Yowani 11
11
Lipfu la Lazaro
1Hwaba na mubeedu mumosi, nduhi a nde Lazaro. Nde aba musi Betanya, bula bwa Mariya na Malata, bakedi ba nde. 2Mariya ni wu apuupili nyafi mu miilu mya Pfumu na ukombolo myo mu nanga a nde. Wu aba mu ubeele ni kedi a nde Lazaro. 3Bakedi ba nde baboole, baatsindihi muutu mu uyateele Yisu na uyabisa nde ti: «Pfumu, mono mbaahi a we, wu we atondo amiibeele.» 4Yisu amana uyuha buuna, nde aleeli: «Bubeedu mo bunuubu a bu lipfu ve. Ka bwo sa bubehe muyusu a Nzambi, mana bayusa Mwana a Nzambi mu bwo.» 5Yisu aba asinzatondo Malata na baana ba ngu a nde Mariya na Lazaro. 6Bu nde hayuhi ti Lazaro aba aka mubeedu, buuna, nde abwetsahala bilumbu byole ŋa mbuha yi nde haba. 7Titswene, nde aleeli huli bayihi ba nde: «Nyaha lifutahaani hu Yude.» 8Bayihi baaleeli nde: «Rabi, Bayudaayo bakasaha uduba we mu mamanya matsuhu mo maniima. Buni! We bwefutaha huuna?» 9Yisu afutili: «Mu ilumbu hu li na mangunga kuumi na moole (12). Tso muutu li mu udyenge ŋa nyangu, nde a hukuba baku ve, mu tooni ati nde ubaamono mu liyalala. 10Ka tso muutu li mu udyenge butsuhu, nde ubaakuba baku, mu tooni ati, nde utwala ubwemono bubwe ve.»
11Ŋa yulu a mambu mo maniima, nde aleeli bo: «Lazaro, mbaahi a bisu amiibwamina, ka me unzatsuula nde.» 12Bayihi baaleeli nde: «Pfumu, tso nde amiibwamina, nde ubeeloho.» 13Yisu akayambila mu lipfu la Lazaro. Ka bayihi ba nde baakatsima ti Yisu mu tolo la Lazaro hakayambila. Kaahu aba tolo li lipfu. 14Bunuubu, Yisu aleeli bo paayalala: «Lazaro amiikwa. 15Ka me ndi na kinya mu benu, bu me mbeedi avele huuna. Ni mu liina, benu luusiila me imiinu. Ka tswendaani huli nde.» 16Tomasi nga kuumbu «Vasa», aleeli bayihi bakima: «Tswendaani bisu a benu kaka, mana liyakwaani na Mulongisi.»
17Ŋa Yisu hayato, nde ayuhi ti Lazaro aka hutso a ngila umata bilumbu bina. 18Bula bwa Betanya aba bwa tahuha na Yeruselemi, bebele mu bakilometere batatu. 19Bayudaayo ba banzuhisini baayidi huli Mariya na Malata, mu ubombesele bo mu lipfu la kedi a bo. 20Bu Malata hayuhi ti Yisu mu uya ali, nde ayabwana nde. Ka Mariya asaali matsahala hu nzo. 21Malata aleeli Yisu: «Pfumu, kini we aba ŋaana, kedi a me a hakiikwa ve. 22Ka buunubu, me nzaabi ti pasi hi we uvondo huli Nzambi, nde uva we hyo.» 23Yisu aleeli nde: «Kedi a we sa asuuha mu lipfu.» 24Malata afutili: «Me nzaabi ti nde sa asuuha mu tsuuhili a babakwa, mu ilumbu hya tsyelele#Dan 12.2.» 25Yisu aleeli nde: «Me, me ni tsuuhili na moonyi. Pasi muutu wu usiila me imiinu, sa aba moonyi, tso nde kwidi. 26Na pasi muutu wu li moonyi, na wu usiila me imiinu, a hukwa ve. We li mu usiila mambu mo maniima imiinu?» 27Malata aleeli: «Eye Pfumu, me ndi mu utsa imiinu ti we ni Kristo, Mwana a Nzambi, wu baatu ba tsi baakakeele.»
Yisu miisuula Lazaro mu lipfu
28Bu Malata hamani uleele buuna, nde ayateele Mariya mwaana a ngu a nde. Na aleeli nde mu tswehi: «Mulongisi ni ŋaniiŋa ali, nde li mu uteele we.» 29Bu Mariya hayuhi buuna, nde amani mu tele mu mawasa na ayeni huli Yisu. 30Yisu aba kini ŋa tsomo a bula, ŋa mbuha yi Malata habwani nde. 31Bayudaayo ba baaba hutso a nzo na Mariya mu ubombesele nde, baamoni nde mu uteleme mawasa na upala. Bo baaduukili nde, bu baakatsima ti nde hu ngila ali mu uyene hu uyalila.
32Mariya atoodi ŋa Yisu haba. Bu nde hamoni Yisu, Mariya abwiidi ŋa miilu mya nde na aleeli: «Pfumu kini we abeedi ŋaana, kedi a me a hakiikwa ve.» 33Bu Yisu hamoni Mariya na Bayudaayo ba baadukili nde mu ulila, nde amoni lingebe na anyongi. 34Nde afuuli bo: «Benu nde huni laasuusa?» Bo baafutili: «Pfumu, yanga yamono.» 35Yisu alili. 36Buuna, Bayudaayo baaleeli: «Monwaani buni nde habeedi hatondo nde!» 37Na bakima mu bo baaleeli: «Nde wunuuwu a ni wu adibuli miisu ma inzimana ve? Buni nde havelitwala usa kaka ti Lazaro avelekwa?»
38Bunuubu, Yisu abwemono lingebe li laafulala. Nde ayeni hu ngila. Ngila mo yiina aba we murali, wu kotili yaba baadibuha mu manya li linene. 39Yisu aleeli: «Masaani manya.» Malata, kedi a wu akwa afutili: «Pfumu, nde amiibaandiha upala tsulu. Mu tooni ati loloyi, huka biluumbi bina nde ali mutso a ngila.» 40Yisu aleeli nde: «Me a handeele we ve ti, tso we sili me imiinu, we umono muyusu a Nzambi?» 41Baamaasi manya. Yisu asimbuli miisu hu yulu na aleeli: «Taata, me miipfutala matondo bu we miiyuhala me. 42Me nzaabi ti we ubaayuhala me taangu yoosi. Ka me ndeeli buuna, mu tooni a konge a baatu mo baniba ba baadiinga me, mana bo basa imiinu ti ni we atsindaha me.» 43Bu nde hamani uleele buuna, nde asyenuli ndaha na mifudi myosi: «Lazaro, pala!» 44Wu akwa apali mu ngila, miilu na myoho baapoto birende, na mbalanga baafuungala lileeso. Yisu aleeli bo: «Nyangulaani nde na nyahulaani nde ayene.»
Pfuundu a bangu ba bangaanga mu Yisu
45Bayudaayo ba banzuhisini ŋa hati la ba baayidi huli Mariya, ba baamoni ma Yisu havangi, baasiidi imiinu mu nde. 46Ka bakima ŋa hati la bo, baayamono Bafarisi na uyabisa bo ma Yisu havangi. 47Buuna, bakuutu ba bangaanga ba Nzambi na Bafarisi, baakuungi pfuundu banzonzi baa Bayudaayo, na baaleeli: «Bisu a benu hima lusaani? Mu tooni ati, nde li mu usa biliimbu bya kimuhili bi bilahi. 48Bisu a benu linyaha nde mu usa mavaanga ma nde, baatu boosi sa basa imiinu mu nde. Na bisu Looma sa bayapatula byosi: nzo a Nzambi na tsi a bisu.»
49Mumosi mu bo, nga nduhi Kayifa, wu aba mukuutu bangaanga ba Nzambi watsomi mu ilima mo hiina, aleeli: «Benu a lili mu utsikaha pasi lo ve! 50Benu a lili mu umono ve ti, hwafulala tsalu ti muutu akwa mu tooni a buli? Kini tsi yoosi yunyambana!» 51Kaahu Kayife a haleeli buuna mu matsimi ma nde mwakulu ve. Ka bu nde haba mukuutu bangaanga ba Nzambi watsomi mu ilima mo hiina, nde abihuli ti Yisu afwana ukwa mu tooni Bayudaayo boosi. 52Ka lipfu, a ndulu mu tsi Bayudaayo ve, ka napa mu upfuuta mu nyutu mosi, baana ba Nzambi boosi ba baamiitsamuha mu toto yoosi.
53Umata ilumbu mo hiina, bakuutu ba Bayudaayo baavoli kesili mu uduba Yisu. 54Ni mu buuna, Yisu hakabweveledyenge ŋa miisu ma Bayudaayo. Ka nde ayeni hu itaanzi hya bebele na kumu, hu musyenge wu bubaateele Ifrayima. Nde atsahili huuna na bayihi ba nde.
55Paake, mukungi Bayudaayo, aba aka bebele. Baatu ba banzuhisini baayakuma hu Yeruselemi, mu utsyemese nyutu na muvumu. 56Bu bo baaba mu litandala la nzo a Nzambi, bo baakasaha Yisu na baakalelesene: «Buni benu lili mu utsima? Nde a huuya hu mukungi ve?» 57Bakuutu ba bangaanga ba Nzambi baatsomi na Bafarisi, baaviidi tumili mo yiniiyi: «Tso muutu yaabi huni Yisu ali, nde afwana uyabisa bisu, mana bisu likanga nde.»
Zvasarudzwa nguva ino
Yowani 11: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.