मत्ती 19
19
तलाक देणे बारे यीशु शिक्षा
मरकुस 10:1-12
1जपल यीशु ई सोब शिक्षा दी गा त गलील राज्य केआं घेई गा; होर यरदन दरेउ केआं पार यहूदिया राज्य अन्तर आ। 2त सुआ हुसुड़ा तसे पता एई गा, त तेन सुआ जेईं के बीमारी सुसुरेरी।
3तपल फरीसी तस परखुण जे तसे भेएड़ एई कइ बोलुण लगे, “गुरुजी! केसे बि बोकी बझई जोई अपु जुएली छुटिबा करण ठीक असु ना?” 4यीशु जवाब दिता, “तुसी धरमे कताब अन्तर नेईं ना पढ़ो कि शुरुवात अन्तर जपल परमेश्वर से बड़ाए,#शुरुवात 1:27 तेन मड़द त जिल्हाणु बड़ाई कइ बोलु,
5‘इस बझई जोई मड़द अपु ईया बोउ केआं बखी कइ
अपु जुएली जोई साते बिश्ता त
से दुहे यक भोई घेन्ते’#शुरुवात 2:24?
6त से अब दुई नेईं, बल्कि यक भोई गो असे। तोउं त, जे परमेश्वरे जोड़ो असे, तेन्हि मेह्णु बखरे न करे।” 7तेन्हि तेस केआं पुछु, “त फिर मूसे किस बोलो असु कि लिख तुखि कइ छड़ देण?”#मत्ती 5:31; विधि 24:1-4 8तेन तेन्हि जे बोलु, “मूसे तुं नकठर मने बझई जुए अपु अपु जुएली छड़ देण जे बोलु, पर शुरु केईआं ईं न थिउ। 9अउं तुसी जे बोता, जे कोउं ‘नाजायज रिश्ता रखण’ छड़ दी कइ होर केसे बझई जोई बि अपु जुएली छड़ दी कइ, होरी जुएली रखता, से नाजायज रिश्ता रखता। होर जे कोउं छुटिबा भुओ तेस जिल्हाणु जोई ब्याह कता, से बि नाजायज रिश्ता रखता।”#मत्ती 5:32 10चेली यीशु जे बोलु, “ए गुरु अगर मड़दे जिल्हाणु जोई ईं रिश्ता असा, त ब्याह न करण ठीक नेईं ना?” 11तेन तेन्हि जे बोलु, “सोब जेईं कुवांरे ना बिश सकते। पर सद सेईंए जेन्के धे परमेश्वरे वर दुतो असा। 12किस कि केहि नामड़द असे, जे ईये पेटेरी ईं भुन्ते। होर केहि नामड़द असे, जे मेह्णु बणो असे। पर होर केहि केहि असे, जे स्वर्ग राज्ये कमे बझई जोई ब्याह न कते। त जे ई बोक मान सकता, तस मनुण चहिए।”
यीशु गभुर अशुश देण
मरकुस 10:13-16; लूका 18:15-17
13तोउं मेह्णु यीशु केईं गभुर घिन आए कि से तेन्के मगिर पुठ हथ रख कइ प्रार्थना करियाल, पर तसे चेले तेन्हि जे लेहरी गे। 14यीशु बोलु, “गभुर मोउं केईं एण दिए। अन्हि रोके नउ, किस कि स्वर्गे राज्य इन्हि गभुर के ईं मेह्णु के भो।” 15त तेन तेन्के मगिर पुठ हथ रख कइ अशुश दिती त तठिआ घेई गा।
अमीर मेह्णु त अमर जीवन
मरकुस 10:17-31; लूका 18:18-30
16यक मेह्णु यीशु भेएड़ आ त तेस जे बोलु, “ए गुरु! मोउं कोउं से खरे कम करुण कि मोउं अमर जीवन मेईंयाल?” 17यीशु तेस जे बोलु, “तु मोउं केआं खराई बारे किस पुछता? खरु त यके असु। पर अगर तु अमर जीवन पाण चहन्ता, त निआंग#19:17 इठि “निआंग” मतलब “मूसा केईआं परमेश्वरे दुतो दस निआंग” भो। मनीण दे।” 18तेन मेह्णु तेस केईआं पुछु, “कोउं निआंग?” यीशु बोलु, “ईं कि
कोउं मारण नउ,
नाजायज रिश्ता न रखण,
चोरुण नउ त
झुठी उगाही न देण;
19अपु ईये बोउए इज्जत करीण,#निसुणे 20:12-16
होर अपु भेयाड़ी जुए अपु ईं परेम करण।”#पुजारोठि 19:18
20तेन मेह्णु तेस जे बोलु, “ए सोब त अउं पेहलाई केआं मान कइ जीण लगो असा; अब मोउं अन्तर केस बोकी कमी असी?” 21यीशु तेस जे बोलु, “किस कि तु सिद्ध पुरुष बणुण चहन्ता, त गा अपु सोब बेच कइ गरीबी कें धे बांट छड़, होर में पता आई। तोउं, तोउ स्वर्ग अन्तर धन मेता।” 22पर से मेह्णु ई बोक शुण कइ उदास भोई गा त तठिआ घेई गा, किस कि से सुआ अमीर थिआ।
23तोउं यीशु अपु चेली जे बोलु, “अउं तुसी जे बोता कि अमीर मेह्णु के स्वर्गे राज्य अन्तर घेण सुआ औखु असु। 24अउं त बोता कि अमीर मेह्णु के परमेश्वरे राज्य अन्तर घेण ईं औखु असु, जीं ऊंटे स्नाणि छिने बइ निशरुण।” 25ईं शुण कइ चेले हैरान भोई गे त बोलु, “त फि कोउं बच सकता?” 26यीशु तेन्के धे हेर कइ बोलु, “मेह्णु केईआं त ई न भोई सकतु, पर परमेश्वर केईआं सोब कुछ भोई सकतु।” 27ई शुण कइ पतरसे बोलु, “हेर! अस त सोब कुछ छड़ दी कइ तें पतोती ओ असे। त असी की मेतु?” 28यीशु तेन्हि जे बोलु, “अउं तुसी जे बोता कि जपल पूरी सृष्टि दुबारी नोई बणती, होर जपल मनखे कुआ अपु महिमा सिंहासन पुठ बिश्ता, त तुस बि जे में पता अओ असे, बाराह सिंहासन पुठ बिश कइ इस्राएले बाराह ऊड़ी के न्याय कते।#मत्ती 25:31; लूका 22:30 29होर जेन केनि अपु गी, भाई भेण, ई बोउ, गभुरु-छिएड़ु त बग-बघुई में नओएं लिए छड़ दुतो असे, तस परमेश्वर सौ गुणा देन्ता, त अमर जीवन देन्ता। 30पर सुआ जेईं जे अगर असे, से पतूं भोई घेन्ते, त जे पतूं असे, से अगर भोई घेन्ते।”#मत्ती 20:16; लूका 13:30
Trenutno izbrano:
मत्ती 19: pgg
Označeno
Deli
Primerjaj
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2023 (Active) Wycliffe Bible Translators, Inc. All rights reserved.