Simuluho 7
7
Muunda o mutuna
1Muñ'a Bupilo a li ku Nuwe, “Kena mwa sisepe, wena ni lubasi lwa hao kaufela. Ni fumani kuli ki wena feela mwa batu kamukana ya lumelezwi ki na. 2Kwa lifolofolo kamukana ze kenile, u nge ze supile za banna ni ze supile za basali. Kwa lifolofolo ze si ka kena, u nge ka bubeli, ye tunanyana ni ye sihali. 3Ni kwa linyunwani u nge ze supile ze tunanyana ni ze sihali. Buluka cwalo mifuta kaufela ya lifolofolo ni linyunywani kuli li pile, mi li te li y'o zwala hape mwa lifasi. 4Ku siyezi feela mazazi a supile kuli ni tise pula ye ka t'o nela mazazi a mashumi a mane ni masihu a teñi, ili kuli ni sinye ze pila kamukana ze ni ezize.” 5Cwale Nuwe a eza lika kaufela z'a n'a mu laezi Muñ'a Bupilo.
6Muunda ha u tibisa lifasi, Nuwe n'a na ni lilimo ze mianda ye silezi. 7#Mat 24.38-39; Luk 17.27 Yena ni musal'a hae hamoho ni bana ni basali ba bona, ba kena mwa sisepe ku sabela mwateñi muunda. 8Ya poho ni ye sihali mwa mifuta kaufela ya lifolofolo ze ciwa, ni ze sa ciwi, linyunywani, ni libupiwa kaufela ze zamaya ka mba za kena mwa sisepe. 9Ka bubeli ye tunanyana ni ye sihali za kena mwa sisepe ni Nuwe, sina mw'a n'a laelezi Mulimu. 10Mwamulaho a mazazi a supile, muunda wa ba teñi mwa lifasi.
11 #
2 Pit 3.6
Mwa kweli ya bubeli ha se i na ni mazazi a lishumi ni a supile, Nuwe ha s'a na ni lilimo ze mianda ye silezi, mawelu-welu kamukana a mawate a matuna a kwatas'a lifasi a punyeha, ni masuba kaufela a kwahalimu a sulula mezi. 12Mi pula ya nela mazazi a mashumi a mane ni masihu a teñi cwalo. 13Ka lona lizazi leo, Nuwe ni musal'a hae ni bana ba hae ba balalu, bo Sema, Kama ni Jafeta, ni basali ba bona, ba longana mwa sisepe. 14Ba longana hamohocwalo ni mishobo kamukana ya lifolofolo za mwa naheñi ni ze pila kwa batu, libupiwa kaufela ze zamaya ka mba, ni mifuta ya linyunywani kamukana. 15Ku ze pila kaufela kwa ngiwa ye sihali ni ye tunanyana, mi za kena mwa sisepe ni Nuwe. 16Ka bubeli cwalo, ili za sinna ni ze sihali, za kena sina mw'a n'a laelezi Mulimu. Mi Nuwe ha s'a keni, Muñ'a Bupilo a kwala sikwalo.
17Mwa mazazi a mashumi a mane muunda wa ekezeha, mezi a ba a mañata, mane sisepe sa cimbauka. 18Buliba ha bu nze bu ekezeha, ni sona sisepe si nze si cimbauka. 19Kwa tunga hahulu mane kwa tiba ni malundu a matelele kaufela. 20Fahalimw'a malundu a matelele mezi a ekezeha ka butelele bwa mapeka a lishumi ku zwa fa lingo za malundu. 21Ze pila fafasi kamukana za shwa: linyunywani, lifolofolo ni libupiwa ze zamaya ka mba kaufela hamoho ni batu cwalo. 22Ze pila fafasi kaufela za shwa. 23Muñ'a Bupilo a felisa ze pila mwa lifasi kamukana, ku kopanyeleza ni batu, lifolofolo ni libupiwa ze zamaya ka mba, ni linyunywani cwalo. Ba ba si ka shwa feela ki Nuwe ni b'a n'a keni ni bona mwa sisepe. 24Mezi a ekezeha cwalo fafasi ka mazazi a mwanda ni mazazi a mashumi a ketalizoho.
Currently Selected:
Simuluho 7: Lozi09
Označeno
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.