Zɛ́kɔ̀wáɖádyà 5
5
Dyí-tɛ̀mɛ̀ìn-ɖɛ̀ ɓá céè-ɖɛ̀ páɖá-páɖá ɓɛ́ ɔ nì wãuń wɛ̃ɛ jè dyíɛ
1Sɔ̀ìn ɓóɛ gboɛɛ, ḿ ɖú ma dyéɖé dyií ɖe, ké ḿ dyé ma céè-ɖɛ̀ páɖá-páɖá ɓɛ́ ɔ nì wãuń wɛ̃. 2Ké ínjàɔ̀ diè ma ḿ dyi ɖe, ké ɔ ɖá, “Ɖɛ́ nìà kɛ́?”
Ké ḿ jǔ ma ɔ gɔ̃̌, ké ḿ ɖá, “Ɔ mɔ̀ céè-ɖɛ̀ páɖá-páɖá, ké ɔ nì wãuń. Céè-ɖɛ̀ɔ̀ tɔ̀mɔ̀-tɔ̀mɔ̀ mɔ̀ ɓáɖáa hm̀m̌, ké ɔ xwíɖí-kù mɔ̀ ɓáɖáa sɔ̃́ kè fá-kɛ́ín.”
3Ké ínjàɔ̀ cɛ̃ɛ ḿ gbo, ké ɔ ɖá, “Ɖɛ nìà kɛ mɔ̀ hwòɛ̌-wùɖù ɓɛ́ ɔ muìn ɓóɖó gànáɔ̀ gboiɛ, sepóɛɖé nyɔ kã̀ìn séín ɓɛ́ wa dyíɖíɛɛ, wa mu wa woɖo gbo cɛ̃ìn dyììn ɖé kà céè-ɖɛ̀ɔ̀ wáká ɖò nyuà cɛ̃ɛ kɛɛ mú, ké nyɔ kã̀ìn séín ɓɛ́ wa tɔ́mɔ́ se hwɛ̀ ɓɛ́ wa dyi gboòɛɛ, wa mu wa woɖo gbo cɛ̃ìn dyììn ɖé kà céè-ɖɛ̀ɔ̀ wáká tɔ̀ɔ̀ nyuà cɛ̃ɛ kɛɛ mú. 4Bounɓo mɔ̀ nyɔ nìà ɖɛ séín kɔ̃in nyɛɛ mu hwòɛ̌-wùɖù nìà kɛ ɖoɓoùn, ké ɔ mu dyíɖíí-nyɔ̀ séín kè nyɔ séín ɓě ɓɛ́ wa tɔ́mɔ́ se hwɛ̀ ɓɛ́ wa dyi Bounɓoɔ̀ dyí gboòɛɛ ɓíɖí-gbǒǔn wáɖáìn. Ɔ mu ɖé waà gbǒ ɓěɔ̀ mú nììn, ɓɛ́ ɔ ké waà gbǒ ɓěɔ̀ mú gbɔɔ̀, hwɛ̀ ḿ po níiń, gbǒ ɓěɔ̀ pòìn-cù ɓěɔ̀ kè waà dèìn-sɔ̀ɔ̌ ɓěɔ̀.”
Dyí-tɛ̀mɛ̀ìn-ɖɛ̀ ɓá màa nì ɖé tìě múɛɛ jè dyíɛ
5Sɔ̀ìn ɓóɛ gboɛɛ, ínjà ɓɛ́ ɔ wùɖù ma kà ḿ gboɛɛ wóɖóìn ma ḿ dyí ɖe, ké ɔ ɖá, “Ɖú nì dyéɖéɔ̀ dyií, ɓɛ́ m̀ ké ɖɛ nìà ɖé muɛń nyɛɛ dyé.”
6Ké ḿ ɖá, “Ɔ mɔ̀ ɖɛ́ kɛ́?”
Ké ɔ ɖá, “Ɔ mɔ̀ ɖɛ-mú-ɖàɓàìn-tìě ɖò nìà ɖé muɛń nyɛ̀. Nyɔ séín ɓě ɓɛ́ wa nìà ɖé ɓóɖóɔ̀ kɔ̃ɛɛ nàmàǔn ɓěɔ̀ dyíɛ mú.”
7Tìěɔ̀ ɓéɖé ma kĩ̀ǐn jɔ̃-jɔ̃ ɖò ɓɛ́ ɔ mɔ̀ ma ɓàǎ saá-saá kɛ. Ké nyɔ ɖò kaà ma dyí. Púɛɛ, màa ɖò nì ma ɖé tìěɔ̀ mú.
8Ké ínjàɔ̀ ɖá, “M̀ dyé màa nìà kɛ níì? Ɔ mɔ̀à nàmàǔn dyíà tìěɔ̀ múɛ̀.” Ké ɔ sṹ ma màaɔ̀ dúɔ̀ ɖé tìěɔ̀ mú ɖe, ké ɔ kã tìěɔ̀ dyí ɖe. 9Hwɛ̀ ké ḿ ɖú ma dyéɖé dyií ɖe, ké ḿ dyé ma màa sɔ̃́ ḿ wɔ̃ dyiɛ. Wa nì ma pìɔ̌ gbɔ, ké wa nì ma wãuń kà zɔ̀ɔ̀ nìà kɛ. Ké wa ɖú ma tìěɔ̀ dyí, ké wa kpaa ma dyií pɔ̃́ɔ.
10Ké ḿ diè ma ínjàɔ̀ dyi, ké ḿ ɖá, “Dɛ̌ wa nìà tìěɔ̀ kpauń wɛ̃́?”
11Ké ɔ cɛ̃ɛ ḿ gbo, ké ɔ ɖá, “Wa nìɛ̀ ɖé Báɓèɖɔ́ùn-ɓòɖòɔ̀ kɔ̃ kpauń, ɓɛ́ wa ké ɖé gbǒ ɖò po ɓóɛ jè. Gbǒɔ̀ ɖǎ hwɛ̀ ní, nìí, wa mu tìěɔ̀ kpaùn, ɓɛ́ wa kéɛ ɖé ɔ kɔ̃-dè-ɖɛ̀ ɖò kɔ̃ dè.”
Trenutno izbrano:
Zɛ́kɔ̀wáɖádyà 5: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.