Mabikiri 17
17
Pooli fa Silasi wɔ wulu ki Tesaloniki kili ki ru
(Tesalonikitɔnŋ kiri (1) 1; 2.1–16)
1Pooli fa Silasi fwuude-i Anfipolisi fa Apoloni kili kiri ra, kí i ta so Tesaloniki kili ki ru. Yawutu kiri wɔ kalinfu ki bɛɛ wuru niŋ kili ki ra. 2Nufaan jibi ki so-i, Pooli i ta niŋ kalinfu ki ru, miŋ tu ntiŋ dali wuru ntiŋ i ǹʼma-ni ɲaan wɔ̀ tɛ kili pyɛ kiri ra. Ntiŋ i Nufaan jibi byaŋ ma niŋ na, ntiŋ i Kirinŋ wɔ wulu ki shi, ntiŋ i konaŋ ki kali-li. 3Ntiŋ i ǹʼji konaŋ ki wu, tu Kirinŋ Ɲaannakonshimaan ki kakan-ni ntiŋ i cɔɔri, ntiŋ i kilɛn, tu niŋ kɔɔtɛ, tu ntiŋ i ŋmɛni po san konkwuu kiri kanfɛ. Ntiŋ wuru ǹʼbi-a kí tɛ sɛbɛ tu afinŋ Yesu wɔ̀ wulu bi-a kíbɛɛ tɛ, tu ninki Kirinŋ Ɲaannakonshimaan ki i.
4Yawutu kiri bɛɛ ri i ǹʼja tu niŋ wulu ki sɛli i, kí i arì bo Pooli fa Silasi fan. Shiya tɔri ru konaŋ wɔ̀ri wuru kɛni-na Kirinŋ jɛŋ, nini mwɔɔnna fa arɔɔ mari tɔtiŋ sinaŋ mwɔɔnna i arì bo kí fan sɛbɛ.
5Niŋ ɲaannajuubi i de Yawutu kiri ru, kí i kaniŋ fan kakaali li lakɔli bo arìmaŋ sun, kí i kí ruye, tu kí kili ki jɔrɔkɔ tu a kanŋ sun, kí i ǹʼbataa ɲaanmi. Niŋ ma-i, kí i ta Jaasɔnŋ wɔ kaniŋ ki sun, tu arì ta-a Pooli fa Silasi pa po konaŋ ki tɛ. 6Kí i ta bɔli nini ciniŋ, niŋ ki ra, kí i Jaasɔnŋ yɛri ki fa bilinatɔnŋ tɔri ri pa, kí i nini cɛɛn ta faantiŋ kiri tɛ, kí i arì wulu tu arì sun tu : « Á ǹʼshɛɛli, shuru wɔ̀ri juniɲa ki bataa jɔrɔkɔ tu-i a kanŋ sun, kí so-i yibɛɛ tɛ kwumaŋ sɛbɛ. 7Jaasɔnŋ i kí jɛshi ki i. Bi wɔ̀ri fa Sensaari wɔ sariya kiri fu kì, kí bataa mabi kiri i nini i. Kí i arì tɔɔn-na kí i ǹʼbi-ri tu masa tɔri nmaŋ, tu nwɔ̀ tɔ Yesu. »
8Niŋ wulu kiri i sɔɔmaŋ cin kitikwurutɔnŋ kiri fa konaŋ ki ra. 9Faantiŋ kiri i wari sinaŋ mwu Jaasɔnŋ fa a kaashi kiri wu, kí i kila kí i kí pani.
Pooli fa Silasi wɔ wulu ki Bere kili ki ru
10Bilinatɔnŋ kiri na-i ǹʼja ninkunŋ, kí i Pooli fa Silasi bosaara cii ru, tu kí ta Bere kili ki ra. Kí ta-i so niŋ kili ki ra waarinŋ wɔ̀ ru, kí i ta Yawutu kiri wɔ kalinfu ki ru. 11Bere Yawutu kiri ciiru ki shɔ wuru Tesalonikitɔnŋ kiri wɔ kiri wu. Kirinŋ wɔ wulu ki ramamaan ki di wuru nini tɛ haali. Pooli fa Silasi wuru wulu finŋ woo finŋ bi-a nini tɛ, si woo si, nini wuru niŋ wulu kiri rufɔɔ-ra, kí i ǹʼshɛɛli-li, a yìrì fa Kirinŋ wɔ Sɛbɛ ki wulu kiri ji fu-a. 12Niŋ ɲaan ki tɛ, niŋ Yawutu kiri mwɔɔnna i bili Yesu ra, ŋì i bo shiya tɔri kiri ru mari tɔtiŋ mwɔɔnna fa ǹʼshuru mwɔɔnna sun.
13Tesaloniki Yawutu kiri i ǹʼnama tu Pooli Kirinŋ wɔ wulu ki sunjo-a Bere kili ki ru sɛbɛ. Kí i na Beretɔnŋ kiri ruye bo Pooli fa Silasi sun sɛbɛ. 14Mìŋ manaanŋ tenŋ ki ru, bilinatɔnŋ kiri i Pooli bo ta mani narimaŋ nu fɔ wɛɛlufinju ki tɔnfan maŋ kiri ru. Nka Silasi fa Timote i tu Bere nmaŋ.
15Pooli bosaaratɔnŋ kiri i ta ntiŋ tu fɔ Atɛni, niŋ kɔɔtɛ, kí i arì pwulu na ntiŋ wɔ cinŋ wu Silasi fa Timote tɛ, tu nini ta a kila nmaŋ jona.
Pooli wɔ wulu ki Atɛnitɔnŋ kiri bɛɛ ri tɛ
16Ŋì i Pooli tu Silasi fa Timote suu-ra Atɛni kili ki ru, ntiŋ tɔnfɔɔ wuru kusɛbɛ, sabu kili ki bataa faa wuru pɛli li la. 17Niŋ na, a ntiŋ de-ri kalinfu ki ru, ntiŋ wuru wulubi-a Yawutu kiri fa shiya tɔri ru Kirinŋ jɛŋ kɛnitɔnŋ kiri tɛ niŋ bi ki sun, niŋ fa jibi woo jibi, a ntiŋ ta-ri maŋ ŋununfumaŋ ki ru, a ntiŋ koŋ woo koŋ kila-ri niŋ mani nu, ntiŋ wuru bari ki ma-a nintiŋ tɛ, mìŋ bi tenŋ ki bi sun.
18Koŋ ɲakilitiŋ wɔ̀ri i dɔri-ra tu epikuriyɛnŋ#17.18 epikuriyɛnŋ : Nini wuru kpeeri i, nwɔ̀ri wuru ǹʼbi-a tu konanmini kakan ŋi i nʼdintɛbi kiri ma-ni. ni, niŋ fa tu sitoyisiyɛnŋ ni, nini bɛɛ ri i wulu ki tɔnpa Pooli wu. Ǹʼbɛɛ ri tu : « Ka wulumwɔɔnnatiŋ ka nfɛnŋ bi-a? » Ǹʼtɔri ri Pooli wɔ wulu kiri rama-i Yesu bi ki fa konkwuu kiri ŋmɛnibi ki sun, nini tu : « Ǹʼyɔ miŋ tu ntiŋ tanfinŋ tɔri ri wulu bi-a, yibɛɛ nwɔ̀ri tɔ-a kì. »
19Kí i Pooli pa tiri kili ki ra wulubimaŋ#17.19 Kili ki ra wulubimaŋ ni namɔnimaan wuru nmaŋ, a kí ji-a furuba wulu bi, niŋ wuru ta-a bi niŋ mani nu. Niŋ mani ki tɔ ki wuru tu Areyopagusi kɔ́ɔ́ wulu ki ru. ki ru. Niŋ mani nu, kí i ntiŋ nanɔri tu : « Miŋ fa kalinŋ ŋunaŋ wɔ̀ na-i, miŋ a so ǹʼɲaanbi-i yibɛɛ tɛ wa? 20Miŋ i wulu wɔ̀ri bi-a, nini bataa i ǹʼŋunaŋ ni i yibɛɛ ɲaanna. Niŋ ki ra, yibɛɛ i ǹʼtɛ miŋ i yìrì ɲaanbika shɔ yibɛɛ tɛ. »
21Atɛnitɔnŋ kiri wuru kpeeri i, bi ŋunaŋ nama ki fa ǹʼnakali ki di wuru nwɔ̀ri tɛ. Cinŋ tɔri wuru niŋ kili ki danji kiri fa ǹʼnu jɛ kiri bataa ra bi ŋunaŋ nama fa bi ŋunaŋ nakali ciniŋ kì#17.21 Niŋ ki i ncin Pooli i so Kirinŋ wɔ wulu ki sunjo-i kí tɛ a sɔbɛ ra..
Pooli wɔ wulu ki Atɛnitɔnŋ kiri tɛ
22Pooli i tu niŋ mani ki ru, konaŋ ki faninmwuŋ, ntiŋ i ǹʼbi tu : « Atɛnitiiri, míŋ ǹʼja-i tu ábɛɛ cunadi tanfinŋ gbɛrama ki ra kusɛbɛ. 23Míŋ ńʼnumaanni-i ábɔɔ kili ki ru, míŋ ábɔɔ pɛli tanmaŋ kiri ja-i. Míŋ tenŋ ja-i, ǹʼsɛbɛ-i nwɔ̀ sun tu : ‹ Kirinŋ tɔbali tanmaŋ i. ›#17.23 Atɛnitɔnŋ kiri gbɛ, pɛli kiri wuru kirinŋ ni i. Á ǹʼtɔ tu ábɛɛ niŋ Kirinŋ ki wɔ̀ ka-a, niŋ i faa á ǹʼtɔ-a kì, tu míŋ i na-a ninki wulu sunjo ábɛɛ tɛ. 24Niŋ Kirinŋ ki juniɲa fa a ciiru finŋ kiri bataa ramɔni-i. Mìnki i kirinpɔli ki fa pwɔkulinŋ ki Ŋuntiŋ ki i. Konanmini na so fu tan-i ŋì a kwun nwɔ̀ ru kì. 25Mìnki i ɲaninkulutɔnbi ki wɔri-ra, ŋì i sifwuu ki wɔri-ri, ŋì i finŋ pyɛ kiri bataa wɔri-ri konaŋ bataa tɛ. Ǹʼmaku ǹʼna tu konanmini ye a tɛ bi bɛɛ ma kì. 26Ŋì pwɔkulinŋ bataa sun shiya kiri bataa po-i shuru tenŋ nu, ŋì i kí sɔɔ sɔɔ ta pwɔkulinŋ ki mani ki bataa ru, ŋì i daŋ sɔɔ kɔ́ɔ́ waaci kiri fa kɔ́ɔ́ mani kiri ra.
27Ŋì i niŋ ma-i, nwɔma konanmini i a ceeli, ŋì i a kpari a tɛ, ŋì i a banba, ŋì i a tɔ. Sɛli ki ra, Kirinŋ tɔmaŋ juu konanmini gbɛ kì, sabu ǹʼnadumaan i kì, ǹʼmyɛ-i yi bataa tɛ. 28Mìnki i ɲaninkulutɔnbi ki wɔri-ra yibɛɛ tɛ, yi i so yi ruti-i, ŋì yibɛɛ ramɔni-i ŋì i yi kɛɲɛ yi ɲaan kiri wu. Ábɔɔ bitɔtɔnŋ kiri bɛɛ ri i ninki bi-a tu : ‹ Yibɛɛ po-i Kirinŋ nu. › 29Niŋ na, a yibɛɛ ji po Kirinŋ nu, yibɛɛ kakan yi i ǹʼmiiri-ri tu Kirinŋ miŋ tu pɛli li kì. Nini wɔ̀ri ramɔni-i sɛniŋ, warifɔ walima kwɔ ra, ŋì i kɛɲɛ konanmini ɲakilila ki fa ǹʼwɔ so ki wu. »
30Niŋ kɔɔtɛ, Pooli tu : « Konaŋ kiri niŋ bi kulinŋ kiri wɔ̀ri ma-i kabi fɔlɔfɔlɔ, waarinŋ wɔ̀ ru kí wuru Kirinŋ tɔ-a kì, ŋì niŋ bi kiri bataa tu-i nmaŋ. Dɔnsaŋ, ŋì i kí bataa dɔri-ra mani bataa ru, tu kí ntɔri bi arɔɔ bijɛ kiri ru, kí i na afinŋ tɛ. 31Á ǹʼtɔ tu, Kirinŋ jibi tenŋ sɔɔ, ŋì a na kiti ki kwuru juniɲa ki bataa sun telibi wu, ŋì i kɛɲɛ koŋ fɔn tenŋ tenŋ ki wɔ bilinabi ki wu a Ɲaannakonshimaan ki ra. Ŋì ninwɔ̀ ŋmɛni po san-i konkwuu kiri ru, nwɔma konaŋ ki bataa i ǹʼtɔ tu ninki afinŋ Ɲaannakonshimaan ki i. »
32Pooli tɔnŋ so-i konkwuu kiri ŋmɛnibi ki sun waarinŋ wɔ̀ ru, ǹʼbɛɛ ri i yɛtan bo-ri ntiŋ sun, ǹʼtɔri ri ǹʼbi tu : « Yibɛɛ ra na niŋ pyɛ ki rama jibi tɔri miŋ tɔnŋ na. » 33Niŋ ɲaan ki tɛ, Pooli fa kí i arìmaŋ bo. 34Nka, ǹʼbɛɛ ri fa Pooli wuru kɛlinŋ tenŋ tɛ, nini i bilinabi ki ma Yesu ra. Niŋ bilinatɔnŋ kiri ru, kitikwurutɔnŋ tenŋ wuru nmaŋ, niŋ tɔ ki wuru tu Denisi#17.34 Denisi i koŋ tɔ ɔ, nwɔ̀ wuru kili ki ra wulubitɔnŋ ki bɛɛ tenŋ i., niŋ fa mari bɛɛ, nwɔ̀ tɔ wuru tu Damarisi, ŋì i bo koŋ dama tɔri ri sun.
Zvasarudzwa nguva ino
Mabikiri 17: JOB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc.