Mabikiri 18
18
Pooli so ki Korɛnti kili ki ru
(Korɛntitɔnŋ kiri (1) 1.1–9; 2.1–5; Korɛntitɔnŋ kiri (2) 11.5–12; 12.12–13)
1Niŋ kɔɔtɛ, Pooli i po Atɛni, ntiŋ i ta Korɛnti. 2Ntiŋ fa Yawutu bɛɛ i ta arìmaŋ kila, niŋ tɔ ki wuru tu Akilasi, Pɔntɔnŋ wuru-i. Ntiŋ fa awɔ mari Pirisili yirimaan ŋunaŋ wuru-i, kí i po Itali kɛniŋ ki ru, sabu masa sinaŋ Kulodi ǹʼbi wuru tu Yawutu kiri bataa po san Ɔrɔmu kili ki ru. Pooli i dibi ye kí ru. 3Ntiŋ i sɔɔ kí fan, ntiŋ fa kí i cinŋ ki ma-ni arìmaŋ fan, sabu kí fɔn wuru juulinfu ramɔnitiiri i. 4Pooli wuru Kirinŋ wɔ wulu ki ɲaanbi-a Nufaan jibi kiri sun kalinfu ki ru, Yawutu kiri fa shiya tɔri kiri tɛ. Ntiŋ wuru ǹʼtɛ, a i a banba, a i kí ɲakilila kiri rapwulu, kí i arì tu Ŋuntiŋ ki tɛ.
5Kabi Silasi fa Timote po-i Maseduwanɛ kɛniŋ ki ru, kí i na, Pooli cinŋ tɔri ma Kirinŋ wɔ Wulujii ki sunjo ki fan kili kì. Ntiŋ wuru ǹʼbi fɔɔ-ra Yawutu kiri tɛ, tu Yesu Kirinŋ Ɲaannakonshimaan ki i. 6Nka Yawutu kiri arì tu Pooli gbɛ kì, kí i wulu kulinŋ ni bi-ri ntiŋ tɛ. Niŋ ki ciiru, ntiŋ i awɔ juulinŋ kiri nuyuuyuu bo kí sun, ntiŋ i ǹʼbi tu : « Ábɛɛ cunŋ ki yɛkɛ ki fɛɛn á yɛrima kiri sun nmaŋ, mɔ́ɔ́n finŋ tɔri ǹʼnu kili kì. Kabi dɔɔ, míŋ a tiri shiya tɔri ru konaŋ kiri kɛlintɛ. »
7Ntiŋ po-i niŋ mani nu, ntiŋ i ta koŋ bɛɛ wɔ mani nu, nwɔ̀ tɔ wuru tu Titusi Yusitusi. Shiya tɔri ru koŋ wuru-i, nwɔ̀ wuru Kirinŋ gbɛ-a. Ntiŋ wɔ mani ki gban wuru kalinfu ki ra. 8Ŋì i ntiŋ tu niŋ mani nu, Kiripusi, ninwɔ̀ wuru kalinfu ki ŋununtiŋ ki i, niŋ fa awɔ kaninsuntɔnŋ kiri bataa i na bili Ŋuntiŋ ki ra. Korɛntitɔnŋ wɔ̀ri Pooli wɔ wulu kiri rama wuru-i, nini mwɔɔnna i bilinabi ki ma, kí i kí wu.
9Jibi bɛɛ cii ru, Ŋuntiŋ ki i ǹʼbi Pooli tɛ jafinŋ nu tu : « Fa kɛni kì, wulu ki bi-ri, fa ǹʼtɔnbo kì, 10sabu koŋ mwɔɔnna i kili ka ru, nwɔ̀ri ra na ji mɔ́ɔ́n konanbi i. Míŋ i miŋ fan, koŋ tɔri tenŋ a so a bo-i miŋ sun, ntiŋ i bijɛ ma miŋ wu kì. »
11Niŋ na, Pooli i tu Korɛnti kili ki ru, ntiŋ i jiri tenŋ fa ɲɛ taanmani ma konaŋ kiri kali ki ra, Kirinŋ wɔ wulu ki ra.
12Galiyɔnŋ wuru Akayi#18.12 Korɛnti kili ki wuru Akayi kɛniŋ ki ru. kɛniŋ ki ŋununtiŋ ki i waarinŋ wɔ̀ ru, Yawutu kiri i daa Pooli sun, kí i ta ntiŋ wu niŋ ɲaanfɛ, nwɔma niŋ i kiti ki kwuru ntiŋ sun. 13Kí tu niŋ tɛ tu : « Ka koŋ ka i konaŋ kiri ŋununapwulu bo-a Kirinŋ gbɛka ɲaan wɔ̀ sun, niŋ i yibɔɔ sariya kiri li-a. »
14Pooli tu a ra wulubi, nka Galiyɔnŋ i ntiŋ tɔnŋ nakwuru, niŋ i Yawutu kiri rupwulu tu : « Ee Yawutu ri! A koŋ ka ji wuru bi kulinŋ sinaŋ walima pɔli sinaŋ ki bɛɛ ma-ni, á bili ǹʼna tu míŋ wuru-ra ńʼtɔɔnye ábɛɛ tɛ, ŋí i kiti ka kwuru. 15Nka, ǹʼja-i tu ábɛɛ kari-ra wulu li fa tɔ ri fa áwɔ sariya ki bira, niŋ na, ábɔɔ bi i niŋ i. Míŋ a so niŋ kiti ki kwuru-i kì. »
16Ntiŋ i kí kwɔ po san kitikwurumaŋ ki ru. 17Niŋ na, kí bataa i kalinfu ki ŋununtiŋ Sɔsitɛni pa, kí i niŋ bwɔ kitikwurumaŋ ki ru, nka niŋ Galiyɔnŋ ŋununsuntiri kì.
Pooli pwulu ki Antiyɔsi
18Pooli i cin Korɛnti kili ki ru nmaŋ. Niŋ kɔɔtɛ, ntiŋ i pani bilinatɔnŋ kiri ra, ntiŋ fa Pirisili niŋ fa Akilasi i de kwurinŋ nu, kí i tiri Siri kɛniŋ ki kɛlintɛ. Pooli a tɔnye wuru Kirinŋ na, niŋ ki ra, ntiŋ i a ŋuniŋ ki shɛn Kenkere, kí i kila kí i tiri#18.18 Ŋuniŋ shɛn ki wuru ǹʼji-a tu tɔnye ki waari ki rafaa kɔ.. 19Kí ta-i so Efɛsi kili ki ru waarinŋ wɔ̀ ru, Pooli i a kila san Pirisili fa Akilasi ra niŋ mani nu. Ntiŋ i ta Kirinŋ wɔ wulu ki ɲaanbi-ri Yawutu kiri tɛ kalinfu ki ru. 20Niŋ Yawutu kiri i ntiŋ nafɛ tu ntiŋ cin arì fan pyaanniŋ, ntiŋ a tu kì. 21Nka ntiŋ ji-a so tiri sun, ntiŋ tu : « A Kirinŋ a tu, míŋ a na ábɛɛ tɛ waarinŋ tɔri ru. » Niŋ na, ntiŋ i de kwurinŋ bɛɛ ru Efɛsi, ntiŋ i tiri.
22Pooli ta-i so Sensare waarinŋ wɔ̀ ru, ntiŋ i tunpa ta coolinŋ wɔri bilinatɔnŋ kiri tɛ Yerusalɛmu. Ntiŋ i kila ntiŋ i jɛri tiri Antiyɔsi. 23Ntiŋ waaci pyaanŋ ma-i Antiyɔsi, ntiŋ i jɔrɔkɔ tiri Galasi fa Firiji kɛniŋ kiri ru, ntiŋ i ta bilinatɔnŋ kiri bataa kali fan, ntiŋ i kí siratu-ri.
Apolɔsi wɔ wulu ki Efɛsi fa Korɛnti bilinatɔnŋ kiri tɛ
24Niŋ waaci ki ru, Yawutu bɛɛ i so Efɛsi. Ntiŋ tɔ ki wuru tu Apolɔsi, ntiŋ i po-ri Alɛkisandiri kili ki ru. Ntiŋ wuru so-a wulu la kusɛbɛ, ntiŋ fani i ji wuru Kirinŋ wɔ Sɛbɛ ki ru wulu kiri tɔ-a haali. 25Ntiŋ wuru Ŋuntiŋ ki wɔ saa ki bi ki tɔ-a, ntiŋ fani i ji wuru konaŋ ki kalika shɔ-a niŋ bi ki sun a ɲaan ki tɛ. Nka nwɔ̀ wuru wuka ɲaan ki i, ntiŋ wuru Wutɔnŋ Yuhana wɔ ki bantenŋ tɔ-a. 26Apolɔsi i tu Efɛsi kili ki ru, ntiŋ i konaŋ kiri kali-li kalinfu ki ru, ŋununsɔɔbi wu. Jibi bɛɛ, Pirisili fa Akilasi i ntiŋ wɔ wulu kiri rama, niŋ na, kí i ntiŋ dɔri ta arì tɛ, kí i ta Kirinŋ wɔ saa kiri ɲaanbika shɔ ntiŋ tɛ.
27Niŋ kɔɔtɛ, ntiŋ na-i ǹʼbi tu a ra ta Akayi kɛniŋ ki ru, bilinatɔnŋ kiri i ntiŋ tɔnnafuru niŋ na, kí i sɛbɛ wɔri ta niŋ mani nu arì kaashi kiri tɛ, nwɔma nini i ntiŋ ŋununafuka shɔ. Ntiŋ so-i kí tɛ waarinŋ wɔ̀ ru, nwɔ̀ri bilinabi ki ma wuru Kirinŋ baraka ki ru, ntiŋ i ye nini tɛ kusɛbɛ. 28Ntiŋ wɔ wulu kiri wuru baraka kila-a Yawutu kiri wɔ kiri sun konaŋ ki bataa ɲaanna. Ntiŋ i ǹʼji ŋì i po Kirinŋ wɔ sɛbɛ ki ru, tu Yesu Kirinŋ Ɲaannakonshimaan ki i.
Zvasarudzwa nguva ino
Mabikiri 18: JOB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc.