Oosana 41
41
Yooseefaafa Faraoona qaina oosana kooroou ufafa.
1Qaara aukuana aiqaroofanoo moo eendaki Isipa maqannaa karaambaiqa Faraoofa moo qaina maaqimmasee qafee fee qinau. 2Qinee Niru nammmari afainni kikiqiqa marida qafaunanoo qisauku dinni taikasee dinni ani qaara marasee 7 burimakau nifaaqa faqaasa urureeqa andanda nee mariafaqa qafeeqa. 3Neemarufaqa dinni qisauku taikasee dinni oonu qaara marasee 7 nimudaani aanaaqi nammarikiqari urureeqa indaaru qaasa naaqa nammari afainni kikiqamma fuafaqa qafeeqa. 4Nimudaani aanaaqiuqa nifaaqa faqaasa aiqama nambiqama saafaqa qafeeqa. Mi ainainausa qainasaa qafamaseenoo karaambaiqa Faraoofa tauti findifinau.
5Mifa kaifaa afuki qaunduarufanoo faifufanoo moo qaininau. Sakumma moodaa oosana saa dinni qisauku taikasee dinni oonu qaara marasee 7 iranoo marufa aiqama anoona qumbi qumbiqirafa marufanoo qafanau. 6Kafaa mina aanaaqianna moo qaina qafoofanoo dinni taikasee dinni ani qaaraqanda marasee 7 sakumma moodaa oosanasaa iranoo marinau. Anoona siaifa narana maaqina kinaafa mandaikirafa sia anoona marufa, ufai fannoo raudaqoo fara foora marufanoo fifau akee kai marinau. 7Anoona siai sakummafa quandaku fanoo anoona faqaa sakumma aiqama namasanau. Mi qainna maseenoo Faraoofa tauti findi fufanoo Boo moo qainammidaqee qinau.
8Mi kananaanna Faraoofa findi fufanoo moomoo irirana maroosia Isipa maqannaa irirana faqaasa faqa afunee fasiqauqa faqa naaranau. Naaramaseenoo narí qainuna qimannimufaqa sia moo fannoo amana mina oosana narí qimamiqau.
9Minara tutu qidaqa randee marufanoo Faraoona uainna tati maru fasiqafa Yooseefaanara iriseenoo Faraoona qimaminoo qinau. Oo karaambaiqa maqee kai qeeqa furufariafanna oosanna oonu mafi iriseeqa kooroommasee qimamidaqa. 10Ooqai anee aanoo qimaseenana qini faqa feemu suqee maruna faqa aneenna sundia rakisirana maaqaki quqaqisanau. 11Moo eendaki maaqanda qaina qiqiafana. Mi qaina qanda naadu naadu oosana faqaa qaina qiqau. 12Minakina Qeeburu maqannaa kumaaraa moo fannoo, sundia rakisirana Pootifaana ainainira faiqi marufa maasa faqa marinau. Maasa qeeqa qaina qimamiafananoo mifa mina oosana maasa qimaqiminau. 13Mifa qundee kaimminau. Anee qini saikaki kaifaa mara quqaqiseenana feemu suqee maruna d irinau.
14Faraoofa mi ufana iriseenoo niqiqoofaqa Yooseefaana karabusa kinaana aaqee uqanna afiqee aniqau. Mifa oosau suqaseenoo narí qamunna fuka afisumareenoo Faraoona afusaa aniranau.
15Aniroofanoo Faraoofa qimaminau. Qinee qainammasaunaqa sia moo fannoo mina oosana qimaqimia faqa iriqa. Anee qaina oosana kooroo qimarianafa mariannanara qimaqimiafaqa aaraidaqa.
16Miqi qufanoo Yooseefaafa qinau. Oo qini uriqararafa amiqirafa qinee qeeqa kai sia amanaikianauranoo. Anutufa kai qaina oosana qimannimirana qiminaqa qimamianaura.
17Miqi qimasoofanoo Faraoofa narí qaina oosana Yooseefaana maaqi qimasee qimaminau. Qainunnana qinee Niru nammari afainni kikiqiqa maridaqa qafeeqa. 18Qafaunanoo burimakau nifaaqa faqaasa dinni qisauku taikasee dinni oonu qaara marasee 7 nammarikiqari urureeqa andanda neemariafaqa niqafeeqa. 19Misa ninaaqianna miqi kaimmaseeqa dinni qisauku taikasee dinni oonu qaara marasee 7 misa nimana kai nimudaani aanaaqi urureeqa kikiqamma fuafaqa nindafeeqa. Miqira mandaikira burimakauqa sia ooqai Isipa maqa maaqaki mootinai mariafaqa qafeeqa. 20Nimudaani aanaaqi burimakauqa nifaaqa faqaasa namataikeea. 21Nambiqamaseeqa sia moo fannoo nifaaqa mareea, ooqai mariundee kai miqa mariafaqa qafeeqa. Nindafamaseeqa tauti findi fiqa.
22Qinee moo qaina faqa masee qafaunanoo dinni qisauku taikasee dinni oonu qaara maraseenoo 7 sakuma aiqama qumbi qumbiqirafa moodaa saqarisaa marifaqa qafeeqa. 23Mina aanaaqianna qafaunanoo kafaa moo sakuma saqarisaa dinni qisauku taikasee dinni oonu qaara maraseenoo 7 iranoo marifaqa qafeeqa. Mifa anoona siaifa ufai uqinoo rauda quqaqai fara foora marifaqa qafeeqa. 24Ira fifaqa qafaunanoo anoonna siaifa indaaru iraina anoona sakumma nambiqamasaafaqa qafeeqa. Qinee mi qainnana afunee fasiqauqa qima nimunaqa sia moo fannoo mina oosana qimaqimia.
25Yooseefaafa mina qaina ufa iriseenoo Faraoona qimaminoo qinau. Anee qainiannana oosana moodaara qaaraqanda qaina iananoo. Anutufa auqaaninna ainainnara qainasaa ani qimaminoo. 26Dinni qisauku taikasee dinni oonu qaara marasee 7 burimakau afaaqa faqaana qafaannana oosana dinni qisauku taikasee dinni oonu qaara marasee 7 aukuana qafaananoo. Sakumma dinni qisauku taikasee dinni oonu qaara marasee 7 sakuma anoona qumbi qumbiqirana faqa qafaanafa mifa faqa miqikai inoo dinni qisauku taikasee dinni oonu qaara marasee 7 aukuana maridanoo. Mi qaina qanda oosana moodaa maridanoo. 27Dinni qisauku taikasee dinni oonu qaara marasee 7 burimakau nimudaani aanaaqi nammariki ururaasa faqa dinni qisauku taikasee dinni oonu qaara marasee 7 sakuma anoona siaina qafaannana oosana 7 aukuanaki aandaroo firaafa mariannoo.
28Qinee qimamunandee kaimmiannoo. Anutufa narí auqaaninnanara ani uqafiqeenoo. 29Dinni qisauku taikasee dinni oonu qaara marasee 7 aukuanaki Isipa maqa maaqaki narana firaaqoo rairaa iannoo. 30Mina aanaaqianna kafaa miqi kai inoo dinni qisauku taikasee dinni oonu qaara marasee 7 aukuana aandaroo naruannoo. Mi aandaroonaki mi rairaaira narannara qaunifaranoo. Aandaroo fannoo maqa maaqa mandaika uqanna masaannoo. 31Mi aandaroo aukuannai faiqí anaasee doo rairaaira aukuanara qaunu uqannaseefaranoo. Aandaroo firaafa mandaika uqanna irafa marianinnanara miqifaranoo. 32Anee kaifaa kaifaa qainiannana oosana Anutufa mi ainainna kasooaqee kuqaa miqiannoo.
33Minara anee aneenna maqannaasakina moo qafamaseenana irirana faqaa fasiqa mara quqasainanoo mifa Isipa maqa maaqasaa rakisiani. 34Anee akaqa rakisirausa quqasainaqa moodaannai qisauku taikasee dinni oonu qaara marasee 7 rairaaira aukuanakina oosana oosana narana moodaannai qisauku namu kinaana moodaa moodaa mara afeediaqa. 35Anee qimanniminaqa aiqama narana rairaaira aukuanakinaana suqu quqaaqa. Anee afeeka ufa nimisainaqa narana maqusa maqusaki suqu quqasee minasaa rakisiaqa. 36Mi narannafa dinni qisauku taikasee dinni oonu qaara marasee 7 aukuana aandaroo firaafa anianinnanaki mi afeediranakinaana neefaranoo. Miqidaqa sia faiqí anaasee kuqifaranoo.
Yooseefaafa Isipa maqannaasa uriqararafaikinau.
37Faraoofa faqa narí uriqararausa faqa Yooseefaana iriranara eedoo qiqau. 38Miqi qimaseenoo Faraoofa qimanniminoo qinau. Maasa sia amana moo fasiqa Yooseefaana uraaqararana paqurianaura, Anutuna maraquna minaki marifa marinara saifanoo mifa kai mariani.
39Miqi qimaseenoo Faraoofa Yooseefaana qimaminoo qinau. Anutufa kai maa aiqama ainainna ani uqafiqeenoo. Anee aiqamausa urinnaaqara masee firaa irirana faqaafa akooqoo mariananoo. 40Qinee ani quqasaanana qini maqa maaqasaa rakisinnaranoo. Aiqama qini faiqí anaasee ani ufa mau kai fifaranoo. Ani afeeka fannoo qini afeeka ameemaanai mariannoo.
41Miqi qimaseenoo Faraoofa kafaa Yooseefaana qimaminau. Qinee maqee ani mareeqee Isipa maqannaasa uriqararafai kammiqa. 42Miqi qimaseenoo Faraoofa narí asauku amukakinaa rinna firaa uriqararausa rinna maruna raduku Yooseefaana asaukuki quqanau. (Yooseefaafa mi rinnanannai peennakina raaraa maseenoo papiqasaa atooqasoofaqa maaqanna maaqanna mina qafeeqa Faraoona rinna akara fee qimaseeqa kaaqa rufieeqa mi papiqana saaqaraa ufara eedoo kai qimariqau.) Faraoofa amiqira qamunna afisu amaqaseenoo koorannai auqira kukukakana faqa rufu amaqanau.
43Miqimmasoofanoo Faraoofa uriqararausa nifiqanoo nu qoosa karana Faraoofa Yooseefaana amisoofanoo minasaa rakisira sundiauqa mina afunni fidaqa maaqi qimasee faaqaridaqa qiqau. Amaaraaqa amaaraaqa. Mi oosannanannai Yooseefaana aiqama Isipa maqannaasa uriqararanaikinau. 44Faraoofa kafaa Yooseefaana maaqi qimasee qimaminau. Qinee uriqararausa Faraoosa qimamidaqa. Sia amana Isipa maqannaa fasiqa moo fannoo narí aidiranannai moo ainaina auqaannoo. Mifa anisaa naaree iraannoo. 45Miqi qimaseenoo Faraoofa Yooseefaana fuka auqu reenoo Safeenata Paneeanee qinau. Miqi qimasee mifa Yooseefaana anaasee aminau. Mi anaaseena auqu Aseenata nammarifa Pootifeerana araamuna marinau. Pootifeerafa Qeerioopoorisa maqusanaasa suani afuara innaaru qimarusa aanaiqikirafa marinau.
46Yooseefaafa moodaa fasiqa faqa moo fasiqa asaukuqara taikasee 30 aukuana marasee Faraoona ainainirana oosana aranau. Oosana araseenoo Faraoona aiseenoo Isipi maqa maaqaki oonuree aniree idanoo aiqama atinai nimarinau. 47Qisauku dinni taikasee dinni ani qaara marasee aukuanaki Isipa maqa maaqaki narana moomoo kambiqafi rairaa inau. 48Mi aukuanna namunakinaa narana irairaa una Yooseefaafa mareeqeenoo maqusakiaqa afeedinau. Mi moodaa moodaa maqusanaki mi maqusana fiqu fiquinoo maru maqanakinaa naranna marasee mi maqusanaki afeedinau. 49Mi naranausa unakiisoofanoo ooruku nammari afaiqaraa nukudara foora moomoo uqanna marufanoo Yooseefaafa asaana rusia minnisanau.
50Aandaroo aukuana sia ani marufanoo Yooseefaana anaaqa Aseenata nammarifa akoonaiqi qaara qanda maqanau. 51Maqasoofanoo Yooseefaafa qinau. Anutufa qini dadaaqifaqa qeeqa aupurarana faqa qeeqa qikoona atiara iriranara faqa auniqa. Miqi qimaseenoo mifa narí indaaruqaa faiqi auqureenoo Mannasee nee qinau. 52Kafaa Yooseefaafa akoonaiqi moo maqaseenoo qinau. Anutufa maa maqa maaqanaki qinee aupurarana maree marunnanaki faiqi qiminoo. Miqi qimaseenoo mifa narí inaaqiannaa faiqi auqureenoo Eefaraimmanee qinau. 53Qisauku dinni taikasee dinni oonu qaara marasee 7 aukuanaki narana irairaa imarufaqa Isipa maqannaasa asasiufa taikanau. 54Yooseefaafa undee kai inoo qisauku dinni taikasee dinni oonu qaara marasee irairaa ira aukuana aiqaroofanoo aandaroo kambiqanau. Aiqama maqa maaqaki aandaroo narinau. Isipa maqa maaqaki kai narana kaqi marinau. 55Mariufanoo Isipa maqa maaqaki faqa aandaroo narufaqa faiqí anaasee Faraoo funnai oonuree naranara faaqarida innaaru qufanoo mifa qinau. Innee Yooseefaa finnai oonu raifanoo mifa innandee innandee kai iaqa. 56Aandaroo firaafa Isipa maqa maaqaki aiqama atinai firaaqoo narufanoo Yooseefaafa aiqama afeedira maqauqa atuqasoofaqa Isipa maqannaasa narana feefauri mariqau. 57Aiqama maqa maaqaki maru fasiqa aanaaseesa aandaroo firaafa naru faqa aiqama atinaindari narana feefaurirara Yooseefaa funnai Isipa maqa maaqaki aniqau.
Currently Selected:
Oosana 41: bjr
Označeno
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.