Kañaam 31
31
Pţu mnhaţ ţi Naşibaţi ţi wal wi unoor
1Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ.
2Iwi Yawe Nawat Kabuka, du iwi di di njaaŋ kamennaana ;
kwut nin bakowandënaan !
Iji kwayëş pwayëş pŧool, dolaan mbuur.
3Watan kabaţ iŧiinkën,
ŧaraan ibuuranaan.
Woon pnkuŋ pi nji ntëŋnuŋ,
woon katoh ki ŋniw ŋankëmuŋ kanjaaŋ kabuuranaan.
4Iwi iwooŋ pnkuŋ pi nji ntëŋnuŋ,
iwo katoh ki ŋniw ŋankëmuŋ ;
katim ki nu, kakaaŋ kë ikţoŋën adiimanaan bgah.
5Iluŋ kapënanaan ţi bţaaw bi babëkanaanuŋ,
du iwi di di njaaŋ kamennaana.
6Iwi Nawat Kabuka ijaaŋ kbuuranaan,
iwooŋ Naşibaţi na manjoonan ;
dbëkan uhaaş naan ţi iñen yi nu.
7Dşoor banjaaŋ badëman iko inaaf inwooŋ iinwo Naşibaţi ;
nji, dţu mnhaţ mi naan ţi Nawat Kabuka.
8Iŋalën ukaaŋ kë nlilan maakan aki ;
iwin mnhaj mi naan,
ime unoor wi uhaaş wi naan.
9Iinwutën du iñen yi naşoorad naan,
inaţanaan, alowanaan du.
10Iwi Nawat Kabuka ñagi'aan, dnoor maakan !
Mnţëg manfëlanaan këş, dnoor ţi uhaaş anoor ţi uleef.
11Unuur unjinţi dji kahaj,
ŋşubal ŋi naan ŋaţëp ţëp ţi ŋwooni.
Pekadu di naan dabeewanaan iñen,
imoh yi naan iyoji.
12Başoorad naan bŧi bakarën,
nji dwooŋ mnkow mi bakinţ naan,
bañaaŋ bammeeŋ nji baţi'ën.
Woli bawinën du bgah, baji baţi kalowën.
13Baţilmi'aan apënanaan ţi ŋşal ji ñaaŋ ankeţuŋ ;
dwo wo ji uko unŧokiiŋ afël.
14Dŧiink iko iwuţaan yi bañaaŋ bakţupuŋ ţi nji.
Palënk kë pawo ţi ŋmbaŋ bŧi ;
bayit bŧi aŧiinkar pnaţara nji,
baţiini aŧiinkar pfiŋën.
15Iwi Nawat Kabuka, dţu mnhaţ mi naan ţi iwi,
dji kaji : « Iwi, iwooŋ Naşibaţi i naan. »
16Ŋnuur ŋi naan ŋawo ţi iñen yi nu ;
buuranaan ţi iñen yi başoorad naan, ţi iñen yi bankdookaruŋ na nji.
17Dolan bjeehi bi kaara di nu bawinana ţi nji nwooŋ nalemparu ;
wi iŋalnuŋ, buuranaan.
18Iwi Nawat Kabuka, kwutën nkowa wi nji kadu'iiŋ,
işë ikowandën bañaaŋ bajooţ,
ido baka bawala byompan du mnkeţ.
19Dëŧan mntum mi baţilan mënţ,
banjaaŋ baţiini ţi anwooŋ naŧool ţi këş ki nu na mngam na phomp na bbeehar.
20Iwi Nawat Kabuka, iko inuura yi ihankaruŋ banjaaŋ baŧiinku idëmi.
Ţi kadun ki bañaaŋ bŧi iji kwul ya bankmbiiŋ kamena du iwi.
21Bukuŋ mënţan iji kmen baka du dko di iwooŋ ;
iji klowan baka kaguuru ki bañaaŋ bajën ;
iji kpënan baka ţi mntum mi bañaaŋ.
22Iwi Nawat Kabuka dbeebu,
dbi wo ji ubeeka wi bakgutaruŋ
kë işë diimanaan uŋal wi nu unwooŋ uunkba.
23Dñoŋar adoo ji ţi uşal :
« Nji wi adookana alow këş ki nu. »
Kë işë ŧiinkën wi nji nkooţiiŋ,
wi nji nhuuranuŋ adu'u.
24An bŧi nanjaaŋ naţaş Nawat Kabuka na manjoonan, naŋalana !
Nawat Kabuka aji beel banfiyaaruluŋ,
kaşë kob maakan banjaaŋ badeeŋ igaŋan.
25An bŧi nanhaţuŋ Nawat Kabuka, natamaan, naţuun uşal !
Zvasarudzwa nguva ino
Kañaam 31: knf
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2014, Wycliffe Bible Translators, Inc. in cooperation with Le Groupe CIM-TBM, Senegal