ᒨᓯᓯ ᓯᑕᒪᖏᑦ 28
28
ᑐᓂᕐᕈᑎᑦ ᖃᐅᑕᒫᕐᓯᐅᑎᑦ
ᒨᓯᓯ ᐂᑉᐸᖏᑦ 29:38-46
1ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ, 2“ᐱᖁᔭᒥᒃ ᐆᒥᖓ ᐃᓴᕆᐊᓕᒥᐅᑦ ᑐᓂᓯᕕᒋᒃᑭᑦ, ᐅᖃᐅᑎᓗᒋᑦ, ‘ᑐᓂᕐᕈᓯᐊᒃᓴᕋ, ᓂᕿᒃᓴᖅ ᑐᓂᕐᕈᓯᐊᒃᓴᕋ ᐃᑯᐊᓚᑎᑕᒃᓴᖅ ᑎᐱᑦᓯᐊᕆᒃᑑᓗᓂ ᐅᕙᓐᓄᑦ, ᑲᒪᑦᓯᐊᕐᓗᓯ ᐱᕕᒃᓴᖓᓂ ᐅᕙᓐᓄᑦ ᑐᓂᕐᕈᑎᒋᖃᑦᑕᕐᓂᐊᕐᐸᓯ.’
3“ᐅᖃᐅᑎᓗᒋᓪᓗ, ᑐᓂᕐᕈᑏᑦ ᑍᒤᑦᑐᖅ ᑐᓂᔭᕆᐊᖃᕐᐸᓯ ᐃᑯᐊᓚᑎᓪᓗᒍ ᐊᑕᓂᕐᒧᑦ: ᐃᒫᒃ, ᓰᐱᐅᑉ ᓄᕐᕋᖏᒃ ᒪᕐᕉᒃ ᐊᖑᑎᐅᓗᑎᒃ, ᐊᑕᐅᓯᕐᒥᒃ ᐊᕐᕌᒍᖃᕐᓗᑎᒃ ᓴᓗᒤᓐᓂᖃᖏᓪᓗᑎᒃ, ᖃᐅᑕᒫᑦ ᑖᒃᑯᐊᒃ ᑐᓂᕐᕈᑎᒋᖃᑦᑕᕐᓂᐊᕐᐸᓯ, ᑍᒪᓐᖓᓕᒫᖅ ᑐᓂᕐᕈᓯᕐᐸᒃᓗᓯ. 4ᓰᐱᐅᑉ ᓄᕐᕋᖓ ᐊᑕᐅᓯᖅ ᐅᓪᓛᒃᑯᑦ ᑐᓂᕐᕈᑎᒋᖃᑦᑕᕐᓂᐊᕐᐸᓯ, ᓰᐱᐅᓪᓗ ᓄᕐᕋᖓᑕ ᐂᑉᐸᖓ ᐅᓐᓄᒃᑯᑦ ᑐᓂᕐᕈᑎᒋᖃᑦᑕᕐᓂᐊᕐᐸᓯ, 5ᓂᐊᖂᔭᒃᓴᒥᒡᓗ ᓯᖃᓪᓕᑦᓯᐊᕐᓯᒪᔪᒥᒃ ᐆᒃᑑᑦ 1/10 ᐃᕝᕙᒥᒃ ᓂᐊᖂᔭᒃᓴᖅ ᑐᓂᕐᕈᑎᒃᓴᖅ, ᐃᓚᖃᕐᓗᓂ ᐅᕐᓱᒥᒃ ᐆᒃᑑᑦ 1/4 ᕼᐃᓐᒥᒃ. 6ᑕᒪᓐᓇ ᑐᓂᕐᕈᓯᕐᓂᖅ ᑍᒪᓐᖓᑦ ᐊᑐᕐᑕᐅᓂᐊᕐᐳᖅ ᐱᒋᐊᕐᑎᑕᐅᓚᐅᕐᑐᖅ ᖃᖅᑲᒥ ᓮᓁᒥ ᑎᐱᑦᓯᐊᕆᒃᑑᓗᓂ ᑐᓂᕐᕈᑕᐅᔪᖅ ᐃᑯᐊᓚᑎᓪᓗᒍ ᐊᑕᓂᕐᒧᑦ. 7ᑐᓂᕐᕈᑎᓗ ᐃᒥᒐᒃᓴᖅ ᐆᒃᑑᑦ 1/4 ᕼᐃᓐᒥᒃ ᐊᖏᓂᖃᕐᓗᓂ ᐊᑐᓂᑦ ᓰᐱᒧᑦ ᑐᓂᕐᕈᑕᐅᔪᒧᑦ; ᑐᓂᕐᕈᓯᕐᕕᖕᒥ ᐃᑦᔪᕐᓁᑦᑐᒥ ᑯᕕᔭᐅᔪᒃᓴᐅᕗᖅ ᐊᑕᓂᕐᒧᑦ ᑐᓂᕐᕈᑎᒃᓴᐅᖁᓪᓗᒍ. 8ᓰᐱᐅᑉ ᓄᕐᕋᖓᑕ ᐱᖃᑖ ᐅᓐᓄᒃᐸᑦ ᑐᓂᕐᕈᑎᒋᔭᕆᐊᖃᕐᐸᓯ; ᐅᓪᓛᒃᑯᑦ ᑐᓂᕐᕈᑎᒋᔭᑦᓯᑐᑦ ᓂᐊᖂᔭᒃᓴᖅ ᐃᒥᒃᓴᕐᓗ ᐊᑦᔨᒋᓗᒍ, ᑎᐱᑦᓯᐊᕆᒃᑑᓗᓂ ᐃᑯᐊᓚᑎᓪᓗᒍ ᑐᓂᕐᕈᑎᒋᔭᕆᐊᖃᕐᐸᓯ ᐊᑕᓂᕐᒧᑦ.”
ᓴᐸᑎ ᑕᒫᑦ ᑐᓂᕐᕈᓯᕐᓂᖅ
9“ᓴᐸᑎᐅᑉ ᐅᓪᓗᖓᓂ ᓰᐱᐅᑉ ᓄᕐᕋᖏᖕᓂᒃ ᒪᕐᕉᖕᓂᒃ ᑐᓂᕐᕈᓯᕆᐊᖃᕐᐳᓯ ᐊᑕᐅᓯᕐᒥᒃ ᐊᕐᕌᒍᖃᕐᑑᖕᓂᒃ, ᓴᓗᒤᑦᑑᖏᓪᓗᑎᒃ, ᓂᐊᖂᔭᓴᒥᒃ ᓯᖃᓪᓕᓯᒪᑦᓯᐊᕐᑐᒥᒃ ᐆᒃᑑᑦ 2/10 ᕼᐃᓐᒥᒃ ᐊᖏᓂᓕᖕᒥᒃ ᐅᕐᓱᒥᒃ ᐃᓚᓗᒍ, ᕔᓂᒥᒡᓗ: 10ᑍᒫᒃ ᐃᑯᐊᓚᑎᑕᒃᓴᖅ ᓴᐸᑎ ᑕᒫᑦ, ᖃᐅᑕᒫᑦ ᑐᓂᕐᕈᑎᑦ ᐃᓚᒋᒃᑲᓐᓂᕆᐊᖃᕐᑕᖓ.”
ᑕᖅᑭᐅᑉ ᐅᓪᓗᖓᑕ ᓯᕗᓪᓕᕐᐹᖓᓂᒃ ᑐᓂᕐᕈᑎ
11“ᑕᖅᑭᐅᑉ ᐱᒋᐊᕐᓂᖓᓂ ᐃᑯᐊᓚᑎᑕᒃᓴᒥᒃ ᐊᑕᓂᕐᒧᑦ ᑐᓂᕐᕈᓯᖃᑦᑕᕐᓂᐊᕐᐳᓯ: ᐊᖑᓴᓪᓘᖕᓂᒃ ᐃᒻᒧᒃᓯᐅᒑᖕᓂᒃ ᒪᕐᕉᖕᓂᒃ, ᓰᐱᒥᒃ ᐊᖑᓴᓪᓗᕐᒥᒃ ᐊᑕᐅᓯᕐᒥᒃ, 7ᓂᒡᓗ ᓰᐱᓂᒃ ᓄᕐᕋᕐᓂᒃ ᐊᕐᕌᒍᖃᕐᑐᓂᒃ ᐊᑕᐅᓯᕐᒥᒃ, ᓴᓗᒤᓐᓂᖃᖏᓪᓗᑎᒃ; 12ᐃᓚᖃᕐᓗᑎᒃ ᓂᐊᖂᔭᒃᓴᒥᒃ ᓯᖃᓪᓕᑦᓯᐊᕐᓯᒪᔪᒥᒃ ᐆᒃᑑᑦ 3/10ᐃᕝᕙᒥᒃ, ᐅᕐᓱᒥᒃ ᐃᓚᖃᕐᓗᒍ ᐃᒻᒧᒃᓯᐅᒐᕐᒥᒃ ᑐᓂᕐᕈᓯᓕᕈᑦᓯ; ᓰᐱᒥᒃ ᐊᖑᓴᓪᓗᕐᒥᒃ ᑐᓂᕐᕈᓯᓕᕈᑦᓯ, 2/10ᐄᕝᕙᒥᒃ ᐊᖏᑎᒋᔪᒥᒃ ᓂᐊᖂᔭᒃᓴᒥᒃ ᐅᕐᓱᒥᒡᓗ ᐃᓚᖃᕐᓗᒍ; 13ᓰᐱᐅᑉ ᓄᕐᕋᖏᑦ ᐊᑐᓂᑦ ᐃᓚᖃᕆᐊᖃᕐᐳᑦ, ᓂᐊᖂᔭᒃᓴᒥᒃ ᓯᖃᓪᓕᑦᓯᐊᕐᓯᒪᔪᒥᒃ, ᐅᕐᓱᒥᒃ ᐃᓚᓯᒪᓗᒍ, ᐆᒃᑑᑦ 1/10ᐄᕝᕙᒥᒃ ᑎᐱᑦᓯᐊᕆᒃᑐᒥᒃ ᐃᑯᐊᓚᑎᑕᒃᓴᒥᒃ ᑐᓂᕐᕈᑎᒃᓴᒥᒃ ᐊᑕᓂᕐᒧᑦ ᑐᓂᕐᕈᑎᒥᒃ. 14ᕔᓂ ᑖᒃᑯᓄᖓ ᑐᓂᕐᕈᑎᓄᑦ ᐃᓚᓕᐅᑎᔭᕆᐊᓕᒃ ᐊᖏᑎᒋᔭᕆᐊᖃᕐᐳᖅ ᐆᒃᑑᑦ 1/2ᕼᐃᓐᒥᒃ ᐃᒻᒧᒃᓯᐅᒐᕐᒧᑦ ᐊᑕᐅᓯᕐᒧᑦ, 1/3ᕼᐃᓐ ᓰᐱᒧᑦ ᐊᖑᓴᓪᓗᕐᒧᑦ, 1/4ᕼᐃᓐ ᓰᐱᐅᑉ ᓄᕐᕋᖓᓄᑦ; ᑍᒫᒃ ᑕᖅᑭᑕᒫᕐᓯᐅᑎᒥᒃ ᑐᓂᕐᕈᓯᖃᕐᑕᕐᓂᐊᕐᐳᓯ ᐊᕐᕌᒍᓕᒫᖅ ᓈᓗᒍ. 15ᐊᒻᒪ ᓱᓕ ᒎᑦᓯᐅᑉ ᓄᕐᕋᖓᓂᒃ ᐊᑕᐅᓯᕐᒥᒃ ᐊᔪᕐᓂᖅ ᐱᓪᓗᒍ ᐊᑕᓂᕐᒧᑦ ᑐᓂᕐᕈᓯᕆᐊᖃᕐᐳᓯ ᑐᓂᕐᕈᑕᐅᔭᕆᐊᓖᑦ ᐃᑯᐊᓚᑎᑕᒃᓮᑦ ᕔᓃᓪᓗ ᑐᓂᕐᕈᑎᒃᓮᑦ ᐊᓯᐊᑦᑎᒍᑦ.”
ᑐᓂᕐᕈᑎᑦ ᓇᓪᓕᐅᓐᓂᕐᓯᐅᕐᕕᖕᒥ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᐊᖂᔭᕐᑐᕐᕕᖕᒥᒃ
ᒨᓯᓯ ᐱᖓᔪᖏᑦ 23:5-14
16 #
ᒨᓯᓯ ᐂᑉᐸᖏᑦ 12:1-13; ᒨᓯᓯ ᑕᓪᓕᒪᖏᑦ 16:1,2. “ᐅᓪᓗᐃᑦ 14ᖓᓂ ᑕᖅᑮᑦ ᓯᕗᓪᓕᕐᐹᖓᓂ ᐊᑕᓂᐅᑉ ᐊᐅᓪᓚᕐᕕᒃᓯᐅᕐᕕᖓ ᓇᓪᓕᐅᑎᕗᖅ. 17#ᒨᓯᓯ ᐂᑉᐸᖏᑦ 12:14-20; 23:15; 34:18; ᒨᓯᓯ ᑕᓪᓕᒪᖏᑦ 16:3-8.ᐅᓪᓗᐃᑦ 14ᖓᓂ ᑕᖅᑭᒥ ᑕᕝᕙᓂ ᓇᓪᓕᐅᓐᓂᕐᓯᐅᕆᐊᖃᕐᐳᓯ; ᓂᐊᖂᔭᕐᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐅᓪᓗᓂᒃ 7ᓂᒃ ᓂᕆᖃᑦᑕᕆᐊᖃᕐᐳᓯ. 18ᐅᓪᓗᐃᑦ ᓯᕗᓪᓕᕐᐹᖓᓂ ᑐᒃᓯᐊᖃᑎᒌᒋᐊᖃᕐᐳᓯ ᐃᑦᔪᕐᓁᑦᑐᒥᒃ ᑍᓗᒍ. ᑕᕝᕙᓂ ᓴᓇᕙᒃᑕᑦᓯᓂᒃ ᐱᓇᓱᐊᕐᓂᐊᖏᓚᓯ. 19ᑐᓂᕐᕈᓯᕆᐊᖃᕐᐳᓯ ᐃᑯᐊᓚᑎᓪᓗᒍ ᐊᑕᓂᕐᒧᑦ ᑐᓂᕐᕈᑎᒋᓗᒍ: ᐃᒻᒧᒃᓯᐅᒑᖕᓂᒃ ᒪᕐᕉᖕᓂᒃ ᐊᖑᓴᓪᓘᖏᓂᒃ, ᓰᐱᒥᒃ ᐊᖑᓴᓪᓗᕐᒥᒃ ᐊᑕᐅᓯᕐᒥᒃ, 7ᓂᒃ ᓰᐱᐅᑉ ᓄᕐᕋᖏᓐᓂᒃ ᐊᑕᐅᓯᕐᒥᒃ ᐊᕐᕌᒍᖃᕐᑐᓂᒃ. ᑖᒃᑯᐊ ᓴᓗᒤᑦᑑᔭᕆᐊᖃᓐᖏᓚᑦ. 20ᑖᒃᑯᓄᖓ ᐃᓚᒋᔭᐅᔭᕆᐊᓖᑦ, ᓂᐊᖂᔭᒃᓴᖅ ᓯᖃᓪᓕᑦᓯᐊᕐᓯᒪᔪᖅ ᐅᕐᓱᒥᒃ ᐃᓚᖃᕐᓗᒍ: ᐆᒃᑑᑦ 3/10ᐃᕝᕙ ᐃᒻᒧᒃᓯᐅᒐᒧᑦ, 2/10ᐃᕝᕙ ᓰᐱᐅᑉ ᐊᖑᓴᓪᓗᖓᓄᑦ; 211/10ᐃᕝᕙ ᓰᐱᐅᑉ ᓄᕐᕋᖏᓐᓄᑦ 7ᓄᑦ ᐊᑐᓂᑦ. 22ᐃᓚᖃᕐᓗᑎᒃ ᒎᑦᓯᒥᒃ ᐊᑕᐅᓯᕐᒥᒃ ᐊᔪᕐᓂᖅ ᐱᓪᓗᒍ, ᐃᓱᒪᒋᔪᓐᓁᕐᕕᐅᖁᓪᓗᓯ. 23ᑖᒃᑯᐊ ᑐᓂᕐᕈᑎᒋᔭᕆᐊᖃᕐᐸᓯ ᐅᓪᓛᑕᒫᑦ ᑐᓂᕐᕈᑎᒋᔭᕆᐊᖃᕐᑕᑦᓯ ᐊᓯᐊᒍᑦ, ᑍᓐᓇ ᐊᓯᑦᔨᕆᐊᖃᖏᒻᒪᑦ. 24ᑍᒫᒃ ᓂᖅᑭᒃᓴᓂᒃ ᑐᓂᕐᕈᓯᖃᑦᑕᕆᐊᖃᕐᓂᐊᕐᐳᓯ ᐃᑯᐊᓚᑎᑕᒃᓴᓂᒃ ᖃᐅᑕᒫᑦ ᐅᓪᓗᓂᒃ 7ᓂᒃ, ᑎᐱᑦᓯᐊᕆᒃᑐᒥᒃ ᐊᑕᓂᕐᒧᑦ; ᑕᒪᒃᑯᐊ ᑐᓂᕐᕈᑕᐅᔭᕆᐊᓖᑦ ᕔᓃᓪᓗ ᐊᓯᖏᑎᒍᑦ ᑐᓂᕐᕈᑕᐅᖃᕐᑕᕆᐊᖃᕐᐳᑦ. 25ᐅᓪᓗᐃᑦ 7ᖓᓂ ᑐᒃᓯᐊᕆᐊᕐᓯᒪᔭᕆᐊᖃᕐᐳᓯ ᐃᑦᔪᕐᓁᑦᑐᒥᒃ ᑍᓗᒍ. ᑕᕝᕙᓂ ᓴᓇᕙᒃᑕᑦᓯᓐᓂᒃ ᐱᓇᓱᐊᕆᐊᖃᓐᖏᓚᓯ.”
ᑐᓂᕐᕈᑎᑦ ᐱᕈᕐᓯᐊᓂᒃ ᑲᑎᕐᓱᐃᕕᐅᑉ ᓇᓪᓕᐅᓐᓂᕐᓯᐅᕐᕕᖓᓂ
ᒨᓯᓯ ᐱᖓᔪᖏᑦ 23:15-22
26 #
ᒨᓯᓯ ᐂᑉᐸᖏᑦ 23:16; 34:22; ᒨᓯᓯ ᑕᓪᓕᒪᖏᑦ 16:9-12. “ᐊᒻᒪ ᐱᕈᕐᑐᑦ ᓯᕗᓪᓕᕐᐹᑦ ᑲᑎᑕᐅᓂᖏᓐᓂ, ᐱᕈᕐᑐᓂᒃ ᓄᑖᓂᒃ ᐊᑕᓂᕐᒧᑦ ᑐᓂᕐᕈᓯᓕᕈᑦᓯ ᐱᓇᓱᐊᕈᓯᕐᓂ ᐱᕈᕐᑐᑦ ᐱᓗᒋᑦ ᓇᓪᓕᐅᓐᓂᕐᓯᐅᕐᕕᖕᒥ, ᑲᑎᒪᓗᓯ ᑐᒃᓯᐊᕆᐊᖃᕐᐳᓯ ᐃᑦᔪᕐᓁᑦᑐᒥᒃ ᑍᓗᒍ. ᑕᕝᕙᓂ ᓴᓇᕙᒃᑕᑦᓯᓂᒃ ᐱᓇᓱᐊᕐᑐᒃᓴᐅᓐᖏᓚᓯ. 27ᑐᓂᕐᕈᓯᕆᐊᖃᕐᐳᓯ ᐃᑯᐊᓚᑎᑕᒃᓴᓂᒃ ᑎᐱᑦᓯᐊᕆᒃᑐᓂᒃ ᐊᑕᓂᕐᒧᑦ: ᐃᒻᒧᒃᓯᐅᒑᖕᓂᒃ ᒪᕐᕉᖕᓂᒃ ᐊᖑᓴᓪᓘᖕᓂᒃ, ᓰᐱᒥᒃ ᐊᖑᓴᓪᓗᕐᒥᒃ ᐊᑕᐅᓯᕐᒥᒃ, 7ᓂᒃ ᓰᐱᐅᑉ ᓄᕐᕋᖏᓐᓂᒃ ᐊᑕᐅᓯᕐᒥᒃ ᐊᕐᕌᒍᖃᕐᑐᓂᒃ, 28ᐃᓚᖃᕐᓗᑎᒃ ᓂᐊᖂᔭᒃᓴᓂᒃ ᓯᖃᓕᑦᓯᐊᕐᓯᒪᔪᓂᒃ ᑐᓂᕐᕈᑎᓂᒃ ᐅᕐᓱᒥᒃ ᐃᓚᓯᒪᔪᓂᒃ: ᐆᒃᑑᑦ 3/10ᐃᕝᕙ ᐃᒻᒧᒃᓯᐅᒐᕐᒧᑦ ᐊᑕᐅᓯᕐᒧᑦ ᐊᑐᓂᑦ, ᐆᒃᑑᑦ 2/10ᐃᕝᕙ ᓰᐱᒧᑦ ᐊᖑᓴᓪᓗᕐᒧᑦ ᐊᑐᓂᑦ, 29ᐆᒃᑑᑦ 1/10ᐃᕝᕙ ᓰᐱᐅᑉ ᓄᕐᕋᖏᓐᓄᑦ 7ᓄᑦ ᐊᑐᓂᑦ; 30ᐃᓚᓗᒋᑦ ᒎᑦᓯᐅᑉ ᓄᕐᕋᖓᓂᒃ ᐊᑕᐅᓯᕐᒥᒃ, ᐊᔪᕐᓂᕐᒥᑦ ᐃᓱᒪᒋᔪᓐᓁᕐᕕᐅᑦᔪᑎᒥᒃ. 31ᑐᓂᕐᕈᑎᑦ ᓴᓗᒤᓐᓂᖃᕆᐊᖃᓐᖏᓚᑦ. ᑐᓂᕐᕈᑎᒋᔭᕆᐊᖃᕐᐸᓯ ᐃᓚᖃᕐᓗᒋᑦ ᕔᓂᒥᒃ ᑐᓂᕐᕈᑎᒃᓴᒥᒃ, ᑐᓂᕐᕈᑎᑦ ᐃᑯᐊᓚᑎᑕᒃᓮᑦ ᐊᓯᖏᑎᒍᑦ ᑐᓂᕐᕈᑎᒋᔭᕆᐊᖃᕐᐸᓯ.”
Zvasarudzwa nguva ino
ᒨᓯᓯ ᓯᑕᒪᖏᑦ 28: EAIB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Eastern Arctic Inuktitut Bible © Canadian Bible Society, 2012, 2021-2023.