2 करिन्थी 11
11
पल़सी अर झ़ुठै शधाणूं
1ज़ै तम्हैं मेरी थोल़ी ज़ेही ऐडी गल्ल बी ज़िरी काढदै, किहअ भलअ हणअ त! हाँ मेरी ज़िरा बी। 2एता च़ाहा हुंह थारी एही हेर-सभाल़ करनी कि ज़ेही परमेशर आप्पै थारी हेर-सभाल़ करा। हुंह आसा तम्हां लै शोहरीए इहै बाब ज़िहअ ज़ुंणी एकी ई मणछा लै थारी गल्ला पाक्की आसा किई दी कि तम्हैं दैणैं ज़ुआन पबित्र कुंआरी ज़िहै मसीहा प्रभू का सभाल़ी।
3पर हुंह डरा एता लै कि मसीहा ईशूओ अदर करना लै थारी भलाई अर पबित्र ज़िन्दगी निं लोल़ी भ्रष्ट हुई, ज़ेही दानुईं च़लाकी करै ज़नानी कबाता पाई ती।#1 थिस. 3:5; मूल. 3:13
4ज़ै कुंण तम्हां सेटा एछी कहा दुजै ईशूए बारै खोज़े, या ज़सरै बारै हाम्हैं नांईं आथी खोज़अ द अर ज़ै कोई होर आत्मां भेटे, ज़ुंण पैहलै नांईं आथी त भेटअ द, या कोई होर खुशीओ समाद खोज़अ ज़ुंण तम्हैं पैहलै नांईं आथी त मनअ द, तै आसा तम्हैं गलत! किल्हैकि तम्हैं मनी तिंयां गलत शिक्षा।
5हुंह, समझ़ा इहअ कि हुंह निं किछ़ू गल्ला दी तिन्नां का घट आथी ज़ुंण आप्पू “बडै शधाणूं” समझ़ा। 6अह गल्ल आसा सच्च़ी कि च़ोपल़ लाई करै गल्ला करनी निं मुंह एछदी। पर तैबी निं हुंह ज्ञैना दी पिछ़ू आथी मंऐं किअ आपणअ ज्ञैन हर गल्ला दी प्रगट ज़िहअ मंऐं शिखल़अ त।
7मंऐं कै ऐहा गल्ला दी किज़ै पाप किअ कि मंऐं खोज़अ तम्हां लै परमेशरो खुशीओ समाद बाझ़ी ढब्बै-धेल्लै मांगी? अर आप्पू बणअ होछ़अ ताकि तम्हैं बडै बणी सके? 8मंऐं लई होरी विश्वासी टोली का मज़दूरी ताकि हुंह थारी च़ाकरी करूं। एता लै निं इहअ बोला कि मंऐं ठगै कुंण! 9ज़ेभै हुंह तम्हां संघै त अर ज़ेभै मुंह किज़ै ढब्बै-धेल्ले काम्मी-पेशी हुई, मंऐं निं कोही लै बोझ़ पाअ, किल्हैकि होरी विश्वासी भाई दैनी मेरी मकिदुनिया मुल्खा का एछी मेरी काम्मी पूरी करी। हुंह निं तम्हां लै आप्पू बोझ़ बणअ आथी, अर नां आजू तम्हां लै बोझ़ बणदअ आथी।
10ज़िहअ मसीहो सत्त मुंह दी आसा, ता, तै सका हुंह ऐहा गल्ला दी घमंड करी कि मंऐं निं अखाया मुल्खै कोही का ढब्बै-धेल्लै मांगै। 11मंऐं किल्है निं तम्हां का ढब्बै मांगै? अह कै मंऐं एते तैणीं किअ कि हुंह निं तम्हां संघै झ़ूरी डाहंदअ? ऐहा गल्ला ज़ाणा परमेशर कि हुंह डाहा तम्हां संघै झ़ूरी।
12मुंह निं तम्हां का ढब्बे मज़त मांगणी ताकि हुंह तिन्नां झ़ुठै शधाणूं रोक्की सकूं ज़ुंण इहअ बोला कि तिंयां करा हाम्हां ई ज़िहअ काम। तिंयां हआ ऐहा गल्ला रहैऊंणे मोक्कै लोल़ै लागै दै कि ज़ुंण तिंयां घमंड करा सह आसा ठीक कि तिंयां आसा हाम्हां बराबर। 13किल्हैकि ईंयां इहै लोग शल़ैघी शधाणूं, अर धोखै करै कामां करनै आल़ै, ईंयां हआ मसीहे शधाणूं हणैंओ रूप धरनैं आल़ै झ़ुठै।
14अह निं किछ़ै रहैन हणें गल्ल आथी, किल्हैकि राख्स एछा धोखै दैणा लै आप्पू बी मसीहे स्वर्ग दूतो रूप बणाईं करै बी। 15ज़ै तेऊ राख्से दास बी धर्मीं दासो रूप बणाईं करै एछे, सह निं किछ़ै रहैनीए गल्ल आथी, पर तिन्नों अंत हणअ तिन्नें कामें साबै।
शधाणूंए रुपै पल़सीओ दुख भुगतणअ
16हुंह बोला भिई कि तम्हैं निं मुंह ऐडअ समझ़ी आथी, नांईं ता मुंह ऐडअ समझ़ी ई मना मेरी अर ज़िरा, ताकि हुंबी थोल़अ ज़िहअ घमंड करी सकूं। 17ज़ेभै हुंह एऊ साबै बोला, एता निं हुंह तेऊ साबै बोल्दअ ज़ेऊ साबै प्रभू बोला, एता बोला हुंह आप्पू बाखा ऐडै ज़िहअ। 18ज़ै ईंयां संसारे मणछा ज़िहै देहीए साबै घमंड करा, तै हुंह किल्है निं करी सकदअ?
19तम्हैं समझ़ा आप्पू कि तम्हैं आसा समझ़कार अर तम्हैं ज़िरा खुशी-खुशी ऐडै मणछा बी। 20किल्हैकि ज़ेभै तम्हां कुंण आपणअ गलाम बणाआं या थारी सोभै गल्ला निंयां, या तम्हां लै धोखअ दैआ, या आप्पू तम्हां का कुंण बडअ फिरा, कि थारै मुंहां दी च़ैंडै बाहा, तम्हैं ज़िरा तेता बी। 21तम्हैं कै इहअ सोठा कि मुंह लोल़ी तेता लै शरम च़ेती कि मंऐं निं तम्हां संघै इहअ किअ?
पर ज़ेभै कुंण कोई गल्ला दी घमंड करा, हुंह बोला ऐडै ज़िहअ, हुंबी करा घमंड। 22कै तिंयां ई आसा इब्रानी? हुंह बी आसा। कै तिंयां ई आसा इज़राईली? हुंबी आसा, कै तिंयां आबरामे लुआद आसा? हुंबी आसा, 23कै सिधै तिंयां ई आसा मसीहे दास? हुंह बोला बेगरै ज़िहअ कि हुंह आसा तिन्नां का खास्सअ मैन्था करनै आल़अ, तिन्नां का खास्सी बारी हुई मुल्है कैद, ज़ेतरी बारी मंऐं मार खाई तेते निं कुंण गणी सकदअ अर हर बगत हआ मुल्है आजू मौत खल़्हुई दी।
24पांज़ा बारी च़िक्कअ हुंह यहूदी सैणें उन्ताल़ी-उन्ताल़ी कोल़ै बाही। 25चिई बारी च़िक्कअ हुंह शोठै करै, एकी बारी दैनअ लोगै मुल्है पात्थरो ढो, चिई बारी चुटअ ज़हाज़ ज़ेथ हुंह बेठअ द थिअ अर एक राच अर एक धैल़ी काटी मंऐं समुंदरा दी। 26हुंह रहअ कई बारी सफरा दी, गाडा नाल़ीए खातरै दी, अर डाकूए खातरै मांझ़ै, अर आपणीं ज़ातीए लोगे खातरै दी, अर होरी ज़ातीए लोगे खातरै दी, अर नगर गराऊंए लोगा मांझ़ै खातरै दी अर रेगीस्ताने खातरै, समुंदरे खातरै अर नकली विश्वासी मांझ़ै रहअ खातरै दी।
27मंऐं किई कष्ट ज़िरी खास्सी मैन्थ, कई राची निं हुंह सुत्तअ, कई धैल़ै रहअ हुंह भुखअ नचिशअ ब्रतू, हिंऊंदै धैल़ै रहअ हुंह नैत्तै झिकल़ै बाझ़ी ठांढै-शेल़ै दी।
28इना गल्ला छ़ाडी ज़ुंण मंऐं खोज़ी निं आथी, सारी टोलीए फिकर हआ मुल्है धैल़ बोझ़। 29हुंबी हआ तेभै दुबल़अ ज़ेभै कुंण दुबल़अ हआ। ज़ेभै कुंण पाप करा तेभै हआ हुंबी खास्सअ दुखी।
30ज़ै घमंड करनअ ज़रूरी आसा, मुंह करनअ आपणीं कमज़ोरीए गल्ला दी घमंड। 31परमेशर, प्रभू ईशूओ बाबो आसा सदा शूकर, सह ज़ाणा कि इना गल्ला कि हुंह निं झ़ुठअ बोल्दअ आथी।
32दमिश्क नगरी दी अरतास ज़ुंण राज़ैओ राज़पाल थिअ, तेऊ थिई मुंह ढाकणा लै दमिश्क नगरी फेर पहरअ लाअ द, 33अर हुंह होथअ ताक्की का तराणैं दी बेशी उछ़टी दुआली बाती उंधै अर इहअ करै बच़अ हुंह राज़पाला का।
Zvasarudzwa nguva ino
2 करिन्थी 11: OSJ
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.