2 Korintiya 1
1
Bulusu u kya̱sa̱i aza o Kutoni a na i Korintiya
1Mpa ɗa Bulusu. Ka̱shile ka zagbai mu mo okpo vuzavusuki vi Yesu Kirisiti Kishi. Timoti wi ta̱ koɓolo nu mpa a ayin a na n ɗanai katagarda ka akaka ka nam pa.
Mi ta̱ a kuɗanaka ɗa̱, a̱ɗa̱ na yi punu wa aza o kutoni a̱ Ka̱shile a̱ likuci i Korintiya, koɓolo n uma a̱ Ka̱shile ra̱ka̱ a na i a uɓon u Akataya:
2Ka̱sa̱kpa̱ Ka̱shile Dada vu tsu n Vuzagbayin Yesu Kirisiti Kishi e neke ɗa̱ kasingai m ma̱ta̱na̱.
Bulusu u yaꞋankai Ka̱shile ogodiya
3Cikpai Ka̱shile a̱yi na wi Esheku a Vuzagbayin vi Yesu Kirisiti Kishi vu tsu! Ka̱shile a̱yi ɗa Dada vu na wi n asuvayali n a̱bunda̱i n kadanshi ka kuvaꞋanka ka̱ɗu ra̱ka̱. 4Ci baci n una̱mgbuka̱tsuma̱, u ci neke tsu ta̱ kadanshi ka kuvaꞋanka ka̱ɗu, adama a na ci neke feu uma kadanshi ka kuvaꞋanka ka̱ɗu. Ayin a na baci aza o yoku i n una̱mgbuka̱tsuma̱, ka̱ta̱ tsu fuɗa ci neke le kadanshi ka kuvaꞋanka ka̱ɗu uteku u na Ka̱shile ke nekei tsu. 5Mayun ɗa tsu soꞋo atakaci ka̱u adama a̱ Kirisiti Kishi. Mayun ɗa kpamu ci isa kadanshi ka kuvaꞋanka ka̱ɗu ka̱u adama a̱ Kirisiti Kishi. 6Ayin a na baci tsu soꞋi atakaci, ci ta̱ e kukeɗe a̱pa̱Ꞌa̱ u Ka̱shile ke neke ɗa̱ kadanshi ka kuvaꞋanka ka̱ɗu n wishi adama a atakaci a̱ tsu. Ka̱shile ke neke tsu baci kadanshi ka kuvaꞋanka ka̱ɗu, ɗaɗa ciya̱ a̱tsu tsu fuɗa ci neke ɗa̱ kadanshi ka kuvaꞋanka ka̱ɗu. Ta feu nannai ya kufuɗa ya̱ lulukpa̱ n icuꞋu yi ili i te i na a̱tsu tsu soꞋi atakaci a. 7Ci ta̱ n a̱ɗu a utsura adama a na ci yeve ta̱ ayin a na baci i soꞋi atakaci tsu na a̱tsu tsu soꞋi, yi ta̱ feu a̱ kuciya̱ kadanshi ka kuvaꞋanka ka̱ɗu tsu na a̱tsu ci ciya̱i.
8Uma a̱ va̱, ci ciga ta̱ i yeve tsu na tsu soꞋi atakaci a iɗika i Asiya. A zuwakai tsu a̱miki a na a laꞋi utsura u tsu, ali ci sheshei tsa kulaꞋa ba. 9Mayun ɗa, tsu dana ta̱ ci ta̱ a̱ kukuwa̱. Amma ili i nam pa i zuwa tsu ta̱ ci gita̱ kuneke a̱ɗu a̱ tsu u Ka̱shile, n ka̱ci ka̱ tsu ka ba, adama a na a̱yi ɗa vuza na u tsu ɗengusa̱ a̱kpisa̱. 10Ka̱shile ki isai tsu a ayin a na ci ishi ɗevu n kukuwa̱, ci yeve ta̱ wi ta̱ a kulyaꞋa kelime n kisa tsu. 11Wi ta̱ a kisa tsu adama a na yi ta̱ a̱ kuɓa̱nka̱ tsu a ayin a na i ci yaꞋansa avasa adama a̱ tsu. Adama a nannai, Ka̱shile ki ta̱ a kushuku n avasa a̱ ɗa̱ n a̱bunda̱i. Wi ta̱ a kuzuwaka tsu una̱singai, ka̱ta̱ uma n a̱bunda̱i a cikpa kula ku ni adama a ili i na u yaꞋankai tsu.
Bulusu u dokongu ta̱ nwalu n ni
12Ci ciɓa baci n ili i na ci yaꞋin, ci yaꞋan ta̱ ma̱za̱nga̱ a na a̱ɗu a̱ tsu i n kadanshi ba. Ayin tutu ci yongo ta̱ m ma̱riki, ka̱ta̱ kpamu tsu saꞋwa kusokongu ɗa̱ ili ba. Kasingai ka̱ Ka̱shile kaꞋa ka zuwai tsu ci yaꞋan tsu nan lo, ugboji wa aduniyan u nam pa u ɗa ba. Ci yongo ta̱ mayin a̱ ubuta̱ u na tsu banai dem, n a̱ɗa̱ ɗa biꞋi ta na u laꞋi. 13Ana tsu ɗanakai ɗa̱, tsu dana ɗa̱ ta̱ magaba, tsu sokonku ɗa̱ ili punu a akaka a na tsu ɗanakai ɗa̱ ba. Adama a nannai, yi ta̱ a kufuɗa kuyeve ili i na tsu ɗanai dem. 14Gogo na i panaka tsu ta̱ nannai, amma a̱pa̱Ꞌa̱ a̱ tsu a ɗa i ta̱wa̱ i yeve ili i na ci ciya̱i gbende, adama a kanna ka Vuzagbayin Yesu Kishi vu tsu i fuɗa i yaꞋan ma̱za̱nga̱ adama a̱ tsu, a̱tsu kpamu ci yaꞋan ma̱za̱nga̱ adama a̱ ɗa̱.
15N yeve ta̱ nannai mayin, adama a nannai, mi ishi ta̱ n sheshe ɗe kuta̱wa̱ kene ɗa̱ biꞋi. Nannai ɗa Ka̱shile ka kuzuwaka ɗa̱ una̱singai, adama a na mi ta̱ a̱ kuta̱wa̱ wa̱ ɗa̱ ali kure. 16Mi ishi ta̱ n ciga n uwa n kya̱sa̱ ɗa̱, mi baci a kubana a Makidoniya ali n kubono dem. Ka̱ta̱ i ɓa̱nka̱ mu n ka̱na̱ uye a kubana a uɓon u Yahuda. 17I kece ta̱ yi ɗa̱i i zuwai ɗa m kpa̱ɗa̱i kuyaꞋan tsu na mi ishi n zuwai. Mi a kuyaꞋan kadanshi ka kavama a ayin a nan lo ba. Mpa mi ta̱ tsa uma a aduniyan a nam pa, a na e ci sheshe ukuna ka̱ta̱ megeshe a yaꞋansaka a̱ɗu a̱ ka̱tsuma̱ ka ayin e te?
18Amma i zuwaka baci Ka̱shile utsura, i kuzuwaka ta̱ utsura n ili i na tsu danai ɗa̱, “E” ɗa, n “A̱Ꞌa̱” a ayin e te ba. 19Na va ɗaɗa adama a na Maku ma̱ Ka̱shile, Yesu Kirisiti Kishi u tsu ushuku ka̱ta̱ u doku u iwan a ayin e te ba. Ayin tutu u tsu ushuku ta̱ n ka̱ɗu ke te. A̱yi ɗa vuza na mpa, koɓolo n Sila n Timoti ci yaꞋankai ɗa̱ kadanshi ka̱ ni. 20Adama a na a̱yi ɗa̱ vuza na u tsu shatangu uzuwakpani u Ka̱shile ra̱ka̱. I ɗaɗa i zuwai a̱tsu tsu dana, “Ta nannai”† ayin a na baci ci nekei Ka̱shile tsugbayin a̱ ubuta̱ kula ku Kirisiti Kishi.
21Ciɓai, Ka̱shile a̱yi ɗa vuza na u zuwai a̱tsu n a̱ɗa̱ dem ci yaꞋan utsura u Kirisiti Kishi. Ka̱shile, a̱yi ɗa kpamu u zagbai tsu. 22Ɗa u zuwakai tsu urotu u na a̱tsu uma a̱ ni a ɗa ci koci. U nekei tsu kpamu Ayinviki a̱ Ka̱shile a̱ a̱ɗu a̱ tsu an uzuwi u kaguta u na u yotsongu tsu ili i yoku i na yi lo a̱ kuta̱wa̱.
23N yaꞋan baci aꞋuwa, ana n danai ɗa̱ n iwan ta̱ kubono o Korintiya, ta lo me neke ɗa̱ atakaci, ka̱sa̱kpa̱ Ka̱shile ke neke mu atakaci. 24Ci a kudana ɗa̱ ili i na sai i neke a̱ɗu ba. Ci yeve ta̱ yi ta̱ n uneki wa̱ a̱ɗu wu utsura, ta kpamu nannai a̱ɗa̱ feu i shamgba n utsura. Ci ciga ta̱ ci yaꞋan ulinga koɓolo n a̱ɗa̱ adama a na a̱ɗu a̱ ɗa̱ a shana m ma̱za̱nga̱.
Zvasarudzwa nguva ino
2 Korintiya 1: asgNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2012 Wycliffe Bible Translators, Inc. All rights reserved