Simuluho 9
9
Bulikani bwa Mulimu ni Nuwe
1 #
Sim 1.28
Mulimu a tohonolofaza Nuwe ni bana ba hae, mi a ba bulelela, a li, “Mu be ni bana ba bañata, kuli masika a mina a be kai ni kai mwa lifasi. 2Lifolofolo kaufela za fafasi, hamoho ni linyunywani, ni libupiwa kaufela ze zamaya ka mba, ni litapi, li ta mi saba. Kaufel'a zona li mwatas'a mina. 3Mu ce lifolofolo kaufela, hamohocwalo ni miloho. Zeo kamukana, ki zona lico za mina ze ni mi fa. 4#Malivi 7.26-27; 17.10-14; 19.26; Mul 12.16; 23; 15.23 Kono ku na ni nto i liñwi ye mu sa lukeli ku ca. Ki nama ye sa na ni mali, kakuli ki mwa mali mo ku na ni bupilo. 5Haiba mutu a bulaya mutu yo muñwi, mutu yo ni ka mu atulela lifu. Ni ta bulaya folofolo ifi ni ifi ye ka mi bulaya, mi ni ta fa mulatu ku mutu ufi ni ufi ya ka bulaya mwanahabo. 6#Sim 1.26; Mut 20.13 Ya bulaya mutu kaufela ni yena u ta bulaiwa ki wahabo, kakuli mutu n'a ezizwe ka siswaniso sa Mulimu.
7 #
Sim 1.28
“Cwale mu be ni bana ba bañata, kuli baikulu ba mina ba be ba bañata mi ba pile kai ni kai mwa lifasi.”
8Mi Mulimu a li ku Nuwe ni kwa bana ba bae, 9“Utwa! Cwale ni iswala bulikani ni mina ni bana ba bana ba mina. 10Mi ni iswala bulikani hamohocwalo ni ze pila kaufela ze ne li inzi ni mina, ili linyunywani, limunanu, ni lifolofolo ze ne li zwile kaufela mwa sisepe. 11Ni iswala bulikani ni mina ka manzwi a. Ni sepisa kuli ha ni sa tola ni sinya hape ze pila kaufela ka muunda. Ha u sa na ku ba teñi o ta sinya lifasi.” 12Mi Mulimu a ekeza, a li, “Sisupo sa bulikani bo bu si na ku fela, bo ni iswala ni mina ni lifolofolo ze pila kamukana, ki se. 13Ni beya nambwamutalati wa ka mwa malu. U ta ba sisupo sa bulikani bwa ka ni lifasi. 14Ka nako ni nako malu a ka kwahela lifasi, mi kwa bonahala nambwamutalati ku ona. 15Ka linako zeo ni ta hupula se ni mi sepisize, mina ni lifolofolo kaufela, kuli muunda ha u sa na ku ba teñi o ka bulaya ze pila kamukana. 16Nambwamutalati h'a ta bonahala mwa malu, ni ta mu bona, mi ni ta hupula bulikani bo bu sa feli, bo ni isweli ni ze pila kaufela mwa lifasi.” 17Mi Mulimu a li ku Nuwe, “Se, ki sisupo sa sepiso ye ni eza ku ze pila mwa lifasi kamukana.”
Nuwe ni bana ba hae
18Bana ba Nuwe ba ba zwile mwa sisepe ne li bo Sema, Kama ni Jafeta. Kama ki yena ndat'ahe Kanana. 19Batu ba balalu ba, ki bona bana ba Nuwe mi ki ku bona fo ku simuluhile batu ba ba talize lifasi kaufela.
20Nuwe n'e li mulimi, mi ki yena mutu wa pili wa ku cala simu ya likota za veine. 21Ha s'a nwile waine, a kolwa, a tubula liapalo za hae kamukana, mi a lobala situtu mwa tende ya hae. 22Cwale Kama, ndat'ahe Kanana, h'a bona kuli ndat'ahe u inzi mapunu, a ya mi a y'o bulelela banabahabo ba babeli. 23Bo Sema ni Jafeta kiha ba nga kubo, ba ikwahela yona fa maheta mi ba y'o apesa ndat'a bona. Ne ba nze ba fulalezi hona cwalo kuli ba si ke ba mu bona a li mapunu. 24Nuwe ha s'a zwile mwa mandingwe a waine, a lemuha s'a mu ezize mwan'a hae wa ñomba. 25A li,
“Ku kutiwe Kanana.
U ta ba mutanga wa banabahabo.”
26Mi hape a li,
“Ku lumbekwe Muñ'a Bupilo,
Mulimu wa Sema.
Mi haili Kanana,
yena a be mutang'a hae.
27Mulimu a atise Jafeta
mi lusika lwa hae lu pile ni batu
ba Sema.
Kanana, yena a be mutang'a hae.”
28Nuwe a pila lilimo ze mianda ye milalu ni mashumi a ketalizoho mwamulaho a muunda. 29Cwale a shwa a na ni lilimo ze mianda ye supile ka ye mibeli ni mashumi a ketalizoho.
Currently Selected:
Simuluho 9: Lozi09
Označeno
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.