Eksotus Nuarin-tas alupas 13.
Nuarin-tas alupas 13.
1 Eh imiitap ilpu halav atamaig inmeto asega vai Atua. 3 Et tas alep a Atua mika eri imiehva nahtaregdei atimi ara. 11 Eh imiitap ilpu halav atamaig inmeto u niji itai eklim edo irai pece. 17 Era udei inpece Ijipt a nup Isreel, um apos pan niji eduei Josef ehele ra. 20 Era yetpam Idam ara. 21 Et atga an nuhup ura a Atua an napat im lep an cap.
1IS ika a Ihova ehele Moses,
2Erumu itap vai nyak inmeto asega, inmeto asega er upyi apos ra irai up Isreel, natimi im niji itai eklim edo irai pece: ek ohuun ra ainyak.
3Is ika a Moses ehele atimi, Akumu imiehva nadiat inigki aijaua, akis udei Ijipt iran aijaua, im inuarin nauaraheca iran unyimia; is iknipagki caua a Ihova an nuarin inigki an nikman emda: uhmu jim caig tah nareto et amen leven iran.
4Akis atga unyimia aijaua an nadiat inigki an mohoc Ebib.
5Etu wit imiapan caua a Ihova an pece u nup u Kenan, im nup u Hed, im nup Emor, im nup u Haivai, im nup u Jibus, is asig yi aktit intas vaig aien ehele ilpu retpomia mika yi alupai caua aien, inpece inig et amen alupas nidenedid im hune iran, akumu ago nedo inigki aijaua an mohoc inigki.
6Akumu caig nareto et ti leven iran aijaua ira adiat inyi seven; jam asjapicnaig an nadiat sevend, um hag vai Ihova.
7Uhmu caig nareto et ti leven iran ira adiat inyi seven; uhmu jim ecetai ehelemia tah nareto et amen leven iran, uhmu jim lep ecetai ehelemia tah leven irai iji uarin asega unyimia.
8Akumu asuptecnaig ehele ilpu hal unyimia aijaua an nadiat iyehki, um ika, Er ago nedo inigki va nedo o Ihova vai cama ecris wat ahes Ijipt aijama,
9Etmu itai asjaaicnaig imi caua nigki irai ikmamia, im nitai imiehva juju irai esgaiimtamia nigki, va etpu amen intas o Ihova an nipjineucsemia: et mun idim iknipagki caua an pece Ijipt a Ihova an nikman emda.
10Va nitai inigki akumu ago nedo inigki aijaua an nopan o un irai iji mesese.
11Etu wit imiapan caua an pece u nup u Kenan a Ihova, et idivaig intas aktit o un ehele ilpu retpomia, um lep alupai caua.
12Akumu ikni inmeto asega unyimia vai Ihova aijaua, im lep inmeto asega u itai eklim edo irai pece unyimia; etpu ohuun ilpu atamaig asega a Ihova.
13Ja akumu isjeupigmoig inmeto asega u togke aijaua an hakli siip; el eka eti isjeupigmoig aijaua, akumu asvi nauinwan aijaua: akumu lep ikni nisjeupigmoig vai inmeto asega irai ilpu hal unyimia aijaua.
14Eru wit ahodai caua a ilpu hal unyimia an taka opan, um ika, Inhe nigki? akumu ika ehele ra aijaua, Is iknipagki cama an pece Ijipt a Ihova an nikman emda, an nuarin nauaraheca iran:
15is wat esjum a Fero natcijaig cama vaig, is atgei inmeto asega an pece Ijipt a Ihova, inmeto u atimi, im inmeto u itai eklim edo irai pece: va nitai inigki inta ahlap vai Ihova akaija irai meto asega et wat atamaig; ja inta ikni nisjeupigmoig akaija vai inmeto asega irai ilpu hal uja,
16Etmu idivaig nitai asjaaicnaig irai ikmamia, im nitai imiehva juju irai esgaiimtamia nigki: is idim iknipagki cama an pece Ijipt a Ihova an nikman emda.
17Is wat atcijaig atimi a Fero, is eti imiapan ra a Atua an nefalaig an pece u nup u Filistia, is ipjidipjid; is ika a Atua, Kit etpu auatialidi inliinmopoi atimi eru wit almoi nedoa ara, um adumoij pan an pece Ijipt:
18is imiatcapijid atimi a Atua, an nefalaig an namasacen u Injap cop: eris ahes an pece Ijipt a nup Isreel, um atga ura is idivaig ilpu eucsupo.
19Is lucsei niji eduei Josef a Moses: is idim leh intas aktit ehele nup Isreel a Josef, um ika, Etpu idim ateghe caua a Atua; akumu lep apos pan niji eduok aijaua.
20Eris ahes Sukod ara, um atga ura, um atumop Idam, an nahaijin namasacen.
21Is atga a Ihova, um uhup ira ra an napat an nadiat, par asjaaicnaig an nefalaig imi ra; im lep an cap an nepig, par lah vai ra; mika eri atga an nadiat im lep an nepig:
22is eti atipagki napat aien an nadiat, im incap an nepig, an nuhup u atimi.
Zvasarudzwa nguva ino
Eksotus Nuarin-tas alupas 13.: ABO
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)