Англунимос 25
25
Лэ Авраамоско жувимос тай лэско мэримос
1О Авраамо ля пэсти авря ромня, савя акхарэнас Хетура. 2Латар лэстэ аракхадилэ о Зимрано, о Йокшано, о Медано, о Мидьяно, о Ишбако тай о Шуахо. 3О Йокшано сас о дад лэ Шэваско тай лэ Деданоско. Э бэяцэ лэ Деданостерэ сас э ашурея, летушэя тай э леумея. 4Э шавэ лэ Мидьяностерэ сас о Эфа, о Эферо, о Ханохо, о Авида тай о Элдага. Саворэ вонэ сас бэяцэ ла Хетурати.
5О Авраамо ашадя ся, со сас лэстэ, лэ Исаакости. 6Ай лэ шавэнди лэ копэльницэндар-ромняндар, савэ сас кай о Авраамо, вов, сар сас инке жундо, дя подаркуря тай отбишалдя лэн пэстерэ шавэстар лэ Исаакостар по востоко, андэ восточно пхув.
7О Авраамо прожудя 175 бэрша. 8Вов атшадя пэстар о духо и муля андэ пэстерэ барэ бэрша, сас чяло лэ жувимастар и жылятар кай пэстерэ мулэ папуря. 9Лэстерэ шавэ о Исаако тай о Измаило прахосардэ лэс андэ пещера Махпела катар о Мамрэ, пэ мал лэ хетеёстери лэ Эфроностери, саво сас шаво лэ Цохароско. 10Кадыя мал о Авраамо тиндя кай э хетея. Котэ о Авраамо сас прахомэ катар пэстери ромни Сарра. 11Кала Авраамо муля, о Дэл бахталисардя лэстерэ шавэс лэ Исаакос. О Исаако жувэлас катар о Бээр-Лахай-Рои.
Лэ Измаилостерэ шавэ
12Акэ э дума пала Измаило, шаво лэ Авраамоско, савэс андя лэ Авраамости э Агарь египтянка, ла Саррати копэльница, тай пала лэстерэ потомкуря. 13Акэ лэ Измаилостерэ шавэнди алава, сар вонэ аракхадилэ екх пала екхэстэ: о Невайото, англуно шаво лэ Измаилоско, о Кедаро, о Адбеэло, о Мивсаимо, 14о Мишма, о Дума, о Маса, 15о Хададо, о Тема, о Етуро, о Нафишо тай о Кедма. 16Када алава лэ Измаилостерэ шавэнго, дэшудуй барэдэра, лэнди породуря, гава тай таборуря.
17О Измаило прожудя 137 бэрша. Вов атшадя пэстар о духо и муля, и жылятар кай пэстерэ мулэ папуря. 18Лэстерэ бэяцэ жувэнас пэ тхана пай пхув, сави цырдэласпэ ла Хавилатар жы каринг о Шуро, паша лэ египтоско бряго, па дром каринг о Ашуро. И вонэ жувэнас андэ холи саворэнца пэстерэ пхралэнца.
Э шавэ лэ Исаакости о Яково тай о Исаво
19Акэ э дума пала Исаако, шаво лэ Авраамоско, тай пала лэстерэ потомкуря.
Кай о Авраамо аркхадиля о Исаако. 20Лэ Исаакости сас саранда бэрша, кала вов ля ла Ревэка, лэ арамеёстеря лэ Бетуилостеря щя. Вов сас катар э пхув Падан-Арамо. Вой сас лэ арамеёстеря лэ Лаваностеря пхья.
21О Исаако мангэласпэ лэ РАЕСТИ пала пэстери ромни, пала кода со латэ на сас бэяцэ. О РАЙ ля сама пэ лэско мангимос, тай лэсти ромни э Ревэка ашыля пхари. 22Э бэяцэ латэ андо йило линэ тэ марэн екх екхэс. Э Ревэка пхэндя:
— Пала со када манди?
Вой жыля тэ пушэл лэ РАЕСТАР. 23О РАЙ пхэндя лати:
— Андэ теро йило исы дуй породуря,
тутар авэна и росжанапэ дуй народуря.
Екх народо авэла майзорало аврэстар,
тай о барэдэр пхрал авэла копэли кай о цыкно пхрал.
24Кала авиля лати э время тэ анэл бэятонэн, андэ лако йило чячес сас дуй шаворэ-близнецуря. 25О англуно аракхадиля лоло, тай ся лэстери тила сас ушаради андэ балэндэ, сар пислатери йида. Пала кода динэ лэсти алав Исаво. 26Тунче сыкадиля лэско пхрал, саво ритярдёласпэ лэ вастэса пала пэрно лэ Исавоско, пала кода динэ лэсти алав Яково#25.26 Анда пхур. евр. шыб алав «Яков» ашунэлпэ сар «акев» (пэрно).. Лэ Исаакости сас шовдэша бэрша, кала э Ревэка андя лэн.
О Исаво битинэл пэско англуно аракхадилимос
27Кала э бэяцэ вибариле, о Исаво тердяпэ лашо астаримари, малянго мануш, ай о Яково сас мануш ковло, саво жувэлас андэ катунэ. 28Лэ Исаакости фартэ чялёлас тэ хал тадо дыко мас, тай вов будэр камэлас лэ Исавос, ай э Ревэка будэр камэлас лэ Яковос.
29Екхвар, кала о Яково тавэлас хамос, о Исаво авиля ла малятар фартэ бокхало. 30Вов пхэндя лэ Яковости:
— Майито, дэ манди найбут тэ хав кода лоло хамос, саво ту тавэс! Мэ мэрав бокхатар!
Акэ состар лэсти инке динэ алав Эдомо#25.30 Анда пхур. евр. шыб алав «Эдом» ашунэлпэ сар алав «адом» (лоло)..
31О Яково пхэндя:
— Данглал битин манди теро англуно тхан#25.31 Англуно тхан — када тхан лэ майпхурэс шавэс (саво аракхадиляпэ англуно) андэ ери. Вов сас майбаро машкар пхрала и лэсти дэласпэ майбаро котор андай дадэско хулаимос..
32— Мэ мэрав бокхатар, — пхэндя о Исаво. — Со манди кодылэ англунэ тханэстар?
33О Яково пхэндя:
— Данглал солаха.
Вов солахая тай кадя битиндя пэско англунимос лэ Яковости.
34Тунче о Яково дя лэ Исавости марно тай чечевично хамос. Вов халя, пиля, ущиля и жылятар. Кадя о Исаво тходя андо нисо пэско англунимос.
Trenutno izbrano:
Англунимос 25: СРБ
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/