Mabikiri 11
11
Pyɛɛri wɔ wulu ki Yerusalɛmu Yawutu bilinatɔnŋ kiri tɛ
1 Cindaŋ pyɛ kiri fa Yude bilinatɔnŋ pyɛ kiri bataa i ǹʼnama tu shiya tɔri ru konaŋ kiri bɛɛ ri ji Kirinŋ wɔ wulu ki tɛ. 2Pyɛɛri a pwulu-i Yerusalɛmu waarinŋ wɔ̀ ru, Yawutu bilinatɔnŋ kiri i jɛbi ntiŋ gbɛ, 3tu nfɛnŋ na ntiŋ a tu ntiŋ i de shiya tɔri ru konaŋ kiri wɔ mani nu, fɔ ntiŋ fa kí i nufinŋ nu arìmaŋ fan.
4Niŋ na, bi finŋ woo finŋ ma-i nmaŋ, ntiŋ i a bo nini bataa ɲaanbi sun kí tɛ. 5Ntiŋ tu : « Míŋ wuru Yope kili ki ru waarinŋ wɔ̀ ru, jibi bɛɛ, ŋì i míŋ tu Kirinŋ nafɛ-a, míŋ i jafinŋ bɛɛ ja, niŋ fa juulinŋ sinaŋ po wuru-i, ǹʼkɔlimaan i ji-i cuunŋ a nɔnkɔnŋ pyiiraŋ ki fɔn tɛ. Ŋì i jɛri, ŋì i na so míŋ fɛ. 6Míŋ i ǹʼshɛɛlika shɔ, míŋ pwɔkulinŋ sun kanpyiirantinfinŋ kwuru ki bataa fa cɛɛnkunsunfinŋ kiri fa kirinpɔli la ɲaannaanŋ kwuru ki bataa ja ǹʼciiru. 7Míŋ i wulu lama, nwɔ̀ i ǹʼbi míŋ tɛ tu, ŋí jɔrɔkɔ, ŋí i finŋ ka bɛɛ kilɛn, ŋí i ǹʼtaa.
8Míŋ i ǹʼbi ńʼtu : ‹ Aayi Ŋuntiŋ, Musa wɔ sariya ki i ǹʼbi-a tu finŋ woo finŋ fa nu kì, ŋì i nini ji finŋ nɔɔmaan ni i, ńʼtu míŋ niŋ finŋ ki tɔri tenŋ nu-a kì. › 9Wulu ki tu míŋ tɛ sɛbɛ tu, Kirinŋ finŋ wɔ̀ ji finŋ fɔɔmaan a, tu míŋ fa niŋ shɛɛli ǹʼnɔɔmaan i kili kì. 10Niŋ bi ki ma-i ninkunŋ fɔ kaan byaŋ. Niŋ kɔɔtɛ, juulinŋ ki fa a ciiru finŋ kiri i arì pwulu tunpa kirinpɔli ki ru nmaŋ.
11Mìŋ manaanŋ tenŋ ki yɛri ki ru, yibɛɛ wuru mani wɔ̀ ru, shuru byaŋ i na tu niŋ tɔnŋ na. Kí kí cin na wuru míŋ tɛ, ŋì i po Sensare. 12Ɲiniwɔlinŋ ki tu míŋ tiri kí fan, ŋí fa koŋ san koŋ nu kì. Yibɛɛ tindaŋ Yawutu taanmani wɔ̀ri i kari i, nini i ta míŋ fan Sensare. Yi bataa i ta de Kɔrinɛyi wɔ mani ki ru. 13Niŋ i a bo bi kiri ɲaanbi sun yibɛɛ tɛ : Mɛlɛkɛn ki na-i a yɛri ji ntiŋ wu awɔ fu ki ru, ŋì i wulu ki bi ntiŋ tɛ ɲaan wɔ̀ tɛ, ntiŋ i nini bataa rakali yibɛɛ tɛ. Ntiŋ tu mɛlɛkɛn ki ǹʼbi afinŋ tɛ, tu a koŋ bo ta Yope, ntiŋ i ta Simɔŋ tɔ bɛɛ dɔri na, kí i nwɔ̀ dɔri-ra tu Pyɛɛri sɛbɛ. 14Tu nintiŋ a na wulu bɛɛ bi afinŋ tɛ, nwɔ̀ a ji sababu afinŋ fa awɔ kaninsuntɔnŋ kiri bataa i arì mwu.
15Míŋ ńʼtɔnŋ ki rawwuli-i, ńʼtu ŋí a wulubi kí tɛ mani wɔ̀ ru, Ɲiniwɔlinŋ ki i jɛri kí sun, miŋ tu ǹʼjɛri-i yibɛɛ sun Pantikɔti shikaŋ ki ru ɲaan wɔ̀ tɛ. 16Niŋ waaci ki ru, míŋ ɲakilila i bo Ŋuntiŋ ki wɔ wulu bimaan ki tɛ tu : ‹ Yuhana konaŋ ki wu-i ju ra, nka ábɛɛ ra na wu Ɲiniwɔlinŋ ki ra. › 17A Kirinŋ ji a tu, ŋì i kafinŋ tenŋ wɔri yibɛɛ fa kí fɔn tɛ yi Ŋuntiŋ Yesu Kirisa bilinabi ki baraka ra, míŋ nkɛnŋ, ŋí i ǹʼbi tu niŋ fa ma kì? »
18Konaŋ ki niŋ wulu kiri rama-i waarinŋ wɔ̀ ru, kí tɔnŋ kiri i fili. Kí i Kirinŋ gbɛ tu : « Sɛli ki ra, Kirinŋ ncusun-i shiya tɔri kiri i so ntɔri bi-i arɔɔ bijɛ kiri ru, nwɔma kí i ɲaninkulutɔnbi ki kila. »
Antiyɔsi bilinatɔnŋ kiri bi ki
19Bilinatɔnŋ wɔ̀ri bili po wuru Ecɛni kilɛnmaan ki kɔɔtɛ, nini bɛɛ ri i tiri Fenisi fa Sipirɛ sɔɔta kiri ru, ǹʼbɛɛ ri i ta Antiyɔsi kili ki ra. Nini wuru Kirinŋ wɔ wulu ki bi-a koŋ tɔri tɛ arì Yawutu shi kiri ciniŋ kì. 20Nka bilinatɔnŋ kiri bɛɛ ri i na po Sipirɛ fa Sirɛni, kí i tiri Ŋuntiŋ Yesu Wulujii ki bi shiya tɔri ru konaŋ kiri tɛ, nwɔ̀ri wuru Antiyɔsi kili ki ru. 21Ŋuntiŋ ki i ye kí tɛ awɔ sotinbi ki wu, ŋì i ncusun koŋ mwɔɔnna i bili a ra, kí i ji awɔ ri.
22Yerusalɛmu bilinatɔnŋ kiri niŋ nama-i waarinŋ wɔ̀ ru, kí i Barinabasi bo ta Antiyɔsi. 23Barinabasi so-i nmaŋ waarinŋ wɔ̀ ru, ntiŋ i Kirinŋ wɔ baara mamaan ki ja bilinatɔnŋ kiri wu, niŋ i ntiŋ tɔnfili. Ntiŋ i bilinatɔnŋ kiri cunadi, tu kí ǹʼpa tu Ŋuntiŋ ki cɛfan tɔnnafurubi wu. 24Barinabasi wuru koŋ sɔbɛ ɛ, ntiŋ faa wuru Ɲiniwɔlinŋ ki ra, ntiŋ i kɔɔ bilinabi ki ru. Koŋ mwɔɔnna tɔri ri i bili Ŋuntiŋ ki na.
25Niŋ kɔɔtɛ, Barinabasi i tiri Tarisi kili ki ra, ntiŋ i ta Sɔɔli maŋ ceeli. 26Ntiŋ ta-i Sɔɔli ja waarinŋ wɔ̀ ru, ntiŋ i na niŋ wu Antiyɔsi. Kí koŋ fuuli ki i jiri tenŋ ma niŋ egilisi ki ru, kí i konaŋ mwɔɔnna kali. Bilinatɔnŋ kiri dɔri-ri tu kiricɛn ni, niŋ tɔnpa-i Antiyɔsi.
27Niŋ waaci ki ru, Kirinŋ wɔ cintɔnŋ bɛɛ ri i po Yerusalɛmu, kí i na Antiyɔsi. 28Kí ru koŋ tenŋ tɔ wuru tu Agabusi, niŋ i jɔrɔkɔ tu, ntiŋ i ǹʼbi Ɲiniwɔlinŋ ki baraka ra, tu bɛɛ sinaŋ a na bo pwɔkulinŋ ki mani ki bataa ru. Niŋ wulu ki i na ji sɛli i, niŋ i ma Ɔrɔmu masa sinaŋ Kulodi wɔ sunŋ ki ra. 29Antiyɔsi bilinatɔnŋ kiri niŋ Kirinŋ wɔ cintɔnŋ ki wɔ wulu kiri rama-i waarinŋ wɔ̀ ru, kí tu arì arì gbɛ bo arìmaŋ sun, arì i ye Yude sɔɔta ki ru bilinatɔnŋ kiri tɛ. 30Kí finŋ wɔ̀ri bo-i arìmaŋ sun, kí i nini wɔri Barinabasi fa Sɔɔli tɛ, kí i ta yìrì wɔri Yude bilinatɔnŋ kiri tɛ.
Zvasarudzwa nguva ino
Mabikiri 11: JOB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc.