Yowani 7
7
Baana baa ngu a Yisu a bali mu usa nde imiinu ve
1Humbisa a maana, Yisu akataangili itaanzi hya Ngalili. Ka nde a hakatondo udyenge mu itaanzi hya Yude ve. Mu tooni ati, lituma li Bayudaayo, laakasaha uduba nde. 2Ka mukungi Bayudaayo wu bitudu#7.2 Mukungi bitudu aba mukungi wu akadinga limiingu li litindala. Nde akakwelene na mukungi wu baakakukaha. Mu mukungi mo wuuna, baatu baakayibwala moonyi mu taangu yi Isereli hyaba mu kumu. Baatu baakabwamina mu bitudu natee bu mukungi mo wuuna hakafwa. Bayudaayo boosi baakaya hu Yeruselemi mu usambila. Lev 23.34-36; Pfu 16.13. aba aka bebele. 3Na baana ba ngu a Yisu baaleeli nde: «Mata ŋaniiŋa, na yene hu tsi a Yude, mana bayihi ba we kaka bamono mavaanga ma we li mu usa. 4A hu li na muutu wu ubaasa mavaanga mu tswehi ve, tso nde tondi uyabahana. Bu we li mu usa mavaanga ma manene, nyaha we yabahana huli baatu boosi.» 5Ka baana ba ngu a nde bo mwakulu, a baakasa imiinu mu nde ve.
6Yisu aleeli bo: «Tangu a me a yamato kini ve, ka uto ti mu benu, pasi taangu yili yimbwe. 7Baatu ba tsi utwala ubelele benu ve. Ka bo baabelele me. Mu tooni ati, me umbaata imbangi ti mavaanga ma bo mali ma mabi. 8Benu, yenaani hwa benu hu mukungi. Me a unzyene hu mukungi mo wuuna ve, mu tooni ati, ya me taangu kini a yatoodi ve.» 9Bu nde hamani uleele bo maana, nde asaali hwa nde hu Ngalili.
Yisu miiyene hu mukungi bitudu
10Ka bu baana ba ngu a nde baayeni hu mukungi, nde kaka ayeni huuna hwavele uyabisa baatu, na uvelemonehele ŋa kungi la baatu. 11Mu taangu mukungi mo wuuna, batumi baa Bayudaayo baakasaha nde na baakafuula: «Nde huni ali?» 12Na mutso makonge ma baatu, hwaba na wadi-wadi mu nduhi a nde. Bamosi baakaleele: «Nde muutu nga mavaanga ma mabwe.» Bakima ti: «Naana! Nde baatu ubaasoho.» 13Ka muutu tso mumosi a hakatoyo mu nde paayalala ve, mu tooni a boomo bu Bayudaayo.
Yisu li mu ulongese mu nzo a Nzambi
14Mukungi aba aka hahati, Yisu ayeni hu nzo a Nzambi na nde abandihi ulongese. 15Bayudaayo baakimuhi na baakalelesene: «Nde buni hayaaba mambu Mabasonehe ma Ngidi maniima, nde wu aveleyiha muhanda?» 16Yisu afutili bo: «Ndongisili yi me ndi mu upa, a yili yi me ambaha ve. Ka yo yili ya Nzambi wu atsindaha me. 17Tso muutu tondi ukuhasa litondo la Nzambi, nde utsikaha tso ndongisili a me yili mu umata huli Nzambi, buuve ti yo yili mu umata mu matsimi ma me mwakulu. 18Muutu wu ubaatoyo mu nde mwakulu, ubaasaha ndulu muyusu a nde. Ka pasi nde wu ubaasaha muyusu a nde wuuna wu atsindaha nde, ubaaleele imbuli. A hu li na upfuta mu nde tso hoole ve. 19Moose aviidi benu Mikele. Ka muutu tso mumosi mu benu a hali mu ukiinza myo ve. Mu hima benu lili mu usaha uduba me?» 20Konge a baatu yaafutili bunuubu: «We na tengo! Na li mu usaha uduba we?» 21Yisu afutili: «Mu vanga ndulu limosi la kimuhili li me miitsa, benu boosi limiipadumana! 22Tsimaani ati: Moose atuma benu mu ubaakete baana ba bahala. Ka, a Moose avoli kesili mo yiina ve. Kesili mo yiina yaamata huli bakaaha#Mba 17.10-13; Lev 12.3 ba bisu baatsomi. Benu lili mu ukete baatu mu ilumbu hya saba. 23Benu lili mu usa buuna mu ukiinza Mikele mya Moose. Mu ki tooni benu lili mu ukwila me kesi, ŋa me miimbeloso muutu wu mutindala mu ilumbu hya saba? 24Nyahaani usilasa misamu mu monihili a mu misu. Ka baasilasaani misamu bu hwafwana#Lev 19.15; Esa 11.4 .»
25Bisu Yeruselemi bakima baakaleele: «Nde wu, me ni wu bali mu usaha uduba? 26Monwaani: nde li mu utoyo ŋa miisu ma baatu, na baatu a bali mu uleele nde pasi dyaambu ve! Buni! Bakuutu ba bisu bamiisilasa ti nde ni Kristo? 27Mu ilumbu hi Kristo huuya, muutu tso mumosi a huyaaba hu nde amiimata ve. Ka nde wunuuwu, bisu liyaabi huni nde amiimata.»
28Yisu akalongese mu litandala la nzo a Nzambi. Nde asyenuli ndaha na uleele: «Mu mbuli benu liyaabi na me ndi, na huni me miimata? Me a hanza mu lituma la me mwakulu ve. Ka wu atsindaha me wu akuha ali. Benu a liyaabi nde ve. 29Me, me nzaabi nde, mu tooni ati me miimata huli nde, na ni nde atsindaha me.» 30Buuna, bo baasahi ukaanga nde. Ka muutu tso mumosi a hatwali ubembe nde ve, bu taangu a nde yaba kini a yatoodi ve. 31Ka, ba banzuhisini ŋa hati la konge a baatu, baasili nde imiinu na baakaleele: «Ŋa Kristo huuya, nde usa biliimbu bya kimuhili bi byalutahala bi nde wunuwu ali mu usa?»
Bafarisi bamiitsindaha baatu mu ukaanga Yisu
32Bafarisi baayuhi ma baatu baakaŋono mu tooni a Yisu. Bakuutu ba bangaanga ba Nzambi na Bafarisi baatsindihi bakeedi mu uyakanga nde. 33Yisu ni uleele: «Me kini na benu mu mwaana a taangu hoole, titswene me tsa nzyene huli wu atsindaha me. 34Benu sa lisaha me, na benu a luusoolo me ve. Na huuna hu me umba, benu a luutwala uyene ve.» 35Bayudaayo baalelisini: «Nde huni ali mu dwe, mana bisu luuvelesoolo nde? Nde ka huli Bayudaayo ba bubaatsahala ŋa hati li Bangeleke nde huyene, buuve Bangeleke huuyalongese? 36Mambu ma nde amiipalisa maniima: “Benu sa lisaha me, na benu a luusoolo me ve” na “Huuna hu me umba, benu a luutwala uyene ve”. Hima mo mamoole matondi uleele?»
Yisu ni mamba ma moonyi
37Ilumbu hya tsukusu mukungi, ilumbu hi hyafulala tsongo#Lev 23.36, Yisu atelimi, na asyenuli ndaha: «Tso muutu li na peyu a mamba, aya huli me, na anywa. 38Pasi muutu wu li mu usiila me imiinu, “banzali baa mamba ma moonyi sa bapala mu mutima a nde#Zak 14.8 ”, we bu Libuku la Ngidi lili mu uleele.» 39Yisu haleeli buuna, mu tooni a Livupu la Nzambi li boosi ba baasiidi imiinu mu nde, baafwana uyaka. Mu taangu mo yiina, Nzambi aba kini a haviidi Livupu ve, mu tooni ati Yisu aba kini a hayaki muyusu ve.
40Bu baatu ba ŋa hati la konge baayuhi mambu mo maana, bamosi baakaleele: «Nde wunuuwu, mbuli ni mumbihuli mo!» 41Bakima baakaleele: «Nde ni Kristo!» Na bakima kaka baakafuula: «Kristo utwala upala mu itaanzi hya Ngalili?
42Mabuuku ma Ngidi mali mu uleele ti Kristo uba wu imbisa hya pfumu Davidi na nde upala mu Betelemi, bula bwa Davidi.»
43Na baatu baakabuhi mu tooni a Yisu. 44Bamosi baakatondo ti bakaanga nde, ka muutu tso mumosi a habembi nde ve.
Bakuutu bamiibisa usa imiinu mu Yisu
45Bakeedi baafutihi huli bakuutu ba bangaanga ba Nzambi na baa Bafarisi na baafuuli bo: «Mu hima benu livelibehe nde?» 46Bakeedi baafutili: «A hu li na muutu wu amiitoyo we bahala mo liina ve.» 47Bafarisi baakaali bo: «Benu kaka limiisinga ubwa mu soho mo liniili? 48Hu li na mumosi mu bakuutu, buuve mumosi mu Bafarisi, wu sili nde imiinu? 49Ka baatu mobaniba ba baaveleyaba Mikele mya Moose, ba baasinga bali!»
50Nikodemo aba mumosi mu Bafarisi ba baaba ŋaana. Nde wuuna wu ayamono Yisu hutsomi. Nde aleeli bo: 51«Mu mikele mya bisu a benu, utwala utsundasa muutu hwavele umayuha nde, na umayaaba ma nde hasa ve#Pfu 1.16.» 52Bo baafutili nde bunuubu: «We kaka musi Ngalili we li? Kengese Mabasonehe na we sa mono ti mumbihuli tso mumosi a hupala mu Ngalili ve.» [53Titswene, muutu-muutu ayeni hu nzo a nde.
Zvasarudzwa nguva ino
Yowani 7: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.