Eksotus Nuarin-tas alupas 29.
Nuarin-tas alupas 29.
1 Niji itai ahlap im niji edo par ikni ilpu atimi ahlap iran. 38 Nitai ahlap inig eri ahlap irai iji adiat asega. 45 Intas upyi asaig u Atua par amen ehele nup Isreel.
1NAMU ago nedo inig vai ra aiek, mika eri itap ara par aheca unyak an nauritai u ilpu atimi ahlap: Namu leh kurimatau atamaig takuras yi ethi aiek, im siip atamaig yi ero, et ti nitai has irai ehtaij,
2im nareto et ti leven iran, im biskit er aplamod pelaig an narakei, im biskit er aspi an narakei; uhmu ago a flaur irai hwiit.
3Namu atohwaig an cat yi ethi aiek, um imiapan an cat, im lep kurimatau atamaig, im siip atamaig erahki.
4Namu lep imiapan Eron aiek, im ilpu hal o un, an neucse neom er asjapicnaig o un, um yiri ra an wai;
5um lucsei apelumai, um aso Eron an napelumai uhup, im napelumai uri efot, im efot, im nitai adahpoi inritin, um ati iran nitai ahid esjilid uri efot:
6um ati incat adgaig an nidjinin, um athai korona iyehki an cat adgaig.
7Ja par leh narakei aspi, um atladwi an nidjinin, um aspi yin.
8Namu lep lucsei ilpu hal o un aiek, um aso ra ira apelumai uhup;
9um ati niji itai ahid ira Eron im ilpu hal o un, um ati niji cat adgaig ira ra: erumu lep ago nauritai u ilpu atimi ahlap ara, intas alep nigki imi iji mesese: namu ikni Eron im ilpu halav atamaig o un aiek.
10Namu ika aiek eri imiapan kurimatau atamaig an nuhup u neom er asjapicnaig o un: erumu lep ikni ikmara ijinies an nidjini kurimatau atamaig a Eron im ilpu hal o un,
11Namu atgei kurimatau atamaig aiek an nuhup u Ihova, an neucse neom er asjapicnaig o un.
12Namu lep leh inja irai kurimatau atamaig iyehki aiek, um ati irai ipat an natau an nupsikmam, um atladwi inja asega iran an nohuun natau,
13Namu leh nagako asega iran aiek irai auitin, im nopoigopoig et adahpoi inmopon, im nohwanispeheg et ero im nagako iran, um atnamud ijinies an natau.
14Jam atnamud itac va nuarin amen u atimi nemihtai kurimatau atamaig, im narasin, im nihkin: nitai ahlap va nedo has nigki.
15Namu lep leh siip atamaig yi ethi aiek; erumu lep ikni ikmara ijinies an nidjinin a Eron im ilpu hal o un.
16Namu lep atgei siip atamaig iyehki aiek, um leh inja iran, um ohwaig an natau, um arehed mihtag.
17Namu lep ehtoplecoplec siip atamaig iyehki aiek um yiri nauintin, im neduon, um ikni u iji uarin, im nipek o un.
18Namu lep atnamud siip atamaig asega aiek an natau: nitai ahlap atnamud nigki vai Ihova: et itai auanipin upene, nitai ahlap er ago an cap vai Ihova.
19Namu lep leh siip atamaig et eche iyehki aiek; erumu lep ikni ikmara ijinies an nidjinin a Eron im ilpu hal o un.
20Namu lep atgei siip atamaig iyehki aiek, um leh inja iran, um ati an nilpun tikgai Eron inmatan, im nilpun tikgai ilpu hal o un inmatara, im lep an nupsikman meto inmatan, im nupseduon meto inmatan, im lep irai upsikmara meto inmatara, im nupseduora meto inmatara, um ohan ja ijinies an natau, um arehed mihtag.
21Namu leh tah inja ijinies an natau aiek, im narakei aspi, um ohaig irai Eron im napelumai o un, im ilpu hal o un, im napelumai u ilpu hal o un: etpu itap aien, im napelumai o un, im ilpu hal o un, im napelumai u ilpu hal o un.
22Namu atipagki nagako an nilauei siip atamaig iyehki aiek, im nagako et adahpoi auitin, im nopoigopoig et adahpoi inmopon, im nohwanispeheg et ero, im nagako iran, im neuhlin an matan; siip atamaig nigki par ago itap atimi vaig:
23im nareto inyi ethi, im biskit yi ethi et amen narakei iran, im biskit yi ethi ahes an cat inig et amen iran nareto et ti leven iran, et amen an nuhup u Ihova:
24um ikni asega an nikmai Eron, im lep irai ikmai ilpu hal o un; va uhpu ohaig jipe nitai ahlap ohaig jipe an nuhup u Ihova.
25Namu lep iknipagki irai ikmara aiek, um atnamud an natau, uri nitai ahlap atnamud, mika yi itai auanipin upene an nuhup u Ihova: nitai ahlap nigki er ago an cap an nuhup u Ihova.
26Namu lep leh inriti siip atamaig aiek eris ati vai Eron, um ohaig jipe, mika yi itai ahlap ohaig jipe an nuhup u Ihova: etmu uarin imtam nigki.
27Namu lep imiitap inritin nitai ahlap ohaig jipe aiek, er ohaig jipe, im neuhlin nitai ahlap asjaig jipe er asjaig jipe, siip atamaig iyehki er ati vai Eron im lep vai ilpu hal o un:
28etmu ohuun a Eron im ilpu hal o un vai intas alep imi nup Isreel irai iji mesese: nitai ahlap asjaig jipe nigki: etmu itai ahlap asjaig jipe u nup Isreel nigki irai iji itai ahlap ura va nigpa, nitai ahlap asjaig jipe ura marom vai Ihova.
29Erumu lep ohuun napelumai itap u Eron a ilpu hal o un erupu epitpitac iran ara, va uhpu aspi ra iran, um ikni ra iran.
30Etmu aso yin iran ira adiat inyi seven a inhalav atamaig iyehki, etpu isjeupigmoig yin aien um atimi ahlap, etu wit apan aien anliin neom er asjapicnaig o un, par auanaheca an nuarin itap.
31Namu lep leh siip atamaig er ago itap atimi vaig, um atho nohun an nuarin itap.
32Erumu caig nohui siip atamaig a Eron im ilpu hal o un, im lep nareto an cat, an neucse neom er asjapicnaig o un.
33Erumu lep caig nitai iji igki er ahlap iran va nedo has, par ikni ra um imiitap ra: ja etmu jim caig intak atimi; era idim itap ara.
34Ja el et eled tah nuarin nohun, nitai eris ago itap atimi vaig, ka nareto, um lahlah iran, namu lep atnamud aiek nuarin inig et eled an cap: uhmu jim caig, et idim itap.
35Namu ago vai Eron im ilpu hal o un aiek nedo asega inig ek asaig ehelum ainyak: namu ikni ra aiek ira adiat inyi seven.
36Namu lep ahlap aiek irai iji adiat a kurimatau atamaig, mika yi itai ahlap va nedo has: nau wit ahlap aiek va nedo has, ja par ahre natau, um aspi, mika yi itap.
37Namu ahlap aiek va nedo has ira adiat inyi seven va natau, mika yi itap; inyi itap acen natau: inyi itap nitai iji igki asega et atcei pan natau.
38Namu ahlap aiek ijinies an natau an nitai iji igki; nan, siip haklin inyi ero et eteuc inmesese et ethi iran, irai iji adiat asega.
39Namu ahlap aiek an nakli siip yi ethi an nuhialeg; im lep nakli siip yi ethi an jupura:
40nakli siip yi ethi im kwart inyi dri irai flaur er aplamod pelaig irai kwart yi ethi irai arakei mat; im nide vaine inyi kwart et ethi par itai ahlap umnyi.
41Namu lep ahlap aiek an hakli siip yi ethi an jupura, um ago iran et idivaig nitai ahlap eh caig an nuhialeg, um lep idivaig nitai ahlap er umnyi, par itai auanipin upene, nitai ahlap er ago an cap vai Ihova.
42Etmu itai ahlap nigki u ilpu mapomia irai iji mesese, an neucse neom er asjapicnaig o un an nuhup u Ihova: ekpu ehtet iram ainyak eahki, um tas ehelum.
43Ekpu lep ehtet irai nup Isreel eahki ainyak, etpu lep itap nuarin iyehki va natimi alupas unyak.
44Ekpu lep imiitap neom asjapicnaig o un ainyak, im natau: ekpu lep imiitap Eron ainyak, im ilpu hal o un, mika eri aheca unyak ara, um ago nauritai u ilpu atimi ahlap.
45Ekpu amen ainyak ehele nup Isreel, ekpu lep Atua ura ainyak.
46Erupu ato ara mika ek Ihova ainyak Atua ura, kis iknipagki ra ainyak an pece Ijipt, mika ki amen ehele ra ainyak: Ek Ihova ainyak Atua ura.
Zvasarudzwa nguva ino
Eksotus Nuarin-tas alupas 29.: ABO
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)