Ɖìvéɖékɔ̀ 6
6
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2-3“Ɔ jǔ ké nyɔ ɖò dyi ɔ mǔè ɖò nàmàǔn bũ̌ nyu, ké ɔ dyi gboò kà ɔ seɛ náa nyuɛɛ ní, nìí, ɔ ɖǎ ḿ nàmàǔn bũ̌ nyu ɖekè. Nàmàǔn ɓěɔ̀, wa kɛà kɛ̀. Wa mɔ̀ ɖɛ ɓɛ́ ɔ mǔèɔ̀ nyí ɔ xwa ɓó dyi dè jè mɔɔ dyí gmɔ̀ jè, ké ɔ nyu gbá-gbá ɓáa jè dyíɛ mɔɔ dyíɖí-dyíɖí mɔɔ ɔ mǔèɔ̀ cá-cá mɔɔ ɔ mǔèɔ̀ ɖɛ ɖò dyi-cɛ̃́-cɛ̃́ kè se-tɔ́mɔ́-tɔ́mɔ́ ɓáa jè dyí mɔɔ nàmàǔn tɔ̀ɔ̀ nì kà ɓěɛ̀ ɖò. 4-5Ɔ dyi nàmàǔn ɓěɛ̀ ɖò nyu ní, nìí, zaa kpɔ̃ ɔ ní ɓóɛ jè. Ké ɔ mɛ tò ɖɛɔ̀ ɖe, ɓɛ́ ɔ kéɛ wáká hm̀m̌ nììn ɓó kɔ̃in po. Wa mɔ̀ ɖɛ ɓě hwɔìn kà ɖɛ ɔ dyíɖíà kɛ mɔɔ ɖɛ ɔ zàà nyɔɔ̀ xwa gbá-gbá-kà kɛ mɔɔ ɖɛ nyɔɔ̀ nyíà ɔ xwa dyi dè jè, ɓɛ́ ɔ dyià máa mɔɔ nyɔɔ̀ kɔ̃̀ɔ̀-ɖɛ̀ ɓɛ́ ɔ cɛ̃́à dyiɛ mɔɔ ɖɛ kã̀ìn séín kɔ̃̀ jè ɓɛ́ ɔ gboò ɖé ɔ se-tɔ́mɔ́-tɔ́mɔ́ɔ̀ múɛ. Ɔ mɛ nyíɛ nyɔ kɔ̃̀à ɖɛɔ̀ kɛɛ ɓó wé kɔ̃̀ ɓaɖa ɔ dyàà kpa-pɛ́ɛ̀ìn-sàǎ-zàìn-ɖɛ̀ɔ̀ kɛ. 6Ɔ mɛ dyà ḿ ɓáɖáá ɓíɔ́ se kɛɛ ɖò ɓéɖéɛ, ɓɛ́ ɔ ké ɔ nàmàǔnɔ̀ kpaɔ̀ pɛ́ɛ̀-ɖɛ̀ jǔ. Ɓáɖáá ɓíɔ́ɔ̀ mɛ hwɛ̀ ɖɛ. Ɔ mɛ dyàà sáa-zà-nyɔ̀ɔ̀ gbo, ɓɛ́ ɔ ké kpa-pɛ́ɛ̀ìn-sàǎ-zàìn-ɖɛ̀ jǔ. 7Ɔ ɖǎ ná nìǐn, nìí, sáa-zà-nyɔ̀ɔ̀ mɛ zàìn ḿ gbo sáa, ɓɛ́ nyúà-ɖɛ̀ɔ̀ ké nyɔɔ̀ nàmàǔnɔ̀ kɔ̃in-ɓáìn-ɖɛ̀ jǔ. Nìí, ní mu ɔ kɔ̃in zĩ̀ìn ɓó nàmàǔn nì kà ɓě ɓɛ́ ɔ dyi nyu ní, zaa kpɔ̃ ɔ kɛɛ jè.”
Sáa-zàìn-ɖɛ̀ɔ̀ nyɔ wa ké fɔ̃ séín nyɛ
8Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 9“Cɛ̃ gma ɓě ɓá fɔ̃ɔ-sàǎ-zàìn-ɖɛ̀ jè dyíɛɛ Eɖóún kè ɔ dyú-gàà ɓěɔ̀ gbo. Gma ɓěɔ̀ kɛà kɛ̀. Fɔ̃ɔ-sàǎ-zàìn-ɖɛ̀ ɖò mɛ nì ɓó dyéɖé ɓó sáa-kɔ̃-zàìn-gbààɔ̀ kɔ̃, ɓɛ́ ɔ ké sĩɛń dyi gã̀ ɓó máaún-hwùɖù gànáɔ̀ mú tee, ɓɛ́ zɔ̃ ké zɔ̃. Nyɛ ɓɛ́ ɔ nìà ɓó gbààɔ̀ kɔ̃ɛɛ mɛ nì wãuń kánáá pū. 10Ɔ ɖǎ ná nìǐn, nìí, sáa-zà-nyɔ̀ ɓěɔ̀ ɖò mɛ po ɖénì-ɓɔ̀ùn-ɓɔ́ún ɖò mú kĩ́ín, hwɛ̀ ɓɛ́ ɔ ké ɖénì-ɖɔ̀ɔ̀ mú po, ɓɛ́ ɔ ké sáa-zàìn-ɖɛ̀ sĩ-sĩɔ̀ tĩ́ɔ nìà ɓó sáa-kɔ̃-zàìn-gbààɔ̀ kɔ̃ɛɛ kuɖu, ɓɛ́ ɔ kéɛ ɓóɛ gbààɔ̀ wáún dyi wáɖá. 11Ɔ ɖǎa náa nyuín, nìí, ɔ mɛ zà ɔ ɖénì-ɖɔ̀ ɓěɔ̀ mú, ɓɛ́ ɔ ké ɖɔ kà kò ɖò mú po, hwɛ̀ ɓɛ́ ɔ ké tĩ́ɔɔ̀ ɖé jàɖàìn-hwɔ̀ɖɔ̀ɔ̀ ɖeín kpa, ɓɛ́ ɔ kéɛ pá ḿ ɖá ɔ hwɛ̀à múɛɛ kɔ̃ gbǒìn. 12Nyɛ nìà ɓó sáa-kɔ̃-zàìn-gbààɔ̀ kɔ̃ɛɛ mɛ nì wãuń kánáá pū. Ɔ mɛ ɓɔ́ mɔ́ɔ fɔɔ cá. Sáa-zà-nyɔ̀ ɓěɔ̀ ɖò mɛ daɓa nyɛɔ̀ ɓó gànà-kṹún ti séín, ɓɛ́ ɔ ké fɔ̃ɔ-sàǎ-zàìn-ɖɛ̀ɔ̀ suaɖɛ̀-kpò ɓěɔ̀ ɓóɛ kɔ̃ dyi pɛ̃́ìn nɔ̀mɔ̀ dyíin, ɓɛ́ wa ké sĩ. Ɔ ɖǎa náa nyuín, nìí, ɔ mɛ fɔ̃̀ìn gbo-kpɔ̃ìn-sàǎ-zàìn-ɖɛ̀ɔ̀ cánáɔ̀ ɓó fɔ̃ɔ-sàǎ-zàìn-ɖɛ̀ nìà sĩɛń nyɛɛ kɔ̃. 13Ḿ ɖá nyɛɔ̀ mɛ nì wãuń ɓó sáa-kɔ̃-zàìn-gbààɔ̀ kɔ̃ kánáá pū. Ɔ mɛ ɓɔ́ mɔ́ɔ fɔɔ cá.
Ɖii-ɖɛ̀-sàǎ-zàìn-ɖɛ̀ɔ̀
14“Gma ɓě ɓá ɖii-ɖɛ̀-sàǎ-zàìn-ɖɛ̀ jè dyíɛɛ, wa kɛà kɛ̀. Eɖóúnɛ̀ dyú-gàà ɓěɔ̀ ɖò mɛ dyà ɖii-ɖɛ̀-sàǎ-zàìn-ɖɛ̀ɔ̀ ɓó ḿ dyúa, ɓó sáa-kɔ̃-zàìn-gbààɔ̀ gbo. 15Ɔ ɖǎ ná nìǐn, nìí, sáa-zà-nyɔ̀ɔ̀ mɛ ɖú fáɖáɓà nìɛ̀-nìɛ̀ caìn cáná mɔ̀à ɖii-ɖɛ̀-sàǎ-zàìn-ɖɛ̀ɔ̀ kɛɛ xwa-wè dyúáɖò kè nyɔ́ún-nɔ̀mɔ̀-ɖɛ̀ séín nì ɓóɛ kɔ̃ɛɛ dyí, ɓɛ́ ɔ kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn, ɓɛ́ ɔ ké sáa-zàìn-ɖɛ̀ kɔ̃̀ nyɔ́ dè ḿ hwìɖǐiɛɛ jǔ. Ɖɛ nìà kɛ muɛ nyɔǔn dyí tɛ̀mɛ̀ìn kà nyɔ dyàà kɛɛ ɖǎa séín mɔ̄ mɔ̀à Bounɓoɔ̀ kɛɛ nyíɛ. 16Ɔ ɖǎ ná nìǐn, ɖii-ɖɛ̀-sàǎ-zàìn-ɖɛ̀ɔ̀ nyɔ sè ɓóɛɛ, Eɖóún kè ɔ dyú-gàà ɓěɔ̀ mɛ ɖiɛ. Wa mɛ nyuɛ bɛɖɛɛ̀ mú, kɛɛ wa mɛ ɓɔ́ɔ bɛɖɛɛ̀-dyáìn-ɖɛ̀ ɖò gbo poɛ. Ké wa mɛ ɖìɛ̀n ɓóɛ pá hwɛ̀ǐn-hwɛ̀ǐn nìà ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ kɔ̃̀pã́ùnɔ̀ kɔ̃ɛɛ mú. 17Wa mɛ ɓɔ́ɔ bɛɖɛɛ̀-dyáìn-ɖɛ̀ ɖò gbo poɛ. Ɔ mɔ̀ wa nììn, ké ḿ nyíɛ wa sɔ̀ìn ɖé ɖii-ɖɛ̀-nyìǐ-ɖɛ̀ ɓě ɓɛ́ nyɔ ɓě dyà ḿ wɛ̃ɛ hwìɛ̀. Ɔ hwɛ̀ mú mìɔ kà nàmàǔn-sàǎ-zàìn-ɖɛ̀ɔ̀ kè kpa-pɛ́ɛ̀ìn-sàǎ-zàìn-ɖɛ̀ɔ̀ wáká ɓɛ́ ḿ nyíà waa nìà kɛ. 18Ké gàa-dyù séín wóɖó ɖé Eɖóún xwíníín nyɛɛ ɓɛ́ìn ɖiɛ. Ɖɛ nìà kɛ mɛ mɔ̀ gma kánáá pū ɓá ɖii-ɖɛ̀-nyìǐ-ɖɛ̀ ɓě ɓɛ́ nyɔ ɓě mu ḿ dyàùn wɛ̃ɛ jè dyí. Ɖɛ kã̀ìn séín muɛ dyi tìnììn nyɛɛ, ɖɛ gbà ɖò mu ɔ gbo kpáùn.”
19Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 20“Sɔ̀ìn ɓó ti ɓɛ́ wa mu Eɖóún kè ɔ dyú-gàà ɓěɔ̀ cáná dúún poùn ɓó sáa-zà-kũ̀àɔ̀ jèɛ gboɛɛ, nìí, sáa-zàìn-ɖɛ̀ ɓɛ́ sáa-zà-nyɔ̀ vɛ̀nɛ̀ɔ̀ ké ḿ gbo dyà ɓó wé séín nyɛɛ kɛà kɛ̀. Ɔ mɛ dyà fáɖáɓà nìɛ̀-nìɛ̀ kópò-wè mɛ̀nɛ̌ìn-tã,#6:20 Gmɔ̀ ɖé Ɖìvéɖékɔ̀ 5:11 mú. ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ. Ɔ ɖǎa dyà ní, nìí, ɔ mɛ geɛ mú, ɓɛ́ ɔ ké wáká ɖò sáa zàìn ɓó gànà-kṹún, ɓɛ́ ɔ ké wáká tɔ̀ɔ̀ sáa zàìn ɓó hwìo. 21Sáa-zà-nyɔ̀ vɛ̀nɛ̀ɔ̀ mɛ caìn fáɖáɓàɔ̀ cáná. Ɔ mɛ nyuɛ náa nɔ̀mɔ̀ dyíin, ɓɛ́ ɔ kéɛ jìà cɛin mú nyùìn. Ɔ jǔ ké ɔ ɖǎa nyuɛ hwɔ ní, nìí, ɔ mɛ wàìn dyi, ɓɛ́ ɔ kéɛ ḿ nyí, ɓɛ́ ɔ ké ɖii-ɖɛ̀-sàǎ-zàìn-ɖɛ̀ kɔ̃̀ nyɔ́ dè ḿ hwìɖǐiɛɛ jǔ. 22Sáa-zà-nyɔ̀ vɛ̀nɛ̀ ɓɛ́ ɔ nì kũ̀à kɔ̃ún wɛ̃ɛ mɔ̀ nyɔ mɛ nyuɛ. Ɔ mɛ fɔ̃ɔ séín ɓó ḿ bìì. Ɖɛ nìà kɛ mɛ mɔ̀ gma kánáá pū. 23Ɖii-ɖɛ̀-sàǎ-zàìn-ɖɛ̀ séín ɓɛ́ sáa-zà-nyɔ̀ ɓěɔ̀ mu ḿ gbo dyàùn wɛ̃ɛ, sáa-zà-nyɔ̀ vɛ̀nɛ̀ɔ̀ mɛ fɔ̃ɔ séín. Nyɔ ɖò mɛ ɓɔ́ ɖò ɖiɛ.”
Nàmàǔn-sàǎ-zàìn-ɖɛ̀ɔ̀
24Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 25“Cɛ̃ gma ɓě ɓá nàmàǔn-sàǎ-zàìn-ɖɛ̀ jè dyíɛɛ Eɖóún kè ɔ dyú-gàà ɓěɔ̀ gbo. Gma ɓěɔ̀ mɔ̀, dɛ̀ dyúáɖò wa ɖáɓáìn fɔ̃ɔ-sàǎ-zàìn-ɖɛ̀ɔ̀ kɛɛ, ɓóɛ̀ wa mɛ ɖáɓáìn nàmàǔn-sàǎ-zàìn-ɖɛ̀ɔ̀ ɖekè. Ɔ xwíníín mɔ̀, ɓó mɔ̄ mɔ̀à Bounɓoɔ̀ kɛɛ dyúa. Nàmàǔn-sàǎ-zàìn-ɖɛ̀ɔ̀ nyɔ ɓɛ́ ɔ sè ɓóɛɛ hwɛ̀ mú mìɔ. 26Ké sáa-zà-nyɔ̀ ɓě ɓɛ́ wa zàìn nyúà-ɖɛ̀ɔ̀ sáa kɛɛ mɔ̀ nyɔ mɛ tà suaɖɛ̀ɔ̀ nyɔ sè ɓóɛ. Wa mɛ tàìn ɓóɛ pá hwɛ̀ǐn-hwɛ̀ǐn nìà ɓó jàɖàìn-gbòɔ̀ kɔ̃̀pã́ùnɔ̀ kɔ̃ɛɛ mú. 27Ké ɖɛ kã̀ìn séín mu suaɖɛ̀ɔ̀ fɔ́ɔ̀ dyi tìnììn nyɛɛ, ɖɛ gbà ɖò mu ɔ gbo kpáùn. Ɔ jǔ ké nyúà-ɖɛ̀ɔ̀ nyɔmɔɔ̀ ɖò dyi nyɔ ɖòɛ̀ mú-po-ɖɔ̀ ɖò dà ɖò té ní, nìí, wa mɛ wɔɔ̀ìn ɖéɛ pá ɓɛ́ ḿ ɖá ɔ hwɛ̀à múɛɛ ɖò mú. 28Ɔ jǔ ké wa dyi suaɖɛ̀ɔ̀ mɛ-dyàà ɖò mú pĩ̀ìn ní, nìí, wa mɛ wàìn dyi. Kɛɛ ɔ jǔ ké wa dyiɛ bàɖàsǐ-jìà ɖò mú pĩ̀ìn ní, nìí, wa mɛ kpoɛ̀ jìàɔ̀, ɓɛ́ wa kéɛ ní múin wɔɔ̀ìn nɔ̀mɔ̀ dyíin. 29Gàa-dyù séín wóɖó ɖé sáa-zà-nyɔ̀ ɓěɔ̀ xwíníín nyɛɛ ɖòùn ɓɛ́ìn ɖiɛ, sepóɛɖé ɖɛ nìà kɛ hwɛ̀ mú mìɔ. 30Kɛɛ nàmàǔn-sàǎ-zàìn-ɖɛ̀ kɔ̃̀ nyɔmɔɔ ɓɛ́ sáa-zà-nyɔ̀ vɛ̀nɛ̀ɔ̀ dyàà nɔ̄ jàɖàìn-gbò hwɛ̀ǐn-hwɛ̀ǐnɔ̀ mú, ɓɛ́ ɔ kéà nyɔ ɖòɛ̀ nàmàǔn-kɔ̃in-ɓáìn-ɖɛ̀ jǔɛɛ, nyɔ ɖò mɛ ɓɔ́ɔ suaɖɛ̀ɔ̀ ɖò ɖiɛ fɔɔ cá. Sáa-zà-nyɔ̀ɔ̀ mɛ fɔ̃ɔ.
Trenutno izbrano:
Ɖìvéɖékɔ̀ 6: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.