Mavaanga 13
13
Livupu la Ngidi limiisoolo Baranabasi na Sahuli
1Mu tso libundu la Antyokya, hwaba na mimbihuli na milongisi: Baranabasi, Simehoni wu baakateele «Mupindi», Lukiyusi musi Kilene, Manaheni mbaahi a Eloode wu bukenyi, wu akatuma itaanzi hya Ngalili#13.1 Eloode Eloode Antipa Luk 3.1. , na Sahuli. 2Ilumbu imosi, bu bo baakasambila Pfumu na bu bo baakadya ikaandi, Livupu la Ngidi laayabisi bo: «Vengolwani Baranabasi na Sahuli, mu tooni isalu hi me ateele bo mu hyo.» 3Ni mu buuna, bu baamani udya ikaandi na usambila Nzambi, bo baasuusili bo myoho na baanyahi bo bayene.
Baranabasi na Sahuli hu Kipere
4Livupu la Ngidi laatsindihi Baranabasi na Sahuli. Bo baakulimini hu ngulu yi makuumbi ma nzali mu baatsikama, hu bo baanami mu likuumbi la nzali mu uyene hu iliiŋa hya Kipere. 5Bu bo baatoodi hu musyenge a Salamineya, bo balongisi mambu ma Nzambi mu manzo ma lisambulu ma Bayudaayo. Yowani nga kuumbu Malako aba itwadi na bo na akabaakumbasa bo. 6Bo baataangili iliiŋa hyoosi natee hu musyenge a Pafosi. Huuna bo baabwani ngaanga mumosi, nduhi a nde Bare-Yisu. Ngaanga mo wuuna aba Muyudaayo, wu akabinuha ti nde mumbihuli a Nzambi. 7Nde aba abaambana na Seregiyusi nga kuumbu Pahulusi, pfumu a iliiŋa mo hina, wu aba muutu nga buyedi. Nde atsihi Baranabasi na Sahuli, bu haba na peyu yi uyuha mambu ma Nzambi. 8Ka ngaanga mowuna, nga nduhi a «Elimasi» mu ndaha Bangeleke, abisi ma bo na akasaha ti pfumu a hasoolo nzila a Kristo. 9Buuna Sahuli wu baakateele ka Pahuli#13.9 Sahuli aba nduhi Bayudaayo yi iluumbi na Pahuli nduhi a nde yi Balooma 22.27-29. , aba wu aluula mu Livupu la Ngidi. Nde asungimini ngaanga. 10Nde aleeli: «We aluula mu mapfuta na bukanyi, mwaana Mukuyi, muboho a byosi bibibwe! Tsikaha utengehe mavaanga ma Pfumu ma maasungama. 11Bunuubu yuha bubwe! Hoho hwa Pfumu sa hubwa ŋa yulu a we, we sa baa inzimana, na we a ubwemono liyalala li litadi ve, umata mwaana a taangu.»
Masulubete, miisu ma Elimasi maadimi na nde akoti mu butsuhu. Nde akapeebete tsyelo na tsyelo mu usaha muutu wu ukaanga nde mu hoho na ubita nde. 12Bu pfumu hamoni ma maavyohi, nde asooli nzila a Kristo. Ndongisili yi baasili nde mu tooni a Pfumu, yakotilili nde mu mutima.
Pahuli na Baranabasi balongisi bisu Antyokya ya Pisidiya
13Umata hu Pafosi, Pahuli na bakaanga ba nde baakoti likuumbi la nzali na baasabuhi natee hu musyenge a Perege hu tsi a Papfiliya. Yowani nga kuumbu Malako#13.13 Perege: musyenge a simu la hu baanda ya itaanzi hya Asiya yi ikeehe. Yowani nga kuumbu Malako: utala 2.12,25; 13.5. akabuhi na bo, na afutihi hwa nde hu Yeruselemi. 14Bo bamata hu Perege, bo baaduukili nzila a bo na baayato hu musyenge a Antyokya ya Pisidiya. Mu ilumbu hya saba, bo baakoti mu nzo lisambulu yi Bayudaayo na baatsahili. 15Bakuutu ba nzo lisambulu yi Bayudaayo baataangi mambu ma ilumbu mu mikele mya Moose, na mu mabuuku ma mimbihuli. Titswene, baatsindihi muutu mu uleele bo: «Baana baa ngu a me, tso benu na mambu ma uyabisa huli libundu mu uhwadisa lo, leelaani.»
16Pahuli atelimi, asyenuli hoho hwa nde mu uliha kele, na aleeli: «Bisu Isereli na benu baa libaakiinza Nzambi, yuhaani me! 17Nzambi a bisu Isereli amiisoolo bakaaha ba bisu. Nde akulisi buli la bisu bu lo laaba mu bumwenyi hu tsi a Ngipiti. Titswene nde apalisi lo mu tsi mo yiina mu matwala ma nde. 18Nde akundi mbiili a lo#13.18 akundi mbiili a lo: buuve Nzambi abungili lo Pal 1.7; 12.51; Mat 14.34; Pfu 1.31. mu bilima bebele maku mana mu kumu a nzala. 19Humbisa, nde abungisini mabuli tsambu hu tsi a Kanana#Pfu 7.1; Yos 14.1. Na nde aviidi itaanzi we mukobe huli buli la nde. 20Maana moosi maasiidi bilima bebele maakama mana maku mataanu.»
«Ŋa yulu a ŋana, nde aviidi banzonzi huli baakaaha ba bisu natee mu taangu mumbihuli Samweli#1Sa 3.20; Bnz 2.16. 21Titswene bo baavondi pfumu mumosi, na Nzambi aviidi bo Sahuli, mwaana a Kiise, wu ibaandu hya Benyamini. Nde atumi mu bilima maku mana. 22Nzambi anyasuli Sahuli na atelimisi bo Davidi we pfumu. Nzambi atiili nde imbangi mohi: “Me miimono ti Davidi, mwaana a Yese, nde li muutu wu ubaakuhasa matsimi ma mutima a me, nde sa akuhasa moosi ma litondo la me#1Sa 8.5,19; 10.21; 13.14; 16.12; Mkg 89.21.” 23Mumosi ŋa hati li imbisa hya Davidi aba Yisu, wu Nzambi hasooli mu uba Muyobili a Isereli we bu nde hasiidi nzuhisini. 24Tswamina nziili a Yisu, Yowani alongisi musamu wu mubwe huli buli li Isereli loosi, mu usobo mbiili na uyaka tondihili#13.24 usobo mbiili na uyaka tondihili mbindulili kima, usobo bipfu buuve ukiingula buyedi Mak 1.4; Luk 3.3.. 25Tangu yi Yowani hasukisi isalu hya nde, nde akaleele: “Benu ubaatsima ti me na ndi? Me a ndi wuna wu benu libaakeele ve. Ka yuhaani: muutu li mu uya humbisa a me, na me a handi tso wu akuha mu uba muviha, mu unyangula midi mi bikoodi bya miilu mya nde ve#13.25 unyangula midi mi bikoodi bya miilu mya nde ve Yow 1.20; Mat 3.11; Mak 1.7; Luk 3.16; Yow 1.27. .”»
26«Baana baa ngu a me, benu baa imbisa hya Abrahami, na baa bubaakiinza Nzambi. Ni huli bisu a benu boosi, Nzambi hatsindaha musamu liyobolo wunuwu. 27Ka bisu Yeruselemi na baatumi ba bo a baatsikihi Yisu na ali ve. Ŋa batsundisi nde, bo baakuhisi mambu ma mimbihuli ma bubaataanga pasi ilumbu hya Saba. 28Tso bu bo baavelimono tooni mu utsundasa nde mu lipfu, ka bo baavondi huli mutumi Pilaato, mu utuma uduba nde. 29Humbisa ukuhasa moosi ma bisono bya Ngidi byayabisi mu tooni a nde, baasutisi nde ŋa kuruwa na baasuusi nde mutso a ngila#13.29 ngila utala Mty 27.22-23,57-61; Mlk 15.13-14,42-47; Luk 23.21-23,50-56; Yow 19.15,38,42.. 30Ka Nzambi asuuli nde mu babaakwa. 31Mu bilumbu bi bilahi, Yisu amonihili huli ba baakadyenge na nde. Ni baatu ba baakayene na nde umata hu itaanzi hya Ngalili natee hu Yeruselemi. Na bunuubu, bo bali bambangi ba nde, ŋa busu bwa bisu Isereli. 32Bisu mwakulu lili mu ubehele benu musamu wu mubwe wu Nzambi hasiidi nzuhisini huli bakaaha ba bisu. 33Bunuubu, Nzambi miikuhasa lo we bu hwafwana huli bisu bikiisa bya bo. Mu usa buuna, Nzambi miisuula Yisu mu babaakwa we bu baasonehe mu Mukuunga wa myole:
“We ni wuli mwaana a me,
loloyi, me mimbuta we#Mik 2.7.”
34Nzambi ayabisi ti nde sa asuula Yisu ŋa hati la babaakwa mana nyutu a nde a yibolo. Nzambi aleeli bunuubu:
“Me tsa pa benu lisyeme la ngidi,
li me atsiidi nzuhisini la simi-simi huli Davidi#Esa 55.3.”
35Ni mu buuna, nde ali mu ubwesiitasa mu Mukuunga mukima:
“We a hutuma ti me, musalili a we wa ngidi,
nyutu a me yibolo mutso a ngila ve#Mkg 16.10.”
36Mu taangu a nde, Davidi akuhisi litondo la Nzambi, na nde akwidi. Baadiihi nde ŋa muvanga bakaaha ba nde na nyutu a nde yaboli#13.36 1Pf 2.10.. 37Ka Yisu wu Nzambi hasuuli mu babaakwa, a haboli ve. 38Baana baa ngu a me, benu lafwana uyaba lo ti: ni mu tooni a Yisu, Nzambi haminyahula masumu ma benu. Ka Mikele mya Moose a myatwali unyahula masumu ma benu ve. 39Ni mu nde pasi muutu wu ubaasa hiitu mu Yisu, amiiyaka nyahulili masumu ma nde. 40Buuna kebaani, mana ma mimbihuli myasonehe a mayiila benu:
41“Talaani, benu baa libaabaaya Nzambi,
kimuhani na dimbalaani.
Ka me ukuhasa vanga limosi, mu taangu a benu yi.
Vanga liina li benu lu uvelesa hiitu,
tso muutu mukima yabisi benu lo#13.41 Hab 1.5. !”»
42Pahuli na Baranabasi baapali mu nzo lisambulu yi Bayudaayo. Baavondi bo mu ubweyafutaha mu ilumbu hya saba hi hyakaduukala, mu ubwetoyo mu musamu mowuna. 43Bu imoho hyafwidi, Bayudaayo ba banzuhisini na baatu bakima ba baasiingi uyusa Nzambi, baaduukili Pahuli na Baranabasi. Bo baakahwadisa bo mu ukangama mu Nzambi, wu ubanyahula masumu ma baatu.
Pahuli na Baranabasi baaka mu ulongese ba bavele Bayudaayo
44Mu ilumbu hya saba hi hyaduuki, bisu musyenge a Antyokya ba banzuhisini, baayakuukama mu uyuha mambu ma Pfumu Yisu. 45Bu Bayudaayo baamoni konge a baatu mo yiina, bo baaluuli mu nyengi. Na baakatuna ndongisili a Pahuli ti yi upfuta, na baakatuha nde. 46Buuna, Pahuli na Baranabasi baayabisi bo na hiitu hyoosi ti: «Beedi hwafwana ti benu liba baatsomi mu uyuha mambu ma Nzambi. Ka bu benu lili mu unyasula mo, na umono ti benu a laakuha mu uyaka moonyi wu bilima na bilima ve, bunuubu, bisu sa liyene huli ba bavele Bayudaayo. 47Buuna monwaani ma Pfumu hatuma bisu:
“Me atsooli we mana we baa liyalala huli ba baaveleyaba me,
mana we bita liyobolo, natee hu tsukusu a tsi#13.47 Esa 49.6..”»
48Bu ba bavele Bayudaayo baayuhi mambu mo maana, bo baaluuli mu kinya na baayusi mambu ma Pfumu. Boosi ba Nzambi hasooli mu ubaha moonyi wu bilima na bilima, baasiidi hiitu mu Pfumu. 49Maambu ma Pfumu maasinzitsaamuha mu itaanzi mo hina hyoosi. 50Ka Bayudaayo baasimbilili bakaasu ba biita lilinene, ba baakayusa Nzambi, napa bangeele baa musyenge. Bo baatsumbili kwamisili ya Pahuli na Baranabasi, na baabingi bo mu itaanzi hya bo. 51Pahuli na Baranabasi baakubili bo mufundu a miilu mya bo#13.51 Mak 6.11. mu uyibusa bo, na baayeni hu Ikoniwumi. 52Ka bayihi ba Pfumu hu Antyokya, baaluuli mu kinya na mu Livupu la Ngidi.
Zvasarudzwa nguva ino
Mavaanga 13: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.