Mavaanga 12
12
Ndubili a Yaaki, kotili a Peetelo mu kondaayi
1Mu taangu mo yiina, pfumu Eloode akaangi baana ba libundu bakima mu unyongese bo. 2Nde atumi masadaadu ma nde mu uduba Yaki mwaana a ngu a Yowani mu sabila. 3Bu hamoni ti mavaanga mo maana mali mu umweese bakuutu ba Bayudaayo kinya, nde abwetuma ukaanga ka Peetelo. Baakangi nde mu taangu mukungi mapa ma maaveledaana. 4Humbisa ukaanga Peetelo na ubwaha nde mu kondaayi, Eloode asuusi mabuli mana ma masadaadu mana-mana mu ukeelese nde. Nde atsimi utsundasa Peetelo ŋa kuungi la baatu, humbisa mukungi a Paake. 5Bu baakakeelese Peetelo mu kondaayi, libundu laakasambila Nzambi mu nde taangu yoosi na ibahala.
Pofi miiyobolo Peetelo
6Mu butsuhu bu bwatehili ilumbu hi Eloode hakiitsundasa Peetelo ŋa kuungi la baatu, Peetelo aba abwamina ŋa hati li masadaadu moole. Baakuti nde mu mapanga moole. Bakeedi bakima baakakeelese ŋa busu bu munywa a nzo a kondaayi. 7Masulubete, pofi a Pfumu ayamonehele, na ŋa Peetelo haba, hwaluuli mu liyalala. Pofi anyingisi nde, asuuli nde na aleeli: «Teleme mu mawasa!» Buuna, mapanga ma maaba mu myoho mya nde maabwidi. 8Pofi aleeli: «Hada mudi a we a luungu, na kuta bikoodi bya we!» Peetelo asiidi buuna na pofi abwesi: «Lwata iyunga hya we, na duukala me.» 9Peetelo aduukili pofi, na apali mu kondaayi. Ka nde akatsima ti hyo aba imono-miisu. Nde a hakatsikaha moosi ma pofi hakavaanga ve, tso maaba ma mbuli. 10Bo baavyohi mbuha bakeedi yatsomi, titswene ya moole, buuna bo baayato ŋa busu bu munywa a nzo bitali, wu akatalisa hu musyenge. Munywa a nzo adibumi mu nde mwakulu. Bu bo baapali na baayasusaha hu tsoso a nzila, mu mawasa, pofi asisi Peetelo.
11Buuna Peetelo apadumini na atsimi: «Bunuubu me miimono bubwe ti mu mbuli, Pfumu miitsindaha pofi a nde. Nde miiyobolo me ŋa myoho mya Eloode. Nde miiyobolo me, mu moosi ma buli li Bayudaayo bakiivangila me.» 12Bu nde hatsikihi buuna, nde ayeni hu nzo a Mariya, ngu a Yowani nga kuumbu Malako. Baatu ba banzuhisini baakuukimi huuna mu usambila Nzambi. 13Peetelo adoodi munywa a nzo. Musalili mumosi wu mukaasu wu bubaateele Roode, ayasusaha mu udibula na ufuula; na doodi. 14Nde adihuli ndaha a Peetelo wu ayahuli, na aluuli mu kinya. Teehele nde adibula, nde abingilili uyayabisa ti Peetelo hu mbadi ali ŋa busu bu munywa a nzo. 15Buuna bo baaleeli nde ti: «We ladi li na lo!» Ka nde akwilili mu ubaaleele ti Peetelo hu mbadi ali. Bo baaleeli ti: «Nde ŋana ka Pofi a nde!» 16Ka Peetelo akwilili mu udoodo munywa a nzo. Bu bo baadibuli munywa a nzo na baamoni Peetelo, bo baakimuhi boosi bu baamoni nde. 17Mu hoho hwa nde, Peetelo avondi bo mu ubaa «swii». Na nde ayabisi bo buni Pfumu hapalisi nde mutso a kondaayi. Nde abwebwese: «Yayabisaani mambu mo maniima huli Yaki na huli baana ba ngu bakima.» Titswene, nde apali na ayeni tsyelo kima. 18Bu busi bwakiidi, muyungisi wu munene aba ŋa hati li masadaadu. Bo baakatsundana: «Ki dyaambu libwili Peetelo!» 19Eloode atumisi baatu mu uyasaha Peetelo, ka bo abaamoni nde ve. Buuna, Eloode atsundisi ba baakakeelese Peetelo. Bu baavelifutala nde mvutu, nde atsindihi baatu mu uduba bo. Humbisa, Eloode asiisi itaanzi hya Yuda, mu uyavyoso taangu hole hu musyenge a Sezare.
Lipfu la pfumu Eloode
20Mu taangu mo yiina, Eloode aba na kesi a bisu Tiilo na bisu Sidoni. Ni mu buuna, baatu ba bitaanzi mo biina baayuhisini mu uyamono Eloode. Humbisa baafuti mbongo huli Balasitusi, mukeelisi itini hya nzo a pfumu. Bo baavangi buuna, mana Balasitusi ayalembesene Eloode mu uyuhasana na bo. Mu tooni ati, byudya bya Tiilo na Sidoni ubaamata hu tsi a pfumu Eloode. 21Mu ilumbu hi bo baasooli, Eloode alwati ikutu hya nde hi mifwende, atsahili ŋa kiti a nde yi ipfumu, asiidi ileedi ŋa litandala. 22Baatu baakafulaha: «Wunuuwu, woosi we Nzambi li mu utoyo, ka a muutu ve!» 23Mu taangu mo yiina, pofi a Pfumu ateti Eloode, mu tooni ati nde ayaki muyusu wu bubaava huli Nzambi. Mu usyembe nde, misobi myakaatuhi nde mu moonyi, na nde akwidi. 24Ka mambu ma Nzambi maakafulala utsamuha, na baatu ba banzuhisini baakasiinga mo. 25Bu Baranabasi na Sahuli baamani ukuhasa isalu hu Yeruselemi, bo baasiisi Yeruselemi na baabiti Yowani#12.25 bo baasiisi Yeruselemi na baabiti Yowani hu musyenge a Antyokya. wu baakateele ka Malako.
Zvasarudzwa nguva ino
Mavaanga 12: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.