Kañaam 30
30
Yawe Nawat Kabuka abuuranaan
1Kañaam. Kayeeh ki kabeebnuŋ Yawe Nawat Kabuka wi babomanuŋ Katoh Kaweek ki Naşibaţi aba. Kayeeh ki kapënna ţi ulibra wi Dayiţ.
2Iwi Yawe Nawat Kabuka, ddëmanu ţiki inaţanaan ;
iinwut başoorad naan kë bakji'ën.
3Iwi Nawat Kabuka Naşibaţi i naan,
dhuuran adu'u kë ijebanaan.
4Iwi Nawat Kabuka, ipënanaan du mnkeţ ;
ipënanaan ţi pŧoof pi bankwaliiŋ du bhër.
5An nanfiyaaruŋ Nawat Kabuka, nayeehan nadëmana ;
nayeehan nadëman katim kayimanaan ki nul.
6Udeeb wi nul uji uwo wi ŋwal ŋntiinku ;
kë bnuura bi ajaaŋ awul başë ji bawo bi mnţo.
Na utaakal, mnkuul ;
na nfa, iyeeh yi mnlilan.
7Nji dbi wo ţi bnuura aşë ţup :
« Mënkluŋ kalënk nin. »
8Iwi Nawat Kabuka, iwulën bnuura bi nu kë nliinŧ ji pnkuŋ ;
ibi dekën kafeţ kë nlënk akat kat.
9Iwi Nawat Kabuka, ddu'u ;
Iwi Ajugun, dkooţu aji :
10« Woli iyeenkën ubida, we wi ikkaaŋ ?
Woli iwutën kë njot du bhër, we wi ikkaaŋ ?
Mboş kadëmanu i ?
Mboş kaţup manjoonan mi nu i ?
11Iwi Nawat Kabuka dkooţu kooţ, ŧiinkaan iñagi'aan !
Iwi Nawat Kabuka, woon nabuuranaan ! »
12Ido kë ŋwooni ŋi naan ŋakak iyeeh yi mnlilan ;
iwohëşaan imişa yi puum aţu'ën yi mnlilan.
13Ukaaŋ kë mënkţañna pyeehu ;
iwi Yawe Nawat Kabuka, Naşibaţi i naan, dbeebu te mnţo.
Zvasarudzwa nguva ino
Kañaam 30: knf
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2014, Wycliffe Bible Translators, Inc. in cooperation with Le Groupe CIM-TBM, Senegal