યાકુબુ પત્રો 1
1
નમસ્કાર
1ઓ પત્ર યાકુબુ વેલેને હાય જો પરમેહેર આને પ્રભુ ઇસુ ખ્રિસ્તુ દાસ હાય, આને તીયા યહુદી વિશ્વાસી લોકુ બારા કુળુ માટે લેખ્યોહો, જે આખા જગતુમે વિખરાલા હાય, તીયા બારા કુળુહુને નમસ્કાર.
વિશ્વાસ આને જ્ઞાન
2ઓ માઅ પાવુહું આને બોયુહુ જાંહા તુમાપે અનેક પ્રકારુ પરીક્ષા આવે, તાંહા ઇયાલે મોડા આનંદુ ગોઠ હોમજુજા. 3કાહાકા તુમુહુ જાંતાહા કા જાંહા તુમા વિશ્વાસ પારખામે આવેહે તાંહા તુમા ધીરજ બી વાદેહે. 4તુમનેહે બાદોજ સહન કેરા હિકા જોજે, કા તુમુહુ આત્મિક રુપુકી પાકા સંપુર્ણ વી જાઅ, આને તુમામે કેલ્લીજ ગોઠી કોમી નાય રેઅ.
5પેન કાદાચ તુમામે કેડાલે બુદ્ધિ કમી વેરી તા પરમેહેરુપે માગા જો વગર દોષ લાગવ્યા, બાદાહાને ખુલ્લા મનુકી દેહે, આને તીયાલે આપવામે આવી. 6પેન જાંહા તુમુહુ તીયાપે માગતાહા તા તુમનેહે વિશ્વાસ કેરુલો હાય, આને તીયાપે કાય બી શંકા નાહ કેરુલો, કાહાકા શંકા કેનારો સમુદ્ર ડોબા સમાન હાય, જો હવાકી વોરાતી આને ઉબલેહે. 7એહેડો ઇ નાય હોમજે કા માને પ્રભુકી કાવીહી મીલી, 8તોઅ માંહુ બેન મનુવાલો હાય આને પોતા ગોઠી મેં ટીકી નાહ રેતો.
ગરીબ આને માલદાર
9તોઅ વિશ્વાયો જો ગરીબ હાય તીયાલે ખુશ વેરા જોજે કા પરમેહેરુ તીયાલે સન્માન આપ્યોહો, 10જો માલદાર હાય તીયાલે ખુશ વેરા જોજે, કા પરમેહેરુહુ તીયાલે નમ્ર કેયોહો, કાહાકા તોઅ ચારા ફુલાં હોચે પારવાય જાય. 11દિહ ઉગતાજ લુ લાગા લાગેહે, આને ચારાલે હુકવી દેહે આને તીયા ફુલો નીગી પોળેહે આને તીયા શોભા પારવાતી જાહે. ઇયુજ રીતીકી એક માલદાર બી પોતા કામુ મેં વ્યસ્ત રીને મોય જાય.
પરીક્ષા આને લાલચ
12ધન્ય હાય તોઅ માંહુ જો પરિક્ષામે સ્થિર રેહે, કાહાકા પરિક્ષામે સફલ વેરા લીદે તીયાલે સાદા માટે જીવનુ મુગુટ મીલી, જીયા વાયદો પરમેહેરુહુ તીયા બાદા લોકુ માટે કેયોહો જો તીયાલે પ્રેમ કેતેહે. 13જાંહા કેડા પરીક્ષણ વેઅ, તા ઇ નાય આખે કા માઅ પરીક્ષણ પરમેહેરુકી વેહે, કાહાકા નાય તા ખારાબ ગોઠીકી પરમેહેરુ પરીક્ષણ વી સેકેહે, આને નાય પોતે પરીક્ષણુમે ટાકેહે. 14પેન દરેક માંહુ પોતાજ ઈચ્છામે ખેચાયને ફસી જાહે, આને પરીક્ષણુ પોળેહે. 15ફાચે જાંહા તોઅ પાપ કેરા વિશે વિચાર કેહે તા પાપુ જન્મ વેહે આને જાંહા પાપ વાદી જાહે તા તીયા પરિણામ સાદા માટે મોત હાય.
16ઓ માઅ મેરાલા પાવુહુ આને બોયુહુ ધોકો નાય ખાવુલો. 17કાહાકા દરેક એક હારો વરદાન દરેક હારો દાન આપુ પરમેહેર બાહકા વેલને હાય. જીયાહા આકાશુમે દિહી આને ચાંદ આને તારાહાને બોનાવ્યેહે, પરમેહેર સાદા એક સમાન હાય, આને તોઅ સાંયુ હોચે નાહ બદલાતો. 18તીયાહા પોતાજ ઈચ્છાકી આપનેહે સત્ય વચનુ મારફતે પોતા પોયરે બોનાવ્યે, કા આપુહુ તીયાહા બોનાવલે જાનવરુમે પેલ્લા ફલ લાવનારે પેલ્લા ફલવા સમાન બોનજી.
ઉનાયેલુ તીયાપે ચાલુલો
19ઓ માઅ મેરાલા પાવુહુ આને બોયુહુ, એ ગોઠ તુમુહુ જાંયલ્યા, દરેક માંહે ઉનાયા ખાતુરે તીયાર આને બાગેજ ગોગનારો આને ગુસ્સો કેરા બી ધીમો વેઅ. 20કાહાકા જાંહા કેલ્લો બી માંહુ ગુસ્સો કેહે તાંહા તોઅ તીયુ ધાર્મિક રીતીકી નાહ રી સેકતો, જો પરમેહેરુલે ખુશ કેહે. 21ઈયા ખાતુરે આખો જીવન આને દુશ્મનીલે છોડીને, તીયા પરમેહેરુ વચનુહુને નમ્રતાકી સ્વીકાર કી લે, જો તુમા રદયુમે ટાકવામે આલો, આને તુમા આત્મા ઉદ્ધાર કી સેકેહે. 22પેન પરમેહેરુ વચનુ પાલન કેનારા બના, પેન ખાલી ઉનાનારાજ નાહ, જે પોતાલે ધોકો દેતેહે. 23કાહાકા જો કેડો વચનુ ઉનાનારા વેઅ, આને તીયાપે ચાલનારો નાય વેઅ, તા તોઅ તીયા માંહા સારકો હાય, જો પોતા હોચ્યોજ મુય આરસામે હેહે. 24ઈયા ખાતુરે કા તોઅ પોતાલે હીને જાતો રેતો આને તુરુત વિહરાય જાહે, કા તોઅ કેહેડો આથો. 25પેન તોઅ માંહુ જો પરમેહેરુ આખા નિયમુપે ધ્યાન કેતો રેહે, જો લોકુહુને પાપુકી છુટકારો આપેહે, તોઅ માંહુ ઉનાયને વિહરાતો નાહ, પેન તીયા પાલન કેહે, એહેડો માંહુ પોતા દરેક કામુમે આશીર્વાદિત વેરી. 26કાદાચ એગોહો પોતાલે ધર્મી હોમજે, આને પોતા જીબુકી ખારાબ ગોઠયા ગોગુલોપે કાબુ નાય રાખે, તા તોઅ પોતાલે ધોકો દેહે, આને તીયા ધાર્મિક કામે બેકાર હાય. 27આપુ પરમેહેર બાહકાપે શુદ્ધ આને હાચો ધર્મ ઓ હાય કા અનાથ આને વિધવા દુ:ખુમે તીયાં મદદ કેરુલો આને ઝગળામે પોતાલે ઈયા જગતુ ખારાબ વેહવારુકી અલગ રાખજે.
Zvasarudzwa nguva ino
યાકુબુ પત્રો 1: DUBNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.