ᒨᓯᓯ ᓯᑕᒪᖏᑦ 19
19
ᓴᓗᒻᒪᕐᑕᐅᓂᕐᒧᑦ ᐱᖁᔧᑦ
1ᐊᑕᓂᕐᓕ ᒨᓯᓯᒧᑦ ᐂᕉᓂᒧᓪᓗ ᐅᖃᕐᐳᖅ, ᐅᖃᕐᓗᓂ, 2“ᐅᓇ ᐱᖁᔭᖅ ᐊᑕᓂᐅᑉ ᒪᓕᒃᑕᐅᖁᔭᖓ ᐅᖃᕐᒪᑦ: ‘ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐃᓕᖕᓄᑦ ᕾᑦᓯᖁᓪᓗᒋᑦ ᐃᒻᒧᒃᓯᐅᒐᕐᒥᒃ ᐊᕐᓇᓪᓗᕐᒥᒃ ᐃᓐᓇᐅᖏᑦᑐᒥᒃ ᓴᓗᒤᓐᓂᖃᖏᑦᑐᒥᒃ, ᖃᓄᐃᑦᔪᑎᖃᖏᑦᑐᒥᒃ ᓱᓇᒥᒡᓗ ᐱᓇᓱᐊᕐᑎᑕᐅᓚᐅᕐᓯᒪᖏᑦᑐᒥᒃ. 3ᑐᓂᕐᕈᓯᕐᑎᑦᓯᔨᒧᑦ ᐃᓕᓯᕆᒧᑦ ᑐᓂᓗᒍ, ᑕᖕᒫᕐᓯᒪᕕᐅᑉ ᓯᓚᑖᓄᑦ ᐂᑦᔪᑎᓂᐊᕐᒪᒍ, ᑖᕙᓂᓗ ᑐᖁᓪᓗᓂᐅᒃ; 4ᑐᓂᕐᕈᓯᕐᑎᑦᓯᔨᐅᑉ ᐃᓕᓯᕆᐅᑉ ᑐᓂᕐᕈᑎᐅᔫᑉ ᐊᐅᖓᑕ ᐃᓚᖓ ᐊᒡᒐᖕᒥᓄᑦ ᖃᓗᓗᒍ, ᓯᕐᐸᕐᓴᕈᑎᓗᒍᓗ 7ᐃᑐᕐᓗᓂ ᑐᐱᕐᔪᐊᑉ ᑲᑎᒪᕕᐅᑉ ᓵᓪᓗᐊᖓᓃᓪᓗᓂ. 5ᐃᒻᒧᒃᓯᐅᒐᖅ ᐊᕐᓇᓪᓗᒃ ᐃᑭᑕᐅᓂᐊᕐᐳᖅ ᐃᓕᓯᕆᐅᑉ ᓵᖓᓂ: ᐊᒥᖓᓗ, ᓂᕿᖓᓗ, ᐊᐅᖓᓗ, ᐊᒥᐊᒃᑯᓕᒫᖏᓪᓗ ᐃᑯᐊᓪᓚᖕᒥᓗᒋᑦ. 6ᑐᓂᕐᕈᓯᕐᑎᑦᓯᔨ ᑎᒍᓯᔭᕆᐊᖃᕐᐳᖅ ᕿᔪᕐᒥᒃ ᓰᑕᕆᒥᒃ ᐊᑎᖃᕐᑐᒥᒃ ᕼᐊᓯᑉᒥᒡᓗ, ᓰᐱᐅᓪᓗ ᒥᖅᑯᖓᓂᒃ ᐊᐅᑉᐸᕆᒃᑐᒥᒃ, ᐃᒋᓪᓗᒋᓪᓗ ᐃᑯᐊᓚᔫᑉ ᐊᕐᓇᓪᓘᑉ ᐃᒻᒧᒃᓯᐅᒐᐅᑉ ᐊᑯᓐᓂᖓᓄᑦ. 7ᑐᓂᕐᕈᓯᕐᑎᑦᓯᔨᐅᓪᓗ ᐊᓐᓄᕌᓂ ᐅᐊᓴᕆᐊᖃᕐᐰᑦ, ᐅᕕᓂᖕᓂᐊᕐᓗᓂᓗ, ᑭᖑᓂᖓᒍᑦ ᑕᖕᒫᕐᓯᒪᕕᖕᒧᑦ ᐅᑎᕐᓗᓂ; ᑐᓂᕐᕈᓯᕐᑎᑦᓯᔨᓗ ᑖᓐᓇ ᓴᓗᒤᓐᓂᕋᕐᑕᐅᓂᐊᕐᐳᖅ ᐅᓐᓄᒃ ᑎᑭᓪᓗᒍ. 8ᑖᑦᓱᒥᖓ ᐃᑭᑦᓯᔪᖅ ᐊᓐᓄᕌᓂ ᐃᒥᕐᒧᑦ ᐅᐊᓴᕆᐊᖃᕐᐰᑦ, ᐃᒥᕐᒧᓪᓗ ᐅᕕᓂᖕᓂᐊᕐᓗᓂ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ. 9#ᐄᑉᕈᐃᓄᑦ 9:13.ᐊᖑᑎᐅᓪᓕ ᓴᓗᒤᓕᓯᒪᖏᑦᑑᑉ ᐊᕐᓇᓪᓘᑉ ᐃᒻᒧᒃᓯᐅᒐᐅᑉ ᐊᕐᔭᓕᓂᖏᑦ ᓄᐊᒋᐊᖃᕐᐰᑦ, ᐃᓕᓗᒋᓪᓗ ᓴᓗᒪᓂᕋᕐᑕᐅᔪᒧᑦ ᑕᖕᒫᕐᓯᒪᕕᐅᑉ ᓯᓚᑖᓂ, ᑍᑲᓂ ᐃᓂᖃᕐᑎᑕᐅᔭᕆᐊᖃᕐᐳᖅ ᑲᑎᒪᔪᕐᔪᐊᑦ ᐃᓴᕆᐊᓕᒥᐅᑦ ᐱᑦᔪᑎᒋᓗᒋᑦ ᐃᒥᕐᒧᑦ ᓴᓗᒻᒪᕐᓴᐅᑕᐅᓗᓂ; ᐊᔪᕐᓂᐅᑉ ᓴᓗᒪᑦᓯᐊᓕᕈᑎᒃᓴᖓᓄᑦ. 10ᓇᓪᓕᐊᑦ ᐊᕐᓇᓪᓘᑉ ᐃᒻᒧᒃᓯᐅᒐᐅᑉ ᐊᕐᔭᓕᓂᖏᓐᓂᒃ ᓄᐊᑦᓯᔪᖅ ᐊᓐᓄᕌᓂ ᐅᐊᓴᕆᐊᖃᕐᐰᑦ, ᓴᓗᒤᓐᓂᕋᕐᑕᐅᓗᓂᓗ ᐅᓐᓄᒃ ᑎᑭᓪᓗᒍ. ᑕᒪᓐᓇ ᐃᓴᕆᐊᓕᒥᐅᓄᑦ ᓄᓇᖃᑎᒋᓐᖏᑕᖏᓐᓄᓪᓗ ᑖᒃᑯᓇᓂ ᐃᓂᖃᕐᑐᓄᑦ ᒪᓕᒐᐅᓂᐊᕐᐳᖅ ᐃᓱᖃᖏᑦᑐᒧᑦ.’”
ᑐᖁᖓᔪᒥᒃ ᐊᒃᑐᕐᓯᓂᖅ
11“ᓇᓪᓕᐊᑦ ᐃᓅᑉ ᑎᒥᖓᓂᒃ ᑐᖁᖓᔪᒥᒃ ᐊᒃᑐᕐᓯᔪᖅ ᓴᓗᒤᑦᑑᓂᕋᑕᐅᓂᐊᕐᐳᖅ ᐅᓪᓗᓂᒃ 7ᓂᒃ. 12ᐃᒻᒥᓂᒃ ᐃᒥᕐᒧᑦ ᓴᓗᒻᒪᕐᓴᕆᐊᖃᕐᐳᖅ ᐅᓪᓗᐃᑦ ᐱᖓᔪᐊᓐᓂᒃ ᐅᓪᓗᐃᓪᓗ 7ᖓᓂᒃ; ᑕᕝᕙ ᓴᓗᒻᒪᕐᓂᐊᕐᐳᖅ, ᐅᓪᓘᑉ ᐱᖓᔪᐊᓐᓂ ᐅᓪᓘᓪᓗ 7ᖓᓂ ᓴᓗᒻᒪᕐᓴᖏᑉᐸᑦ, ᓴᓗᒻᒪᕐᓂᐊᓐᖏᓚᖅ. 13ᓇᓪᓕᐊᑦ ᑭᓇᑐᐃᓐᓇᕐᒥᒃ ᑐᖁᔪᒥᒃ ᐊᒃᑐᕐᓯᔪᖅ, ᐃᒻᒥᓂᒡᓗ ᓴᓗᒻᒪᕐᓴᖏᓪᓗᓂ, ᐊᑕᓂᐅᑉ ᑐᐱᕐᔪᐊᖓᓂᒃ ᓴᓗᒤᓕᑎᑦᓯᕗᖅ. ᑖᓐᓇᓗ ᐃᓴᕆᐊᓕᒥᐅᓂᑦ ᐊᕕᑕᐅᔭᕆᐊᖃᕐᐳᖅ. ᓴᓗᒤᑦᑑᓂᐊᕐᒪᑦ, ᐃᒥᖅ ᓴᓗᒻᒪᕐᓮᑦᔪᑎ ᓯᕐᐸᕐᓴᕐᑕᐅᓚᐅᖏᒻᒪᖅ ᑖᑦᓱᒧᖓ; ᓴᓗᒤᓐᓂᖓ ᓱᓕ ᑖᑦᓱᒪᓃᒻᒪᑦ.
14“ᑕᕝᕙ ᑍᒫᒃ ᐱᖁᔭᖅ ᐃᓄᒃ ᑐᐱᕐᒥᓂ ᑐᖁᒃᐸᑦ: ᑐᐱᕐᒧᑦ ᐃᑎᕐᑐᓕᒫᑦ ᑐᐱᕐᒦᑦᑐᓕᒫᓪᓗ ᓴᓗᒤᑦᑑᓂᐊᕐᐳᑦ ᐅᓪᓗᓂᒃ 7ᓂᒃ. 15ᐃᓗᓕᖁᑎᓕᒫᓪᓗ ᒪᑐᐃᖓᔪᑦ, ᐊᑦᓱᖏᕐᓯᒪᓗᑎᒃ ᒪᑐᓯᒪᖏᑦᑐᑦ, ᓴᓗᒤᑦᑑᕗᑦ. 16ᓇᓪᓕᐊᓪᓘᓐᓃᑦ ᓇᑎᕐᓇᒥ ᓴᕕᒡᔪᐊᒧᑦ ᑐᖁᑕᐅᔪᒥᒃ ᐊᒃᑐᕐᓯᔪᖅ ᑐᖁᔪᒥᒡᓘᓐᓂᑦ, ᐃᓅᓪᓘᓐᓃᑦ ᓴᐅᓂᖓᓂᒃ, ᐃᓗᕕᕐᒥᒡᓘᓐᓃᑦ, ᓴᓗᒤᑦᑑᓂᐊᕐᐳᖅ ᐅᓪᓗᓂᒃ 7ᓂᒃ.
17“ᐃᓄᒃ ᓴᓗᒤᓕᓯᒪᔪᖅ ᐱᓪᓗᒍ, ᐃᒻᒧᒃᓯᐅᒐᐅᑉ ᐊᕐᓇᓪᓘᑉ ᐃᒥᕐᒧᑦ ᓴᓗᒻᒪᕐᓴᐅᑎᒃᓴᐅᓗᓂ ᐊᔪᕐᓂᕐᒧᑦ ᐃᑯᐊᓚᑎᑕᐅᓯᒪᔫᑉ, ᐊᕐᔭᓕᓂᖏᑕ ᐃᓚᖏᓐᓂᒃ ᐱᔭᕆᐊᖃᕐᐳᑦ, ᐃᒥᕐᒥᒃ ᑯᕕᔪᒥᒃ ᐊᖅᑯᓵᕐᕕᒋᓗᒋᑦ ᐃᓗᓕᖃᕐᑐᒧᑦ ᑯᕕᑎᓪᓗᒍ. 18ᐃᓄᒃ ᓴᓗᒤᓕᓯᒪᖏᑦᑐᖅ ᕼᐊᓯᑉᒥᒃ ᑎᒍᓯᓗᓂ ᐃᒥᕐᒧᑦ ᑕᕝᕗᖓ ᒥᓱᒡᓗᒍ, ᑐᐱᖅ ᓯᕐᐸᕐᓴᕆᐊᖃᕐᐹ, ᐃᓗᓕᖁᑎᓕᒫᖏᓪᓗ, ᐃᓄᐃᓪᓗ ᑐᐱᕐᒦᑦᑐᕕᓂᓕᒫᑦ, ᐅᕝᕙᓘᓐᓃᑦ ᓇᓪᓕᐊᑦ ᓴᐅᓂᕕᓂᕐᒥᒃ ᐊᒃᑐᕐᓯᓚᐅᕐᑐᒧᑦ, ᑐᖁᑕᕕᓂᕐᒥᒡᓘᓐᓃᑦ, ᑐᖁᖓᔪᒥᒡᓘᓐᓃᑦ, ᐃᓗᕕᕐᒥᒡᓘᓐᓃᑦ ᐊᒃᑐᕐᓯᓚᐅᕐᑐᒧᑦ. 19ᐃᓄᒃ ᓴᓗᒤᓕᓯᒪᖏᑦᑐᖅ ᓴᓗᒤᑦᑐᒥᒃ ᓯᕐᐸᕐᓴᕐᓯᔭᕆᐊᖃᕐᐳᖅ ᐅᓪᓗᐃᑦ ᐱᖓᔪᐊᓐᓂᒃ ᐅᓪᓗᐃᓪᓗ 7ᖓᓂᒃ; ᐅᓪᓗᐃᓪᓕ 7ᖓᓂ ᐃᓄᒃ ᓴᓗᒻᒪᕐᓴᕐᑕᐅᔪᖅ ᓇᖕᒥᓂᖅ ᓴᓗᒻᒪᕐᓴᕆᐊᖃᓕᕐᐳᖅ, ᐊᓐᓄᕌᓂ ᐅᐊᓴᕐᓗᒋᑦ, ᐃᒥᕐᒧᓪᓗ ᐅᕕᓂᖕᓂᐊᕐᓗᓂ; ᐅᓐᓄᒃᐸᑦ ᓴᓗᒻᒪᕐᓂᐊᕐᐳᖅ.
20“ᐃᓄᒡᓕ ᓴᓗᒤᑦᑐᖅ ᐃᒻᒥᓂᒡᓗ ᓴᓗᒻᒪᕐᓴᖏᓪᓗᓂ, ᐃᓅᖃᑎᒌᒡᔪᐊᓂᑦ ᐊᕕᑕᐅᔭᕆᐊᖃᕐᐳᖅ, ᐊᑕᓂᐅᑉ ᐃᑦᔪᕐᓁᑦᑐᕕᖁᑎᖓᓂᒃ ᓴᓗᒤᓕᑎᑦᓯᖕᒪᑦ. ᐃᒥᖅ ᓴᓗᒻᒪᕐᓴᐅᑎᓕᐊᕆᓯᒪᔪᖅ ᓯᕐᐸᕐᓴᕈᑕᐅᓯᒪᖏᒻᒪᑦ ᑖᑦᓱᒧᖓ; ᑍᒫᒃ ᓴᓗᒤᑦᑑᕗᖅ. 21ᑕᒪᓐᓇ ᑍᒪᓐᖓᑦ ᒪᓕᒐᐅᓂᐊᕐᐳᖅ ᑖᒃᑯᓄᖓ. ᓇᓪᓕᐊᓪᓗ ᐃᒥᕐᒥᒃ ᓴᓗᒻᒪᕐᓮᑦᔪᑎᒥᒃ ᓯᕐᐸᕐᓮᔪᖅ ᐊᓐᓄᕌᓂ ᐅᐊᓴᕆᐊᖃᕐᐰᑦ; ᓇᓪᓕᐊᓪᓗ ᐃᒥᕐᒥᒃ ᓴᓗᒻᒪᕐᓮᑦᔪᑎᒥᒃ ᐊᒃᑐᕐᓯᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ. 22ᓇᓪᓕᐊᑦ ᓴᓗᒤᓕᓯᒪᔪᖅ ᓱᓇᑐᐃᓐᓁᑦ ᐊᒃᑐᕐᑕᖏᑦ ᓴᓗᒤᕐᑑᓕᕐᐳᑦ; ᓇᓪᓕᐊᑦᓗ ᐊᒃᑐᕐᑕᕕᓂᖏᓐᓂᒃ ᐊᒃᑐᕐᓯᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.”
Zvasarudzwa nguva ino
ᒨᓯᓯ ᓯᑕᒪᖏᑦ 19: EAIB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Eastern Arctic Inuktitut Bible © Canadian Bible Society, 2012, 2021-2023.