Yowani 12
12
Mariya miipuupala nyafi mu miilu mya Yisu
1Bilumbu bisamunu, tswamina Paake yito, Yisu ayeni hu Betanya. Ni huuna hwaba Lazaro, muutu wu nde hasuuli mu babaakwa. 2Baaviidi Yisu byudya bi Malata hakakaba. Lazaro aba mumosi mu ba baaba ŋa metse na nde. 3Mariya avoli itutu hya nyafi ya talu yindahi ya nduhi a «nare», nde apuupili yo mu miilu mya Yisu na akombili nde miilu mu nanga a nde. Nzo yaluuli mu tsulu a nyafi mo yiina.
4Mumosi mu bayihi ba nde, nga nduhi a Yuda Isikaryoti, wu aba na matsimi ma uyeholo Yisu, aleeli: 5«Mu hima bavelisuumbasa nyafi mo yiniiyi mu maku matatu (300) ma baa denye ma mbongo na uva mo huli biyaha#12.5 Mbongo yi yafwana na pfuta musalili yi ilima hi itindala.?» 6Nde a haleeli buuna mu tooni a kwili lingebe mu biyaha ve, ka mu tooni ati nde aba muyibi. Bu nde hakakanga koome yi itwadi, nde akayiba mbongo yi baakasuusa muuna. 7Ka Yisu aleeli nde: «Nyaha nde tsina! Nde asiidi buuna, mu uvangimasa ilumbu hya ndihili a me. 8Benu sa libaaba na biyaha taangu yoosi#Pfu 15.11 . Ka me, benu a luuba na me taangu yoosi ve.»
9Konge yinene yi Bayudaayo yaayuhi ti Yisu aba hu Betanya. Bo a baayeni huuna mu umono ndulu Yisu ve, ka mu umono kaka Lazaro, wu nde hasuuli mu babaakwa. 10Buuna, bakuutu ba bangaanga ba Nzambi baavoli kesili mu uduba kaka Lazaro. 11Bo baasahi uduba nde mu tooni ati, ba banzuhisini baasiisi bo, bu Bayudaayo baasiidi imiinu mu Yisu, mu tooni a Lazaro.
Kotili a Yisu hu Yeruselemi
12Ilumbu hi hyaduukili, konge a baatu yinene yi yaayidi mu mukungi a Paake, yaayuhi ti Yisu akaya hu Yeruselemi. 13Bo baavoli bihele, baapali mu musyenge mu uyabwana nde na baakafulaha: «Osana! Nzambi asyeme nde wu li mu uya mu nduhi a Pfumu! Nyaha Nzambi asyeme mutumi Isereli#Mkg 118.25-26 .» 14Yisu amoni buuru mumosi, nde atsahili ŋa yulu a nde. We bu Mabasonehe ma Ngidi mali mu uyabisa:
15«A baa na boomo ve, we nuumba a Syoni!
Mono mutumi a we li mu uya,
atsahala ŋa yulu a mwaana a buuru#Zak 9.9 .»
16Hu mbaandihili, bayihi ba nde a baatsikihi ma maakavyoho ve. Ka humbisa a hu Yisu hasyenuhi mu muyusu, bo baayibuhili moonyi ti mambu mo maana aba baasonehe mu nde. Bo baayibuhili kaka moonyi mu mambu ma maavyohi mu ilumbu mo hiina.
17Baatu boosi ba baaba ŋa Yisu haateeli Lazaro mu upala mu ngila, na usuula nde mu babaakwa, baakatiila nde imbangi mu ma bo baamoni. 18Ni mu buuna konge a baatu yaayabwana nde, mu tooni ati bo baayuhi ti nde asiidi iliimbu hya kimuhili mo hiina. 19Bafarisi baalelisini: «Bisu lili mu umono ti, bisu a benu a laatwala ve. Monwaani buni baatu boosi bali mu uduukala nde!»
Bangeleke bakima baatondi ubwana Yisu
20Hwaba na Bangeleke ŋa hati la baatu ba baakumisi hu Yeruselemi, mu ukunda Nzambi mu ilumbu hi mukungi a Paake. 21Bo baayasusaha ŋa pedu a Filipo musi Betesayida, hu Ngalili na baafuuli nde: «Pfumu, bisu litondi umono Yisu.» 22Filipo ayatoosele huli Andele, titswene Andele na Filipo baayayabisa Yisu.
23Yisu afutili bo: «Ngunga yimiito yi baafwana uyuusa Mwana a Muutu. 24Mu mbuli, mu mbuli, me ndi mu undeele benu: tso libutu li libaava lipa a libwidi ŋa toto na ukwa ve, lo utwala ubuta ve. Ka tso lo likwidi, lo sa libuta mbutu yindahi. 25Pasi muutu wu ubaatondo idiingu hya nde, ubaanyambasano hyo. Ka nde wuuna wu ubaabisa ukangama mu idiingu hya ŋa toto, sa abaha moonyi wu bilima na bilima. 26Tso muutu tondi usalila me, nyaha nde aduukala me. Ni mu buuna, ŋa me ndi, musalili a me sa aba na me, na Taata a me sa ayusa nde.»
Yisu li mu utoyo mu lipfu la nde
27«Buunubu, muvumu a me li na mangongo. Ka ki lo me undeele? Me ndeele ti: “Taata yobolo me mu ngunga mapasi yiniiyi”? Naana! Me ti ni mu ukuhasa iteesi hya ngunga mo yiniiyi me anza. 28Taata, yusa nduhi a we!» Na ndaha yaayuhini hu mayulu: «Me amiinzuusa yo, na me tsa mbwenzuusa yo.» 29Baatu ba baaba ŋaana, ba baayuhi ndaha mo yiina, baakaleele: «Wuuna bedi nzyedi.» Bakima baakaleele: «Pofi miitoyo na nde.» 30Yisu aleeli: «A mu tooni a me, ndaha mo yiniiyi yiyuhini ve. Ka mu tooni a benu. 31Yiniiyi ka ni taangu yi Nzambi hutsundasa baatu ba tsi mo yiniiyi. Nde ubinga hu mbadi pfumu wu mubi wa tsi mo yiniiyi. 32Na me, ŋa Nzambi husyenolo me ŋa yulu a toto, me umbehe baatu boosi huli me.» 33Nde hakaleele buuna, mu uyabisa kwili yi nde haakikwa.
34Baatu baafutili nde: «Bisu laayiha mu libuuku li Mikele ti Kristo ukwilala#Mkg 110.4; Esa 9.6; Dan 7.14 bilima na bilima. Ka we buni we li mu uleele ti: “Mwana a Muutu bafwana usyenolo nde”? Mwana a Muutu mo ka na?» 35Yisu aleeli bo: «Liyalala likini mwaana taangu hoole ŋa hati la benu. Hwadaani mu uyene, bu liyalala likini ŋa hati la benu, mana piipidi a yikimusa benu. Ka muutu wu ubaayene hutso a piipidi, a hubaayaaba huni nde ubaayene ve. 36Bu benu likini na liyalala, saani imiinu mu liyalala, mana benu likituha baana ba liyalala.
Kamini mutima Bayudaayo
Yisu aleele buuna, nde ayasweme lala na bo.» 37Tso bu nde hasiidi biliimbu bya kimuhili bi bilahi ŋa busu bwa bo, bo a baasili nde imiinu ve. 38Buuna, ma mumbihuli Esaya haleeli maavangimi:
«Pfumu, na asiidi imiinu mu ibila hi bisu laatiidi?
Huli na Pfumu hamweesi matwala ma hoho hwa nde#Esa 53.1 ?»
39Bo a baatwali usa imiinu ve, mu tooni ati mumbihuli Esaya abweleele:
40«Nzambi adibuhi miisu ma bo,
nde aviidi bo kamini mutima,
mana bo bavelemono mu miisu ma bo,
mana baveletsikaha mu mitima mya bo,
mana bavelekingula buyedi na uyafutaha huli me,
kini me umbeeloso bo#Esa 6.9-10.»
41Maana ni mambu ma Esaya haleeli ŋa nde hamoni muyusu a Yisu, wu nde ali mu usangula.
42Tso buuna, ba banzuhisini ŋa hati li bakuutu ba Bayudaayo baasiidi imiinu mu Yisu. Ka mu tooni Bafarisi, bo a baakasangula mo paayalala ve, mana a babingasa bo mu nzo lisambulu yi Bayudaayo. 43Mu tooni ati bo baakatondo muyusu wu ubaamata huli baatu, ka a wu ubaamata huli Nzambi ve.
Yisu miiyafuhasa baatu ba tsi
44Yisu aleeli mu mifudi: «Muutu wu li mu usiila me imiinu, a hubasiila hyo ndulu mu me ve, ka napa mu wuuna wu atsindaha me. 45Na muutu wu miimono me, miimono napa wu atsindaha me. 46Me anza mu tsi we liyalala. Pasi muutu wu usiila me imiinu, a hafwana ukwilala mu piipidi ve. 47Tso muutu li mu uyuha mambu ma me, ka velisalila mo, me a handi mu utsundasa nde ve. Mu tooni ati, me a hanza mu utsundasa baatu ba tsi ve, ka mu uyobolo bo. 48Muutu wu ubaanyanza me na uvelesiinga mambu ma me, amiibaha wu utsundasa nde. Ni mikuma mi me andeele myutsundasa nde, mu ilumbu hya tsyelele. 49Mu tooni ati mambu ma me nzabisi benu, a mali ma me mwakulu ve. Ka nde mwakulu Taata wu atsindaha me, atuma me mambu ma me apfwana uleele na ulongese. 50Na me nzaabi ti tumili a Taata yibaabita baatu hu moonyi wu bilima na bilima. Ni mu buuna, mambu moosi ma me ndi mu undeele, me ndi mu undeele mo we bu Taata haleele me.»
Zvasarudzwa nguva ino
Yowani 12: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.