2 Koridɨ 7
7
1Sarɨmɨnyɨna tewaanya nyɨvu'nadeihi, yuya daza, Gotɨyare yune naanga nebulya'na wɨja daza mena kɨnɨnnakeine. Sarevɨdaa'nyɨ yɨ nemɨ yuya gɨrɨkita'nanya kɨlaakejɨkɨyajɨ kuryarɨyajɨ duimwagasɨ'naana! Sara yawaajɨ tewaanya yɨda'maraangeina mwalaana! Sare' nemɨ Gotɨyare dɨragɨnyavɨna lɨka yadaa nawɨ'nya gɨrɨ'maayabwi yuyagaa' yunebanna neyɨma'nade'nanyɨ.
2Sarɨmɨre sɨmunyai nemɨnyɨneba dɨnebasamarɨmwaaihila! Nemɨ sarɨmɨjɨya a'mwe aane pwarɨ kwarɨ yɨwetawakya pɨrɨ' myadaanyaine. Nemɨ aane pwai kwarɨ kayaaka migalakyadaanyaine. Nemɨ aane pwai kwarɨ kwaasɨ wɨdadaa gamɨre gɨlyɨvɨsa mamwagi'nyadaanyaine. 3Nɨmɨ sarɨmɨnyɨ yaasɨwa' yagaala yɨhɨzɨdaya'ne' majɨvanɨge. Sare' darevɨnyɨ. Nɨmɨ mena dara dɨwa. Nemɨre sɨmunyavɨ sarɨmɨ wɨlamwaaiha'. Sarevɨ yɨhɨgaimwagya'neina sarɨmɨ kabalapi nemɨ sarɨmɨjɨ ye'mwannabaina yaade' tewaanyasɨ. Yɨ nabaai sarɨmɨ gaala kuna kamwaalapi nemɨ sarɨmɨjɨ gaala ye'mwannamwaaina yaade' tewaanyasɨ. 4Nɨmɨ sarɨmɨnyɨna yɨlaaya yadɨ dɨragɨnna yawɨ'dɨ ku'maayaba yɨhɨzalɨkurakyɨvanɨge. Nɨmɨ sarɨmɨnyɨna wɨ'nena sarɨmɨnyɨne yaya' munyaba makimanɨge. Yuya taanginya neyɨma'nade sangɨ sarɨmɨ yɨwa'daasa'na nɨmɨre kuryarɨ yunebanna nyɨvaimwamanɨ'. Nabaai yɨlaaya naange' nɨmɨnyɨ yuneba yeku'nawɨresɨ'manɨ'.
5Taanginya sare' darevɨnyɨ. Sɨnnawɨ Pɨrovijɨ Maazathonɨyana bi'ma'mwa'dohaa' dazɨmagɨ kimagɨjɨ nemɨre kɨlaakejɨkɨ kwaamu'na mamwaalyɨwa'do. Aawa. Taanginya dala pɨnɨnna pɨnɨnnanya neyɨma'nɨwa'dɨkengɨ. Yɨ mwasɨmagɨ nemɨnyɨ maiyagaalyajɨ maangejɨ warɨna. Yɨ kusɨmagɨ nemɨ lɨka yɨna. 6Sare' kɨrɨ' taanginya kɨnɨnnakeraavɨ yɨvaimwadei Gotɨyai nemɨnyɨ neyɨvaimwamwa'. Yɨ sai Taaitazarɨ maryasaabakei nemɨnyabanna bi'ma'mwakevɨ sai nemɨre sɨmunyavɨ neyɨvaimwamwa'. 7Taaitazai nemɨnyabanna bi'ma'mwake'na yune dazahɨrɨvɨna Gotɨyai neyɨvaimwamwake' mi yɨwa'. Aawa. Sarɨmɨ Taaitazare sɨmunyavɨ yɨvaimwanna kiwa'daa' sahwai yagaala datha' makabɨwakevɨ Gotɨyai nemɨ kwainaavɨre sɨmunyavɨ neyɨvaimwamwa'. Taaitazai dara nedɨwa'. Sarɨmɨ nɨmɨnyɨ tɨnna wanganya'na tewaanya yɨhɨvu'nada yɨ sarɨmɨre sɨmunya' kɨnna dɨvanɨ'. Sara yadɨvɨ' nɨmɨjɨ avaaizɨmunya'na ye'mwannamwaalya'na sarɨmɨ sɨmunya kwalaalya yawɨ'manɨga'. Sarevɨdaa'nyɨ nɨmɨ yɨlaaya naanga naanga yɨvanɨge. 8Sare' dare'nanyɨ. Nɨmɨre pɨkarɨyɨkwiavɨ yagaala dɨragɨnya' sarɨmɨre kale yɨhigaimwa'dɨka kɨrɨ' yɨ nɨmɨ yagaala dazavɨna nɨmɨre sɨmunya' taanga manyɨvanɨ'. Nebulyasɨ. Kɨgaa' sagaa' sɨmunya' taanga nyakeinyɨ. Kɨrɨ' dahaa' aawa. Nɨmɨ dara yawɨrangamanɨge. Paazɨya daza' sarɨmɨnyɨ sɨmunya' kale yɨhigaimwa'dɨkesɨ. Kɨrɨ' nabaai sa' maalɨkegaa'nesɨ. 9Dahaa' nɨmɨ yɨlaaya yɨvanɨge. Sarɨmɨre sɨmunyavɨ kale yɨhigaimwa'de'na yɨlaaya mivanɨge. Aawa. Sɨmunya' kale yɨhigaimwa'de' sarɨmɨre sɨmunyavɨ mudɨkebwi yawɨramaa'mwa'daasa'nanyɨ. Sare' darevɨnyɨ. Sarɨmɨnyɨ sɨmunyavɨ kale daza' Gotɨyai marayɨhima'nɨwa'daavadɨkesɨ. “Nemɨre paazɨyavɨya yagaalya' Koridɨ mwaalyaraavɨ kayaaka aane pɨmɨlɨ' kɨmɨlɨ' nyɨgalakadɨka!” kado Gotɨyai sara yɨwa'dɨkesɨ. 10Sare' darevɨnyɨ. Kale daza' Gotɨyai marima'naabade daza' yɨ nemɨ a'mweinaavɨ sɨmunya mudɨkebwi neyadesɨ. Yɨ sasare dazaburɨ Gotɨyai nemɨnyɨ nevadaihasamaa'delyɨ. Sarevɨ sɨmunya mudɨkebwina nemɨre sɨmunyavɨ taanga maneyanna! Kɨrɨ' kale wiabwi yaasɨwa'nanyabwi a'mwe Kwaakevakɨyaraavɨrebwi yɨ daza' baryabwi gavebwi marima'naabadesɨ. 11Sare' darevɨnyɨ. Yɨthaanyi, Gotɨyare kale daza' yɨ dazahɨrɨsa' sarɨmɨnyɨ dala pɨnɨnna pɨnɨnnanya tewaanya nawɨ'nyabura yɨhɨmarima'nɨwa'daavadɨkesɨ. Yavada'galya'na sarɨmɨnyɨ mwolavalɨmwagata yɨhiwa'dɨkesɨ. Yɨ yagaainakeihi sarɨmɨre yagaalya yavada'gaimwa'daasange! Yɨ Gotɨyai yɨhidɨkaa'bwa'de' yɨ sarɨmɨre yɨwetawakya'na wagɨla maa'mwa'daasave! Yɨ Gotɨyare dɨragɨnyavɨna lɨka naanga yɨwa'daasave! Nemɨnyɨ tɨnna wanganya'na sarɨmɨre sɨmunya' sɨmuyɨwaala yɨwa'dɨkeve! Yɨ tewaanya'na dɨragɨnna yadɨvɨ' kayaa'nanya'na dɨragɨnna nayaa yɨwa'daasave! A'mwe dazai yɨwetawakya'na tɨvɨkɨta naange' yɨwa'daasave! Yuya sangɨ sarɨmɨre sabwi gamɨre yɨwetawakya savɨna ku'maayaba dara yɨma'nɨvanɨ' “Sarɨmɨ yɨwetawakya' maayaihɨlyɨ.”
12Sarevɨ, sɨnnawɨ sarɨmɨnyɨ paazɨya' yɨdave' daza', yɨ a'mwe dazai yɨwetawakya mena yaka gave sarɨna yawɨrena yɨdave' mɨ'. Nabaai sahwai a'mwe pwarɨ kayaa'nanyabwi yɨngakakerɨna gaverɨna yawɨreinyɨ mɨ'. Aawa. Nɨmɨ sarɨmɨre sɨmunya dɨragɨnyabwi ku'maayabanna marima'naabya'na yɨdavesɨ. Yɨ Gotɨyare tɨnnyarɨ sarɨmɨ tewaanya nawɨ'nyabura neya'neihi nemɨnyɨna tewaanya yɨhɨvu'nɨvanɨke'nanyɨ. Sarɨmɨ sara yawɨramaata'ne' yɨdave'nanyɨ. 13Sarevɨ nemɨre sɨmunyavɨ tewaanya neyɨvaimwadɨvɨsaihɨlyɨ. Sare kɨrɨ' neyɨvaimwange' gave' mɨ'. Nemɨ yɨlaaya naanga yuna yɨvanɨgo. Sarɨmɨ yuyaihi tewaanna yadɨvɨ' Taaitazare kuryai kave mena yɨmwaaihɨvanɨgasa'na sahwai yɨlaaya yɨvanɨ'. Gamɨre yɨlaaya sasare dazabwi wangadaa yɨ nemɨjɨ yɨlaaya naanga yuna yɨvanɨgo. 14Sare' dare'nanyɨ. Sɨnnawɨ nɨmɨ Taaitazarɨ wɨdadɨ sarɨmɨnne yaya' munyaba makɨle daza'na, yɨwetawakya mye'na, nɨmɨre yagaala dazavɨ wagɨla mamaariwa. Aawa. Yuya yagaala nemɨ yɨhɨtho daza yɨ naanga nebulya'nanya warɨkabaaibɨ' yɨ savɨ Taaitazaryaba sarɨmɨnne yaya' munyaba makɨlo yagaala daza' yagaala naanga nebulya'nanyasɨ. 15Taaitazai sarɨmɨnyawɨnna kabi'mava' yɨ sarɨmɨ “Yɨwetawakya nyaadɨkajɨ,” lɨka yɨwaaineva sahwarɨ maaresalyɨ. Yɨ sarɨmɨ yuyaihi sahware yagaalya' mɨdɨnna yesaihɨlyɨ. Sahwai yune dazahɨbwina yawɨ'da yɨ gamɨre sɨmunyai yawɨrirɨkɨrakyai sarɨmɨnyawɨnna yuna wa'daawadelyɨ. 16Dahaa' nɨmɨ nebulya' dɨragɨnna dara lɨmwamwa. Sarɨmɨ saihi yuya yɨdata sabura nayaa nebulya'na jideihɨlyɨ. Yɨ sasare saburɨ nɨmɨ yɨlaaya yɨvanɨge.
Trenutno izbrano:
2 Koridɨ 7: byr
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2013, Wycliffe Bible Translators, Inc. All rights reserved.