Mavaanga 1
1
Kotili a muhanda
1Ngeele Tehofile, mu libuuku la me latsomi, me atsonihi moosi ma Yisu habandihi uvanga na ulongese, 2natee mu ilumbu hi nde havati hu yulu. Tswamina Yisu mu uvata hu yulu, nde asooli biluumbi na aviidi byo tumili mu matwala ma Livupu la Ngidi.
3Humbisa umono pasi yi lipfu, Yisu ayamonehele huli baatu mo baana, na umweese bo mu biliimbu bi bilahi, ti mbuli nde moonyi ali. Nde ayamonehele huli bo, mu maku mana ma bilumbu. Mu taangu mo yiina, nde ayabisi bo mambu ma Ipfumu hya Nzambi.
4Ilumbu imosi hi Yisu hakadya mu itwadi na biluumbi, nde aviidi bo tumili mo yiniiyi: «A lipala mu Yeruselemi ve, ka keelaani nde wuuna wu Taata hasiidi nzuhisini. Ni nde wuuna wu me anzabisi benu. 5Yowani atondihi baatu mu mamba, ka mu bilumbu hole, Nzambi utondehe benu mu Livupu la Ngidi.»
Yisu avati hu yulu
6Ba baakuukimi ŋa pedu a Yisu, baafuuli nde: «Pfumu, ni mu taangu mo yiniiyi we ufutala ipfumu hya Isereli?» 7Yisu afutili bo: «A huli dyaambu la benu mu uyaba, ki matangu na matsuhu ma Taata hakese mu lituma la nde mwakulu ve. 8Ka benu lu uyaka matwala, bu Livupu la Ngidi lukulamana ŋa yulu a benu. Benu lu uba bambangi ba me mu Yeruselemi, mu itaanzi hya Yuda hyoosi na hya Samariya, natee hu hwasuka toto.»
9Bu hamani uleele mambu mo maana, Yisu avati hu yulu. Bu biluumbi byosi byakatala nde, yidu laabiti nde. 10Bu bo baakatala hu yulu hu Yisu hakayene, baatu boole ba baaba baalwata bikutu bi bifuka, baayamonehele ŋa busu bwa bo. 11Baatu mo baana baaleeli bo: «Benu bisu Ngalili, hima benu lamiiteleme ŋa, mu ubaatala hu yulu? Yisu mo wunuuwu, wu Nzambi amiimasa ŋa hati la benu mu ubita hu yulu, uyafutaha we bu benu limoni nde mu uyene.»
Matyasi miikisana Yuda
12Biluumbi byafutihi hu Yeruselemi mu umata hu isyelo hya Olive. Isyelo mo hiina hyaba bebele na musyenge a Yeruselemi, mu itsudu hya ngunga mosi mu dwe la miilu. 13Bu bo baatoodi hu musyenge a Yeruselemi, bo baavati hu itini hi ibaanga hya yulu hu bo baaba na ipfu hi upfutana. Ŋa hati la bo aba Peetelo na Yowani, Yaki na Andele, Filipo na Tomaasi, Batolomayi na Mataayi, Yaki mwaana a Alafe, Simoni wu aba mu kabu li «bazeloti#1.13 bazeloti aba kabu la baatu ba baakalwanisa bisu Looma mu usaha bunyanga bwa Isereli.» na Yuda mwaana Yaki. 14Boosi mu matsimi mamosi, baakapfutana taangu yoosi mu usambila Nzambi. Itwadi na bakaasu bakima, Mariya ngu a Yisu, na baana ba ngu a Yisu.
15Mu bilumbu mo biina, banga hiitu baapfutini. Bo aba bebele a kama na maku moole (120). Peetelo atelimi ŋa hati la bo, na aleeli: 16«Baana baa ngu a me, hwafwana ti mambu ma Livupu la Ngidi laayabisa mu bisono mu munywa a Davidi, matswiha, mu tooni a Yuda wu alahi nzila huli ba baayakaanga Yisu. 17Yuda aba mumosi ŋa hati la bisu a benu, na nde akasala itwadi na bisu. 18Mu mbongo yi baaviidi mu pfuta lisumu la Yuda, baasumbili nde ngundu. Ni hutso a ngundu mo yiina, nde habwidi mutswe mu toto, moonyi a nde atubihi na bihati bya nde byosi byasudimi. 19Bisu Yeruselemi boosi baayuhi musamu mowuna. Ni mu buuna, ngundu mo yiina baaviidi yo nduhi mu ndaha a bo: “Akelidama”, mbindulili ti: “ngundu makila”. 20Buuna baasonehe mu Mikuunga mya Davidi:
“Nyaha nzo a nde babungasana yo,
na tso muutu mumosi a hatsahala mu yo ve!”
Na baabwesonehe:
“Muutu mukima akiisana ŋa isalu hya nde#Mkg 69.26; 109.8.”
21Laafwana mu usoolo muutu mumosi ŋa hati la ba baakayavehese bisu a benu, mu taangu yoosi yi Pfumu Yisu hakadyenge na bisu a benu. 22Muutu mowuna abeedi ŋana, umata taangu yi Yowani hakatondehe, natee bu Yisu havati hu yulu. Hwafwana ti mumosi ŋa hati la baatu mo baana, aba mbangi a bisu mu tsuuhili a Yisu mu babaakwa.»
23Baatelimisi baatu boole. Muutu watsomi Yosefi, wu bubaateele Barasabasi. Kuumbu a nde kima Yusetuusi. Muutu waboole, wu bubaateele Matyasi. 24Baasambili bunuubu: «Pfumu, we ni wu yabi mitima mya boosi. Mweese bisu, na we sooli ŋa hati la baboole baniiba, 25mana nde asala isalu hi buluumbi ŋa ikiisa hya Yuda. Nde wuuna wu atimbi isalu hya nde, mu uyene hu mbuha yi yafwana na nde.» 26Bo baatidi ngodo, na baasooli muutu waboole Matyasi, wu baabwesi ŋa hati la kuumi na iluumbi imosi.
Zvasarudzwa nguva ino
Mavaanga 1: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.