યાકુબુ પત્રો 5
5
માલદારુ માટે ચેતવણી
1ઓ માલદારુહુ માઅ ગોઠ ઉનાયા, તુમુહુ પોતાપે આવનારા દુખુપે બોમબ્લી-બોમબ્લી રોળા. 2તુમા ધનુ નાશ વી ગીયો આને તુમા પોતળે કીડે ખાય ગીયે. 3તુમા હોના ચાંદીમે કાટ લાગી ગીયીહી, આને તે કાટ તુમા વિરુધુમે સાક્ષી આપી, આને એ કાટ તુમા શરીરુલે આગી સમાન બાલી દી. આને તુમુહુ છેલ્લા દિહુમે ધન એકઠો કેયોહો. 4હેરા જીયા મોજર્યાહા તુમા ખેતે વાડ્યે, તીયા મોજર્યા રોળુલો આવાજ ઉનાયા, જીયા આરી તુમુહુ મોજરી દાંઅ ધોકો દેદોહો આને તીયા મોજર્યા રોળુલો, જીયાહા તુમા ઉપજ એકઠી કેયી, સેના પ્રભુહુ ઉનાય લેદોહો. 5તુમુહુ તોરતીપે મોજ-મોજામે લાગલા રેજા આને મોડોજ સુખ ભોગા; એહેકી કીને તુમુહુ તીયા જાનવરુ સમાન હાય જીયાહાને માયને ખાંઅ પેલ્લા મોડા આને તાજા બોનાવામે આવેહે, તેહેકી તુમુહુ ઇ નાહ જાંતા કા તુમા ન્યાય વેનારો હાય. 6તુમુહુ ધર્મીલે દોષી બોનાવીને માય ટાક્યો, પેન તોઅ તુમા વિરુધ નાહ કેતા.
દુખુમે ધીરજ રાખુલો
7ઈયા ખાતુરે ઓ પાવુહુ આને બોયુહુ, પ્રભુ આગમનુ હી લોગુ ધીરજ રાખા, હેરા ખેડુત તોરતી કિંમતી પાકુ આશા રાખતા પેલ્લો આને છેલ્લો વોર્ષો વેરા લોગું ધીરજ રાખેહે કા પાક વાદે આને વાડા ખાતુરે તીયાર રેઅ. 8એહેકી તુમુહુ બી ધીરજ રાખા આને આશા રાખા માઅ છોડાહા કાહાકા પ્રભુ માહરીજ આવી રીયોહો. 9ઓ પાવુહુ આને બોયુહુ, એકબીજાપે દોષ માઅ લાગવાહા, કા તુમાપે બી દોષ નાય લાગવામે આવે, હેરા, ન્યાય કેનારો ખુબુજ પાહી ઉબલો હાય. 10ઓ પાવુહુ આને બોયુહુ, જીયા ભવિષ્યવક્તાહા પ્રભુ નાવુકી ગોઠયા કેયા તીયાહાને દુઃખ વેઠુલો આને ધીરજ રાખુલો નમુનો હોમજા. 11હેરા આમુહુ ધીરજ રાખનારાહને ધન્ય આખતાહા, તુમુહુ અયુબુ ધીરજુ વિશે તા ઉનાયાહાજ આને પ્રભુવેલેને જો તીયાલે જો ફલ મીલ્યો તુમુહુ તીયાલે બી જાંય લેદોહો, જીયાકી પ્રભુ ખુબુજ કરુણા આને દાયા જાહેર વેહે.
12પેન ઓ માઅ પાવુહુ આને બોયુહુ, બાદા કેતા મોડી ગોઠ એ હાય, કા કસમ માઅ ખાહા નાય હોરગા, નાય તોરતી, નાય કેલ્લી એગી વસ્તુ, પેન તુમા ગોઠી હોવુ હોવ આને નેયુ નાહ કા તુમુહુ પરમેહેરુ મારફતે દોષી નાય ઠેરવામે આવે.
પ્રાર્થના સામર્થ
13કાદાચ તુમામેને એગોહો દુઃખી હાય, તા તોઅ પ્રાર્થના કે, આને કાદાચ ખુશ હાય તા સ્તુતિ ગીતે આખે. 14કાદાચ તુમામે કેડો રોગી હાય, તા તોઅ મંડળી વડીલુહુને હાદે આને પ્રભુ નાવુકી તીયાપે તેલ લાગવીને તીયા માટે પ્રાર્થના કે. 15વિસ્શ્વાસુ પ્રાર્થના લીદે રોગી વાચાય જાય, આને પ્રભુ તીયાલે હારો કેરી, આને કાદાચ તીયાહા પાપ બી કેયા વેરી તા પરમેહેર તીયાલે માફ કેરી. 16ઈયા ખાતુરે તુમુહુ આપસુમે એકબીજા હુંબુર પોત-પોતા પાપુહુને કબુલ કીલ્યા આને એકબીજા માટે પ્રાર્થના કેરા, જીયાકી તુમુહુ હારા વી જાઅ, ધર્મી માંહા પ્રાર્થના પ્રભાવુ કી ખુબુજ કાય-કાય વી સેકેહે. 17એલિયા ભવિષ્યવક્તા બી આપુ સારકો દુઃખ સુખ ભોગનારો માંહુ આથો, આને તીયાહા પોતા પુરા મનુકી પ્રાર્થના કેયી, કા વોહરાત નાય પોળે; આને સાળે તીન વોર્ષે લોગુ તોરતીપે વોહરાત નાય પોળ્યો. 18ફાચે તીયાહા પ્રાર્થના કેયી તાંહા જુગુમેને વોહરાત પોળ્યો, આને તોરતીપેને પાક ઉત્પન્ન વીયો.
19ઓ માઅ પાવુહુ આને બોયુહુ, કાદાચ તુમામેને એગોહો હાચાયુ વાટ છોડી દેઅ આને કાદાચ એગોહો તીયાલે મન ફીરવા મદદ કે, 20તા તુમનેહે ઇ જાંય લાં જોજે કા કાદાચ જો કેડો તીયા ભટકુલા પાપીલે મન ફીરવા મદદ કેતા તોઅ એક જીવુલે મોતુમેને વાચાવી આને પરમેહેર તીયા પાવુ ખુબુજ પાપુહુને માફ કી દી.
Zvasarudzwa nguva ino
યાકુબુ પત્રો 5: DUBNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.