Kañaam 29
29
Pyeehar Yawe Nawat Kabuka
1Kayeeh ki pñaamarën Naşibaţi ki kapënna ţi ulibra wi Dayiţ
An ŋwanjuŧ ŋi baţi nawulan Yawe Nawat Kabuka,
nadëmaan Nawat Kabuka, ul awooŋ na mnhina na mndëm !
2Nabiin naţup mnhina na mndëm mi katim Nawat Kabuka !
Naŋupan nadëman Nawat Kabuka, ayiman abot awo na mndëm !
3Pdiim pi Nawat Kabuka paŧiinkana du idëk ;
Naşibaţi ajug mndëm ado kë imparantant ikdug ;
Nawat Kabuka aţo, aşih idëk iweek.
4Pdiim pi Nawat Kabuka pawo na mnhina ;
pdiim pi Nawat Kabuka pawo na mndëm.
5Pdiim pi Nawat Kabuka papaaţ mnko mnweek ;
aa, Nawat Kabuka apaaţ mnko mnweek manwooŋ du uŧaak wi Libaŋ#29.5 Mnko mnweek : baji badu ma Ŧedër, manwo mnko manjaaŋ mandëm maakan ji pnţeen..
6Ado kë inkuŋ yi Libaŋ iklut aŧëfa awo ji ubay ;
ado kë pnkuŋ pi Hermoŋ paklut aŧëfa awo ji uwit wi uţeeh umpoţi.
7Pdiim pi Nawat Kabuka paji papënan iliik liik yi bdoo.
8Pdiim pi Nawat Kabuka paji paşinţ şinţan pndiiş ;
aa, Nawat Kabuka aji lëk lëkan pndiiş pi Kadeş.
9Pdiim pi Nawat Kabuka paji pado ŋbaŧa ŋabuk ;
paji pamaran itoh yi mnko mi uţeeh.
Katoh ki nul kaŧum na idiim injaaŋ ihuuran kaji :
Nawat Kabuka awo na mndëm !
10Nawat Kabuka aţo ţi meel duuţ aşih ;
Nawat Kabuka aţo aşih te mnţo.
11Nawat Kabuka aluŋ kawul pntaali pi nul mnhina ;
Yawe Nawat Kabuka aluŋ kawul bañaaŋ biki nul bnuura.
Zvasarudzwa nguva ino
Kañaam 29: knf
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2014, Wycliffe Bible Translators, Inc. in cooperation with Le Groupe CIM-TBM, Senegal