Oosana 9
9
Anutufa Nooana faqa moodaanaki kinau.
1Anutufa Nooana narí faiqi namu faqa nifaaqooqa qinoo qinau. Inni asumu moomoo kambiqafi aiqama maqa maaqa amana kai mariaqa. 2Aiqama aandauqa faqa ufiniuqa faqa noodaanna faqa inniara rufiaranaki mariaqa. Misa inni afeeka ameemaanai mariaqa. 3Innee maaqooqari sia andanda kai naaqa mi aandausa namu faqa naaqa. Innee naranara foora naaqeera nimidaqa.
4Innee moodaa ainaina kai sia naaqa, fidika amaqiki marinnana kai sia naaqa. Mifa marirana nimimarifa marinara sia naaqa. 5Faiqí moo fannoo faiqí faiqi fidika ruqiqainaqa qinee mina akiiqara ummaara amianauranoo. Aandau moo fannoo faiqí faiqi kuqa narinaqa qinee mi aandauna kuqa aruanaura. 6Anutufa faiqí faiqi narí fooqaasa auquqoonara yafee moona auqu qimasee kuqa arinnana akaqausa mina akiiqara narí arifaranoo.
7Innee moomoo faiqi maqasaifaqa aiqama maqa maaqaki amanaikammafi mariaqa.
8Anutufa Nooana faqa narí faiqi namu faqa kaifaa qimanniminoo qinau. 9Maqee qinee inni faqa innisaaqari kasooaqee kambiqainausa faqa moodaanaki kira ufa qidaqa. 10Aiqama ainaina ufiniuqa faqa aiqama aandauqa faqa ani faqa sipakiqari anusa faqa moodaanaki kianaura. 11Maa ufausannoo qinee moodaanaki kira ufa inni faqa qidaqa. Qinee kuqaa qima afeekaika qidaqa sia kaifaa nammari aufirafa faiqí faqa aiqama ainaina faqa naruannoo. Sia uqanna kafaa nammari aufirafa maa maqa maaqana mandaikiannoo.
12Qinee naaru marira moodaanaki kira ufa ani faqa aiqama aandauqa faqa doodaaniuqa faqa qunafa maaqi qimasee uqannifiqaanaura. 13Qinee qeeqa oondanda oonnamuki quqaanaura. Mifa qinee maa maqanasaaqaraasa faqa moodaanaki kirana uqannifiqaannoo. 14Yairee fee qinee oonnamunnai innaaruna itita saananoo miqoo oondanda kambiqaannoo. 15Oonnamuki oondanda rafeeqna finaqa qafeeqa qinee ani faqa aiqama aandau doodaani faqa qima afeekaikira ufara irisee sia kaifaa nammari aufirafa naruannoo. 16Oondanda oonnamuki rafeeqnainaqa qafamaseeqa naaruara qinee inni maqasaaqaraasa faqa naaru marira moodaanaki kira ufa qiafannanara irianaura.
17Minannai qinee aandauqa faqa doodaaniuqa faqa qima afeekaikiafanna ufana kooroo idaqa.
Nooana faqa narí faiqi namuara faqa qidanoo.
18Nooana faiqi namu sipakiqari anusa nuqu maaqimminoo marinau. Seemmafa faqa Qammafa faqa Yafeetafa faqa mariqau. Qammafa Kannaana akoofa marinau. 19Nooana mi faiqi qaaramoo namusa aiqama maa maqanasaaqaraasa nikeeku nikaaku mariqau.
20Nooafa afuqaki ainaini marufa marinau. Mifa indaaru oosana arasee afuqa auqusee uainna sanda moomoo ummaqinau. 21Mifa uainna aqama tatiseenoo moomoo neeneeseenoo furufara maseenoo narí qamunna raipaquseenoo narí uiqaana maqaki kaqi samu faiqanau. 22(Yafeetafa indaaruqaafa Seemafa mina aanaaqianaafa marinau Qammafa inaaqianaafa marinau.) Qammafa Kannaana akoofa maridanoo anireenoo narí akoofa kaqi samu faiqaqee ufanoo oonu qafeenoo narí akaqaafasaaqara naaramaseenoo qimanniminau. 23Seemafa faqa Yafeetafa faqa minara iriseeqa qaoo qimasee qamunna marasee moo fannoo dinni ati narí aururusaa quqasoofanoo moo fannoo dinni ati narí aururusaa quqaseeqara ninaaqianaindari uiqaana maaqaki keeqa fiqaqara nári nikoona afaaqa itita amaqaqau. Miqanda noori kaqinni quqasee nisauruanoo qimasee sia nári nikoona qafaqau.
24Nooafa kasooqaqee irirafa kambiqafufanoo narí inaaqianaa faiqi mifa auqoo ainainnara irinau. 25Iriseenooo maaqi qimasee aquraranau. Qinee ani amaaku Kannaanasaa aqurara ufa quqaanaura. Anee aneenna akaqaafasaauqa saika faiqi maria. 26Miqi qimaseenoo Nooafa quandafinoo Qammana akaqaafasaa qarara maaqi qinau.
Seemana Karaambaiqa Anutuna amooqirana amia.
Kannaafa Seemana ainainira faiqi mariannoo.
27Anutufa qinanoo Yafeetanakiqari moomoo kambiqafiqa mina faiqi namu Seemana faiqi namu faqa moodaanaki marifaranoo.
Miqiqa marifanoo Kannaafa Yafeetana ainainira faiqi mariannoo.
28Nammari aufirafa taikoofanoo miqooqari Nooafa 350 aukuana maraseenoo kuqinau. 29Mina aukuana aiqama moodaanaki 950 aukuana maraseenoo kuqinau.
Currently Selected:
Oosana 9: bjr
Označeno
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.