2 Korintiya 2
2
1Ɗa n danai ka̱ci ka̱ va̱, “Mi o kudoku ma bana we le ba, adama na a ayin a na n gita̱i kubana we le, gbende vi le a̱ na̱mgba̱ ta̱ ka̱tsuma̱.” 2Mi baci a̱ kula̱nga̱sa̱ ɗa̱ a̱ɗu, yayi tamkpamu u kuneke mu ma̱za̱nga̱? A̱ɗa̱ ɗa koci vu na i kuneke mu ma̱za̱nga̱, amma ta na n la̱nga̱sa̱ ɗa̱ ta̱ ɗe a̱ɗu. 3I ɗaɗa i zuwai ɗa n ɗanai nannai punu a akaka a na n suki ɗe a kubana wa̱ ɗa̱ wa. N ciga m bana me ene ɗa̱ ba, adama a na kubana kene ɗa̱ ki ta̱ a̱ kula̱nga̱sa̱ mu ka̱ɗu. A̱ɗa̱ ɗa ta na uma a na i e kuneke mu ma̱za̱nga̱. Ili i na i zuwai ɗa n cigai n yongo m ma̱za̱nga̱ i ɗaɗa, adama a na n zuwa ɗa̱ i yongo m ma̱za̱nga̱ feu. 4Ana n ɗanakai ɗa̱ n ayin a ɗe, mi ishi m ma̱ta̱na̱ koɓolo m ma̱za̱nga̱ a̱ ka̱ɗu ka̱ va̱ ba, ɗa n ɗanai n i shika̱i. N ɗana adama a na n la̱nga̱sa̱ ɗa̱ a̱ɗu ba, amma n ɗana ta̱ adama a na i yeve n ciga ɗa̱ ta̱ ka̱u.
Cinukpakai vuza na u yaꞋin unushi
5Vuza yoku lo a̱ ka̱tsuma̱ ka̱ ɗa̱ u zuwa ta̱ ra̱ka̱ vu ɗa̱ una̱mgbuka̱tsuma̱, mpa ɗa koci ba. N dana ɗa̱ u zuwa ta̱ aza a̱ Kutoni una̱mgbuka̱tsuma̱ nannai. Ali n doku n ciga kuyaꞋan kadanshi ka nam pa ka̱u ba. 6A̱ɗa̱ vi yoku n a̱bunda̱i i ɓolongi ka̱ci ka̱ ɗa̱, ɗa i nekei ni atakaci a na a untsai ni. Atakaci a nan lo a yawa yi ta̱. 7Amma gogo na i cinukpaka yi unushi u ni, ka̱ta̱ i neke yi kadanshi ka kuvaꞋanka ka̱ɗu, adama a na i sa̱nka̱ ka̱ɗu ka̱ ni kuna̱mgba̱ n a̱bunda̱i, ali u ka̱sa̱kpa̱ uye u kutoni ba. 8N folono ɗa̱ ta̱, yotsongi a na i cigai ni. 9N ɗana ta̱ adama a na n kondo ɗa̱, ka̱ta̱ kpamu n yeve ko i tono kuyotsongusu ku va̱. 10Ayin a na baci i cinukpakai vuma vu nam pa, mpa n cinukpaka yi ta̱ feu. Ayin a na baci n cinukpakai ni (unushi wi ishi baci lo), n yaꞋan ta̱ adama a na n yaꞋanka ɗa̱ kasingai adanshi mi ta̱ kelime ka̱ Kirisiti Kishi. 11N yaꞋan ta̱ nannai adama a na MalyaꞋi† mo doro tsu ba. Adama a na ci yeve ta̱ mayin ili i na MalyaꞋi mi n i ɗa ufoɓi a̱ ka̱ɗu.
Bulusu a Taruwasa
12Ana n yawai a Taruwasa kudana uma Arabali a Singai† a ukuna u Kirisiti Kishi, ɗa n cinai wana ɗai Vuzagbayin u ɓa̱yuwa̱ uye adama a ulinga ɗe. 13Amma m pana uyoꞋo a̱ ka̱ɗu ba, adama a na me ene Taitu vuza tsu ba. Ɗa n danai uma a na i ɗe va, “Sai kpamu ayin o yoku.” Ɗa n lazai m banai a Makidoniya.
UlyaꞋi adama a̱ Kishi
14Ci cikpa ta̱ Ka̱shile n a̱bunda̱i! A̱yi ɗa vuza na u bonokoi tsu agbashi a̱ ni, ɗa u dasakai tsu kelime adama a na Kirisiti Kishi ɗa u lyaꞋi. Ka̱shile kpamu ka̱ ɓa̱nka̱ tsu ta̱ tsu pecuki uyevi wu ukuna u Kishi a̱ ubuta̱ dem an maniꞋin ma̱ ma̱gula̱ni. 15Wuma u tsu wi ta̱ an maniꞋin ma̱ ma̱gula̱ni ma na Kirisiti Kishi u nekei Ka̱shile, ali ɗa ma̱ ka̱ra̱Ꞌi sai a̱ ubuta̱ u uma a na wi isai, n aza a na i a̱ kukuwa̱. 16Aza a na i a̱ kukuwa̱, ma̱gula̱ni ma̱ tsu mi ta̱ an ushami wu ukpa̱, amma aza a na i n wuma, ma̱gula̱ni ma̱ tsu ma wuma maꞋa. Yayi u kufuɗa kuyaꞋan ulinga tsu nan lo? 17Ci tsu uma n a̱bunda̱i a na a tsu dana uma kadanshi ka̱ Ka̱shile, adama a na a tsupa le ikebe ba. A̱Ꞌa̱, ta nannai ba. Amma mayun ɗa ci an aza a na Ka̱shile ka̱ suki n utsura u Kirisiti Kishi, tsu dana uma akaka a̱ tsu n ka̱ɗu ke te e kelime ka̱ Ka̱shile.
Zvasarudzwa nguva ino
2 Korintiya 2: asgNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2012 Wycliffe Bible Translators, Inc. All rights reserved