Maak 1
1
1Naawen nidoabinni Yeezu Kirisita wapaalaŋa piilimka ale nna. 2Ase ku ale ŋmarisi Wen biisiteerɔwa Azaya gbaŋka po ayen, <<Nya, m tom ka tomtomdɔ waai ale wa gomsi suiku la ayen wa dɛ fi niŋ.>> (Malakai 3:1) 3<<Waai lueluk ale kasim a kaari gɔnni po a weeni ayen gomsi Naawen suiku abe fi nye ate wa suitaŋa a teenti.>> (Azaya 40:3)
4Jɔɔn Sokateerɔwa ale nyini gɔnni po, a mooli ayen ba laŋ nyeka a tuesi soka a nya vɔŋteka. 5Nuruba yegayega yaa nyini tɛŋ kpieŋka Jerusalem ale tɛŋ sii meena ale gilim ka Judia po la a jam Jɔɔn jigi. Ba ale wom wa sinsaŋŋa la, ba yaa tɔk ba tuimbaataŋa meena a sak Naawen alege ate Jɔɔn yaa te ba soka Jodan benni po. 6Ba jam pai ka laalaakomi kɔbta a nye Jɔɔn garukku. Wa jam pai ka chiak gbain a bobi wa chiaka. Wa jam a ŋɔbi ka tintue ale a dɛ siita mɛ.#1:6 Zakaria 13:4; 2 Nalima 1:8; Kaabka 11:22 7Wa jam a mooli kama ayen, <<Nuru wanyi ale bo mi ŋaaŋ a cheena. Wa ta pagrim a gaam mi kama. Mi pɔsima ale mi ale domsi a kali wa niŋ a yeeri wa nuensaŋa a te wa. 8Nyiam ate mi pai a te ni soka, alege waai ale cheena la, ale pai ka Wen Chiika a te ni soka.>>
9Da ŋala po Yeezu a jam nyini ka Nazaret ale bo Galili po la. Wa yaa jam Jɔɔn jigi ayen Jɔɔn a te wa soka Jodan benni po. 10Jɔɔn ale te wa soka a nueri ate Yeezu a yaa nyini nyiamu po a jueli la, wa yaa deri nya wenŋmazukku ale ku lagri ate wa nya Wen Chiika a siŋ jam kali wa zuk nna ase nangbaŋ la, 11ate lueluk a yaa nyini wenŋmazukku po a weeni Yeezu ayen, <<Fi ale m nidoabili dii ate mi a yaali la. M sui a peenti ale fu kama.>>
12Wen Chiika yaa ta Yeezu a ga jo gɔnni po. 13Wa jam bo dula jigini ate ku paari ka da pisinaansi. Ate Sitaana yaa jam nye wa a nya. Wa jam bo ale ka gɔi duŋsa ate Wen yaa tom maarɔba ate ba jam maari wa.
14Dai yeŋ po nuruba a yaa yik Jɔɔn a ta wa ga lik dɔk po. Ku ŋaaŋnyiŋ ate Yeezu yaa jam Galili tɛŋka po a mooli Wen wamaŋsaŋa ayen, 15<<Da ŋaai ate Wen dak ayen wa naamu le jam la, a moata kama. Ni basi ni tuimbaataŋa abe ni ta siaka ale wa wamaŋsaŋa.>>
16Yeezu ale va Galili nyakpiemu nɔi a taam la, wa yaa nya Simon ale wa suoku Andiru ale ba za a yuk ba ŋmiak a basi nyiamu po diila ba jam ka jum yigrisa. 17Yeezu yaa weeni ba ayen, <<Ni jam va mu ate m basi ate ni ta nuruba a jam m jigi.>> 18Ate ba deri basi ba ŋmaasaŋa ale va wa.
19Wa le cheŋ magadek la, wa yaa nya Jeemsi ale wa suoku Jɔɔn ale jam ka Zebedi nidoabilisa la ale ba bo ba ŋaaruŋ po a laŋ ba ŋmaasaŋa. 20Yeezu yaa wi ba ate ba deri basi ba kowa Zebedi ŋaaruŋku po ale wa tomteerɔma ale ga va wa.
21Yeezu ale wa ŋaaŋviirɔma yaa ga jo Kapernaum tɛŋka po. Juuma Vuusum Danni ale jam paari la,#1:21 Nyinika 31:12-17 Yeezu yaa ga jo ba tuka dɔkku po a boro a sak ba Wen wie. 22Nuruma ale wom wa sinsaŋŋa la, ku yaa cha ba, dii nyiŋla wa sak kama ase waai ale jam ta pagrim la ale kan nye ase Sinsak sagrɔma la. 23Nuru ale jam ta chichirik biok a maa bo tuka dɔkku po. Wa yaa kaari 24ayen, <<Yeezu Nazaret denɔwa, fi a yaali ka boa ti jigiya? Fi jam ayen fi kaasi ti kama? M seba fi ale ka waai la kama, fi ka Nuru Weleŋ a nyini Wen jigi.>>
25Alege Yeezu yaa toariŋ chichirik bioku ayen, <<Goori abe fi nyini wa po a nyini.>> 26Chichirik bioku a deri basi ate nuruwa nyiŋka a gɔk a yaa kaari a nyini wa po a nyini.
27Ku yaa cha nuruma meena ale jam bo dula la, ate ba weeni ayen, <<Ni nya nuruwa de ta pagrim a weeni chichirik baata ate ti a wom wa nɔi a nyini nuruba po a nyini.>> Ba yaa bek chaab mɛ ayen, <<Ka boan jaab sinsak paala ale nna?>> 28Galili tɛŋka po nuruma yegayega a jam wom Yeezu ale tom diila kama.
29Yeezu yaa deri basi tuka dɔkku ale cheŋ. Wa ale Jeemsi ale Jɔɔn yaa ga jo Simon ale Andiru yenni po. 30Yeezu ale jo yenni po la, ba yaa deri weeni wa ayen Simon ŋanuba ale a yuak. Wa nyiŋka jam toliŋ ka nna bakki ate wa dua wa dɔkku po. 31Yeezu yaa jo nipowa dɔkku po a yik wa nisaŋa a zak ate wa yiti ŋmai. Wa ale nye dila la, wa nyiŋka yaa deri yɔk ate wa yiti yaali nyiam a te ba.
32Wenni ale siŋ la, tɛŋka po demma a pai ba yɔgnyieŋsa ale baai ate chichirik baata a jam ta ba la a jam Yeezu jigi. 33Tɛŋka po demma meena a yaa tigsi chaab a jam yeri diipo ate Yeezu a boro la. 34Wa tebi nuruba yegayega baai ate nyiŋtuila tɔgatɔga a jam ta ba la, ale a yiak chichirik baata yegayega nuruba po a basi. Yeezu an jam te chichirik baataŋa suik ate ti weeni wari ya, dii nyiŋla ti poom seba wa ale ka waai la kama.
35Saluik yokyok ate vanni an diem jam veenti la, Yeezu yaa yiti a nyini tɛŋka po a cheŋ juijui ate nuru a karo la a puusi a te Wen dula jigini. 36Simon ale wa vaanchaama yaa nyini gisi wa. 37Ba ale nya wa la, ba yaa weeni wa ayen, <<Waai meena a gisi fu kama.>>
38Yeezu yaa weeni ba ayen, <<Ni te ti cheŋ tɛŋ sii ale moata la ate m sak nuruma Wen wie ate ba wom. Ka dila nyiŋ ate m jam.>> 39Wa yaa nyiem a gilim Galili tɛŋka a sak nuruba Wen wieŋa ba tuka diinaŋa po. Wa jam yiak chichirik baata nuruba po a basi mɛ.
40Gami yaa jam Yeezu jigi a kpi duna wa niŋ a saalim wa ayen, <<Fi dan siak, fi baga a tebi mu kama, ate m nya nyiŋyɔgsa.>>
41Yeezu yaa ta jiirim ale wa a teeri wa nisaŋa a tiri wa ale weeni wa ayen, <<M siak ya. Be nye cheri.>> 42Ate gama tuemu a deri basi wa ate wa nye cheri.
43Yeezu yaa kaam wa ale deri basi ate wa cheŋ. 44Ale weeni wa ayen, <<Kan weeni wari a sak waai ya, ga pai fidek a sak kaabteerɔwa abe fi te sugrika tiirimu ate Moosis a weeni la ate ku chim wensie a sak nuruma.#1:44 Kaabka 14:1-32 45Gamini yaa basi dula jigini. Wa an jam va Yeezu ale weeni wa diila, alege wa jam gɔnti a nyiem a weeni waai meena kama Yeezu ale tebi wa diila. Dila nyiŋ ate Yeezu an ŋman baga a nyini peelim a jam tɛŋka po. Wa yaa ga bo gɔnni po ate nuruba nyini tɛŋsa yegayega po a jam wa jigi.
Zvasarudzwa nguva ino
Maak 1: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation