Yowani 6
6
Yisu miibuungala konge a baatu
1Titswene, Yisu ayeni hu simu lina la dyanga la Ngalili, li babaateele kaka dyanga la Tiberiyade. 2Konge a baatu yinene yaakaduukala nde, mu tooni ati yo yaakamono biliimbu bya kimuhili bi nde hakasa mu ubeeloso babeedu. 3Yisu avaati isyelo, na nde atsahili ŋaana na bayihi ba nde. 4Mukungi a Paake wu Bayudaayo aba aka bebele.
5Yisu asiimbula miisu, ni umono konge a baatu yinene yi yaakaya huli nde. Yisu ni uleele Filipo: «Huni bisu a benu lusuumbani mapa, mana baatu mo baniiba boosi babaha byudya?» 6Nde haleeli buuna mu ukete imiinu hya Filipo, mu tooni ati Yisu aba amiikwayaaba ma nde husa. 7Filipo ni ufutala nde: «Tso likiisalila makama moole (200) ma denye#6.7 makama moole (200) ma denye mbongo a pfuta a muutu mu batsungi basamunu. mu usuumba mapa, a makiikuha mu ukabila huli pasi muutu tso mwa itini ve.» 8Mukima mu bayihi ba nde, nga nduhi a Andele, mwaana a ngu a Simoni Peetelo, ni uleele Yisu bunuubu: 9«Ŋaniiŋa hu li na mufudu mbahala wu li na mapa mataanu na batswi boole. Ka mwa bisiha mo biina utwala ubuungala musiiku a baatu mobaniba ve#2Pf 4.42-44 .»
10Yisu ni uleele: «Tsahisaani bo.» Bu hwaba na biimbu bi bilahi ŋa mbuha mo yiina, baatu baatsahili mu toto. Litangu la baatu aba laato bebele na biveeve bitaanu (5 000) bi babahala. 11Yisu avoli mapa, afutili matondo huli Nzambi, na akabi mo huli ba baaba ŋaana. Nde aviidi bo kaka batswi mu iteesi hi bo baatondi. 12Bu bo baaywati, nde aleeli huli bayihi ba nde: «Tolwaani bitsudu bi bimiisaala, mana pasi isiha a hibungana.» 13Bo baatoli byo, na baaluusi maponzi kuumi na moole, ma bitsudu bi mapa bi byasalili mu mapa mataanu ma baatu baadiidi.
14Bu baatu baamoni iliimbu hya kimuhili hi Yisu hasiidi, bo baakaleele: «Mbuli nde ni Mumbihuli wu akiifwana uya mu tsi!» 15Yisu ayaabi ti baatu baakiyavolo nde mu mifudi na ubyalisa nde mutumi. Nde abwevyasuha na ayeni nde siha hu yulu isyelo.
Yisu li mu uyene ŋa yulu a mamba
16Tsitsaha bu yaatoodi, bayihi ba Yisu baakulimini natee ŋa muvanga a dyanga. 17Bo baanami ŋa yulu a luungu mu uyene hu Kapernahumi, hu simu lina la dyanga. Aba hutso butsuhu, na Yisu aba kini a habiisili bo ve. 18Ifula hi mifudi hyakanyingasa mamba ma dyanga.
19Bayihi baakayene mu luungu na bu bo baatoodi lala, bo baatalili Yisu mu uyene mu miilu ŋa yulu a mamba, na uyaasusaha hu pedu a luungu. Bayihi baamoni boomo na baatsuli likamba. 20Ka Yisu aleeli bo: «Wunuwu me, a liba na boomo ve!» 21Bo baakiisaha ukotese nde mu luungu, ka mu mawasa, luungu laatoodi simu lina, hutsyelo yi bo baaba mudwe.
Yisu ni lipa la moonyi
22Ilumbu hi hyaduukili, konge a baatu yi yaasaali hu simu lina la dyanga, yaamoni ti aba ŋaana ndulu luungu limosi. Baatu baayaabi ti Yisu a hakoti mu luungu mo liina na bayihi ba nde ve. Ka bo siha baayeni. 23Bunuubu, maluungu makima ma maamati hu Tiberiyade, maayato bebele na mbuha yi bo baadiidi mapa, humbisa hu Pfumu Yisu afutili matondo huli Nzambi. 24Bu konge a baatu yaamoni ti tso Yisu, tso bayihi ba nde, a baabedi ŋaana ve, bo baakoti bo mwakulu mutso maluungu mo maana, na baayeni hu Kapernahumi mu uyasaha Yisu. 25Bo baasooli nde hu simu lina la dyanga na baaleeli nde: «Rabi, ki taangu we amiiyato huni?» 26Yisu ni ufutala bo: «Mu mbuli mu mbuli me ndi mu undeele benu, benu lili mu usaha me, a bu benu limiimono biliimbu bya kimuhili ve. Ka mu tooni ati benu limiidya mapa na limiiywata. 27A lisala mu tooni a byudya bi bibaabungana ve. Ka saalaani mu tooni a byudya bi bibaava baatu moonyi wu bilima na bilima. Ni byudya bi Mwana a Muutu huva benu, mu tooni ati Taata Nzambi amiikuma nde iliimbu, mu umweese ti nde amiisilasa lituma la nde.»
28Bo ni ufuula nde: «Hima bisu lafwana usa mu ukuhasa mavaanga ma Nzambi atondi?» 29Yisu afutili bo: «Mavaanga ma Nzambi ali mu utondo ti benu likuhasa, ni mu usa imiinu mu wuuna wu nde hatsindaha.» 30Bo ni uleele nde: «Ki iliimbu hya kimuhili we umweese bisu, mana bisu lisiila we imiinu? Ki vanga we umweese? 31Bakaaha ba bisu baadiidi maane mu kumu we bu baasonehe: “Nde aliisili bo mu mapa ma maamati hu yulu#Pal 16.4,15; Mkg 78.24 .”» 32Yisu aleeli bo: «Mu mbuli, mu mbuli me ndi mu undeele benu, a Moose aviidi benu mapa ma maamati hu yulu ve. Ka ni Taata a me ubaava benu mapa ma mbuli ma yulu. 33Mu tooni ati lipa la Nzambi ni li libaakulamana umata hu yulu, na li libaava baatu ba tsi moonyi.» 34Bo baaleeli nde: «Pfumu, baava bisu lipa mo liina taangu yoosi.»
35Yisu ni uleele: «Me, me ndi lipa la moonyi. Pasi muutu wu uya huli me, a hukaakwa nzala ve. Na wu usiila me imiinu, a hukaamono peyu ve. 36Me andeele benu ti, benu limiimono me, ka tso bu benu limiimono me, benu a lili mu usa imiinu ve. 37Boosi ba Taata huva me, sa baya huli me. Na pasi nde wu uya huli me, me a unyasula nde ve. 38Mu tooni ati, tso me akulamana umata hu yulu, a mu uvanga litondo la me ve, ka mu kuhasa litondo la wu atsindaha me. 39Na litondo la wu atsindaha me ni liniili: ti me pelenyambasana tso muutu mumosi mu boosi ba nde haviidi me, ka ni ti me tsuula bo ŋa hati la babaakwa mu ilumbu hya tsyelele. 40Eye, litondo la Taata a me ni liniili: woosi wu umono Mwana a nde, na usiila nde imiinu, ubaha moonyi wu bilima na bilima. Na me utsuula nde mu ilumbu hya tsyelele.»
41Bayudaayo baakaŋono mu nde, mu tooni a bu nde haleeli ti: «Me ni lipa li laakulamana umata hu yulu.» 42Bo baakaleele: «Wunuuwu a ni Yisu mwaana a Yosefi ve? Bisu laayaaba bubwe-bubwe taata na ngu a nde. Ka buni nde ali mu uleele ti: “Me akulamana umata hu yulu”?» 43Yisu afutili bo: «Nyahaani uŋono. 44Muutu tso mumosi utwala uya huli me ve, tso Taata wu atsindaha me a habehi nde ve. Me tsa tsuula muutu mo wuuna ŋa hati la babaakwa, mu ilumbu hya tsyelele. 45Mimbihuli myasonehe bunuubu: “Nzambi sa alongese baatu boosi#Esa 54.13.” Pasi nde wu uyuhala Taata na uyaka ndongisili a nde, li mu uya huli me. 46Buuna a hu li mu umweese ve ti, hu li na muutu wu amono Taata. Ka ndulu nde wuuna wu amata huli Nzambi, amono Taata. 47Mu mbuli, mu mbuli, me ndeele benu lo, wuuna wu usiila nde imiinu, miibaha moonyi wu bilima na bilima. 48Me, me ndi lipa la moonyi. 49Bakaaha baa benu baadiidi maane mu kumu, ka bo baakwidi. 50Ka liniili ni lipa li lili mu ukulamana umata hu yulu. Pasi muutu wu udya lo, a hukwa ve. 51Me, me ndi lipa la moonyi li laakulamana umata hu yulu. Tso muutu diidi lipa mo liina, nde sa abaha moonyi wu bilima na bilima. Lipa li me upa, ni musunya a me. Me ndi mu upa nde, mana baatu ba tsi babaha moonyi.»
52Bayudaayo baakatsotsosono na mifudi na ubaaleele: «Buni muutu mo wunuuwu hutwala uva bisu musunya a nde mu udya?» 53Yisu ni uleele bo: «Mu mbuli mu mbuli me ndi mu undeele benu, tso benu a lidiidi musunya a Mwana a Muutu ve, na tso benu a linywidi makila ma nde ve, benu a luubaha moonyi ve. 54Pasi muutu wu udya musunya a me na unywa makila ma me, li na moonyi. Na me tsa tsuula nde mu ilumbu hya tsyelele. 55Mu tooni ati, musunya a me li byudya bi bibaaywatisa, na makila ma me mali byunywa bi bibaamana peyu. 56Pasi muutu wu udya musunya a me na unywa makila ma me, li mu ukwilala itwadi na me, na me ukwilala mu nde. 57We bu Taata wu atsindaha me ali moonyi, me ndi moonyi mu tooni a Taata. Bumosi kaka, muutu wu udya musunya a me sa aba moonyi mu tooni a me. 58Liniili ni lipa li laakulamana umata hu yulu. Lo a lili we ma bakaaha ba benu baadiidi ve. Mu tooni ati, humbisa udya mapa mo maana, bo baakwidi. Ka muutu wu udya lipa mo liniili, sa aba moonyi nzyeni.» 59Yisu haleeli mambu mo maana, ŋa nde hakalongese mu nzo lisambulu yi Bayudaayo hu Kapernahumi.
Bayihi bamiitimba Yisu
60Ba banzuhisini mu bayihi ba nde bu baamani uyuha nde, baaleeli: «Dyambu mo liniili lilutiili bunono. Muutu utwala usiinga lo ve.» 61Bu Yisu hayaabi ti bayihi ba nde baakaŋono mu tooni a dyaambu mo liina, nde afuuli bo: «Dyambu mo liniili limiikwamisa benu? 62Ka buni buuba, tso benu limoni Mwana a Muutu mu ubwekuma hu nde haba tsomi? 63Ni Livupu la Nzambi libaava moonyi. Musunya a hali na tsongo ve. Mambu ma me ndeeli benu mali mu umata mu Livupu, na mali ma uva moonyi huli baatu. 64Ka ŋa hati la benu, hu li na ba baavelesa imiinu.» Mu mbuli, Yisu aba ayaaba umata hu mbandu, baana ba baavelesa imiinu mu nde, na wu akiyeholo nde. 65Na nde abweleele: «Ni mu buuna me ndi mu undeele benu, muutu utwala uya huli me ve, tso Taata a haviidi nde muswa ve.»
66Umata taangu mo yiina, bayihi ba nde ba banzuhisini baatiimbi nde, na a baakabweyene na nde ve. 67Ni mu buuna, Yisu haleeli huli kuumi na bayihi boole ba nde: «Benu kaka a litondi uyene ve?» 68Simoni Peetelo ni ufutala nde: «Pfumu, bisu ka huli na luuyene? We ni nga mambu ma mu baava moonyi wu bilima na bilima. 69Bisu lili mu usa imiinu, na bisu liyaabi ti we ni Kristo, wa Ngidi wu Nzambi hatsindaha!» 70Yisu afutili bo bunuubu: «Me, me ni wu asoolo benu, kuumi na boole. Ka mumosi mu benu muutu wu Mukuyi ali!» 71Nde hakaleele buuna mu tooni a Yuda, mwaana a Simoni Isikariyoti. Mu tooni ati, nde ni wu aba amiikuta usumbasa Yisu. Nde wu aba hwande mumosi mu kuumi na bayihi boole baa Yisu.
Zvasarudzwa nguva ino
Yowani 6: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.