Nùb róòm 2
2
Mèín kwá ŋgwin nùb lâs
1Wu nò du kùb àm ŋgwéé ténniì, sàmàìn Mèín tɨ́í wé ɗàà, wu dùgɨ̀ na. Ɓetí ɓwâ wu du wú kùb àm ŋgwéé ténnɨ, wu a ndɨ̀ŋɓwêcè wú nɨ́ɨ́b mwi̧ kíì, wu téíncuɓa wu àm wu nɨ̀mɨ́rí ŋgwéné á. 2Nùb du ndɨ̀ŋnɨ kúúŋ nɨ́ɨ́b kíì, nɨ́m ɗəəŋtɨ́ Mèín á nɨ ténnɨ àm ŋgábè jɨ́k ɓe àmɨɨr cúk. 3Wu nò du ténnɨ nùb du ndɨ̀ŋnɨ nɨ́ɨ́b u̧ kíì àm ŋgwéné, u̧ kɨ́ wu nɨ̀mɨ́r á ndɨ̀ŋɓwênɨ nɨ́ɨ́b mwi̧ kíì, wu lə́mne wu ɓa ɓáíhó̧nɨ ŋgwìn Mèèín no á à? 4Kèè wu sakkɨ́ wú nyàŋnjɔ̧̀ kàm Mèín du ɓe kí rè, jíhɨ́r noò ɓe mwàm no rè? Wu wu ɗə̀ə̀ŋwá á sàmàìn nyàŋnjɔ̧̀ no kɨ́ ndɨŋ wu ɓàndɨ̀ sumí à? 5Ɨ́dù wu á ɓe ɗèìntóo, wu ɗúwa ɓàndɨ̀nɨ sum. Wu máréɓagɨ wu jábɨ́r kàm jíri só, ye Mèín ɓa túùmnɨ njù̧ noò ɓe ŋgwìn ɗɨ́ɗɨ̧́ nóò rɨ á. 6Ye kɨ́ ŋgə́ ɓa gòmnɨ nɨ̀vɨ́tè ɗóhîn ɓe nɨ́m nò kɨ́ ya ndɨŋndé á. 7Nùb du málɨ́ŋhánɨ ndɨ̧̀ɨ̧́ nyɔ̧né àm kwa mgbíí, dɨmɨɨr ɓe mè mɨ̀cɨ̧̀ɨ̧́, Mèín ɓa ŋgáb nànɨ nyòm dulɨ́ŋ ɓe ŋgə́ tɨ́k kɨ́ tɨ́ɨ́ á. 8Ɨ́dù nùb du ndɨ̀ŋnànɨ Mèín ŋgwé ɓáŋhɨ́nne, nùb du jə̀ŋnɨ àm àmɨɨr ɗàwáá ɓe nùb du mbɔ́klɨ́b nɨ́ɨ́b ɓáŋhɨ́bí, Mèín ɓa ŋgáb ŋgùnnɨ ɓe njù̧ á. 9Nùb lâs du ndɨ̀ŋnɨ ɓáŋhɨ́nne ɓa ɓábnɨ ɓe jábɨ́r ɨ́ yíìnɨ́m sumíì á, dùgɨ̀ Jwîf, dùgɨ̀ Jwîf sé. 10Nɨ́m mwi̧ nùb du ndɨ̀ŋnɨ nyɔ̧né, dùgɨ̀ Jwîf, dùgɨ̀ Jwîf sé, Mèín á nànɨ nùb kɨ́ mgbíí, dɨmɨɨr ɓe ju ɗóóŋ, 11ɓetí Mèín nɨ cànɨ nùb ŋgə́ ndɨŋna nɨ́ɨ́b kíì ca̧á̧ ɗàà.
12Nùb lâs du bɨ́ ndɨ̀ŋnɨ cum àm ŋgáb du bɨ́ ɓíì Mòyíìs ɗə̀ə̀ŋwáá, kwá kú u̧ ŋgáb ɓíì kɨ́ ɗə̀ə̀ŋwá. Ɨ́dù nùb lâs ndɨŋ cum u̧ kɨ́ ŋgáb ɗəəŋɓatɨ́ ɓíhì, Mèín kwá ŋgwin ŋgáb ɓe ɓíì kɨ́. 13Ɓetí nùb du bɨ́ Mèèín íhín ɗɨ́ɗɨ̧́ɨ̧́ nɨ nùb ókhó̧ɗóo ɓíì ó̧ne nɨ sé, du nɨ nùb jəŋ bɨ́ nɨ́m ɓíì kɨ́ ta ndɨ̀ŋte á. 14Nùb du bɨ́ Jwîf séé bɨ ɓíì Mòyíìs ɗə̀ə̀ŋwá. Ɨ́dù nùb kù mvókín ŋgábè noò á bɨ́ ndɨ̀ŋnɨ nɨ́m du ɗóògènɨ ɓe nɨ́m ɓíì Mòyíìs ta ndɨ̀ŋte. Nùb kɨ́ bɨ ɓe ɓíì ɗàà, ɨ́dù ŋgáb nɨ̀miib ɨ́ ducuɓa bɨ́ ɓíì ŋgábè ru. 15Ɓe ndɨ̧̀ɨ̧́ u̧nè kɨ́, ŋgáb túum bɨ ɨnayâna nɨ́m ɓíì ta ndɨ̀ŋte á nɨ́ ŋgábè njɔ̧̀ɔ̧ na á. Njɔ̧̀ ŋgábè á túùmɓwênɨ u̧, ɓetí njɔ̧̀ ŋgábè kɨ́, ɓwâ kù á ŋgáb yètɨ̀nɨ, ɓwâ kù cè a kàŋhȩ̀ ŋgáb. 16Nɨ́ɨ́b yoó nɨ̀vɨ́tɨ̀b ya ndɨŋndé kwá fó̧ laŋtɨ̧ɨ̧́ ye Mèín kwá na Yésù Krístù nyòm ŋgwin nɨ̀vɨ́tɨ̀b ɗóhîn ɓe Kìn Nyɔ̧ɔ̧́ mɨ du ɓéèniì.
Jwîf bɨ ɓe tùú ɓíhì
17Ɨ́dù wu nò ɨ́r du só Jwîf, wu á sə̀ŋnɨ gíí ɓe ɓíì, wu á cè ndɨ̀ŋnɨ mɨ̀tɔ̀k wu du nò Mèèín. 18Wu ɗəəŋtɨ́ nɨ́m Mèín ɗúré, ɓíì tɔɔnaceé wu càá nɨ́m du nyɔ̧né. 19Wu á tànɨ ní du nò ɗamɨ ɓùɓú̧bì á, ní dunakwa nùb du sɨ́mnɨ̀rí mwa á, 20wu á tàkwànɨ ní nò ɗə́ŋhɨ nùb kɨ̀cáàb ŋgwȩ́ȩ́ ɗàwáá á, ní tá tɔ̀hí mucutɨ́bí á, ɓetí wu á ɓe gíí ɨnayâna ɓíì kɨ́ no wu ɓa kwàɓànɨ ɗɨɨ́ŋ ɓe àmɨɨr á. 21Wu nò du nò tɔhɨ kùbè, wu duce wú wu nɨ̀mɨ́r tɔ̀ɔ̀cùwá àm níì? Wu nò du ɓéènɨ kùb yúk yɨ́re, wu ma yɨ́ce wú àm níì? 22Wu nò ta nɨ ɗúwa kùb ndɨ̀ŋ mààŋ, wu ma ndɨŋce wú àm níì? Wu nò du ɓə̀ndɨ̀nɨ mèín saaibi, wu lə́ce wú ɓo yó nɨ́ɨ́b yínɨ àm níì? 23Wu á ndɨ̀ŋnɨ mɨ̀tù àm wu du ɓe ɓíì Mòyíìs, ɨ́dù wu á jààŋkɨ́nɨ Mèín ɓetí wu wu ndɨ̀ŋnɨ nɨ́m ɓíì noò ta ndɨ̀ŋte ɗàà. 24Ɓetí káàtà Mèèín á wáàɓànɨ ɨnè: «Ɓe àm nyínè, nyí Jwîf bɨ, nùb du bɨ́ Jwîf séé á nyìŋɓáàŋnɨ ɓe ɨ́r Mèèín.»
25Wu ɨ́ ndɨ̀ŋ nɨ́m ɓíì ta ndɨ̀ŋte, lê ndɨ̀ɨ́ ɓa wu kpɔ́knɨ á, ɨ́dù wu ɨ́ dù wú ndɨ̀ŋwá nɨ́m ɓíì ta ndɨ̀ŋte, lê ndɨ̀ɨ́ wo kɨ́ du nɨ sam á. 26Nò ndɨ̀ lə́waá ɨ́ dù nɨ́ ndɨ̀ŋnɨ nɨ́m ɓíì ta ndɨ̀ŋte, Mèín tɨ̀ nɨ ŋgə́ áɓwêwá hȩ nò ndɨ̀ lȩ́ne à? 27Nò ndɨ̀ lə́waá ɨ́ dù nɨ́ ndɨ̀ŋnɨ nɨ́m ɓíì ta ndɨ̀ŋte, ŋgə́ ɨ́ ɓa ténnɨ àm wo sóò ru, wu nò du wú jə̀ŋnɨ ɓíì ɗàà u̧ kɨ́ wu á ɓe ɓíì Mòyíìs ŋgáré, wu á cè ndɨ̀ lȩ́ȩ rè. 28Ɓetí nɨ nɨ́m nɨ̀vɨ́tè du ndɨ̀ŋnɨ laŋtɨ̧né sé du túùmnɨ ŋgə́ Jwîf á, kɨ́ kù àm ŋgə́ lə́ ndɨ̀ɨ́. 29Jwîf mɨr fó̧ nɨ́ njɔ̧̀ɔ̧ á, ndɨ̀ ŋgéé á cè nɨ́ njɔ̧̀ɔ̧ lȩ́ȩ. Nyéhè Mèèín ɨ́ duce nɨ́ lénɨ ndɨ̀ kɨ́ ru, nɨ ɓíì Mòyíìs sé. Kúúŋ nùb u̧ kíì, nɨ nɨ̀vɨ́tɨ̀b sé ɨ́ du ŋgáb dɨ̀ɨ̀mnɨ, Mèín ɨ́ du nɨ́ ŋgáb dɨ̀ɨ̀mɓànɨ ru.
© 2007 Alliance Biblique du Cameroun, B.P. 1133, Cameroon