2 થેસ્સલોનિકા પત્રો 3
3
આમા માટે પ્રાર્થના કેરા
1છેલ્લે, ઓ માઅ વિશ્વાસી પાવુહુ, આમા માટે પ્રાર્થના કેતા રેજા, કા પ્રભુ વચન બાદી જાગે માહરી ફેલાય આને તીયાલે મહિમા મીલે, જેહેકી તુમામે વીયો. 2આને એહેકી બી પ્રાર્થના કેરા પરમેહેર આપનેહે ખોટા આને દુષ્ટ લોકુકી ઉદ્ધાર પામી સેકેહે, કાહાકા બાદા લોક બાદા લોક પરમેહેરુ ગોઠીપે વિશ્વાસ નાહ કેતા 3પેન તુમુહુ પ્રભુપે પુરો રીતીકી વિશ્વાસ રાખી સેક્તાહા, તોઅ તુમનેહે આત્મિક રુપુકી મજબુત કેરી, આને શૈતાનુકી વાચાવી રાખી. 4આને આપનેહે પ્રભુમે તુમાપે ભોરોષો હાય, કા આમુહુ તુમનેહે જો કાય કેરા આખલો, તુમુહુ તેહેકીજ કી રીયાહા આને કેતા રીહા. 5પ્રભુ તુમનેહે ઇ હોમજા મદદ કે કા પરમેહેર તુમનેહે કોતો પ્રેમ કેહે, આને ઇસુ ખ્રિસ્તુ હોચે ધીરજ રાખા.
કામ કેરા આલ્યાહા માઅ બોનાહા
6ઓ મેરાલાહા, આમુહુ તુમનેહે પ્રભુ ઇસુ ખ્રિસ્તુ નામુકી આજ્ઞા આપતાહા, કા તુમુહુ એહેડા વિશ્વાસી પાવુ-બોયુકી દુર રેજા, જે કામ કેરામે આલ્યાહા, આને જે આમુહુ હિક્વ્યોહો તીયા અનુસાર નાહ ચાલતા. 7તુમુહુ પોતે જાંતાહા કા તુમનેહે કેલ્લી રીતીકી આમા હોચે જીવન જીવા જોજે, કાહાકા આમુહુ તુમા આરી રીને કામ કેરામે આલાહ નાહ કેયી. 8આમુહુ કેડા બી ફોકટુ મે માંડો નાહ ખાદો, પેન તુમનેહે યાદ આમા જરુરતુ માટે ધ્યાન નાય રાખા પોળે ઈયા ખાતુરે રાત-દિહી તકલીફ વેઠીને કામ ધંધો કેતલા. 9ઈયા ખાતુરે નાહ કા આમુહુ તુમાપેને મદદ મિલવા અધિકાર નાય આથો, પેન ઈયા ખાતુરે કા આમુહુ તુમા હુંબુર નમુના બોનજી, કા તુમુહુ બી આમા હોચે જીવન જીવા. 10જાંહા આમુહુ તુમા આરી રેતલા, તાંહા બી આમુહુ તુમનેહે આખ્યા કેતલા, કા કાદાચ એગો માંહુ કામ કેરા નાય માગે, તા તીયાલે ખાવુલો નાય ખાંઅ જોજે. 11કાહાકા આમુહુ ઉનાય રીયાહા કા તુમા કેતા વાદારે થોડાક લોક આલ્યોહો જીવન જીવી રીયાહા, પોતે તા કાયજ કામ નાહ કેતા પેન બીજા કામુમે રુકાવટ ટાકતાહા. 12એહેડા લોકુહુને આમુહુ પ્રભુ ઇસુ ખ્રિસ્તુ નાવુકી આજ્ઞા દેતાહા આને હોમજાવતાહા, કા શાંતિકી પોતે મેહનત કીને, પોતા કામાયુમેને ખાંઅ જોજે. 13ઓ માઅ વિશ્વાસી પાવુહુ, તુમુહુ ભલાય કેરામે હિંમત માઅ છોડાહા.
14કાદાચ એગોહો આમા ઈયા પત્રમે લેખલી ગોઠીહીને નાય માને, તા તીયાપે ધ્યાન રાખા, આને તીયા સંગતી માઅ કેહા, જીયાકી તીયાલે પોતે નાજવાયા પોળે. 15તેબી તીયા આરી દુશ્મનુ હોચે નાય વેહવાર માઅ કેહા, પેન પોતા પાવુ-બોંય હોમજીને ચેતવણી આપા.
છેલ્લો નમસ્કાર
16આમી પ્રભુ જો શાંતિ આપનારો હાય, પોતે તુમનેહે સાદા આને દરેક પ્રકારુકી શાંતિ આપે, આને પ્રભુ સાદા તુમા બાદા આરી રેઅ.
17આંય પાઉલ પોતા આથુકી ઈયુ પત્રીમે નમસ્કાર લેખી રીયોહો. દરેક પત્રીમે આંય ઇયુજ રીતી લેખુહુ, એ માઅ લેખુલો નિશાણી હાય. 18આંય પ્રાર્થના કીહુ કા આપુ પ્રભુ ઇસુ ખ્રિસ્તુ કૃપા તુમા બાદાપે વેતી રેઅ.
Zvasarudzwa nguva ino
2 થેસ્સલોનિકા પત્રો 3: DUBNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.