Eksotus Nuarin-tas alupas 12.
Nuarin-tas alupas 12.
1 Et eche natupun u yier. 3 Er ati nahtaregdei atimi. 11 Nedo o nahtaregdei atimi. 15 Nareto inig et ti leven iran. 29 Eh atgei ilpu halav atamaig inmeto. 31 Eh ahau nup Isreel par udei inpece. 37 Era yetpan Sukod ara. 43 Intas alep vai nahtaregdei atimi.
1IS tas a Ihova ehele Moses im Eron an pece Ijipt, um ika,
2Natupun mohoc imi caua inmohoc inigki: inmohoc uhup irai yier imi caua nigki.
3Arumu tas aijaurau ehele nup Isreel asega, um ika, Erumu leh inhakli siip imi ra natimi asega an nadiat tend an mohoc inigki, athi um athi ehni, inhakli siip yi ethi vai nup uran nimnim yi ethi:
4el era eti elpat a nup uran nimnim yi ethi vai inhakli siip yi ethi, erumu asipiaig ara im ilpu atimi eblaamnem ura, ubutpotet pan u nimnim ura, et idivaig natimi ira ra; akumu esvi atimi aijaua vai inhakli siip, et idivaig inhag ura:
5inhakli siip atamaig unyimia, inyi ti nitai has iran, um ethi ache inmesese iran: akumu iknipagki irai siip aijaua, ka nanin:
6akumu aminjinaig aijaua um yetpan an nadiat fortiind an mohoc inig: erumu atgei an jupura a nup Isreel asega:
7Erumu leh inja iran ara, um ohaig ira auicai aduwi an nahaijin neucse neom im lep an nahaijin, im lep nauincai atgeig ijinies irai eucse eom iji igki, erupu hag iran ara.
8Erumu ahen nohun an cap ara, um caig an nepig iyehki, im lep nareto inyi ti leven iran; erumu lep caig pan ara irai eri itai acas iran.
9Akumu jim caig mat aijaua, um jim atho an wai, jam ahen an cap; nipek o un, im neduon, im nauitin.
10Akumu jim udei tah nuarin aijaua um yetpan an nuhialeg; akumu lep atnamud an cap aijaua nuarin inig inyi eled um yetpan an nuhialeg.
11Akumu caig aijaua yi uce; etmu amen iramia nitai arore nijihgamia, im incetpoi eduomia, im lep niseuc irai ikmamia; akumu auroauro aijaua um caig: nahtaregdei atimi u Ihova nigki.
12Ekpu atga an pece Ijipt asega ainyak an nepig inigki, um auud inmeto asega an pece Ijipt, natimi im niji itai eklim edo irai pece; ekpu ago neruvaig ainyak irai ilpu atimi alupas asega Ijipt: ek Ihova ainyak.
13Etpu itai asjaaicnaig imi caua inja ira iji iyum unyimia: eku wit almoi inja ainyak, ekpu ahtaregdei caua ainyak, inyi eti yetpam iramia inmas, par auahas caua, eku wit auud inpece Ijipt ainyak.
14Akumu imiheva nadiat inigki aijaua; akumu apos aijaua um hag iran vai Ihova, im lep ilpu mapomia asega; akumu apos aijaua um lep ago nedo inigki irai iji mesese.
15Akumu caig nareto aijaua inyi ti leven iran ira adiat inyi seven; akumu atipagki leven iraili iyum unyimia aijaua an nadiat uhup: aien et caig nareto aien et amen leven iran ahes an nadiat uhup um yetpan an nadiat sevend, uhmu atipagki natimi iyehki ehele nup Isreel.
16Etmu itap nasjapicnaig u atimi an nadiat uhup, etmu lep itap nasjapicnaig ura an nadiat sevend; eri eti ago tah nauritai nan, akumu ago nitai caig inig ache aijaua erupu caig natimi asega, athi um athi ehni.
17Akumu lep aminjinaig nasjapicnaig aijaua va nareto et ti leven iran; ek mun idim iknipagki caua ainyak an pece Ijipt an nadiat inigki: va nitai inigki akumu apos nadiat inigki aijaua im lep ilpu mapomia, inyi amen nedo inigki irai iji mesese.
18Et wat jupura an nadiat fortiind, an mohoc uhup, akumu caig nareto aijaua inyi ti leven iran, um yetpan an jupura an nadiat twente first an mohoc iyehki.
19Etmu jim amen tah leven iraili iyum unyimia ira adiat inyi seven: aien et caig nareto inig aien et amen leven iran, uhmu atipagki yin ehele nup Isreel, kit inyi up urai taka pece aien, ka natimi eris apos yin an pece.
20Akumu jim caig tah nareto aijaua et amen leven iran; akumu caig nareto et ti leven iran aijaua irai iji imnim asega unyimia.
21Is ahlaig vai ilpu atimi alupas asega u nup Isreel a Moses, um ika ehele ra, Akumu apan aijaua, um leh inhakli siip yi tup apapa pan irai iji ilpu atemeten unyimia, um atgei nitai ahlap va nahtaregdei caua.
22Akumu lep leh nuhud irai hisop aijaua, um ahtaijuli an ja an nipjinitai, um ohaig irai auicai aduwi an nahaijin neucse neom im lep an nahaijin an ja an nipjinitai, im lep nauincai atgeig ijinies; etmu jim alau ijo tah caua an neucse neom o un, um yetpan an nuhialeg.
23Etpu atga a Ihova, um auud nup Ijipt; etu wit ecetai inja aien ira auicai aduwi an nahaijin neucse neom im lep an nahaijin, im lep an nauincai atgeig ijinies, etpu ahtaregdei neucse neom iyehki a Ihova, um atapnes nitai auahas atimi, vai yi jim apan iraili iyum unyimia, um auud caua.
24Akumu ago nedo inigki aijaua, im lep ilpu mapomia irai iji mesese.
25Aku wit yetpan aijaua an pece inig, etpu alupai caua a Ihova, et idivaig is upyi asaig aien, akumu ago nedo inigki aijaua.
26Eru wit ahodai caua a ilpu hal unyimia, um ika, Nesgantas inigki inhe?
27Akumu ika ehele ra aijaua, Nitai ahlap va nahtaregdei u Ihova nigki, is ahtaregdei niji iyum u nup Isreel aien an pece Ijipt, is wat auud nup Ijipt aien, um udei niji iyum uja. Eris atpuse natimi um ago nalaigaheni.
28Eris atga ura a nup Isreel, um ago nedo inig is asaig a Ihova ehele Moses im Eron.
29Is wat ijihgan nepig, is auud inmeto asega an pece Ijipt a Ihova, um atupun ahes an meto u Fero natimarid, um yetpan irai meto u ilpu ohua iraili iyum ipjin; im lep inmeto asega u itai eklim edo irai pece.
30Is atidai a Fero an nepig, im ilpu aheca asega o un, im nup Ijipt asega; is esjilid nehtigtaig Ijipt; is eti eteuc tah neom inig is eti amen iran natimi mas.
31Is ahlaig vai Moses im Eron aien an nepig, um ika, Atidai aijaurau, um atga unyimirau, um udei nup uran pece unyak, aijaurau im lep nup Isreel; um apan, um ahlap vai Ihova, et idivaig arus asaig aijaurau.
32Akumu lep lucsei siip unyimia aijaua, im kurimatau unyimia, et idivaig arus asaig aijaurau, um atga unyimia; arumu lep acis yi alwai nyak aijaurau.
33Eris lep imiisjis a nup Ijipt, mika eri abrai ra eri fi auroauro ara um atga ura; eris ika ara, Inta emesmas ehni akaija asega.
34Eris leh flaur ura a nup Isreel eris aplamod, ja is eti fi aridjai, im nelcau ura eris aplamod flaur iran, um aso ira apelumai ura, um ahelwei.
35Eris ago a nup Isreel is idivaig is asaig a Moses; eris ugyi niji itai silver ara, im niji itai colt, im napelumai ehele nup Ijipt:
36is ago upene inliinmopoi nup Ijipt vai ra a Ihova, eris ahtai nitai iji igki imi ra ara, eris ugyi vaig ara. Eris ilpu ihki atimi a nup Ijipt vai ra.
37Eris ahes Rameses a nup Isreel um atga um yetpan Sukod, eris idivaig siks huntret dausant (600,000) a ilpu atamaig, um aled ilpu halav.
38Eris lep ahced ra natimi is eche is ahinag; im lep siip, im kurimatau, is ahinag niji itai eklim edo irai pece ura.
39Eris ahen flaur iyehki ara is eti fi aridjai, eris aplamod an pece Ijipt um lucsei, is ti leven iran; eris idim ahlo ra an pece Ijipt, is ehka vai ra namen vaig, eris lep eti ago nitai caig incara ara.
40Eris amen an pece Ijipt a nup Isreel irai mesese is for huntret im dirte (430).
41Is wat ti pan itac inmesese is for huntret im dirte (430), an nadiat iyehki, eris udei inpece Ijipt a ilpu atimi u Ihova asega.
42Eris idim ika uhmu imiehva upene nepig iyehki vai Ihova, va nedo o un, nikavaig, is iknipagki ra aien an pece Ijipt: erumu imiehva nepig iyehki vai Ihova a nup Isreel asega im ilpu mapora irai iji mesese.
43Is ika a Ihova ehele Moses im Eron, Intas alep va nahtaregdei caua nigki: Etmu jim caig tah nup urai taka pece:
44ja naheca o un tah inig er auanimtan irai mune, uhu wit aperitome iran, etmu caig aien.
45Etmu jim caig tah nup urai taka pece, ka naheca o un tah et auritai aien va nimtan.
46Uhmu caig an neom inyi ethi ache; um jim apos pok ijo tah nuarin nohun; um jim asvi tah neduon.
47Erumu ago nitai inigki a nup Isreel asega.
48Etu wit amen ehelemia tah nup urai taka uarin, um lep merit incaig vaig nitai ahlap va nahtaregdei u Ihova, erumu leh naperitome ira ra a ilpu atamaig asega o un, ja etmu ham aien ubutpotet, um caig; etpu idivaig natimi eris apos yin an pece aien: etmu jim caig tah natimi eris eti aperitome iran.
49Etmu tup ethi ache intas alep va natimi eris apos yin an pece, im nup urai taka uarin et amen ehelemia aien.
50Eris ago nedo inig is asaig a Ihova ehele Moses im Eron a nup Isreel asega.
51Is idim iknipagki nup Isreel an pece Ijipt a Ihova an nadiat iyehki, is idivaig niji ira atimi ura.
Zvasarudzwa nguva ino
Eksotus Nuarin-tas alupas 12.: ABO
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)