1 પિત્તરુ પત્રો 1
1
નમસ્કાર
1આંય પિત્તર, જો ઇસુ ખ્રિસ્તુ ચેલો બી હાય, ઓ પત્ર તીયા લોકુ માટે લેખુહુ, જે પરદેશી લોકુ હોચે પોતિયુસ, ગલાતિયા, કપુદીકીયા, આસિયા આને બીતુનીયા વિસ્તારુંમે વેર-વિખેર વીને રેતાહા. 2પરમેહેર બાહકાહા પેલ્લાનેજ તુમનેહે પોતા લોક વેરા આને પવિત્રઆત્મા કામુ મારફતે તુમનેહે પવિત્ર કેરા માટે પસંદ કી લેદલા. તીયાહા એહેકી ઈયા ખાતુરે કેલો કા તુમુહુ ઇસુ ખ્રિસ્તુ આજ્ઞા પાલન કેરા, આને તીયા રોગુતુ મારફતે શુદ્ધ વી જાઆ. પરમેહેર તુમનેહે કૃપા આને શાંતિ બહુતાયુકી આપતો રેઅ.
એક જીવતી આશા
3આપુ પ્રભુ ઇસુ ખ્રિસ્તુ આને બાહકા આને પરમેહેરુ ધન્યવાદ વેઅ, જીયાહા ખ્રિસ્તુ મોરુલોમેને ફાચે જીવતો ઉઠુલોકી, આપનેહે તીયા મોડી દયા લીદે નવો જીવન મીલ્યોહો, જીયાકી આપનેહે એક જીવતી આશા ઉત્પન્ન વેહે. 4પરમેહેરુહુ જો વારસામે પોતા લોકુ માટે હોરગામે થોવ્યોહો, તોઅ કીદીહીજ નાશ નાય વેઅ, નાય ખારાબ વેઅ આને નાય જુનો વેઅ. 5તુમા વિશ્વાસ કેરુલોકી પરમેહેર તુમનેહે પોતા સામર્થુ મારફતે સુરક્ષિત રાખેહે, તોઅ ઇસુ ખ્રિસ્ત ફાચે આવુલો લોગુ તુમનેહે સુરક્ષિત રાખી, તાંહા તુમુહુ જાંય જાંહા કા પરમેહેરુહુ તુમનેહે પાપ આને મોતુમેને પુરી રીતીકી ઉદ્ધાર પામાવ્યાહા.
6કાદાચ આમી થોડા સમયુ માટે તુમનેહે અલગ-અલગ પ્રકારુ પરીક્ષા લીદે દુઃખી વેરા પોળેહે, તેબી તુમનેહે તીયુ ગોઠીકી ખુશ વેરા જોજે. 7આને એ મુસીબત તુમા વિશ્વાસ હાચો હાય કા નાહ ઇ પારખા ખાતુરે આવેહે, નાશ વેનારા હોનાલે બી આગીમે પારખામે આવેહે, આને તુમા વિશ્વાસ તા હોના કેતા કિંમતી હાય, આને તુમા વિશ્વાસ સ્થિર રેઅ ઈયા ખાતુરે તીયા પરીક્ષા વેરા જોજે. જાંહા ઇસુ ખ્રિસ્ત બીજીવારી આવી તાંહા તુમુહુ સ્તુતિ, મહિમા આને આદર મીલી. 8ઇસુલે તુમુહુ હેયો બી નાહ તેબી તુમુહુ તીયા આરી પ્રેમ રાખતાહા, આને તુમુહુ આમી બી તીયાલે નાહ હેતા પેન વિશ્વાસ કેતાહા. આને એહેકી આનંદ કીને ખુશ વેતાહા, જીયાલે મુયુકી ગોગીને પ્રસંશા નાહ કી સેક્તાહા, જો મહિમાકી પોરાલો હાય. 9તુમુહુ આનંદિત હાય કાહાકા પરમેહેરુહુ તુમા આત્મા ઉદ્ધાર કી રીયોહો, આને ઇ બાદો ખ્રિસ્તુમે તુમા વિશ્વાસુ ફલ હાય.
10ઇયાજ ઉદ્ધારુ વિશે તીયાં ભવિષ્યવક્તાહા ખુબુજ હોદળી આને તપાસ કેયી, આને તીયાહા ઈયા કૃપા વિશે ભવિષ્યવાણી કેલી, જે પરમેહેર તુમનેહે આપનારો હાય. 11ઇસુ ખ્રિસ્તુ આત્મા ભવિષ્યવક્તામે આથી, ખ્રિસ્તુ દુઃખ આને તીયાં દુઃખુ બાદ મીલનારી મહિમા વિશે આંય તીયાહાને પેલ્લાથીજ આખલી આથી. તીયાહા એ ગોઠયા કીદીહી વેરી આને કેહકી વેરી ઇ જાંણુલો કોશિશ કેયી.
પવિત્ર જીવન જીવુલો માટે હાક
12તીયાહાને ઇ આખવામે આલો કા તે પોતા સેવા માટે નાહ પેને તુમા સેવા ગોઠયા કેતલા, તે સુવાર્તા ઇસુ ખ્રિસ્તુ હારી સુવાર્તા હાય, જે તુમુહુ આમી ઉનાયાહા. પરમેહેરુહુ હોરગામેને પોતા પવિત્રઆત્મા મોકલી કા તુમા વોચ્ચે હારી સુવાર્તા પ્રચાર કેરા માટે લોકુ મદદ કે. એ ઓતી અદભુત ગોઠ હાય કા હોરગા દુત બી એ ગોઠ ઉત્સુકતાકી એ બાધ્યા ગોઠયા વેતા હેતલા.
13ઈયા ખાતુરે જેહેડા કાંવીહી કામ કેરા તીયાર રેતાહા, તીયુજ રીતીકી પોતા મનુલે બી તીયાર કેરા. સાવધાન રેજા આને ઇસુ ખ્રિસ્તુ ફાચે આવુલો સમયુલે તુમનેહે મીલનારી કૃપાપે તુમા પુરી આશા રાખા. 14આજ્ઞા માનનારા પોયરા હોચે પરમેહેરુ આજ્ઞા પાલન કેરા આને ખોટે કામે કેરા છોડી ધ્યા, જે તુમુહુ પરમેહેરુ સત્યલે જાંણુલો પેલ્લા કેરુલો ઈચ્છા રાખતલા.
15પેન દરેક કામે જે તુમુહુ તીયામે પવિત્ર બોના, કાહાકા આંય તુમનેહે હાદનારો પરમેહેર પવિત્ર હાય. 16કાહાકા પવિત્રશાસ્ત્રમે લેખલો હાય, “પવિત્ર બોના, કાહાકા આંય પવિત્ર હાય.” 17જાંહા તુમુહુ પ્રાર્થના કેતાહા તા પરમેહેરુહુલે તુમુહુ ઓ બાહકા ઇ આખીને પ્રાર્થના કેતાહા, પેન યાદ રાખા કા પરમેહેર પક્ષપાત નાહ કેતો, આને દરેકુ કામુ અનુસાર ન્યાય કેહે. ઈયા ખાતુરે જાંવ લોગુ તુમુહુ ઈયા જગતુમે એક પરદેશી બોનીને રેતાહા, તાંમ લોગુ પરમેહેરુ બીખ રાખીને જીવન જીવા. 18કાહાકા તુમુહુ જાંતાહા કા તુમુહુ બેકાર જીવન જીવતલા જો તુમા આગલા ડાયાહીને ચાલતલો, પેન તુમનેહે તીયા બેકાર જીવનુમેને છોડાવી લેદાહા. જો હોના ચાંદી જેહેડી નાશ વેનારી વસ્તુ કિંમતુપે નાહ વીયો. 19પેન ખ્રિસ્તુ ખુબુજ કિંમતી રોગુતુકી વીયોહો, જો નિર્દોષ આને શુદ્ધ ઘેટા હોચે હાય. 20પરમેહેરુહુ જગતુ બોનાવા પેલ્લાજ પસંદ કી લેદલા કા ઇસુ ખ્રિસ્ત છુટકારો આપનારો વેરી. પેન તોઅ તુમા લાભુ માટે ઈયા છેલ્લા દિહુમે ઈયા જગતુમે જાહેર વેરી. 21ઇસુ ખ્રિસ્તુહુ જો કાય આપુ માટે કેયો, તીયા લીદે તુમુહુ આમી પરમેહેરુપે વિશ્વાસ કેતાહા, જીયાહા ખ્રિસ્તુલે મોલામેને ફાચે જીવતો કેયો આને તીયાલે વાદારે મહિમા આપી, ઈયા ખાતુરે કા તુમુહુ વિશ્વાસ રાખતા આને પરમેહેરુપે તુમા આશા આમી મજબુત હાય.
22કાહાકા સત્ય પાલન કેરુલો તુમુહુ તુમા પાપુકી પવિત્ર કેરામે આલાહા, આમી તુમનેહે તુમા આર્યા વિશ્વાસી લોકુ આરી કપટ કેયા વગર પ્રેમ કેરા જોજે. એકબીજા આરી હાચા મન આને પુરા દિલુકી પ્રેમ કેતા રેજા. 23કાહાકા તુમા નવો જીવન નાશ વેનારી વસ્તુ મારફતે નાહ પેન નાશ નાય વેનારા બિયારા હોચે એટલે પરમેહેરુ જીવતા આને અનંત વચનુ મારફતે મીલેહે. 24કાહાકા પવિત્રશાસ્ત્રમે લેખલો હાય, “બાદા લોક ચારા હોચે હાય, આને તીયાં બાદો રુપ જંગલી ફુલાં હોચે હાય,
ચારો હુકાય જાહે આને ફુલે ખેકરાય પોળતેહે.
25પેન પ્રભુ વચન યુગા-યુગ સ્થિર રીઅ,” ઇ વચન ખ્રિસ્તુ વિશે હારી સુવાર્તા હાય, જો તુમા વોચ્ચે પ્રચાર કેરામે આલો.
Zvasarudzwa nguva ino
1 પિત્તરુ પત્રો 1: DUBNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.