ᒨᓯᓯ ᓯᑕᒪᖏᑦ 21
21
ᑬᓇᓂᒥᐅᓂᒃ ᓵᓚᖃᕐᓂᖅ ᓄᓇᒥ ᕼᐅᕐᒪᒥ
1 #
ᒨᓯᓯ ᓯᑕᒪᖏᑦ 33:40. ᐊᖓᔪᖅᑳᕐᔪᐊᖅ ᐊᕌᑦ ᑬᓇᓂᐅᑉ ᓯᕿᓂᖓᓂ ᓄᓇᖃᕐᑐᖅ ᓂᒋᑉᒥ, ᑐᓴᕋᒥ ᐃᓴᕆᐊᓕᒥᐅᑦ ᐊᒡᒋᕐᓂᕋᕐᑕᐅᖕᒪᑕ ᐊᖅᑯᑎᒃᑯᑦ ᐊᑕᕆᒻᒧᑦ ᑐᕌᖓᔪᒃᑯᑦ. ᑖᑦᓱᒪ ᐃᓴᕆᐊᓕᒥᐅᑦ ᐅᓇᑕᕆᐊᕐᑐᕐᐰᑦ, ᐃᓚᖏᓪᓗ ᑎᒍᓪᓗᒋᑦ. 2ᐃᓴᕆᐊᓕᒥᐅᓪᓕ ᐊᖏᕐᐳᑦ ᐊᑕᓂᕐᒧᑦ, ᐅᖃᕐᓗᑎᒃ, “ᐅᑯᐊ ᐃᓅᖃᑎᒌᒡᔪᐊᑦ ᐅᕙᑦᑎᓐᓄᑦ ᓵᓚᐅᑎᓐᓂᐊᕈᕕᒋᑦ, ᑕᕝᕙ ᓄᓇᓕᒡᔪᐊᖏᑦ ᓱᓇᐅᔪᓐᓃᕐᑎᓪᓗᒋᑦ ᓯᖁᑦᑎᕈᒪᕙᕗᑦ.” 3ᐊᑕᓂᐅᓪᓗ ᐃᓴᕆᐊᓕᒥᐅᑦ ᓂᓪᓕᐊᓂᖏᑦ ᑐᓴᕐᐰᑦ ᑬᓇᓂᒥᐅᓪᓗ ᓵᓚᒋᔭᐅᑎᑉᐰᑦ, ᑖᒃᑯᓇᖓᓪᓗ ᓄᖑᑕᐅᕗᑦ ᓄᓇᓕᒡᔪᐊᖏᓪᓗ ᓯᖁᑦᑎᕐᑕᐅᓪᓗᑎᒃ. ᑕᒪᓐᓇᓗ ᓄᓇ ᐊᑎᖃᕐᑎᑕᐅᕗᖅ ᕼᐅᕐᒪᒥᒃ.
ᖁᒡᓗᒋᐊᓐᖑᐊᖅ ᑲᓐᓄᔭ ᓴᓇᓯᒪᔪᖅ
4 #
ᒨᓯᓯ ᑕᓪᓕᒪᖏᑦ 2:1. ᐊᐅᓪᓚᕐᐳᓪᓗ ᖃᖅᑲᒥᑦ ᕼᐅᕆᒥᑦ ᐃᒪᕐᒧᑦ ᐊᐅᐸᓗᒃᑕᐅᑉ ᐊᖅᑯᑎᖓ ᐊᑐᕐᓗᒍ, ᓄᓇ ᐄᑐᒥ ᓂᒍᕐᐹᑦ; ᐃᖏᕐᕋᓂᕐᒥᖕᓂᓗ ᑕᒪᐅᓇ ᖁᕕᐊᓱᓚᐅᓐᖏᓚᑦ. 5#1 ᑯᕆᓐᑎ 10:9.ᐃᓄᐃᓪᓗ ᓈᒻᒪᒃᓴᖏᓐᓂᕐᒥᒃ ᓂᓪᓕᐊᕗᑦ ᒎᑎᒧᑦ ᒨᓯᓯᒧᓪᓗ ᐅᖃᕐᓗᑎᒃ: “ᓱᖕᒪᑦ ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᐱᑎᒍᑦ ᑐᖁᖁᓪᓗᑖ ᐃᓄᖃᖏᑦᑐᒥ? ᑕᒫᓂ ᓂᕿᒃᓴᖃᖏᒻᒪᑦ, ᐃᒪᖃᕋᓂᓗ, ᓂᕿᕗᓪᓗ ᐃᕿᐊᓐᖑᕐᐸᕗᑦ ᓂᕿᑐᕾᑦ.” 6ᐊᑕᓂᕐᓕ ᑎᑭᑎᑦᓯᕗᖅ ᐃᓄᖕᓄᑦ ᖁᒡᓗᒋᐊᓂᒃ ᑐᖁᓐᓇᕐᑐᓕᖕᓂᒃ; ᐃᓄᐃᓪᓗ ᑕᒪᒃᑯᓄᖓ ᑮᔭᐅᕗᑦ, ᐅᓄᕐᑐᓪᓗ ᐃᓴᕆᐊᓕᒥᐅᑦ ᑐᖁᓪᓗᑎᒃ. 7ᑍᒤᒻᒪᑦ ᐃᓄᐃᑦ ᕾᕗᑦ ᒨᓯᓯᒧᑦ ᐅᖃᕐᓗᑎᒃ, “ᐊᔪᕐᑐᓕᓚᐅᕐᐳᒍᑦ, ᓈᒻᒪᒃᓴᖏᓐᓂᕐᒥᒃ ᓂᓪᓕᐊᓚᐅᕋᑦᑕ ᐊᑭᕋᕐᑐᕐᓗᑕ ᐊᑕᓂᕐᒥᒃ ᐃᓕᖕᓂᒡᓗ; ᑐᒃᓯᐊᓚᐅᕆᑦ ᐊᑕᓂᕐᒧᑦ ᖁᒡᓗᒋᐊᑦ ᐊᐅᓪᓚᖁᓪᓗᒋᑦ ᐅᕙᑦᑎᓐᓂᑦ.” ᑍᒫᒃ ᒨᓯᓯ ᑐᒃᓯᐊᓚᐅᕐᐳᖅ ᐃᓄᐃᑦ ᐱᓪᓗᒋᑦ. 8ᑕᕝᕙ ᐊᑕᓂᐅᑉ ᒨᓯᓯ ᐅᖃᐅᑎᕚ, “ᖁᒡᓗᒋᐊᓐᖑᐊᒥᒃ ᓴᓇᓚᐅᕆᑦ, ᓇᐸᔪᒧᓪᓗ ᐃᓕᓗᒍ; ᑍᒃᑯᐊ ᖁᒡᓗᒋᐊᓄᑦ ᑮᔭᐅᔪᑦ, ᑖᑦᓱᒥᖓ ᑕᑯᒍᑎᒃ, ᐃᓅᓂᐊᕐᐳᑦ.” 9#ᐊᑕᓃᑦ ᐂᑉᐸᖏᑦ 18:4; ᔪᐊᓇᓯ 3:14.ᑍᒤᒻᒪᑦ ᒨᓯᓯ ᖁᒡᓗᒋᐊᖑᐊᒥᒃ ᑲᓐᓄᔭᒥᒃ ᓴᓇᕗᖅ, ᓇᐸᔪᒧᓪᓗ ᐃᓕᓪᓗᒍ; ᐃᒫᒡᓗ ᐱᓚᐅᕐᐳᑦ, ᖁᒡᓗᒋᐊᒧᑦ ᑮᔭᐅᔪᕕᓃᑦ, ᖁᒡᓗᒋᐊᓐᖑᐊᒥᒃ ᖃᑯᕐᓕᖕᒥᒃ ᑕᑯᔪᑦ, ᐃᓅᓕᓚᐅᕐᐳᑦ.
ᖃᖅᑲᒥᑦ ᕼᐆᕆᒥᑦ ᒧᐊᐱᒥᐅᑦ ᓄᓇᖓᓄᑦ ᑎᑭᓐᓂᖓᑦ
10ᐃᓴᕆᐊᓕᒥᐅᓪᓕ ᐊᐅᓪᓚᕐᒥᒐᒥᒃ ᐅᐴᑎᒧᑦ ᑕᖕᒫᕐᐳᑦ. 11ᑕᕝᕙᖓᓪᓗ ᐅᐴᑎᒥᑦ ᐃᔨ-ᐊᐸᕆᒻᒧᑦ ᑕᖕᒫᕆᕗᑦ, ᐃᓄᖃᖏᑦᑐᒦᑦᑐᒧᑦ ᒧᐊᐱᐅᑉ ᓯᕿᓐᓂᓕᕐᕕᐊᑕ ᓇᓛᓄᑦ. 12ᑕᕝᕙᖓᓪᓗ ᐊᐅᓪᓚᕋᒥᒃ ᓇᕐᓴᒧᑦ ᔨᕆᑦᒧᑦ ᑕᖕᒫᕐᐳᑦ. 13ᑕᕝᕙᖓᓪᓗ ᐊᐅᓪᓚᕋᒥᒃ, ᐋᕐᓄᓂᐅᑉ ᐃᑎᕕᐊᓄᑦ ᑕᖕᒫᕐᐳᑦ, ᑖᓐᓇ ᐃᓄᖃᖏᑦᑐᒦᑦᑐᖅ ᐊᒧᕅᑎᑦ ᓄᓇᖓᓄᑦ ᑎᑭᐅᒪᔪᖅ; ᓄᓇ ᐋᕐᓄᓂ ᒧᐊᐱᐅᑉ ᑭᒡᓕᖓᓃᒻᒪᑦ, ᒧᐊᐱᐅᑉ ᐊᒧᕅᑎᓪᓗ ᐊᑯᓐᓂᖓᓂ. 14ᑍᒤᒻᒪᑦ ᐅᓇᑕᕐᓂᑦ ᐅᓂᒃᑲᐅᓯᐅᓂᖏᓐᓂ ᐊᑕᓂᖅ ᐅᖃᕐᓯᒪᕗᖅ: “ᐅᐊᕼᐃᑉ ᓲᐸᒦᑦᑐᖅ, ᑰᑦ ᐋᕐᓄᓂᒦᑦᑐᑦ, 15ᓇᕐᓮᓪᓗ ᓯᕕᖓᓂᖏᑦ ᑎᑭᓯᒪᕗᑦ ᓄᓇᒧᑦ ᐋᕆᒧᑦ, ᓄᓇᐅᓪᓗ ᒧᐊᐱᐅᑉ ᑭᒡᓕᖓᓃᓪᓗᑎᒃ.”
16ᑕᕝᕙᖓᓪᓗ ᐊᐅᓪᓚᕐᐳᑦ ᐱᐊᕐᒧᑦ, ᐃᒥᕐᑕᕐᕕᖃᕐᑐᒧᑦ ᐊᑕᓂᐅᑉ ᐅᖃᐅᓯᕆᓚᐅᕐᑕᖓᓂᒃ ᒨᓯᓯᒧᑦ, ᐅᖃᕐᓗᓂ, “ᐃᓄᐃᑦ ᑲᑎᖁᒃᑭᑦ ᐃᒥᕐᒥᒃ ᑐᓂᓯᕕᒋᔪᒪᒐᒃᑭᑦ.” 17ᐃᓴᕆᐊᓕᒥᐅᑦ ᐃᒫᒃ ᐃᓐᖏᓚᐅᕐᐳᑦ:
“ᐃᒥᕐᑕᕐᕖᒃ, ᑰᓚᐅᕆᑦ!—
ᐃᓘᓐᓇᓯ ᐃᓐᖏᕆᑦᓯ—
18ᐃᒥᕐᑕᕐᕖᒃ ᐊᖓᔪᖅᑳᑦ ᐃᑎᕐᓴᓕᐅᓚᕐᑕᖓᑦ,
ᐃᓅᖃᑎᒌᒡᔪᐊᑦ ᐊᖓᔪᖅᑳᖏᑕ ᐊᒡᒐᓚᐅᕐᑕᖓᑦ
ᐱᖁᔭᓂᒃ ᑐᓂᓯᔪᑦ, ᐊᔭᐅᐱᐊᒥᖕᓄᑦ.”
ᑕᒫᖓᓪᓗ ᐃᓄᖃᖏᑦᑐᒥᑦ ᐊᐅᓪᓚᕋᒥᒃ ᓄᓇᒧᑦ ᒪᑖᓇᒧᑦ ᐱᕗᑦ. 19ᒪᑖᓇᒥᓪᓗ ᐱᒐᒥᒃ ᓇᕼᐊᓔᓕᒧᑦ ᐱᕗᑦ, ᓇᕼᐊᓔᓕᒥᓪᓗ ᐸᒨᑎᒧᑦ ᐱᕗᑦ, 20ᐸᒨᑎᒥᓪᓗ, ᓇᕐᓴᒧᑦ ᒧᐊᐱᐅᑉ ᐃᓚᖓᓃᑦᑐᒧᑦ, ᐱᔅᒐᐅᑉ ᖄᖓᓄᑦ ᓱᓇᖃᔪᐃᑦᑐᒧᑦ ᐅᔭᐅᒪᔪᒧᑦ ᐱᕗᑦ.
ᓵᓚᖃᕐᓂᖅ ᐊᖓᔪᖅᑳᕐᔪᐊᒥᒃ ᓮᕼᐆᓂᒥᒃ ᐊᖓᔪᖅᑳᕐᔪᐊᒥᒡᓗ ᐆᒡᒥᒃ
ᒨᓯᓯ ᑕᓪᓕᒪᖏᑦ 2:26—3:11
21ᐃᓴᕆᐊᓕᒥᐅᓪᓗ ᐅᖃᕆᐊᕐᑐᕐᑐᓂᒃ ᑎᓕᓯᓕᕐᐳᑦ ᐊᖓᔪᖅᑳᕐᔪᐊᒧᑦ ᓮᕼᐆᓂᒧᑦ ᐊᒧᕅᑎᑦ ᐊᖓᔪᖅᑳᕐᔪᐊᖓᓐᓄᑦ, ᐅᖃᕐᓗᑎᒃ, 22“ᓄᓇᑦᓯᒍᑦ ᐊᖅᑯᓵᕈᓐᓇᕐᑎᑕᐅᔪᒪᒐᑦᑕ. ᐱᕈᕐᓰᕕᖁᑎᑦᓯᓐᓄᑦ ᓴᖑᓂᐊᓐᖏᓚᒍᑦ ᕔᓂᓕᒃᓴᖁᑎᑦᓯᓐᓄᓪᓘᓐᓃᑦ; ᐃᒥᕐᑕᕐᕕᑦᓯᓐᓂᓪᓘᓐᓃᑦ ᐃᒥᕐᓂᐊᓐᖏᓚᒍᑦ. ᐊᖓᔪᖅᑳᕐᔪᐊᑦᓯᓕ ᐊᖅᑯᑎᒋᔭᐅᖁᔭᖓᒎᕈᒪᕗᒍᑦ ᓄᓇᑦᓯᓐᓂᑦ ᖃᖏᐅᑎᖅᑳᕋᑕ.” 23ᓮᕼᐆᓂᐅᓪᓕ ᐃᓴᕆᐊᓕᒥᐅᑦ ᓄᓇᖁᑎᒥᒍᑦ ᐊᖅᑯᓵᖁᖏᓔᑦ. ᓮᕼᐆᓂᐅᓪᓗ ᐃᓄᖁᑎᓕᒫᓂ ᑲᑎᕐᓱᕐᐰᑦ ᐃᓴᕆᐊᓕᒥᐅᓪᓗ ᐃᓄᖃᖏᑦᑐᒧᑦ ᐅᐸᒃᑐᕐᓗᒋᑦ, ᑎᑭᓪᓗᓂᓗ ᓄᓇᒧᑦ ᔧᕼᐋᓯᒧᑦ ᐃᓴᕆᐊᓕᒥᐅᓪᓗ ᐅᓇᑕᖃᑎᒋᕔᑦ. 24ᐃᓴᕆᐊᓕᒥᐅᓪᓕ ᓴᕕᒡᔪᐊᒧᑦ ᓵᓚᒋᕚᑦ, ᓄᓇᖁᑎᖓᓂᒡᓗ ᐊᕐᓵᕐᓗᒋᑦ ᐋᕐᓄᓂᒥᑦ ᔭᐴᒃ ᑎᑭᓪᓗᒍ, ᐊᒧᓁᑎᒥ ᓄᓇᖃᕐᑐᑦ ᑭᒡᓕᖓᓄᑦ ᑕᒪᓐᓇ ᓴᐴᓗᑕᖃᓚᐅᕐᒪᑦ. 25ᐃᓴᕆᐊᓕᒥᐅᑦ ᐃᒡᓗᒐᓴᒡᔪᐊᑦ ᑖᒫᓂᑦᑐᑦ ᑎᒍᕔᑦ, ᐃᓴᕆᐊᓕᒥᐅᓪᓗ ᓄᓇᖃᓕᓚᐅᕐᐳᑦ ᐊᒧᕅᑎᑦ ᓄᓇᖏᓐᓂ, ᕼᐃᓴᐸᓂᒥᓗ ᖃᓂᒋᔮᓂᓗ ᓄᓇᓕᖕᓂ ᒥᑭᔪᓂ. 26ᐃᒡᓗᒐᓴᒡᔪᐊᑦ ᕼᐃᓴᐸᓂᒥᒃ ᐊᑎᓖᑦ ᐊᖓᔪᖅᑳᔪᐊᑉ ᓮᕼᐆᓂᐅᑉ ᐊᒧᕅᑎᑦ ᐊᖓᔪᖅᑳᕐᔪᐊᖓᑦᑕ ᓄᓇᒋᓚᐅᕐᒪᒍ, ᒧᐊᐱᒥᐅᑦ ᐊᖓᔪᖅᑳᕐᔪᐊᖓᓂᒃ ᓵᓚᖃᓚᐅᕐᓂᒥ ᑭᖑᓂᖓᓂ, ᓄᓇᖁᑎᖓᓂᒡᓗ ᐊᕐᓵᓚᐅᕋᒥᑦᔪᒃ ᑕᒤᓐᓂᒃ ᐋᕐᓄᓂ ᑎᑭᓪᓗᒍ. 27ᑍᒤᒻᒪᑦ ᐱᓯᓕᐅᕈᑎᑎᒍᑦ ᐅᖃᕐᐸᒃᑐᑦ ᐃᒤᓕᕙᒃᐳᑦ,
“ᕼᐃᓴᐸᓂᒧᑦ ᑎᑭᓕᕆᑦᓯ, ᓮᕼᐆᓂᐅᑉ ᐃᒡᓗᒐᓴᒡᔪᐊᖏᑦ ᓴᓇᓕᕐᓯᐅᒃ,
ᐃᒡᓗᒐᓴᒡᔪᐊᑦ ᐅᑯᐊ ᐋᖅᑭᒃᓱᕐᑕᐅᒃᑲᓐᓂᓕᕐᓕᑦ.
28 #
ᔨᕆᒤᐊ 48:45,46. ᐃᑯᒪᕐᔪᐊᖅ ᐊᓂᓯᒪᖕᒪᑦ ᕼᐃᓴᐸᓂᒥᑦ,
ᐃᑯᒪᕐᔪᐊᖅ ᐱᔪᖅ ᓮᕼᐆᓂᐅᑉ ᐃᒡᓗᒐᓴᒡᔪᐊᖏᓐᓂᑦ;
ᓄᖑᓪᓗᒍᓗ ᐋᕆ ᒧᐊᐱᒥᐅᑕᖅ,
ᑖᒃᑯᐊ ᐊᖓᔪᖅᑲᐅᑎᐅᔪᑦ ᐋᕐᓄᓂᐅᑉ ᖃᖅᑲᖏᓐᓂ.
29ᑲᑉᐱᐊᓐᓇᒦᒃ, ᒧᐊᐱᒥᐅᑕᐅᔪᓯ!
ᑭᒨᓯᒥᐅᑕᐅᔪᓯᓗ ᐊᓯᕈᕐᑕᐅᓯᒪᕗᓯ!
ᐃᓕᑦᓯᓗ ᑖᒃᑯᓄᖓ ᕿᑐᕐᖓᕆᔭᐅᔪᓯ ᕿᒫᓯᒪᔭᕆᐊᖃᓕᕐᐳᓯ,
ᐃᓕᑦᓯᓗ ᑖᒃᑯᓄᖓ ᐸᓂᒋᔭᐅᔪᓯ ᑎᒍᔭᐅᓗᓯ ᐊᐅᓪᓚᕈᔭᐅᓂᐊᕐᐳᓯ,
ᐊᒧᕅᑎᑦ ᐊᖓᔪᖅᑳᕐᔪᐊᖓᓄᑦ ᓮᕼᐆᓂᒥᒃ ᐊᑎᓕᖕᒧᑦ.
30ᐅᕙᒍᓪᓕ ᓵᓚᒋᓚᐅᕐᐸᕗᑦ;
ᕼᐃᓴᐸᓂ ᐊᓯᕈᕐᓯᒪᕗᖅ ᑎᐴᓂ ᑎᑭᓪᓗᒍ.
ᓄᓇ ᓯᖁᑦᑎᓚᐅᕐᐸᕗᑦ ᓅᐸ ᑎᑭᓪᓗᒍ,
ᑕᒪᓐᓇ ᑎᑭᐅᒪᔪᖅ ᒥᑎᐸ ᑎᑭᓪᓗᒍ.”
31ᑍᒤᒻᒪᑦ ᐃᓴᕆᐊᓕᒥᐅᑦ ᐊᒧᕅᑎᑦ ᓄᓇᖏᓐᓂ ᓄᓇᖃᓕᓚᐅᕐᐳᑦ. 32ᒨᓯᓯᓕ ᑎᓕᓯᓚᐅᕐᐳᖅ ᓄᓇ ᔧᔨᕆ ᕿᒥᕐᕈᔭᐅᔭᕐᑐᖁᓪᓗᒍ; ᑕᑯᔭᕐᑐᕐᑕᒥᖕᓂᒡᓕ ᐊᒧᕅᑎᑦ ᑕᒫᓃᑦᑐᑦ ᐊᐅᓪᓚᕐᑎᑉᐰᑦ.
33ᓴᖑᒐᒥᒡᓕ ᐃᖏᕐᕋᕗᑦ ᐹᓴᓂ ᐊᖅᑯᑎᒋᓪᓗᒍ. ᐊᖓᔪᖅᑳᕐᔪᐊᓪᓕ ᐋᒡᒥᒃ ᐊᑎᓕᐅᑉ ᐹᓵᓂᒥᐅᑦ ᐊᖓᔪᖅᑳᕐᔪᐊᖓᑕ ᐅᓇᑕᕆᐊᕐᑐᕐᕕᒋᕔᑦ, ᐃᓄᖁᑎᓕᒫᑎᒃ ᐃᓚᒋᓪᓗᒋᑦ, ᐃᑐᕆᐂᒥ ᐅᓇᑕᕐᐳᑦ. 34ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᑖᓐᓇ ᐃᕐᓯᒋᓂᐊᕐᓇᒍ ᐃᓕᑦᓯᓐᓄᑦ ᑐᓂᓯᒪᒐᒃᑯ ᓵᓚᐅᖁᓪᓗᒍ, ᐃᓄᖁᑎᖏᓪᓗ ᓄᓇᖁᑎᖏᓪᓗ; ᑖᒃᑯᐊ ᐱᓂᐊᕐᕕᒋᓂᐊᕋᑦᓯᐅᒃ ᑍᒫᑦᓮᓐᓇᖅ ᓮᕼᐆᓂ ᐊᒧᕅᑎᑦ ᐊᖓᔪᖅᑳᕐᔪᐊᖓᑦ ᐱᓂᐊᕐᕕᒋᓚᐅᕋᑦᓯᐅᒃ, ᕼᐃᓴᐸᓂᒥ ᓄᓇᖃᕐᑐᖅ.” 35ᑍᒤᒻᒪᑦ ᓵᓚᒋᕚᑦ ᐃᕐᓂᖏᓪᓗ ᐃᓄᖁᑎᖏᓪᓗ, ᑖᒃᑯᓇᖓᓪᓘᓐᓃᑦ ᐊᒥᐊᒃᑯᖃᓚᐅᓐᖏᓚᖅ; ᓄᓇᖁᑎᖓᓂᒡᓗ ᐊᕐᓵᕐᓗᒍ.
Zvasarudzwa nguva ino
ᒨᓯᓯ ᓯᑕᒪᖏᑦ 21: EAIB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Eastern Arctic Inuktitut Bible © Canadian Bible Society, 2012, 2021-2023.