Ioane 6
6
Na wāngai ia Iētū i te limanga mano tangata
(Mātaiō 14:13-21; Māleko 6:30-44; Luka 9:10-17)
1I te toe vāia i muli mai, tīkoti loa ia Iētū ki te toe kaokao o te loto i Kalilea, e meangia ko te loto ko Tīpēlia. 2E patanga tangata tokawolo te mea na ālu lā muli ōna, na a lātou kitea oki ana yanga wotu nā wai i te wakaolanga i te kau mamakí. 3Eia, wakaake loa ia Iētū ki lunga lā te toe kaokao o te maunga ia, nō ai ki lalo ma ana pipi. 4Koa talivave ki te vāia o te Ōloa Paata a te Ngāti Iūta.
5Kē kakalo atu ia Iētū, onoono atu iāna i te maliunga tangata tokawolo ia ko lōmamai kia ana; eia, uwi loa iāna kia Pilipa, “Ka wō tātou ki wea oko ai ni walaoa kē wāngai ai te wainga tangata nei?” 6E uwinga wua nā ana tāmata pē ka pēwea ia Pilipa, yaulā na ana iloa taumua wua ka mea iāna pēwea.
7Pau atu ai ia Pilipa, “E yē lava lāi i te lualau moni tiliva#6:7 moni tiliva: e tayi moni tēnali ko maua i te tangata nō tana yanga i te ayo tākatoa (onoono ki te Mātaiō 20:2). kē oko ai ni walaoa kē lamulamu ai te wī tāngata takitai.”
8Ko tana toe pipi lā, ia Ānētelea te taina o Timona Pēteló, talatala mai loa, 9“Ēnei te tamatāne e lima ana walaoa oloōpuē kēlite#6:9 kēlite: Ēleni, krithē, Eng. barley: nā walaoa ia e popoa nā te kau vevé. ma lua ika liliki, yaulā ka lava ai pēwea mā te wainga tangata nei?”
10Mea ai ia Iētū ki ana pipi, “Wakanōnō lā te wī tāngata ki lalo.” E konga vayavayā oki te konga ia, nōnō ai te kakai ki lalo. (Ko talivave te limanga mano te tokawolo o te tāne.) 11Eia, liko loa ia Iētū i nā walaoa, wakaatawai loa i te Atua, tua atu ai ki te kau e nōnō ia. Na peia oki iāna ki lua ika, kai ai lātou tākatoa ki o lātou yayae.
12Kē yāngingia lātou, mea loa ia Iētū ki ana pipi, “Opoopoa nā popoa na toé, auyē vayipātai.” 13Eia, opoopo ai lātou i nā toetoenga, wakakī ai kikī te laungaulu mā lua kete i te toenga o te lima ngaua walaoa kēlite nā kai ai te wī tāngata ia.
14I te kitenga a te kakai i te yanga wakawotu a Iētū na wai ia, mea loa lātou, “Ēeke pē, ko ona lāi pē te Peloveta ka yau ki te ao nei.”#6:14 te Peloveta: onoono ki te Ioane 1:21. 15Ko Iētū lā, alawia loa ēna nā naumatenga a te kau ia kē liko ia ana kē wakalilo wai aliki, wakangalo wua loa iāna tokotai maia lātou, wakaake ai iāna ki lunga o te maunga.
Na yaele ia Iētū i lunga o nā yua
(Mātaiō 14:22-33; Māleko 6:45-52)
16I te wakaawiawinga, wō atu loa nā pipi a Iētū ki te tukutai o te loto. 17Na pōuli i te vāia ia, e kiai lāi ia Iētū na wakatai mai kia lātou. Eia, wekake loa lātou ki lunga o te poti, tele atu ai lātou i te manatunga kē tīkoti ki te toe kaokao o te loto kē ōko ki Kāpelenāuma. 18E kiai na loa, tuki mai loa te matangi pōkelekele, wowolo ma nā ngalu o te loto ia. 19Na taliweolo oki te mamao o te woenga a nā pipi ki te tolu ma te wā maile#6:19 te tolu ma te wā maile: Ēleni, 25-30 stadia (e lima pēkole e ono kilomita). ki tai, eia, makoyia loa e lātou ia Iētū koa pili mai ki tō lātou poti ia, ko yaele i lunga o nā yua. Kamuloa lātou wetō wua i te mataku. 20Yaulā, talatala mai loa ia Iētū kia lātou, “Ko oku tēnei, auyē mātataku kōtou!” 21Eia, pole ai lātou kē wakauta ia ana ki loto o te poti. Na peia ngatai, tau atu loa tō lātou poti ki te tukutai, te konga a lātou na manatu ai.
22I te tāyao, ko te lulunga tangata nā nōnō i te toe kaokao o te loto ia, na a lātou iloa e tayi wua poti nā i kiai, e kiai oki ia Iētū na kake ki lunga o te poti ia, ko ana pipi wua na wō i lunga. 23E nī oki toe poti mai Tīpēlia na wetau mai lā tawa o te konga nā taumamaya ai te lulunga tangata i nā walaoa na takungia e te Atú. 24Kē mailonga i te lulunga tangata ia ko yē i kiai ia Iētū ma ana pipi, wīwiti oki lātou ki lunga o nā poti ia, wō ai ki Kāpelenāuma ulupango ia ana.
Ko Iētū te Popoa o te Ola
25I tā lātou kitenga ia Iētū i te toe kaokao o te loto ia, iliili loa lātou ki ai, “E te Pūāpī, e wea te vāia na oko mai ai koe ki kinei?”
26Pau atu loa ia Iētū, “Ko tala atu au i te tika, ko yē ulu kōtou ia aku nō nā wakailo wotu a kōtou na kité, nō tei taumamaya lā kōtou i nā walaoa na kikī ai o kōtou kōpū. 27Auyē kōtou e umati ki nā popoa ka papalá, umati lā kōtou kē maua nā popoa ka vai wua peia oko ki te ola e yē ngata; ko nā popoa teia a te Tama a te Tangata ka avatu kia kōtou. Na tuku oki te Matua Yā i tona mana wakatika ki lunga ōna.”
28Nō kiai lātou na uwi ai peia kia ana, “Ka pēwea ai mātou kē wai i nā yanga a te Atua e winangaló?”
29Pau atu oki ia Iētū, “Ēnei te yanga a te Atua ko winangalo kē wai kōtou: kē nunumi kōtou ki te tangata āna na unga maí.”
30Eia, uwi atu oki lātou ki ai, “E wea ai tau wakailo wotu ka wakaāli mai ke a mātou kitea, kē lotokono atu ai mātou ia koe? E wea tau mea ka wai? 31I te vāiá, ni māna nā popoa a o mātou mātutua nā kai ai i te mētēpala; na tutingia i te Puka Yā: ‘Na aumai iāna ni walaoa mai te Langi kē kai ai lātou.’ ”#Ēkoto 16:4, 15; Nēmia 9:15; Talamo 78:24
32Talatala ai ia Iētū kia lātou, “Ko tala atu au i te tika, kāle ai ko Mōte na avatua kia kōtou nā walaoa mai te Langi, ko toku Matua lā ko avatua kia kōtou te walaoa tika mai te Langi. 33Ko te walaoa oki a te Atua ia, ko te tangata na leilo mai ki lalo mai te Langi, ko ona oki ko aumaia te ola ki te kakai o te ao nei.”
34Mea mai loa lātou ki ai, “E te vale tāne ia ē, aumai ake nā walaoa ia kia mātou i te wī vāia tākatoa.”
35Eia, wakamamata ai ia Iētū kia lātou, mea loa, “Ko oku te walaoa o te ola. Ko te kau e lōmamai kia aku nei, e yē wiakakaia loa lātou; ko te kau oki e nunumi mai kia aku nei, e yē wiainua loa wakawōu. 36Pē aku tala atunga lāi, na a kōtou kitea oki au, yaulā ko yē nunumi lāi kōtou. 37Ko te wī tāngata a te Matua e aumai kia akú ka lōmamai lāi kia aku, e yē tutuli au ia lātou ki nā kongá. 38Nō kiai au na yau ai ki lalo nei mai te langi, auyē au e wai wua i aku manatunga, kē wai lā au i te winangalo ōna na yeunga mai ia aku nei. 39Ko te winangalo tēnei ōna na yeunga mai ia aku nei, auyē loa e tangata e ngalo i toku lima mai te kau āna na aumai kia aku nei, kē wakatū lā au ia lātou tākatoa ki lunga i te ayo openga. 40Ēnei oki te winangalo o toku Matua, ko te tangata e kakalo ki tana Tama ma te nunumi kia ana, ka maua ia ana te ola e yē ngata, ko oku oki ia ana ka wakatū wakawōungia ki lunga i te ayo openga.”
41Eia, kāmata loa te Ngāti Iūta e te ngūngū nō tana meanga ia, “Ko oku te walaoa na yau mai te Langi ki lalo nei.” 42Mea loa lātou, “Kāle ai lā tēnei ko Iētū te tama a Iōtēpá? Ko a tātou iloa tona matua tāne ma tona matua wawine. Nō wea ai iāna e mea ai i te vāia nei, ‘Na leilo mai au ki lalo mai te Langi’?”
43Pau atu loa ia Iētū, “Mutu i kinā tā kōtou ngūngū. 44Kāe tangata e maua e te yau kia aku nei, kē takia mai loa iāna e te Matua na ungaina mai au nei. Ko oku oki ka wakatū wakawōungia iāna ki lunga i te ayo openga. 45Na tutingia oki i te puka a nā pelovetá, ‘Ko te Atua lātou tākatoa ka akoakoa.’#Ītaia 54:13 Ko te tangata ka wakalongo i te Matua ma te wakamau maia aná, ko ona lāi ka yau kia aku nei. 46Kāe tangata loa na ana kitea te Matua, ko te kovi wua na yau mai te Atuá; ko ona tokotai wua na kite i te Matua. 47Ko tala atu au i te tika, ko te tangata e nunumí ka maua ia ana te ola kāe ngatanga. 48Ko oku te walaoa o te ola. 49Nā kai o kōtou mātutuá ki te māna i te mētēpala, yaulā na mamate lātou. 50Ko te walaoa oki tēnei na yau ki lalo mai te Langi, ko te tangata ka kai e yē mate iāna. 51Ko oku te walaoa ola na yau ki lalo mai te Langi. Ko te tangata ka kai i te walaoa nei, ka ola iāna ē vāia wua atu. Ko toku tino oki te walaoa nei, āku ka avatu wai ola mō te ao nei.”
52Wowo loa te wakatautotoko a te kau Ngāti Iūtá kia lātou lāi, “Ka aumai pēwea te tangata nei i ona kiko kē kai ai tātou?”
53Eia, mea ai ia Iētū pēnei kia lātou, “Ko tala atu au i te tika, kē yē kai kōtou i te tino o te Tama a te Tangata, kē yē inu oki i ona toto, kāe ola e maua i loto o kōtou. 54Ko te tangata ka kai i toku tino ma te inu i oku toto, ka maua ia ana te ola kāe ngatanga, ko oku oki ka wakatūngia iāna kē oko ki te ayo openga. 55Ko toku tino oki te popoa tika, peia oki oku toto ko te yua tika teia. 56Ko te tangata oki ka kai i toku tino ma te inu i oku toto, ka wakavilo iāna i loto ōku, ka peia oki au i loto ōna. 57Pe te Matua ola oki na unga mai ia aku nei, ko ola oki au i te Matua. Nō kiai, ko te tangata ka kai ia aku nei, ka ola iāna nōoku nei. 58Ko te walaoa tēnei na yau ki lalo mai te Langi, ko yē weolo pe nā māna nā kai ai o kōtou mātutuá, mamate atu ai. Ko te kau lā ka kai i te walaoa nei ka ōla lātou ē vāia wua atu.” 59Nā yalu oki iāna i nā mea nei i tona vāia nā akoako ai i loto o te walepule i Kāpelenāumá.
E tokawolo te pipi na maka ia Iētū
60I tā lātou wakalongonga i nā muna ia, e tokawolo te pipi āna na talatala pēnei, “Nā akoakonga nei i te waingatā. Ko ai te kau ka āwuwū ki ai?”
61Mailonga loa ia Iētū nā ngūngūnga a ana pipi ia, talatala atu ai iāna ki ai, “Na kinokino mō kōtou i nā mea ia? 62Ka pēwea ai ke a kōtou kitea te Tama a te Tangata i te wakaakenga ki lunga ki te konga nā nō ai iāna i mua atú? 63Ko te Vaelua o te Atua ko aumaia te ola ki te tangata; kāe kalu oki a te tino tangata. Ko aku talatala oki nā tala atu kia kōtoú, ko nā mea teia ko aumaia te Vaelua ma te ola a te Atua. 64Yaulā te toe kau o kōtou nā, ko yē nunumi mai kia aku.” Na mailonga wua ia Iētū mai mua mai ko ai te kau e yē nunumi, peia te kovi ka tōa ia aná. 65Mea atu oki ana toe muna kia lātou, “Nō kiai oki au na tala atu ai kia kōtou, kāe tangata e maua e te yau kia aku nei, kē tika loa mai te Matua.”
66Mai te vāia ia, e tokawolo te pipi a Iētū na nīniko ki muli, e kiai na ālu wakawōu i ona tawa.
67Eia, wuwuli ai loa iāna ki tana laungaulu mā lua pipí, iliili oki ki ai, “Ia kōtou mō oki ko manatu kē maka?”
68Pau mai oki ia Timona Pētelo kia ana, “E te Atu ē, ka wō mātou kia ai? Ko ia koe oki nā muna e maua mai ai te ola kāe ngatanga.#Mātaiō 16:16; Māleko 8:29; Luka 9:20 69Ēnei lā koa nunumi tika mātou, na taka lelei oki ia mātou, ko koe lāi pē te Kovi Yā a te Atuá.”
70Eia, pau mai oki ia Iētū, “E kiai lā ko oku na ikingia kōtou e tino angaulu mā lua? Yaulā ko te toe o kōtou nā, e tiāpolo!” 71Ko talatala iāna nō Iūta, te tama a Timona Ikaliota. Wua atu iāna ko te toe o te tino angaulu mā luá, ko ona lāi te kovi ka tōa ia Iētū i nā vāia i muli mai.
Zvasarudzwa nguva ino
Ioane 6: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau
Ioane 6
6
Na wāngai ia Iētū i te limanga mano tangata
(Mātaiō 14:13-21; Māleko 6:30-44; Luka 9:10-17)
1I te toe vāia i muli mai, tīkoti loa ia Iētū ki te toe kaokao o te loto i Kalilea, e meangia ko te loto ko Tīpēlia. 2E patanga tangata tokawolo te mea na ālu lā muli ōna, na a lātou kitea oki ana yanga wotu nā wai i te wakaolanga i te kau mamakí. 3Eia, wakaake loa ia Iētū ki lunga lā te toe kaokao o te maunga ia, nō ai ki lalo ma ana pipi. 4Koa talivave ki te vāia o te Ōloa Paata a te Ngāti Iūta.
5Kē kakalo atu ia Iētū, onoono atu iāna i te maliunga tangata tokawolo ia ko lōmamai kia ana; eia, uwi loa iāna kia Pilipa, “Ka wō tātou ki wea oko ai ni walaoa kē wāngai ai te wainga tangata nei?” 6E uwinga wua nā ana tāmata pē ka pēwea ia Pilipa, yaulā na ana iloa taumua wua ka mea iāna pēwea.
7Pau atu ai ia Pilipa, “E yē lava lāi i te lualau moni tiliva#6:7 moni tiliva: e tayi moni tēnali ko maua i te tangata nō tana yanga i te ayo tākatoa (onoono ki te Mātaiō 20:2). kē oko ai ni walaoa kē lamulamu ai te wī tāngata takitai.”
8Ko tana toe pipi lā, ia Ānētelea te taina o Timona Pēteló, talatala mai loa, 9“Ēnei te tamatāne e lima ana walaoa oloōpuē kēlite#6:9 kēlite: Ēleni, krithē, Eng. barley: nā walaoa ia e popoa nā te kau vevé. ma lua ika liliki, yaulā ka lava ai pēwea mā te wainga tangata nei?”
10Mea ai ia Iētū ki ana pipi, “Wakanōnō lā te wī tāngata ki lalo.” E konga vayavayā oki te konga ia, nōnō ai te kakai ki lalo. (Ko talivave te limanga mano te tokawolo o te tāne.) 11Eia, liko loa ia Iētū i nā walaoa, wakaatawai loa i te Atua, tua atu ai ki te kau e nōnō ia. Na peia oki iāna ki lua ika, kai ai lātou tākatoa ki o lātou yayae.
12Kē yāngingia lātou, mea loa ia Iētū ki ana pipi, “Opoopoa nā popoa na toé, auyē vayipātai.” 13Eia, opoopo ai lātou i nā toetoenga, wakakī ai kikī te laungaulu mā lua kete i te toenga o te lima ngaua walaoa kēlite nā kai ai te wī tāngata ia.
14I te kitenga a te kakai i te yanga wakawotu a Iētū na wai ia, mea loa lātou, “Ēeke pē, ko ona lāi pē te Peloveta ka yau ki te ao nei.”#6:14 te Peloveta: onoono ki te Ioane 1:21. 15Ko Iētū lā, alawia loa ēna nā naumatenga a te kau ia kē liko ia ana kē wakalilo wai aliki, wakangalo wua loa iāna tokotai maia lātou, wakaake ai iāna ki lunga o te maunga.
Na yaele ia Iētū i lunga o nā yua
(Mātaiō 14:22-33; Māleko 6:45-52)
16I te wakaawiawinga, wō atu loa nā pipi a Iētū ki te tukutai o te loto. 17Na pōuli i te vāia ia, e kiai lāi ia Iētū na wakatai mai kia lātou. Eia, wekake loa lātou ki lunga o te poti, tele atu ai lātou i te manatunga kē tīkoti ki te toe kaokao o te loto kē ōko ki Kāpelenāuma. 18E kiai na loa, tuki mai loa te matangi pōkelekele, wowolo ma nā ngalu o te loto ia. 19Na taliweolo oki te mamao o te woenga a nā pipi ki te tolu ma te wā maile#6:19 te tolu ma te wā maile: Ēleni, 25-30 stadia (e lima pēkole e ono kilomita). ki tai, eia, makoyia loa e lātou ia Iētū koa pili mai ki tō lātou poti ia, ko yaele i lunga o nā yua. Kamuloa lātou wetō wua i te mataku. 20Yaulā, talatala mai loa ia Iētū kia lātou, “Ko oku tēnei, auyē mātataku kōtou!” 21Eia, pole ai lātou kē wakauta ia ana ki loto o te poti. Na peia ngatai, tau atu loa tō lātou poti ki te tukutai, te konga a lātou na manatu ai.
22I te tāyao, ko te lulunga tangata nā nōnō i te toe kaokao o te loto ia, na a lātou iloa e tayi wua poti nā i kiai, e kiai oki ia Iētū na kake ki lunga o te poti ia, ko ana pipi wua na wō i lunga. 23E nī oki toe poti mai Tīpēlia na wetau mai lā tawa o te konga nā taumamaya ai te lulunga tangata i nā walaoa na takungia e te Atú. 24Kē mailonga i te lulunga tangata ia ko yē i kiai ia Iētū ma ana pipi, wīwiti oki lātou ki lunga o nā poti ia, wō ai ki Kāpelenāuma ulupango ia ana.
Ko Iētū te Popoa o te Ola
25I tā lātou kitenga ia Iētū i te toe kaokao o te loto ia, iliili loa lātou ki ai, “E te Pūāpī, e wea te vāia na oko mai ai koe ki kinei?”
26Pau atu loa ia Iētū, “Ko tala atu au i te tika, ko yē ulu kōtou ia aku nō nā wakailo wotu a kōtou na kité, nō tei taumamaya lā kōtou i nā walaoa na kikī ai o kōtou kōpū. 27Auyē kōtou e umati ki nā popoa ka papalá, umati lā kōtou kē maua nā popoa ka vai wua peia oko ki te ola e yē ngata; ko nā popoa teia a te Tama a te Tangata ka avatu kia kōtou. Na tuku oki te Matua Yā i tona mana wakatika ki lunga ōna.”
28Nō kiai lātou na uwi ai peia kia ana, “Ka pēwea ai mātou kē wai i nā yanga a te Atua e winangaló?”
29Pau atu oki ia Iētū, “Ēnei te yanga a te Atua ko winangalo kē wai kōtou: kē nunumi kōtou ki te tangata āna na unga maí.”
30Eia, uwi atu oki lātou ki ai, “E wea ai tau wakailo wotu ka wakaāli mai ke a mātou kitea, kē lotokono atu ai mātou ia koe? E wea tau mea ka wai? 31I te vāiá, ni māna nā popoa a o mātou mātutua nā kai ai i te mētēpala; na tutingia i te Puka Yā: ‘Na aumai iāna ni walaoa mai te Langi kē kai ai lātou.’ ”#Ēkoto 16:4, 15; Nēmia 9:15; Talamo 78:24
32Talatala ai ia Iētū kia lātou, “Ko tala atu au i te tika, kāle ai ko Mōte na avatua kia kōtou nā walaoa mai te Langi, ko toku Matua lā ko avatua kia kōtou te walaoa tika mai te Langi. 33Ko te walaoa oki a te Atua ia, ko te tangata na leilo mai ki lalo mai te Langi, ko ona oki ko aumaia te ola ki te kakai o te ao nei.”
34Mea mai loa lātou ki ai, “E te vale tāne ia ē, aumai ake nā walaoa ia kia mātou i te wī vāia tākatoa.”
35Eia, wakamamata ai ia Iētū kia lātou, mea loa, “Ko oku te walaoa o te ola. Ko te kau e lōmamai kia aku nei, e yē wiakakaia loa lātou; ko te kau oki e nunumi mai kia aku nei, e yē wiainua loa wakawōu. 36Pē aku tala atunga lāi, na a kōtou kitea oki au, yaulā ko yē nunumi lāi kōtou. 37Ko te wī tāngata a te Matua e aumai kia akú ka lōmamai lāi kia aku, e yē tutuli au ia lātou ki nā kongá. 38Nō kiai au na yau ai ki lalo nei mai te langi, auyē au e wai wua i aku manatunga, kē wai lā au i te winangalo ōna na yeunga mai ia aku nei. 39Ko te winangalo tēnei ōna na yeunga mai ia aku nei, auyē loa e tangata e ngalo i toku lima mai te kau āna na aumai kia aku nei, kē wakatū lā au ia lātou tākatoa ki lunga i te ayo openga. 40Ēnei oki te winangalo o toku Matua, ko te tangata e kakalo ki tana Tama ma te nunumi kia ana, ka maua ia ana te ola e yē ngata, ko oku oki ia ana ka wakatū wakawōungia ki lunga i te ayo openga.”
41Eia, kāmata loa te Ngāti Iūta e te ngūngū nō tana meanga ia, “Ko oku te walaoa na yau mai te Langi ki lalo nei.” 42Mea loa lātou, “Kāle ai lā tēnei ko Iētū te tama a Iōtēpá? Ko a tātou iloa tona matua tāne ma tona matua wawine. Nō wea ai iāna e mea ai i te vāia nei, ‘Na leilo mai au ki lalo mai te Langi’?”
43Pau atu loa ia Iētū, “Mutu i kinā tā kōtou ngūngū. 44Kāe tangata e maua e te yau kia aku nei, kē takia mai loa iāna e te Matua na ungaina mai au nei. Ko oku oki ka wakatū wakawōungia iāna ki lunga i te ayo openga. 45Na tutingia oki i te puka a nā pelovetá, ‘Ko te Atua lātou tākatoa ka akoakoa.’#Ītaia 54:13 Ko te tangata ka wakalongo i te Matua ma te wakamau maia aná, ko ona lāi ka yau kia aku nei. 46Kāe tangata loa na ana kitea te Matua, ko te kovi wua na yau mai te Atuá; ko ona tokotai wua na kite i te Matua. 47Ko tala atu au i te tika, ko te tangata e nunumí ka maua ia ana te ola kāe ngatanga. 48Ko oku te walaoa o te ola. 49Nā kai o kōtou mātutuá ki te māna i te mētēpala, yaulā na mamate lātou. 50Ko te walaoa oki tēnei na yau ki lalo mai te Langi, ko te tangata ka kai e yē mate iāna. 51Ko oku te walaoa ola na yau ki lalo mai te Langi. Ko te tangata ka kai i te walaoa nei, ka ola iāna ē vāia wua atu. Ko toku tino oki te walaoa nei, āku ka avatu wai ola mō te ao nei.”
52Wowo loa te wakatautotoko a te kau Ngāti Iūtá kia lātou lāi, “Ka aumai pēwea te tangata nei i ona kiko kē kai ai tātou?”
53Eia, mea ai ia Iētū pēnei kia lātou, “Ko tala atu au i te tika, kē yē kai kōtou i te tino o te Tama a te Tangata, kē yē inu oki i ona toto, kāe ola e maua i loto o kōtou. 54Ko te tangata ka kai i toku tino ma te inu i oku toto, ka maua ia ana te ola kāe ngatanga, ko oku oki ka wakatūngia iāna kē oko ki te ayo openga. 55Ko toku tino oki te popoa tika, peia oki oku toto ko te yua tika teia. 56Ko te tangata oki ka kai i toku tino ma te inu i oku toto, ka wakavilo iāna i loto ōku, ka peia oki au i loto ōna. 57Pe te Matua ola oki na unga mai ia aku nei, ko ola oki au i te Matua. Nō kiai, ko te tangata ka kai ia aku nei, ka ola iāna nōoku nei. 58Ko te walaoa tēnei na yau ki lalo mai te Langi, ko yē weolo pe nā māna nā kai ai o kōtou mātutuá, mamate atu ai. Ko te kau lā ka kai i te walaoa nei ka ōla lātou ē vāia wua atu.” 59Nā yalu oki iāna i nā mea nei i tona vāia nā akoako ai i loto o te walepule i Kāpelenāumá.
E tokawolo te pipi na maka ia Iētū
60I tā lātou wakalongonga i nā muna ia, e tokawolo te pipi āna na talatala pēnei, “Nā akoakonga nei i te waingatā. Ko ai te kau ka āwuwū ki ai?”
61Mailonga loa ia Iētū nā ngūngūnga a ana pipi ia, talatala atu ai iāna ki ai, “Na kinokino mō kōtou i nā mea ia? 62Ka pēwea ai ke a kōtou kitea te Tama a te Tangata i te wakaakenga ki lunga ki te konga nā nō ai iāna i mua atú? 63Ko te Vaelua o te Atua ko aumaia te ola ki te tangata; kāe kalu oki a te tino tangata. Ko aku talatala oki nā tala atu kia kōtoú, ko nā mea teia ko aumaia te Vaelua ma te ola a te Atua. 64Yaulā te toe kau o kōtou nā, ko yē nunumi mai kia aku.” Na mailonga wua ia Iētū mai mua mai ko ai te kau e yē nunumi, peia te kovi ka tōa ia aná. 65Mea atu oki ana toe muna kia lātou, “Nō kiai oki au na tala atu ai kia kōtou, kāe tangata e maua e te yau kia aku nei, kē tika loa mai te Matua.”
66Mai te vāia ia, e tokawolo te pipi a Iētū na nīniko ki muli, e kiai na ālu wakawōu i ona tawa.
67Eia, wuwuli ai loa iāna ki tana laungaulu mā lua pipí, iliili oki ki ai, “Ia kōtou mō oki ko manatu kē maka?”
68Pau mai oki ia Timona Pētelo kia ana, “E te Atu ē, ka wō mātou kia ai? Ko ia koe oki nā muna e maua mai ai te ola kāe ngatanga.#Mātaiō 16:16; Māleko 8:29; Luka 9:20 69Ēnei lā koa nunumi tika mātou, na taka lelei oki ia mātou, ko koe lāi pē te Kovi Yā a te Atuá.”
70Eia, pau mai oki ia Iētū, “E kiai lā ko oku na ikingia kōtou e tino angaulu mā lua? Yaulā ko te toe o kōtou nā, e tiāpolo!” 71Ko talatala iāna nō Iūta, te tama a Timona Ikaliota. Wua atu iāna ko te toe o te tino angaulu mā luá, ko ona lāi te kovi ka tōa ia Iētū i nā vāia i muli mai.
Zvasarudzwa nguva ino
:
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau