2 करिन्थी 12
12
पल़सीओ दर्शण अर कमज़ोरी
1एही ता निं घमंड करनअ मुल्है ठीक आथी, तैबी लागा मुंह घमंड करनअ, मुंह खोज़णीं प्रभू दैनै दै दर्शणें अर ज्ञैने गल्ला। 2हुंह मसीहो दास निंयं च़ौदा साला पैहलै उझै चिऐ स्वर्गा तैणीं। हुंह आपणीं ऐहा देही संघी निंयं या बाझ़ी देही सुपनै निंयं ऐहा गल्ला निं हुंह ज़ाणदअ, एता ज़ाणा सिधअ परमेशर।
3हाँ, ऐहा गल्लो थोघ आसा सिधअ परमेशरा का कि हुंह मेरी देही दी त कि सुपनै त? पर मुखा आसा थोघ 4कि हुंह निंयं उझै स्वर्गा लै अर मंऐं शूणीं तिधी एही रहैन करनै आल़ी गल्ला ज़ुंण खोज़णीं मेरै बशा का बागै आसा। तिन्नां गल्ला खोज़णें ज़ाज़त निं मणछा लै आथी।
5ऐहा गल्ला पिछ़ू सका हुंह घमंड करी पर मुंह निं इहअ करनअ आथी, मुंह करनअ सिधअ आपणीं कमज़ोरी दी घमंड।
6ज़ै हुंह घमंड करनअ बी च़ाहूं ता, तैबी निं हुंह ऐडअ हणअ, किल्हैकि हुंह आसा शुची गल्ला खोज़दअ लागअ द। पर मुंह निं तिहअ करनअ किल्हैकि हुंह निं च़ाहंदअ कि लोग मुंह मेरी शुची ज़िन्दगी अर मेरी शिक्षा का खास्सअ समझ़े।
देही दी कांडअ
7पर मुंह निं तिन्नां नुआहरी गल्ले बारै खास्सअ घमंड लोल़ी हुअ ज़ुंण मुखा परमेशरै रहैऊई तैही च़भेऊअ तेऊ मेरी देही दी एक कांडअ, मतलब राख्सो एक दूत कि सह मुल्है धमुक्कै बाहे ताकि हुंह घमंड निं करूं।#गल. 4:13; आयू. 2:6
8एते बारै किई मंऐं प्रभू का चिई बारी अरज़ कि अह लोल़ी मुखा दूर हुअ। 9पर तेऊ बोलअ हर बगत इहअ, “ताल्है आसा मेरअ जश ई बतेर्हअ। किल्हैकि मेरी शगती करा कमज़ोरी दी खास्सअ काम।” तैही करनअ मुंह आपणीं कमज़ोरी प्रैंदै बडै नंदा दी घमंड कि ईशू मसीहे शगती लोल़ी मुंह प्रैंदै बणी रही। 10एता पिछ़ू आसा हुंह मसीहा लै कमज़ोरी दी, अर निंदा दी अर दल़िदरा दी, अर लोगे बरोधा मांझ़ै मसीबता अर मसीबता दी खुश, किल्हैकि ज़ेभै हुंह आत्मां दी दुबल़अ हआ, मसीहे शगती करै हआ हुंह ज़ोरा आल़अ जोधअ।
करिन्थ रहणैं आल़ै विश्वासी लै पल़सीओ फिकर करनअ
11ज़ांऊं मंऐं तम्हां लै एऊ साबै ऐडै ज़िहअ लिखअ, मुंह फिरी आप्पू बी माल़ी, पर मुंह पल़अ लिखणअ किल्हैकि तम्हां लागा त मुंह प्रैंदै भरोस्सअ करनअ। तम्हां लागा ती हथू मेरी सर्राफी पै करनी, किल्हैकि हुंह निं किछ़ बी आथी त पर हुंह निं किछ़ू गल्ला दी तिन्नां का घट आथी ज़ुंण आप्पू “बडै शधाणूं” समझ़ा। 12असली शधाणूंए लछ़ण बी रहैऊऐ तम्हां मांझ़ै सोभी साबै सबर करनै अर नछ़ैणां करै, नुआहरै कामां अर शगतीए कामां करै। 13तम्हैं कहा ज़ेही गल्ला दी थिऐ होरी टोली का घट, सिधै एकी गल्ला दी कि मंऐं निं तम्हां लै होरी टोली ज़िहअ आपणअ ढब्बै-धेल्लैओ बोझ़ पाअ, पर ज़ै मेरै तम्हां का ढब्बै नांईं मांगणै पिछ़ू तम्हैं माल़ी च़ेती, एऊ पापा लै करै मुंह माफ।
विश्वासी टोली लै झ़ूरी
14भाल़ा, हुंह आसा तम्हां सेटा लै चिऊथी बारी एछणा लै तैर्हुअ द, अर मुंह निं तम्हां प्रैंदै ढब्बै-धेल्लैओ किछ़ै बोझ़ पाणअ। किल्हैकि हुंह च़ाहा तम्हां, थारी धन-माया निं हुंह च़ाहंदअ आथी किल्हैकि शोहरू निं लागदी ईजा-बाबा लै ज़ैदात कठा करनी, पर ईज-बाब लागा शोहरू लै ज़ैदात कठा करनी। 15हुंह दैंऊं तम्हां लै बडी खुशी-खुशी आपणीं सोभै गल्ला इधी तैणीं कि आपणैं प्राण किल्है निं पल़े दैणैं। हुंह, झ़ूरा तम्हां लै खास्सअ पर मुखा ज़ाण्हिंआं कि तम्हैं निं मुल्है खास्सी झ़ूरी करदै।
16तम्हां मांझ़ै कई ता मना ऐहा गल्ला कि मंऐं निं तम्हां लै ढब्बै-धेल्लैओ बोझ़ पाअ, पर कई सोठा अज़ी बी इहअ कि मंऐं किअ तम्हां धोखै दी पाई च़लाकी दी तम्हां करै आपणअ फाईदअ। 17मंऐं निं तितस या कुंण होर तम्हां सेटा लै एते तैणीं छ़ाडै कि तिंयां मुल्है तम्हां का ढब्बै आणे मांगी। 18मंऐं छ़ाडअ तितस समझ़ाऊई करै तेऊ भाई संघै, तेऊ तितसै कै तम्हां का छ़ल़-कपट करी किज़ै निंयं किनी? कै हाम्हैं एकी आत्में साबै निं ज़िन्दगी काटी? अर कै म्हारअ बभार एकी रंगो निं आथी?
19तम्हैं समझ़अ हणअ एभै तैणीं इहअ कि हाम्हैं आसा लागै दै थारै सम्हनै आपणीं गल्ले सफाई दैंदै। ऐहा गल्ला ज़ाणा परमेशर आप्पै कि हुंह खोज़ा परमेशरो बैण शुचै मन्नैं अर मसीहे हका करै इहअ सोठी करै कि परमेशर आसा हाम्हां भाल़अ लागअ द।
ए मेरै पैरै भाईओ, मंऐं लिखी तम्हां लै हर गल्ला थारी भलाईए तैणीं ताकि तम्हैं विश्वास करना लै पाक्कै होए। 20किल्हैकि मुंह आसा एही डअर कि किधी इहअ निं हआ कि ज़ेभै मुंह एछणअ, अर ज़िहै मुंह तम्हैं हुऐ लोल़ी अर तम्हैं निं तिहै हआ अर हुंबी ज़ेभै तम्हां नांईं लोल़ी त आअ अर हुंह एछे तेभै, अर तम्हां दी होए झ़गल़ै, आल-मस्ती, रोश्श, बरोध, ज़ल़ण, घैंचल़, घमंड अर झ़गल़ै। 21किधी इहअ निं हआ कि ज़ेभै हुंह तम्हां सेटा भिई फिरी एछूं, तेभै पल़े मुंह परमेशरा सम्हनै शर्मिंदअ हणअ अर मुंह पल़े तिन्नां लै शोग करनअ ज़ुंण छ़ोतलै, शर्मिंदै करनै आल़ै काम अर कंज़रैई ज़िहै पापा लै अज़ी बी प्राश्त नांईं किअ होए!
Zvasarudzwa nguva ino
2 करिन्थी 12: OSJ
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.