2 कुरन्थीयो 9
9
परमेसर का भगता ताँई दान
1परमेसर का मिनखा ताँई जोक्यु दान देबा क बारां म थे सोच्या हो बिकै बारां म मनै ओर बेत्ती मांडबा की जुर्त कोनी। 2क्युं क मनै बेरो ह थे इ कामनै करबा ताँई सदाई त्यार रेह्ओ हो। जणाई म मकीदुनिया का मिनखा क सामै थारै बारां म गुमानऊँ खयो क अखाया का मिनख तो गेलड़ा बरसऊँई त्यार हीं अर थारी उजमानै देखर बोळा अंय्यां करबा ताँई आगै आया हीं। 3जणा मेरै सागैहाळा बिस्वासी भाईड़ानै थारै कनै भेजर्यो हूँ, जिऊँ थार प जखो गुमान म्हें करां हां बि ताँई म्हानै निचो नइ देखणो पड़ै। इ ताँई जंय्यां म खयो हूँ बंय्यांई थे त्यार रेह्ओ। 4क्युं क काँई बेरो कदै मेरै सागै मकीदुनिया नगरी का मिनख थारै कनै आज्या अर जखो थारा बारां म बानै बतायो गयो हो, बंय्यां नइ देखै जणा म्हारूँ बेत्ती थानै सरमिंदा होणो पड़सी। 5इ ताँई म मेरा आबाऊँ पेली मेरै सागैहाळा बिस्वासी भाईड़ानै थारै कनै जाबा ताँई मनायो जिऊँ बे, जखो खुला हियाऊँ बडो दान थे देबा ताँई जबान करी ही बिनै भेळो कर त्यार राखै। अंय्यां करबो इ बातनै दिखासी क थे थारी इंछ्याऊँ दिआ हो नइ क थे देबा ताँई पाबंद हा।
6पण थे याद राखो जखो थोड़ो बोवै ह बो थोड़ो अर जखो बोळो बोवै ह बो बोळो काटसी। 7हर कोई बत्तोई दान दे जत्तो बो देबा की मन म करी ह। नइ बेमनऊँ अर नइ कोई क दबाव म आर, क्युं क परमेसर राजी हियाऊँ देबाळाऊँ परेम करै ह। 8अर परमेसर थारी सगळी जुर्तानै पूरी करसी। जिऊँ भला काम करबा ताँई थारै कनै थारी जुर्तऊँ बेसी होसी। 9जंय्यां सास्तर म मांडेड़ो ह,
“बो खुला हियाऊँ गरीबानै देवै ह,
बिकी भलाई सदाई बणी रेह्सी।”
10परमेसर बोवणियानै बीज, अर खाबा ताँई रोटी देवै ह। बोई थारी जुर्त पूरी करसी अर थारी धारमिक्ता की फसलनै बढासी। 11थानै हर ढाळ भर्योपूरो कर्यो जासी जिऊँ हर मोका प थे खुला हियाऊँ हात बढाबाळा बणो। अर जद म्हें थारा दियड़ा दानऊँ ओरा क आडा आस्यां जणा बे परमेसरनै धनेवाद देसी।
12क्युं क इ सेवा की बजेऊँ परमेसर का मिनखा की जुर्तई पूरी कोनी होवै पण मिनख परमेसरनै धनेवाद बी देवीं हीं। 13थारी इ सेवा की बजेऊँ बे परमेसरनै मेमा देसी। क्युं क बा ताँई अर सगळा बिस्वासी ताँई थारो खुला हियाऊँ दान करबो ओ साबित करै ह क थे मसी का चोखा समचार प चालबाळा हो। 14परमेसर थानै जखो हियो दिओ ह बिकी बजेऊँ बे थारै ताँई मन लगार अरदास करसी अर बे थानै आपकै हिया म बसासी। 15बि बरदान#9:15 बि बरदान ओ बरदान परमेसर को बेटो ईसु मसी ह। ताँई परमेसर को धनेवाद जिको बखान कोनी कर्यो जा सकै।
Trenutno izbrano:
2 कुरन्थीयो 9: एस डब्लु वी
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
(c) 2010-2017, New Life Computer Institute. All rights reserved