Mabikiri 10
10
Pyɛɛri fa Kɔrinɛyi bi ki
1Koŋ bɛɛ wuru Sensare, nwɔ̀ tɔ wuru tu Kɔrinɛyi. Ɔrɔmu surudashi kwuru wɔ̀ tɔ wuru tu Italikwuru, niŋ wuru niŋ kwuru ki kapitɛni ki i. 2Niŋ koŋ ki wuru Kirinŋ jɛŋ kɛnintɔnŋ sinaŋ i. Ntiŋ fa awɔ kaniŋ ki bataa wuru Kirinŋ gbɛ-a arìmaŋ fan. Ntiŋ wuru ye-a Yawutu gbɛwɔ mwɔɔnna tɛ, ntiŋ i Kirinŋ nafɛ-ri waarinŋ bataa ru. 3Jibi bɛɛ, bilana Kirinŋ nafɛ waari ki ru, ntiŋ i jafinŋ ka ja : Kirinŋ wɔ mɛlɛkɛn bɛɛ i de ntiŋ wɔ fu ki ru, ŋì i ntiŋ dɔri tu : « Kɔrinɛyi! » 4Kɔrinɛyi i mɛlɛkɛn ki shɛɛli, kɛmi i de ntiŋ nu, ntiŋ i ǹʼbi tu : « Nfɛnŋ, Ŋuntiŋ ki? » Niŋ i ǹʼnupwulu tu : « Miŋ nafɛ wɔ̀ri tan-i, Kirinŋ nini nama-i, niŋ fa miŋ ye-i gbɛwɔ kiri tɛ ɲaan wɔ̀ tɛ, ŋì i niŋ bataa ja. 5Dɔnsaŋ, koŋ cin tiri Yope, ntiŋ i ta shuru bɛɛ dɔri na nʼtɛ kwumaŋ, nwɔ̀ tɔ i tu Simɔŋ, kí i ntiŋ dɔri-ri tu Pyɛɛri sɛbɛ. 6Ntiŋ i kaatɔnŋ bɛɛ wɔ mani nu, wɛɛlufinju ki tɔnŋ na. »
7Mɛlɛkɛn ki tirimaan ki kɔɔtɛ, Kɔrinɛyi i awɔ joŋ koŋ fuuli dɔri, ntiŋ i a dintɛ surudashi ki bɛɛ tenŋ bo kí sun, ninwɔ̀ wuru Kirinŋ jɛŋ kɛnitɔnŋ i. 8Ntiŋ i mɛlɛkɛn ki wɔ wulu kiri bataa rakali kí tɛ, ntiŋ i kila, ntiŋ i kí bo ta Yope.
9Niŋ sisarifuluntɔnŋ ki, bilana Kirinŋ nafɛ waarinŋ ki ru, shuru byaŋ kari i myɛ Yope kili ki tɛ. Niŋ waari ru, Pyɛɛri yɛri ki wuru Kirinŋ nafɛ-a sankasoŋ ki sun. 10Ntiŋ i tu niŋ Kirinŋ nafɛ ki ra fɔ bɛɛ i na kwulu ntiŋ na. Ntiŋ tu kí nufinŋ namɔni wɔri a tɛ. Kí ji-i nufinŋ ki ramɔni-na waarinŋ wɔ̀ ru, ntiŋ i ji Kirinŋ nafɛ ki ra nmaŋ, ntiŋ i jafinŋ bɛɛ ja. 11Ntiŋ i kirinpɔli ki rawwulumaan ja, finŋ bɛɛ i jɛri yiri-ri ǹʼnu, niŋ fa juulinŋ sinaŋ po wuru-i, ǹʼkɔlimaan i ji-i cuunŋ a nɔnkɔnŋ pyiiraŋ ki fɔn tɛ. Ŋì i jɛri, ŋì i na so fwuniŋ ki sun. 12Niŋ juulinŋ ki ciiru, kanpyiirantinfinŋ mwɔɔnna wuru nmaŋ, ŋì i bo cɛɛnkunsunfinŋ kiri fa ɲaannaanŋ kwuru ki bataa sun.
13Pyɛɛri i wulu bɛɛ rama tu : « Pyɛɛri! Jɔrɔkɔ, ŋi i finŋ ka bɛɛ kilɛn taa. »
14Pyɛɛri i ǹʼnupwulu tu : « Aayi Ŋuntiŋ, Musa wɔ sariya ki i ǹʼbi-a tu finŋ woo finŋ fa nu kì, ŋì i nini ji finŋ nɔɔmaan ni i, míŋ niŋ finŋ ki tɔri tenŋ nu-a kì. »
15Niŋ wulu ki i ǹʼbi Pyɛɛri tɛ sɛbɛ tu : « Kirinŋ finŋ wɔ̀ ji-i finŋ fɔɔmaan a, fa niŋ shɛɛli ǹʼnɔɔmaan kili kì. » 16Niŋ bi ki ma-i ninkunŋ fɔ kaan byaŋ. Niŋ kɔɔtɛ, juulinŋ ki fa a ciiru finŋ kiri i arì pwulu tunpa kirinpɔli ki ru nmaŋ.
Kɔrinɛyi wɔ cintɔnŋ kiri so ki Pyɛɛri sun
17Pyɛɛri ciirufɔnimaan i tu a miiri-ra awɔ finŋ jamaan kiri kɔri ki sun. Mìŋ waaci tenŋ ki ru, Kɔrinɛyi koŋ wɔ̀ri cin wuru-i, nini i Simɔŋ wɔ mani ki nanɔri tan de-ri fɔ kí i ta tu niŋ tɔnŋ na. 18Kí i coolinŋ tan, kí i nanɔri tan tu : « Simɔŋ wɔ̀ i dɔri-ra tu Pyɛɛri, niŋ jɛri-i kwumaŋ wa? » 19Pyɛɛri wuru faa a miiri-ra ka jafinŋ kari kɔri ki bi sun, Ɲiniwɔlinŋ ki i ǹʼbi ntiŋ tɛ tu : « Ǹʼshɛɛli, koŋ byaŋ tu-i fu ki tɔnŋ na, kí i miŋ ceeli-la. 20Jɔrɔkɔ, ŋi i jɛri tiri kí fan, fa koŋ san koŋ nu kì, sabu mínki kí cin-i miŋ tɛ. »
21Niŋ na, Pyɛɛri i jɛri ta niŋ koŋ kiri tɛ, ntiŋ i ǹʼbi kí tɛ : « Ábɛɛ i koŋ wɔ̀ ceeli-la, míŋ yɛ. Ábɛɛ na ŋuŋ ki ǹʼdanwɔ? »
22Kí i ǹʼnupwulu tu : « Kapitɛni Kɔrinɛyi yibɛɛ cin-i. Koŋ telimaan yɛ, ntiŋ i kɛni-ni Kirinŋ jɛŋ. Yawutu kiri fɔn i ntiŋ tɔ shɔɔrinŋ bi-a. Mɛlɛkɛn wɔlinŋ bɛɛ a yɛri ji-i ntiŋ wu, ŋì i ǹʼbi tu ntiŋ na miŋ dɔri ta awɔ mani nu, tu wulu bɛɛ miŋ gbɛ, ŋi i ǹʼbi ntiŋ tɛ. » 23Pyɛɛri kɔ́ɔ́ wulu kiri rama-i waarinŋ wɔ̀ ru, ntiŋ tu kí san.
Pyɛɛri somaan ki Kɔrinɛyi wɔ mani ki ru
Ǹʼsisarifuluntɔnŋ ki, Pyɛɛri fa kí i tiri arìmaŋ fan. Yope bilinatɔnŋ kiri bɛɛ ri i ta kí fan. 24Niŋ sisarifuluntɔnŋ ki, kí i so Sensare. Kɔrinɛyi wuru kí sunsuu-ra. Ntiŋ awɔ kaninsuntɔnŋ kiri fa awɔ wɔshuru sɔbɛ kiri dɔri sɔɔ wuru awɔ mani ki ru. Kí i Pyɛɛri sunsuu-ri. 25Pyɛɛri so-i nmaŋ waarinŋ wɔ̀ ru, Kɔrinɛyi i na ntiŋ ŋununafu. Ntiŋ i a sunbili fwuniŋ sun Pyɛɛri fɛ, ntiŋ i ntiŋ co gbɛbi wu. 26Nka Pyɛɛri i ntiŋ pa, ntiŋ i ǹʼbi ntiŋ tɛ tu : « Jɔrɔkɔ tu, míŋ yɛrima ki finŋ tɔri konanminaaŋ ciniŋ kì. » 27Kí i tu wulu ki bi-a arìmaŋ tɛ, kí koŋ fuuli ki i de fu ki ru, Pyɛɛri i konaŋ mwɔɔnna ki rakɔlimaan ki ja a jɛŋ. 28Ntiŋ i ǹʼbi kí tɛ tu : « Ábɛɛ yɛrima kiri i ǹʼtɔ-a tu yibɔɔ sariya ki ǹʼbi-a tu Yawutu tɔri dantenŋ fa shiya tɔri fa dɛbɛ bi sun kì, niŋ fa tu yi fa de shiya tɔri wɔ fu ru kì. Nka Kirinŋ ǹʼji-i míŋ wu, tu míŋ fa koŋ san koŋ nu kì, ŋí i ǹʼbɛɛ ri shɛɛli-li koŋ nɔɔmaan ni walima koŋ wu fɔɔbali li i kì. 29Ninki cin-i, ábɛɛ míŋ dɔri-i waarinŋ wɔ̀ ru, míŋ i na shuu. Dɔnsaŋ, á ńʼdɔri ŋuŋ ki bi ńʼtɛ. » 30Kɔrinɛyi i Pyɛɛri rupwulu tu : « Jiŋ i ǹʼsunŋ pyiirantɔnŋ ki i kaa, míŋ wuru Kirinŋ nafɛ-a bilana bɛɛ ru, ńʼwɔ kaniŋ ki sun, míŋ i kwulu míŋ koŋ bɛɛ tu ja ńʼɲaanfɛ, ntiŋ wɔ juulinŋ kiri i cucu-ri. 31Ntiŋ i ǹʼbi míŋ tɛ, tu míŋ nafɛ wɔ̀ri tan, tu Kirinŋ nini nama, niŋ fa tu míŋ ye gbɛwɔ kiri tɛ ɲaan wɔ̀ tɛ, tu ŋì i niŋ bataa ja. 32Ntiŋ tu míŋ kpeeri cin ta Yope, kí i ta koŋ bɛɛ dɔri na, nwɔ̀ tɔ i Simɔŋ, tu ǹʼbɛɛ ri i ntiŋ dɔri-ri tu Pyɛɛri. Tu ntiŋ i kaatɔnŋ Simɔŋ wɔ mani nu, wɛɛlufinju ki tɔnŋ na. 33Niŋ ki ra, míŋ i kpeeri bo ta miŋ dɔri shuu. Miŋ namaan ki shɔ-i. Dɔnsaŋ, yi bataa rakɔlimaan ki i kaa Kirinŋ ɲaanfɛ, Ŋuntiŋ ki nwɔ̀ bi-i miŋ tɛ, niŋ bi yi tɛ. »
34Niŋ na, Pyɛɛri i wulu ki shi, ntiŋ i ǹʼbi : « Sɛli ki ra, míŋ ǹʼtɔ-i dɔɔ tu Kirinŋ koŋ san-a koŋ nu kì. 35Nka shiya woo shiya ru, konwɔtiŋ i kɛni-na Kirinŋ jɛŋ, ntiŋ i tiri-ri telibi wu, ninki bi di-i Kirinŋ tɛ. 36Ŋì awɔ wulu ki wɔri-i Isirayɛli nupo ki tɛ, ŋì i ɲaanfɛfili Wulujii ki sunjo kí tɛ, kí a ninwɔ̀ kila Yesu Kirisa baraka ra. Niŋ Yesu ki i konaŋ bataa Ŋuntiŋ i. 37Ábɛɛ bataa niŋ Yesu wulu ki rama-i. Ǹʼtɔnpa-i Galile sɔɔta ki ru, kabi waarinŋ wɔ̀ ru Wutɔnŋ Yuhana wuru ǹʼbi-a tu konaŋ ki wu, fɔ ŋì i na Yude kɛniŋ ki bataa rapo. 38Kirinŋ Yesu Nansarɛtitɔnŋ ki ɲaannashi-i ɲaan wɔ̀ tɛ, ŋì i ntiŋ faa Ɲiniwɔlinŋ ki wɔ sotinbi ki ra, ábɛɛ niŋ tɔ-i. Á i ǹʼtɔ-ri tu Kirinŋ wuru ntiŋ fan, tu ntiŋ wuru a maanni de-a kɛniŋ ki ru, ntiŋ i bi shɔɔrinŋ ni ma-ni, ntiŋ i shitaanni wɔ konaŋ cɔɔrimaan kiri bataa kene-ni.
39Yesu bi finŋ woo finŋ ma-i Yawutu kiri wɔ kɛniŋ ki ru, yibɛɛ i nini bataa shɛɛri ri i, fɔ ŋì i na so Yerusalɛmu, yibɛɛ i nini bataa shɛɛri ri i. Niŋ mani nu, kí ntiŋ kpinkpi-i suu sun, kí i ntiŋ kilɛn. 40Ntiŋ beŋ ki sunŋ byantɔnŋ ki, Kirinŋ ntiŋ ŋmɛni po san-i konkwuu kiri kanfɛ. Ŋì i ncusun ntiŋ i a yɛri ji ǹʼbɛɛ ri wu. 41Nka, koŋ bataa ntiŋ ja kì. Ntiŋ a yɛri ji-i yibɛɛ kiri bantenŋ wu, Kirinŋ yibɛɛ wɔ̀ri ɲaannashi wuru-i ǹʼbwuumaan a, yi i ji ntiŋ shɛɛri kiri i. Yibɛɛ kiri nufinŋ ki nu-i, yi i yi mwunu ntiŋ fan, ntiŋ ŋmɛnimaan ki kɔɔtɛ, ŋì i po konkwuu kiri kanfɛ. 42Ntiŋ ǹʼbi-i yibɛɛ tɛ, tu yi ǹʼsunjo konaŋ ki bataa tɛ, yi i ǹʼfɔɔ tu Kirinŋ afinŋ ki sɔɔ, tu a i ji ɲaninkulutɔnŋ kiri fa konkwuu kiri wɔ kitikwurutɔnŋ ki i. 43Kirinŋ wɔ cintɔnŋ kiri bataa ǹʼbi-i tu koŋ finŋ woo finŋ bili Yesu ra, tu ntiŋ baraka ra Kirinŋ a nintiŋ wɔ bijɛ kiri tu nintiŋ tɛ. »
Kirinŋ wɔ Ɲiniwɔlinŋ ki jɛri bi ki shiya tɔri ru konaŋ kiri sun
44Ŋì i Pyɛɛri tu wulu ki ra, Ɲiniwɔlinŋ ki i jɛri ntiŋ wɔ wulu ki ramatɔnŋ kiri bataa sun. 45Yawutu bilinatɔnŋ wɔ̀ri na wuru Pyɛɛri fan, nini ǹʼja-i waarinŋ wɔ̀ tu Ɲiniwɔlinŋ ki jɛri shiya tɔri ru konaŋ kiri sun arìbɛɛ fan sɛbɛ, niŋ i bo nini tɔnŋ sun. 46Kí wuru ǹʼja-a ncinŋ, tu nini wuru Kirinŋ gbɛ-a wulu tɔri ri ru Ɲiniwɔlinŋ ki baraka ra. 47Niŋ na, Pyɛɛri tu : « Koŋ kari Ɲiniwɔlinŋ ki kila-i miŋ tu yibɛɛ yɛrima kiri, koŋ a so a kaan-a kí wu ki sun dɔɔkunŋ? » 48Niŋ na, ntiŋ tu kí wu Yesu Kirisa tɔ ki ra. Niŋ kɔɔtɛ, kí i ntiŋ nafɛ tu ntiŋ sunŋ fuulaaŋ ma arì fan.
Zvasarudzwa nguva ino
Mabikiri 10: JOB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc.