साल्तेङ दिङगिल्का 1
1
परमेस्वरको केरा चाका पुनित हाङसा
1माननिय थियोफिलस, इसुको पालि रो धिरपालि भोका गोताङ काथाको बारेता काङको लाङ किताबता का लेखिलि दोहोइका।#लुका १:१-४ 2इसु स्वरग हानिका खान्तेङ लाम्फा ताइमिको साल्का साल्तेङ दिङगिल्कालाइहेङ पुनित हाङसाको सरबङसो हुकुम पिहि। 3इसु तु: भोगितेङ कुरुसता सिकान्हुअ्सो न्हेकुरि दिनाथिकापा साल्तेङ दिङगिल्कालाइकोता तिङन्हाहि रो वा ताइमिङहेङ सिन्हुका हिघा दोअ्तेङ दासि पिहि। एम्बालाइ वासेहेङ तिङहि रो वा एम्बालाइदोफा परमेस्वरको सारभिको बारेता काथा पाहि।
4एअ्खे इसु एम्बालाइदोफा चालि योम्लाउ वा एम्बालाइहेङ इस्का हुकुम पिहि, “नेलाइ यरुसलेम काङको आबाको पाका केराहेङ र्हुम्तेङ हिसु। इङको केराको बारेता का नेलाइहेङ लाम्फा बुङ दोअ्का हिघाखा,#लुका २४:४९ 5युहन्ना ते चिको चिभुअ्लि पिघाखे, कालाउ एलाको आसा दिनान्हुअ्सो नेलाइ पुनित हाङसाको चिभुअ्लि निङस्वाना।”#मत्ति ३:११; मरकुस १:८; लुका ३:१६; युहन्ना १:३३
इसु स्वरग हानिका
6इदोइभाअ्सिङ जेलाउ साल्तेङ दिङगिल्कालाइ जोम्हि, कालाउ एम्बालाइ इसुहेङ हिअ्हि, “प्रभु, हाइ ना इदोइ पहरदोङ इस्राएलि सारभिहेङ छुटकारा#१:६ इस्राएलि सारभिहेङ छुटकारा इङको पहर इस्राएल रोमको आधिनता हिघाहि। प्याना?” 7इसु एम्बालाइहेङ दोअ्हि, “इदोइ पहर ते आबा ताइमिङ तोकिका हि। वा हाइ तोकिका हि, इङको गिलि नेलाइको काम माको। 8कालाउबुङ पुनित हाङसा नेलाइर्हुता लोकान्हुअ्सो नेलाइ सरबङ निङस्वाना। इङकोन्हुअ्सो नेलाइ यरुसलेमता, गोताङ यहुदिया रो सामरिया माउजाता कालाउ सुमिङको कोन्हाथिकापा काङको दासि जेङस्वाना।”#मत्ति २८:१९; मरकुस १६:१५; लुका २४:४७-४८
9इदोइ दोअ्लि दोकान्हुअ्सो एम्बालाइ खाङकाखाङकाताङ इसु स्वरगभारि तोल्हेन्हाहि। बादेल वासेहेङ थुमहि रो इङकोन्हुअ्सो एम्बालाइ वासेहेङ मातिङहि।#मरकुस १६:१९; लुका २४:५०-५१
10एम्बालाइ आकासभारि खाङतेङ हिलाउ जेका धाबा होङका न्हेमि द्याङगेलाइ एकासि एम्बालाइकोङ आगाता जाअ्हि। 11एम्बालाइ दोअ्हि, “ओइ गालिलको द्याङगेलाइ, नेलाइ हाइपालि जाअ्तेङ आकासभारि खाङदोङसुखेना? इसु ते स्वरगभारि हानिहोइ। वासेहेङ जेसापा नेलाइ एला हानितेङहिका तिङसुन्हा, एन्सा दोङ वा आरोङ एअ्नि घुरितेङ ल्वावा।”
यहुदाको थामेता मतियासेहेङ साल्का
12इङकोन्हुअ्सो एम्बालाइ जाइतुन आरदाङ लाअ्तेङ यरुसलेमभारि हानिहि। इन्तासो यरुसलेम थुकालि तेतेङ हानिलाउ आधा घान्टाझोको लागिखे। 13यरुसलेम थुकातेङ एम्बालाइ ताइमि हिका साअ्को र्हुताको तालाता ताङतेङ एलोङ कोठाता जोम्हि। इन्ता जोम्कालाइता पत्रुस, युहन्ना, याकुब, आन्द्रियास, फिलिप, थोमा, बारथोलोमाइ, मत्ति, आल्फायसको चान याकुब, मुलुकभक्त दोअ्का सिमोन रो याकुबको चान यहुदा हिघाखे।#मत्ति १०:२-४; मरकुस ३:१६-१९; लुका ६:१४-१६ 14एम्बालाइता आधिमि बाइओनेगेलाइ रो इसुको आमाइ मरियम रो वाको ओनेगेलाइदोफा जोम्तेङ पारथाना पाघाखे।
15एअ्नि इन्ता झान्दाइ एअ्साइ एअ्कुरि झोको खान्धुर पाका द्याङगेलाइ जोम्का हिघाखे। कालाउ पत्रुस जाअ्तेङ एम्बालाइको माझाता धुइलि तेङहि, 16“दादाओने बाइओनेगेलाइ, धरमकिताबको बचन पोङघालि गोइधाङ, जेदोङ बचन इसुहेङ रिम्पाकालाइको आगुवा यहुदाको बारेता दाउदको नुइसो लाम्फासोङ पुनित हाङसा धुइका हिघाहि। 17हाइपानु वा बुङ केलाइदोफाङ गान्दिन्हाका हिघाहि रो इदोङ सेवाता भाग निङका हिघाहि।”
18यहुदाको मारेम्का कामसो कामाइका पाइसासो एलोङ मिलिङ चोल्हि। द्याङ दुस्करमको काम्हाइसो एलोङ मिलिङ चोल्हि। कालाउ वा इङकोङ मिलिङता पुरिङलेता जेङतेङ हुल्तेङ सिहि रो वाको हेमुङ भोइन्हातेङ तेरेङभुति राइन्हाहि। 19इदोइ काथा यरुसलेमता हिकालाइ झाराङ गिहि। कालाउ एम्बालाइ इङको मिलिङको मिङ ताइको राउता “आखेल्दामा” ताअ्हि। जाइको माने हितिको मिलिङ जेङखे।#मत्ति २७:३-८
20पत्रुस आरोङ दोअ्हि, “लेको किताबता एसापा लेखिका हि:
‘इङकोको हिका थामे र्हाअ्न्हाको,
इन्ता बासा हिका हासुङ माज्याको।#ले ६९:२५
इङकोको पाका कामको जिम्मा बोमि दोङ र्हुकाको!’#ले १०९:८
21“इदोइभाअ्सिङ केलाइदोफा हिका द्याङगेलाइता इस्का एअ्मि साल्लि गोयाङ, जेदोङ द्याङ प्रभु इसु केलाइको माझाता हितेङ लिअ्ता बाहार पालाउ दिनाङ केलाइदोफाङ हिघाहि। 22इस्का खामाल जाइ युहन्नाको चिभुअ्लिसो वा केलाइसो र्हुता चुमपुन्हाका दिनाथिकापा केलाइदोफा हिघाहि। इङको द्याङ केलाइ दोफादोफाङ वाको सिकासो सिन्हुकाको दासि हिलिगोयाङ।”#मत्ति ३:१६; मरकुस १:९; १६:१९; लुका ३:२१; २४:५१
23इदोइ काथा हिङकान्हुअ्सो इन्ता जोम्का द्याङगेलाइ न्हेमिहेङ आगा सारेहि। इङकोता एअ्मिचाहिँ योसेफ हिघाखे, जाइहेङ बारसाबास माकुनु युस्तस बुङ दोअ्न्हाघाहि रो भेनेङचाहिँ मतियास हिघाखे। 24एम्बालाइ एसापा पारथाना पाहि, “झाराङ द्याङको कोन्धाङको काथा गिका प्रभु, इदोइ न्हेमिता ना हासुहेङ साल्का हिन्हा इङको केलाइहेङ तिम्पा। 25इङको इदोइ सेवा साल्तेङ दिङगिल्कालाइभाइपा, जेदोङ सेवासो यहुदा भड्कितेङ ताइकोङ थामेता सिहि।” 26इङकोन्हुअ्सो एम्बालाइ इङको न्हेमिको मिङता चिठा ह्वाअ्हि। चिठा मतियासको मिङता परेहि रो एसापा इङको तेएअ् साल्तेङ दिङगिल्कालाइता गान्देन्हाहि।
Zvasarudzwa nguva ino
साल्तेङ दिङगिल्का 1: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.