ᒫᑎᐅᓯᐅᑉ ᐊᒡᓚᖏᑦ 2
2
ᐅᓪᓗᕆᐊᓂᒃ ᐃᓕᓯᒪᔪᑦ ᑕᑯᔭᕐᑐᕐᓂᖓᑦ ᔩᓱᓯᒥᒃ
1ᔩᓱᓯ ᐃᕐᓂᐊᖑᖕᒪᑦ ᐱᑦᓕᐊᒥ ᔫᑎᐊᒦᑦᑐᒥ, ᐃᕉᑕᓯ ᐊᖓᔪᖅᑳᕐᔪᐊᖑᑎᓪᓗᒍ, ᑕᑯᒋᑦ, ᐊᖑᑏᑦ ᐅᓪᓗᕆᐊᓂᒃ ᐃᓕᓯᒪᔪᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐱᔪᑦ, ᔨᕉᓴᓕᒻᒧᑦ ᑎᑭᑉᐳᑦ. 2ᐊᐱᕆᓪᓗᑎᒡᓗ, “ᔫᑎᑦ ᐊᖓᔪᖅᑳᕐᔪᐊᒃᓴᖓᑦ ᐃᕐᓂᐊᖑᓯᒪᔪᖅ ᓇᓃᑉᐹ? ᑖᑦᓱᒪ ᐅᓪᓗᕆᐊᖓ ᓴᖅᑭᓚᐅᕐᒪᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ, ᑎᑭᑉᐳᒍᑦ ᐅᐱᒋᔭᕐᑐᕐᓗᒍ.”
3ᐃᕉᑕᓯ ᑕᒪᑐᒥᖓ ᑐᓴᕋᒥ, ᖁᐊᕐᓵᕐᐳᖅ, ᔨᕉᓴᓕᒻᒥᐅᓪᓗ ᑕᒪᕐᒥᒃ; 4ᐃᕉᑕᓯᐅᓪᓕ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᓕᒫᖏᑦ ᐱᖁᔭᓂᒡᓗ ᐃᓕᓮᔩᑦ ᕾᖁᓪᓗᒋᑦ ᐊᐱᕐᓱᕐᐰᑦ, “ᓇᓂ ᙭ᔅᑑᓯ ᐃᕐᓂᐊᖑᓂᐊᕐᓂᕋᕐᑕᐅᓯᒪᕙ?”
5ᑖᒃᑯᐊ ᑭᐅᕚᑦ, “ᐱᑦᓕᐊᒥ ᔫᑎᐊᒦᑦᑐᒥ; ᐃᒫᒃ ᓇᓚᐅᑍᔪᖅ ᑎᑎᕋᕐᓯᒪᖕᒪᑦ:
6 #
ᒤᑲ 5:2. ‘ᐃᕝᕕᑦ ᐱᑦᓕᐊᒻ, ᓄᓇᒥ ᔫᑕᒦᑦᑐᑎᑦ,
ᒥᑭᓐᓂᕐᐸᐅᓐᖏᓚᑎᑦ ᐃᒡᓗᒐᓴᒡᔪᐊᓂᑦ ᐊᖏᓂᕐᐸᐅᔪᓂᑦ ᔫᑕᒥ;
ᐃᓕᖕᓂᑦ ᐊᐅᓚᑦᓯᔨᒃᓴᖅ ᐱᔪᒫᕐᒪᑦ
ᑖᑦᓱᒪ ᐃᓄᖁᑎᒃᑲ ᐃᓴᕆᐊᓕᒥᐅᑦ ᑕᓯᐅᕈᒫᕐᒪᒋᑦ.’”
7ᑕᕝᕙ ᐃᕉᑕᓯᐅᑉ ᐅᓪᓗᕆᐊᓂᒃ ᐃᓕᓯᒪᔪᑦ ᐃᔨᕋᕐᑐᕐᓗᓂ ᑲᑎᒪᖃᑎᒋᓪᓗᒋᑦ, ᑐᑭᓯᕕᒋᕔᑦ ᖃᖓᓪᓚᕆᒃ ᐅᓪᓗᕆᐊᖅ ᓴᖅᑭᓚᐅᕐᒪᖔᑦ. 8ᑭᖑᓂᖓᒍᑦ ᐱᑦᓕᐊᒧᑦ ᑎᓕᕔᑦ, ᐅᖃᐅᑎᓪᓗᒋᑦ, “ᓄᑕᕋᖅ ᓇᓃᒻᒪᖔᑦ ᕿᓂᑦᓯᐊᕐᓯᐅᒃ, ᓇᓂᒍᑦᓯᐅᒡᓗ, ᖃᐅᔨᑎᓐᓂᐊᕐᐸᑦᓯᓐᖓ, ᐅᕙᖓᑦᑕᐅᖅ ᐅᐱᒋᔭᕐᑐᕈᒪᒐᒃᑯ.”
9ᐊᖓᔪᖅᑳᕐᔪᐊᖅ ᑍᒫᒃ ᐅᖃᕇᕐᒪᑦ, ᑖᒃᑯᐊ ᑕᕝᕙᓐᖓᑦ ᐊᐅᓪᓚᕐᐳᑦ, ᐃᖏᕐᕋᓕᕐᑎᓪᓗᒋᑦ ᐅᓪᓗᕆᐊᖅ ᑕᑯᓚᐅᕐᑕᑎᒃ ᑕᑯᒋᕚᑦ. 10ᑕᑯᒐᒥᑦᔪᒃ ᖁᕕᐊᓱᒻᒪᕆᒃᐳᑦ, ᐅᓪᓗᕆᐊᖅ ᓯᕗᓕᕆᕚᑦ, ᓄᑕᕋᑯᓘᑉ ᓇᔪᕐᑕᖓᑕ ᖁᓛᓄᐊᕋᒥ ᓄᖅᑲᕐᐳᖅ. 11ᐃᒡᓗᒧᑦ ᐃᑎᕋᒥᒃ, ᓄᑕᕋᑯᓗᒃ ᐊᓈᓇᖓᓗ ᒥᐊᕆ ᑕᑯᒐᒥᑦᔪᒃ, ᓵᖓᓄᑦ ᓰᖅᑯᕐᓗᑎᒃ ᑐᒃᓯᐊᕐᕕᒋᕚᑦ. ᑐᓂᕐᕈᑎᒥᖕᓂᒃ ᓴᖅᑭᑎᑦᓯᓪᓗᑎᒃ ᑐᓂᓯᕕᒋᕚᑦ, ᒎᓗᒥᒃ, ᑎᐱᑦᓯᐊᕆᒃᓴᐅᒥᒡᓗ ᕗᕋᖕᑭᓐᓯᓐᓯᒥᒃ, ᑎᐱᑦᓯᐊᕆᒃᓴᐅᒻᒥᒡᓗ ᒧᕐᒥᒃ.
12ᑭᖑᓂᖓᒍᑦ ᓄᓇᒥᖕᓄᑦ ᐅᑎᕐᐳᑦ ᐊᖅᑯᑎᒋᓚᐅᕐᑕᒥ ᐊᓯᐊᒍᑦ, ᒎᑎᐅᑉ ᓯᓐᓇᒃᑑᒪᒃᑯᑦ ᐃᓂᕐᑎᓚᐅᕐᒪᒋᑦ ᐃᕉᑕᓯᒧᑦ ᐅᑎᖁᓇᒋᑦ.
ᔩᓱᓯᐅᑉ ᕿᒪᐅᑦᔭᐅᓂᖓ ᐄᑦᔨᑉᑎᒧᑦ
13ᐊᐅᓪᓚᕐᒪᑕ, ᑕᑯᒋᑦ, ᐊᑕᓂᐅᑉ ᐂᖏᓕᖓᑕ ᔫᓯᐱ ᓴᖅᑭᕝᕕᒋᕚ ᓯᓐᓇᒃᑑᒪᒃᑯᑦ, ᐅᖃᕐᓗᓂ, “ᐃᕉᑕᓯ ᓄᑕᕋᑯᓗᖕᒥᒃ ᕿᓂᕐᓂᐊᓕᕐᒪᑦ ᑐᖁᑦᓯᔪᒪᓗᓂ. ᑍᒤᒻᒪᑦ ᒪᑭᓕᕆᑦ, ᓄᑕᕋᑯᓗᒃ ᐊᓈᓇᖓᓗ ᓇᒃᓴᕐᓗᒋᒃ ᕿᒫᓕᕆᑦ ᐄᑦᔨᑉᑎᒧᑦ, ᑍᑲᓃᓐᓂᐊᕐᐳᑎᑦ ᐅᕙᓐᓄᑦ ᓅᖁᔭᐅᓕᓚᐅᖏᓐᓂᕐᓂ.”
14ᔫᓯᐱ ᒪᑭᓐᓇᒥ, ᓄᑕᕋᑯᓗᒃ ᐊᓈᓇᖓᓗ ᓇᒃᓴᕐᓗᒋᒃ, ᐅᓐᓄᐊᖑᑎᓪᓗᒍ ᐊᐅᓪᓚᕐᐳᑦ, ᐄᑦᔨᑉᑎᒧᑦ ᕿᒫᓪᓗᑎᒃ, 15#ᕼᐆᓯᐊ 11:1.ᑕᕝᕙᓃᓚᐅᕐᐳᑦ ᐃᕉᑕᓯ ᑐᖁᓚᐅᖏᓐᓂᖓᓂ; ᑕᒪᓐᓇ ᐱᓂᐊᕐᓂᐅᓚᐅᕐᐳᖅ ᐊᑕᓂᐅᑉ ᐅᖃᐅᓯᕆᓯᒪᔭᖏᑦ ᓇᓚᐅᑦᑍᔪᖁᑦ ᓇᓚᐅᑦᓯᖁᓪᓗᒋᑦ, ᐃᒤᓕᔪᑦ: “ᐃᕐᓂᕋ ᑬᖁᓚᐅᕐᐸᕋ ᐄᑦᔨᑉᑎᒥᑦ.”
ᓄᑕᕅᑦ ᑐᖁᕋᕐᑕᐅᓂᖏᑦ
16ᐃᕉᑕᓯ ᖃᐅᔨᓕᕋᒥ ᐅᓪᓗᕆᐊᓂᒃ ᐃᓕᓯᒪᔪᓄᑦ ᓴᒡᓗᕿᑕᐅᓂᕐᒥᓂᒃ, ᓂᓐᖓᕕᒃᔪᐊᕐᐳᖅ, ᐱᖁᔨᓕᕐᐳᖅ ᓄᑕᕅᑦ ᓄᑲᑉᐱᐊᖑᒃᐸᑕ ᐱᑦᓕᐊᒦᑦᑐᑦ ᖃᓂᒋᔮᓃᑦᑐᓪᓗ ᑕᒪᕐᒥᒃ ᑐᖁᕋᕐᑕᐅᖁᓪᓗᒋᑦ, ᒪᕐᕉᖕᓂᒃ ᐊᕐᕌᒍᓖᑦ ᓄᑲᕐᖠᓪᓗ, ᑍᒤᓕᐅᓚᐅᕐᐳᖅ ᑖᒃᑯᐊ ᐅᓪᓗᕆᐊᖓᓂᒃ ᑕᑯᓚᐅᕐᑐᑦ ᑐᑭᓯᕕᒋᑦᓯᐊᓚᐅᕋᒥᒋᑦ ᖃᖓᐅᑎᓪᓗᒍ ᓴᖅᑭᓚᐅᕐᒪᖔᑦ.
17ᑍᒤᓕᐅᕐᑎᓪᓗᒋᑦ ᓇᓚᐅᑦᑍᔫᑉ ᔨᕆᒤᐊᐅᑉ ᐅᖃᐅᓯᖏᑦ ᓇᓚᐅᑦᓯᓚᐅᕐᐳᑦ ᐃᒤᓕᔪᑦ:
18 #
ᔨᕆᒤᐊ 31:15. “ᕌᒪᒥ ᓂᐱ ᑐᓴᕐᓴᐅᕗᖅ,
ᕿᐊᓂᖅ ᐅᒡᒍᐊᕕᒃᔪᐊᕐᓂᕐᓗ,
ᕅᒋᓕᐅᑉ ᕿᑐᕐᖓᓂ ᕿᐊᑦᔪᑎᒋᕔᑦ;
ᓮᒻᒪᕐᓴᕐᑕᐅᔪᒪᓐᖏᓚᖅ ᕿᑐᕐᖓᖏᑦ ᓄᖑᑕᐅᖕᒪᑕ.”
ᔫᓯᐱᒃᑯᑦ ᓈᓴᕇᑎᒧᑦ ᐅᑎᕐᓂᖓᑦ ᐄᑦᔨᑉᑎᒥᑦ
19ᐃᕉᑕᓯ ᑐᖁᖕᒪᑦ, ᑕᑯᒋᑦ, ᐊᑕᓂᐅᑉ ᐂᖏᓕᖓᑕ ᔫᓯᐱ ᓴᖅᑭᕝᕕᒋᕚ ᓯᓐᓇᒃᑑᒪᒃᑯᑦ ᐄᑦᔨᑉᑎᒦᑎᓪᓗᒍ ᓱᓕ, ᐅᖃᐅᑎᓪᓗᒍ, 20“ᒪᑭᓪᓗᑎᑦ, ᓄᑕᕋᑯᓗᒃ ᐊᓈᓇᖓᓗ ᓇᒃᓴᕐᓗᒋᒃ, ᐅᑎᓕᕆᑦᓯ ᐃᓴᕆᐊᓕᐅᑉ ᓄᓇᖓᓄᑦ, ᓄᑕᕋᑯᓗᖕᒥᒃ ᑐᖁᑦᓯᓇᓱᓚᐅᕐᑐᑦ ᑐᖁᖕᒪᑕ.” 21ᔫᓯᐱ ᒪᑭᓐᓇᒥ, ᓄᑕᕋᑯᓗᒃ ᐊᓈᓇᖓᓗ ᓇᒃᓴᕐᓗᒋᒃ, ᐃᓴᕆᐊᓕᐅᑉ ᓄᓇᖓᓄᑦ ᐅᑎᕐᐳᑦ.
22ᔫᓯᐱ ᑐᓴᕋᒥ ᐋᑭᓚᐅᓯᐅᑉ ᐊᖓᔪᖅᑳᕐᔪᐊᖑᓕᕐᓂᖓᓂᒃ ᔫᑎᐊᒥ, ᐊᑖᑕᒥᓂᒃ ᐃᕉᑕᓯᒥᒃ ᐃᓇᖐᓪᓗᓂ, ᑕᕝᕗᓐᖓᕆᐊᒃᓴᖅ ᓯᕘᕋᓕᕐᐳᖅ, ᓯᓐᓇᒃᑑᒪᒃᑯᓪᓕ ᒎᑎᐅᑉ ᐅᖃᐅᑎᖕᒥᖕᒪᒍ, ᓄᓇᒧᑦ ᒐᓕᓕᐊᒧᑦ ᓴᖑᕗᖅ, 23#ᒫᑯᓯ 1:24; ᓘᑲᓯ 2:39; ᔪᐊᓇᓯ 1:45.ᐃᒡᓗᒐᓴᖕᓄᑦ ᓈᓴᕇᑎᒥᒃ ᐊᑎᓕᖕᓄᑦ ᑎᑭᓐᓇᒥ, ᑕᕝᕙᓂ ᓄᓇᖃᓕᕐᐳᖅ, ᓇᓚᐅᑦᑍᔫᑦ ᐅᖃᐅᓯᕆᓯᒪᔭᖏᑦ ᓇᓚᐅᑦᓯᓕᕐᐳᑦ ᐃᒤᓕᔪᑦ: “ᓈᓴᕇᑎᒥᐅᑕᕐᒥᒃ ᑍᔭᐅᔪᒫᕐᐳᖅ.”
Zvasarudzwa nguva ino
ᒫᑎᐅᓯᐅᑉ ᐊᒡᓚᖏᑦ 2: EAIB
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Eastern Arctic Inuktitut Bible © Canadian Bible Society, 2012, 2021-2023.