Maak 2
2
1Daa ale ŋman jam taam la, Yeezu yaa basi dula ale ŋman cheŋ Kapernaum tɛŋka po a ga jo yeri dinyi po. Tɛŋka po demma yaa wom ayen wa jam ya. 2Nuruba yegayega yaa jam tigsi chaab yeri diipo ate wa boro la. Yenni meena a jam sueri kama ate nansuiŋku nɔi a ka zaanika jigiya, ate Yeezu a yaa boro a sak ba Wen wie. 3Nuruba banaansi yaa pai nuru ate wa nisa ale wa naŋsa a kpi la, a jam Yeezu jigi. 4Ba an jam baga a vuri nuruma po a paari Yeezu, dii nyiŋla nuruma a jam piisi kama. Ba jam pai nuruwa kama a ta jueli yenni zuk a vuri vɔrup yenni suŋsuŋ a yaa pai miisa a bobi jaab a pai wa ta va vɔrumu po a siŋ dueni Yeezu niŋ. 5Yeezu ale jam seba ayen ba ta siaka yegayega ale wa la, wa yaa weeni nuru waai ate wa nisaŋa ale wa naŋsaŋa a kpi la ayen, <<M biiga, m vɔŋ fi wabaataŋa a te fu kama.>>
6Sinsak sagrɔma ba gela ale jam maa kala dula jigini la, a yaa poli ayen, 7<<Nuruwa de ale a biisi diila, ku nala? Wa ale a nye diila ku ka leeta Wen jigi. Ka Wen dek wa nyiini ale a vɔŋ wabaata a te.>>
8Yeezu a poom seba wadek popola po ba ale a poli diila kama. Wa yaa bek ba ayen, <<Ka boan jaab popola ate nama a poli? 9Kun dek ale moali ate fi weeni waai nisa ale wa naŋsa ale kpi la, <M vɔŋ fi wabaataŋa a te fu, yaase yiti a pai fi tiaka a cheŋ?> 10Mi a yaali kama ayen ni seba ayen Mi Saalɔbiika a ta pagrim kama tɛŋzuk meena a baga vɔŋ nuruba wabaata a te ba.>> Wa yaa weeni waai nisa ale wa naŋsa ale kpi la ayen, 11<<Mi a weeni fu, yiti a pai fi tiaka a kuli.>> 12Nuruwa yaa deri yiti a zaani ŋmai ale pai wa jaamu a cheŋ nyini. Ku yaa cha nuru baai meena ale jam za dula jigini la. Ba yaa pak Wen a weeni ayen, <<Tama an diem a nya nyakude choa ka jinla nyiini.>>
13Yeezu yaa basi dula jigini ale ŋman pilim cheŋ Galili nyakpiemu nɔi, ate nuru boari yaa jam wa jigi ate wa sak ba Wen wie. 14Wa ale a taam la, wa yaa nya Livai. Wa jam ka Alfiyus nidoabili. Wa jam kala ka lampoo cheesika dɔk po a tuesi lampoo. Yeezu yaa weeni wa ayen, <<Yiti a va mu.>> Wa yaa yiti a va wa.
15Yeezu ale wa ŋaaŋviirɔma yaa cheŋ Livai yenni ayen ba dɛ ŋandiinta. Lampoo cheesirɔba ale wabaata nyam yegayega a jam maa va Yeezu ŋaaŋ ate ba gela mɛ yaa jam gum wa ale wa ŋaaŋviirɔma po, ate ba meena a kala a dɛ ŋandiinta. 16Sinsak sagrɔma baai ale ka Farisiiba la, yaa nya ba a dɛ ŋandiintaŋa. Ba yaa bek wa ŋaaŋviirɔma po wanyi ayen, <<Ka boa ale a sak ate Yeezu a siak ate lampoo cheesirɔba ale wabaata nyam a kali ale wa a dɛ ŋandiinta?>> 17Yeezu ale wom dila la, wa yaa weeni ba ayen, <<Baai ale ta nyiŋyɔgsa la kan yaali tebirɔ alege ka baai ale a yuak la. Mi an jam ayen m wi ka wayɔrisima nyama alege ka wabaata nyam.>>
18Jɔɔn Sokateerɔwa ŋaaŋviirɔma ale Farisiima a yaa bobi nɔi.#2:18 Kaabka 16:29-34 Nuruba ba gela a yaa jam Yeezu jigi a bek wa ayen, <<Ka boa ate Jɔɔn ŋaaŋviirɔma ale Farisiima ŋaaŋviirɔma a bobi nɔi, alege fi ŋaaŋviirɔma a kan bobi?>> 19Yeezu yaa weeni ba ayen, <<Nipok fiaka nyɔnɔwa doama a baga a bobi nɔi yaa? Aaya. Nipok fiaka nyɔnɔwa ale diem boro ale ba la, ba an baga a nye dila. 20Alege ku cheena ate ba le yik nipok fiaka nyɔnɔwa a ta cheŋ, dila powa ba yaa le bobi nɔi.>>
21<<Nuru a kan pai garuchiak paalik a laŋ garuk kpaga. Ba dan nye dila, garukku le cheeri a gum du, yaase, 22ba kan pai da paalik a su bunlɔk kpak po. Ba dan nye dila, bunlɔkku a na kama ate daamu a waaŋ. Ku dan nye dila, nuruwa a jɔk wa bunlɔkku ale wa daamu meena kama. Da paalik a magsi ka bunlɔk paaluk sukka.>>#2:22 Nya fotowa, Matiu 9:17.
23Vuusum Daaŋa po dinyi ate Yeezu ale wa ŋaaŋviirɔma yaa va talim po a taam. Ba ale a cheŋ la, wa ŋaaŋviirɔma yaa wɛ ŋanbie zuima a ŋɔbi. 24Farisiima yaa bek Yeezu ayen, <<Nya, ka boa ate fi ŋaaŋviirɔma a kaasi tama Vuusum Danni kisukku?>> 25Yeezu yaa bek ba ayen, <<Nama an diem karim Deevid wie diipo ate wa a silim ate kom a ta wa ale wa doama ate wa nye dii la? 26Kaabteerɔ kpioŋku Abiata daaŋa po wa jam jo Wen yenni po a ŋɔbi Wen niŋ boroborok kuui ale magsi kaabteerɔma nyiini ŋɔbika la. Wa jam te wa doama mɛ kama.#2:26 1 Samuel 21:1-6
27Wa yaa weeni ba ayen, <<Wen a nye Vuusum Danni a te ka nurubiik, alege daa nurubiik a te Vuusum Danni. 28Dila nyiŋla, Mi Saalɔbiika ale soa Vuusum Danni.>>
Zvasarudzwa nguva ino
Maak 2: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation