Eksotus Nuarin-tas alupas 28.
Nuarin-tas alupas 28.
1 Er ikni Eron im ilpu halav atamaig o un mika eri ago nauritai u ilpu atimi ahlap. 2 Er asaig apelumai itap. 6 Efot. 15 Napelumai adahpoi inritin im inhat esjilid et twelv. 30 Urim im Dummim. 31 Napelumai uri efot, im pumcranet im niji itai ahlaig. 36 Nitai apalapal urin cat adgaig. 39 Napelumai uhup er ijei almuitai iran. 40 Niji apelumai uri ilpu halav atamaig u Eron.
1NAMU aniv Eron etwam aiek, im ilpu hal o un irai up Isreel, mika eri aheca unyak ara, um ago nauritai u ilpu atimi ahlap, Eron marom, im lep Netab, im Abaihu, im Eliesar, im Idamar, ilpu halav atamaig u Eron.
2Uhmu ago niji apelumai itap imi Eron etwam, inyi esjilid um upene.
3Namu asaig aiek ehele ilpu atimi arapakau asega iji ig, kis ati alupas narapakau an liinmopom ainyak, mika eri ago apelumai imi Eron ara, va etpu itap vaig aien, um aheca unyak, um ago nauritai u natimi ahlap.
4Uhmu ago napelumai iji igki; nikavaig, nitai adahpoi inriti Eron, im efot, im nitai aso yin iran, im napelumai uhup, im incat adgaig, im nitai ahid: erumu ago apelumai itap ara imi Eron etwam, im ilpu hal o un, mika yi aheca unyak aien, um ago nauritai u natimi ahlap.
5Erumu leh colt ara, im napelumai emilmat, um umjigumjig, um cap, um yilyil.
6Erumu lep ago efot irai colt ara, im napelumai emilmat, um umjigumjig, um cap, um yilyil er atpelaig inya iran, an nauritai arapakau.
7Uhmu ahtehgaig nuarin inyi ero uri euhlin, an tid iran et ero; uhmu ahtehgaig sjipe inyi uce.
8Uhmu lep ago nitai ahid esjilid uri efot et amen iran, et idivaig nauritai iran, irai itai iji igki; nikavaig, colt, im napelumai emilmat, um umjigumjig, um cap, um yilyil er atpelaig inya iran.
9Uhmu lep leh inhat oniks inyi ero, um aged iran nidai ilpu hal u Isreel:
10nidara inyi siks an hat et ethi, im nidara inyi siks an hat et eche inyi idivaig napos vaig ura.
11Uhmu aged nidai ilpu hal u Isreel an hat inyi ero an nauritai u natimi aged hat, et idivaig er aged irai itai asjaaicnaig: uhmu ago ja par ikni irai pai colt.
12Uhmu ikni inhat inyi ero erahki ijinies irai euhli efot mika yi hat par imiehva ilpu hal u Isreel: etmu apos nidara a Eron ijinies irai euhlin an nuhup u Ihova, nitai imiehva ra nigki.
13Uhmu lep ago inpai colt;
14im lep natau colt upene inyi ero an nilpun im lep nilpun; uhmu ago irai colt eris atpelaig, um athai natau colt eris atpelaig an pai colt.
15Uhmu lep ago nitai adahpoi inriti Eron eh tas alep vaig an nauritai arapakau; inyi idivaig nauritai irai efot; uhmu ago irai colt, im napelumai emilmat, um umjigumjig, um cap, um yilyil eris atpelaig inya iran.
16Inyi tup apapa pikgaig nahaijin et for, uhmu lep asvapicnaig; inyi idivaig nikma atimi nopra iran, inyi lep idivaig nikma atimi natgeig iran.
17Uhmu ikni natah hat iran, natah hat, inyi for marom: etmu amen an natah iran uhup sartius, im topas, im karbugkel.
18Etmu amen an natah iran sekunt emeralt, im safir, im taimunt.
19Etmu amen an natah iran dirt laicur, im acet, im amedist.
20Etmu amen an natah iran ford beril, im oniks, im jasper: uhmu ikni irai irahed colt um ago ipjin.
21Etmu amen nidai ilpu hal u Isreel et twelv irai hat iji igki, inyi idivaig nidara, et idivaig intas er aged irai itai asjaaicnaig; etmu amen nidara asega iran, et idivaig ilpu retpora et twelv, athi um athi ehni.
22Uhmu ago natau colt irai colt upene er atpelaig ijinies an nitai adahpoi inriti Eron an nesvi vaig.
23Uhmu ago nitai arehed inyi ero irai colt ijinies an nitai adahpoi inriti Eron, um ikni nitai arehed inyi ero an nesvi vaig et ero an nitai adahpoi inritin.
24Uhmu ati natau colt inyi ero er atpelaig iraili itai arehed et ero an nesvi vaig et ero an nitai adahpoi inritin.
25Uhmu athai an nirahed colt inyi ero nilpui natau colt et ero er atpelaig, um aijalcei ijinies an neuhli efot an nahaijin uhup.
26Uhmu ago nitai arehed inyi ero irai colt, um ikni an nesvi vaig et ero an nitai adahpoi inritin, an nitai arehed iran an nahaijin efot inliin.
27Uhmu lep ago nitai arehed irai colt inyi ero, um ati an nesvi vaig et ero irai efot sepagko, an nahaijin uhup, ubutpotet pan u nuarin ahtehgaig iran, ijinies an nitai ahid esjilid irai efot.
28Uhmu ahtehgaig jipe niji itai arehed an nitai adahpoi inritin, im niji itai arehed irai efot an ya emilmat, mika yi amen ijinies an nitai ahid esjilid irai efot, va yi jim etjo nitai adahpoi inritin irai efot.
29Etmu apos nidai ilpu hal Isreel a Eron an ritin an nitai adahpoi inritin eh tas alep vaig, etu wit apan aien an nuarin itap, nitai imiehva ra an nuhup u Ihova irai iji mesese nigki.
30Uhmu ati Urim im Dummim an nitai adahpoi inritin eh tas alep vaig; inyi amen an riti Eron, etu wit apan aien an nuhup u Ihova: etmu apos intas alep vai nup Isreel a Eron an ritin an nuhup u Ihova irai iji adiat.
31Uhmu lep ago apelumai uri efot ira apelumai emilmat ache.
32Inyi eteuc nuarin vai nauinwan ijinies an napelumai an nuarin juju: etmu idivaig nuarin an napelumai u neucsupo, uhmu lep ijei nuarin napelumai inigki um arehed mihtag, va yi jim rag.
33Uhmu lep ijei nalmui pumcranet an tid an napelumai ira apelumai emilmat, um umjigumjig, um cap, an tid an napelumai um arehed; im lep niji itai ahlaig irai colt an niblai pumcranet um arehed mihtag:
34uhmu tiplai jipe nitai ahlaig irai colt inyi ethi im pumcranet inyi ethi, an tid an napelumai um arehed mihtag.
35Uhmu aso Eron iran par ago nauritai iran: uhmu atahaijeg nohran etu wit apan aien an nuarin itap an nuhup u Ihova, um lep alau ijo, va yi jim mas aien.
36Uhmu lep ago nitai apalapal irai colt upene, um aged intas iran, et idivaig er aged intas an nitai asjaaicnaig, um ika, Et itap vai Ihova.
37Uhmu athai inya emilmat iran, um ati an cat adgaig; inyi amen an nahaijin cat adgaig uhup.
38Inyi amen an nidjini Eron uhup, va etpu apos nedo has a Eron va niji itai itap iji igki, eri ikni a nup Isreel irai iji itai tup ahtai itap asega ura; inyi amen ijinies an nidjinin uhup irai iji adiat, va etpu upene inliinmopoi Atua vai ra.
39Uhmu ago napelumai uhup an napelumai yilyil um ijei nalmuitai iran, uhmu lep ago incat adgaig ira apelumai yilyil, uhmu lep ago nitai ahid um ijei itai iran.
40Uhmu lep ago niji apelumai uhup irai ilpu hal u Eron, im niji itai ahid imi ra, im niji cat adgaig imi ra, inyi esjilid um upene.
41Namu aso Eron etwam iran aiek, im lep ilpu hal o un; um aspi ra, um ikni ra, um acis yi alwai ra mika eri itap ara, mika eri aheca unyak ara, um ago nauritai u ilpu atimi ahlap.
42Uhmu lep ago incetpoi eduora ira apelumai yilyil, par adahpoi nohura; inyi ahes an cehera um ehlause an neduora:
43erumu aso ra iran a Eron im ilpu hal o un, eru wit apan ara anliin neom atga, im lep an napan vaig ura ubutpotet u natau par ago itai an nuarin itap; va eri jim lucsei nedo has ara um emesmas: intas alep nigki vai yin im ilpu hal o un im ilpu mapon irai iji mesese.
Zvasarudzwa nguva ino
Eksotus Nuarin-tas alupas 28.: ABO
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)