Ɖìvéɖékɔ̀ 4
4
Sáa-zàìn-ɖɛ̀ nì ɓó seó-ɖei-dyéɛ̀ nàmàǔn jèɛ
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2“Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké nyɔ ɖò seó ɖei dyé, ké ɔ dyi gma ɓě ɓá ɖɛ ɓě, ɓɛ́ ḿ ɖá ɓě mɛ ɓɔ́à nyuɛ kɛɛ jè dyíɛɛ ɖò wáɖá dyììn ɖé ɖɛ ɓěɛ̀ ɖò nyu-nyu mú ní, nìí, ɖɛ ɓě nyɔɔ̀ ké nyu ɓó gmaɔ̀ dyáìn jèɛɛ, wa kɛà kɛ̀. 3Ɔ jǔ ké sáa-zà-nyɔ̀ vɛ̀nɛ̀ɔ̀ dyi nàmàǔn ɖò nyu ní, nìí, zaa mu nyɔ ɓěɔ̀ dúún wáɖáùn. Ɔ dyi ná nìǐn, nìí, sáa-zà-nyɔ̀ vɛ̀nɛ̀ɔ̀ mɛ dyà ɓìɖǐ ɓíɔ́ ɖò mɔ̄ mɔ̀à Bounɓoɔ̀ kɛɛ gbo, ɓɛ́ ɔ ké sáa-zàìn-ɖɛ̀ jǔ ɓó ɔ nàmàǔnɔ̀ jè. Ɓìɖǐ ɓíɔ́ɔ̀ mɛ ɓɔ́ kɛɛ ɖò ɓéɖéɛ. 4Ɔ mɛ dyà ɓìɖǐ ɓíɔ́ɔ̀ ɓó ḿ dyúa ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ wĩín, ɓɛ́ ɔ kéɛ sɔ̃ dúún dè. Sɔ̀ìn ɓóɛ gboɛɛ, nìí, ɔ mɛ ɖáɓáìn ɓó ɓìɖǐ ɓíɔ́ɔ̀. 5Ɔ ɖǎa náa nyuín, nìí, ɔ mɛ ɖúɛ nyɔmɔɔ̀ ɖò dyí, ɓɛ́ ɔ kéɛ nɔ̄ jàɖàìn-gbòɔ̀ mú dyà. 6Ɔ ɖǎa náa nyuín, nìí, ɔ mɛ kpa ɔ jìì-dyùà dyúáɖò ɖé nyɔmɔɔ̀ gbo, ɓɛ́ ɔ kéɛ ɖò ɓó faà-ɖɔ̀ ɓáà nɔ̄ jàɖàìn-gbòɔ̀ mú dyiíɛɛ dyúa ɓó ɓíɖíi dyi téìn ɓó ḿ dyúa. Ɔ mɛ nyùɛ̀n náa kpa mɛ̀nɛ̌ìn-sɔ̃́. 7Sɔ̀ìn ɓóɛ gboɛɛ, nìí, ɔ mɛ ɖú nyɔmɔɔ̀ ɖò dyí, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naín nyɛɛ gã hĩinyɛɔ̀ kɔ̃ɛɛ bũ̌ po. Gbàà nìà kɛ nì ɓó ḿ dyúa nɔ̄ jàɖàìn-gbòɔ̀ mú. Ɔ ɖǎ ná nìǐn, nìí, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbàà nìà ɓó jàɖàìn-gbòɔ̀ wĩín nyɛɛ gbɔí. Ɔ mɔ̀ gbàà kɔ̃̀ kɔ̃ ɓɛ́ wa fɔ̃̀ìn sáa-zàìn-ɖɛ̀ kɛ. 8Ɔ ɖǎa náa nyuín, ɔ mɛ zà ɓìɖǐ ɓíɔ́ mɔ̀à nàmàǔn-sàǎ-zàìn-ɖɛ̀ɔ̀ kɛɛ cáná séín nìɛ̀ múɛɛ ɖé dyi. Ɔ xwíníín mɔ̀, ɔ mɛ zà ɓó cáná séín ɓáìn mɛ́ɔ̀ bũ̌in nyɛ 9kèɛ̀ pɔnɔ-mɛ́ sɔ̃́ xwɛ̃́àìn ɓó ɔ gbe-zèɖèɔ̀ dyiɛ kè cáná ɓáìn wa kɔ̃in nyɛ kèɛ̀ pìùɔ̀ dà kpa ɖɛɔ̀. 10Ɔ mɛ zà ɖɛ ɓěɛ̀ ɓìɖǐɔ̀ múin kà ɔ nyuà ɓìɖǐ mɔ̀ sáa-zàìn-ɖɛ̀ ɓá gbo kpɔ̃ìn jè dyíɛɛ nyuɛ kɛ. Ké ɔ mɛ ɖú ɖɛ ɓěɛ̀ dyí, ɓɛ́ ɔ ké wa gbàà kɔ̃̀ kɔ̃ mɔ̀à fɔ̃ɔ-sàǎ-zàìn-ɖɛ̀ fɔ̃̀ìn-naínɔ̀ kɛɛ kɔ̃ fɔ̃̀ìn. 11Kɛɛ ɔ mɛ ɖúɛ kúɖúùɔ̀ kè fɔ́ séínɔ̀ kè dúɔ̀ kèɛ̀ ɖáá ɓěɔ̀ kè xwíníín-ɖɛ̀ séínɔ̀ kèɛ̀ mɛ́ɔ̀ dyí. 12Ɔ xwíníín mɔ̀, wa mɛ ɖú ɓìɖǐ ɓíɔ́ɔ̀ ɖɛ séín sè ɓóɛɛ dyí, ɓɛ́ wa ké wa jàɖàìn-hwɔ̀ɖɔ̀ɔ̀ ɖeín kpa. Ɔ mɛ mɔ̀ pá ɓɛ́ ḿ ɖá ɔ hwɛ̀à múɛɛ mú. Ɔ mɔ̀ dɛ̀ ɓɛ́ wa kpaà tĩ́ɔ-pɛ̀ɛ̀ɔ̀ xwáɖáún wɛ̃. Ɖé tĩ́ɔ-kòòɔ̀ kɔ̃, ɖéɛ̀ wa mɛ po nyɛ dyí, ɓɛ́ wa ké ɖé wa fɔ̃̀ìn.
13“Ɔ jǔ ké ɓě mɔ̀ Éézùɖùɛ̀-ɓòɖò gànáɔ̀ kɛɛ seó ɖei dyé, ké ɓě dyi gma ɓě ɓá ɖɛ ɓě ɓɛ́ ḿ ɖá ɓě mɛ ɓɔ́à nyuɛ kɛɛ jè dyíɛɛ ɖò wáɖá dyììn ɖé ɖɛ ɓěɛ̀ ɖò nyu-nyu mú ní, nìí, ɓě seó ɖei dyé dyɛo, kɛɛ zaa ɖǎ ɓě dúún wáɖá nɔ̀ɔ̀. 14Ɔ dyi ná nìǐn, ti ɓě muɛ dyuòùn kà ɓě nyu nàmàǔn wɛ̃ɛ ní, nìí, ɓě mɛ ɖú ɓìɖǐ ɓíɔ́ ɖò dyí, ɓɛ́ ɓě kéɛ ɓóɛ jàɖàìn-gbòɔ̀ dyúa dyà, ɓɛ́ ɔ ké sáa-zàìn-ɖɛ̀ jǔ ɓó ɓěɛ̀ nàmàǔnɔ̀ jè. 15Ɔ ɖǎ ná nìǐn, nìí, ɓěɛ̀ nyɔ vɛ̀nɛ̀ ɓěɔ̀ mɛ dè ɓìɖǐ ɓíɔ́ɔ̀ sɔ̃ dúún ɓó ḿ dyúa kĩ́ín, hwɛ̀ ɓɛ́ ɓě kéɛ ɓóɛ ɖáɓáìn. 16Sɔ̀ìn ɓóɛ gboɛɛ, sáa-zà-nyɔ̀ vɛ̀nɛ̀ɔ̀ mɛ dyàà nyɔmɔɔ̀ ɖò nɔ̄ jàɖàìn-gbòɛ̀ mú. 17Ɔ ɖǎa náa nyuín, nìí, ɔ mɛ kpa jìì-dyùà dyúáɖò ɖé nyɔmɔɔ̀ gbo, ɓɛ́ ɔ kéɛ ɖò ɓó faà-ɖɔ̀ɔ̀ dyúa ɓó ɓíɖíi dyi téìn ɓó ḿ dyúa. Ɔ mɛ nyùɛ̀n náa kpa mɛ̀nɛ̌ìn-sɔ̃́. 18Sɔ̀ìn ɓóɛ gboɛɛ, nìí, ɔ mɛ ɖú nyɔmɔɔ̀ ɖò dyí, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naín nyɛɛ gã hĩinyɛɔ̀ kɔ̃ɛɛ bũ̌ po. Gbàà nìà kɛ nì ɓó ḿ dyúa nɔ̄ jàɖàìn-gbòɛ̀ mú. Ɔ ɖǎa náa nyuín, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbàà nìà ɓó jàɖàìn-gbòɔ̀ wĩín nyɛɛ gbɔí. Ɔ mɔ̀ gbàà kɔ̃̀ kɔ̃ ɓɛ́ wa fɔ̃̀ìn sáa-zàìn-ɖɛ̀ kɛ. 19Ɔ ɖǎa náa nyuín, ɔ mɛ zàà cáná séínɔ̀ múin, ɓɛ́ ɔ kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn. 20Kà ɔ nyuà ɓìɖǐ ɓíɔ́ mɔ̀à ɔ mìɔùn nììn nàmàǔnɔ̀ sáa-zàìn-ɖɛ̀ɔ̀ nyuɛ kɛɛ, kà dyúáɖòɔ̀ kǎà ɔ mɛ nyu ɓìɖǐ ɓíɔ́ɔ̀ nyɔ nìà kɛ. Ɖɛ nìà kɛ mu ɓěɛ̀ nàmàǔnɔ̀ kɔ̃in-ɓáìn-ɖɛ̀ jǔùn, ɓɛ́ sáa-zà-nyɔ̀ vɛ̀nɛ̀ɔ̀ kéɛ nyu. Ɔ dyi ná nìǐn, nìí, ní mu ɓěɛ̀ nàmàǔnɔ̀ kɔ̃in zĩ̀ìn. 21Sɔ̀ìn ɓóɛ gboɛɛ, nìí, wa mɛ ɖú ɓìɖǐ ɓíɔ́ɔ̀ ɖɛ séín sè ɓóɛɛ dyí, ɓɛ́ wa ké wa ɖé jàɖàìn-hwɔ̀ɖɔ̀ɔ̀ ɖeín kpa, ɓɛ́ wa ké ɖé wa fɔ̃̀ìn kà wa nyuà ɓìɖǐ tɔ̀ɔ̀ mɔ̀à sáa-zà-nyɔ̀ vɛ̀nɛ̀ɔ̀ nììn nàmàǔnɔ̀ sáa-zàìn-ɖɛ̀ɔ̀ kɛɛ fɔ̃ɔ kɛ. Ɖɛ nìà kɛ mɔ̀ ɓěɛ̀ nàmàǔnɔ̀ sáa-zàìn-ɖɛ̀.
22“Ɔ jǔ ké nyɔ ɓěɔ̀ wuɖuí-kɔ̃̀-nyɔ̀ ɓěɔ̀ ɖò seó ɖei dyé, ké ɔ dyi gma ɓě ɓá ɖɛ ɓě ɓɛ́ ḿ ɖá ɓě mɛ ɓɔ́à nyuɛ kɛɛ jè dyíɛɛ ɖò wáɖá dyììn ɖé ɖɛ ɓěɛ̀ ɖò nyu-nyu mú ní, nìí, zaa ɖǎ ɔ dúún wáɖá. 23Ɔ ɖǎ ná nìǐn, ti ɔ muɛ dyuòùn kà ɔ nyu nàmàǔn wɛ̃ɛ ní, nìí, ɔ mɛ dyà vã́á ɖò, ɓɛ́ ɔ ké sáa-zàìn-ɖɛ̀ jǔ ɓó ɔ nàmàǔnɔ̀ jè. Vã́áɔ̀ mɛ ɓɔ́ kɛɛ ɖò ɓéɖéɛ. 24Ɔ ɖǎa náa nyuín, ɔ mɛ dè vã́áɔ̀ sɔ̃ dúún kĩ́ín, hwɛ̀ ɓɛ́ ɔ kéɛ ɖáɓá. Ɔ mɛ ɖáɓáìn ɓóɛ ḿ dyúa, dà ɓɛ́ wa ɖáɓáìn fɔ̃ɔ-sàǎ-zàìn-ɖɛ̀ɔ̀ kɛ. Ɖɛ nìà kɛ mɔ̀ nàmàǔn-sàǎ-zàìn-ɖɛ̀. 25Sɔ̀ìn ɓóɛ gboɛɛ, sáa-zà-nyɔ̀ ɓěɔ̀ ɖò mɛ ɓéɖéìn nàmàǔn-sàǎ-zàìn-ɖɛ̀ɔ̀ nyɔmɔɔ̀ ɖò jìì mánáín, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à fɔ̃ɔ-sàǎ-zàìn-ɖɛ̀ɔ̀ nyùìn-naínɔ̀ kɛɛ gã hĩinyɛɔ̀ kɔ̃ɛɛ bũ̌ po. Nìí, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbààɔ̀ gbɔí. 26Sɔ̀ìn ɓóɛ gboɛɛ, ɔ mɛ fɔ̃̀ìn sáa-zàìn-ɖɛ̀ɔ̀ cáná séínɔ̀ ɓó gbààɔ̀ kɔ̃ kà dyúáɖò kà wa nyuà sáa-zàìn-ɖɛ̀ ɓá gbo kpɔ̃ìn jè dyíɛɛ nììn cánáɔ̀ fɔ̃ɔ kɛ. Ɖɛ nìà kɛ mu wuɖuí-kɔ̃̀-nyɔ̀ɔ̀ nàmàǔnɔ̀ kɔ̃in-ɓáìn-ɖɛ̀ jǔùn, ɓɛ́ sáa-zà-nyɔ̀ɔ̀ kéɛ nyu. Ɔ dyi ná nìǐn, nìí, ní mu ɔ nàmàǔnɔ̀ kɔ̃in zĩ̀ìn.
27“Ɔ jǔ ké nyɔ tɔ̀ɔ̀ ɓěɔ̀ ɖò seó ɖei dyé, ké ɔ dyi gma ɓě ɓá ɖɛ ɓě ɓɛ́ ḿ ɖá ɓě mɛ ɓɔ́à nyuɛ kɛɛ jè dyíɛɛ ɖò wáɖá dyììn ɖé ɖɛ ɓěɛ̀ ɖò nyu-nyu mú ní, nìí, zaa ɖǎ ɔ dúún wáɖá. 28Ɔ ɖǎ ná nìǐn, ti ɔ muɛ dyuòùn kà ɔ nyu nàmàǔn wɛ̃ɛ ní, nìí, ɔ mɛ dyà gbǎà nyɔ́nɔ́ ɖò, ɓɛ́ ɔ ké sáa-zàìn-ɖɛ̀ jǔ ɓó ɔ nàmàǔnɔ̀ jè. Gbǎà nyɔ́nɔ́ɔ̀ mɛ ɓɔ́ kɛɛ ɖò ɓéɖéɛ. 29Ɔ ɖǎa náa nyuín, ɔ mɛ dè sáa-zàìn-ɖɛ̀ ɓɛ́ ɔ dyàà ɓó ɔ nàmàǔnɔ̀ jèɛɛ sɔ̃ dúún kĩ́ín, hwɛ̀ ɓɛ́ ɔ kéɛ ɖáɓá. Ɔ mɛ ɖáɓáìn ɓóɛ pá dyúáɖò kɔ̃̀ mú wa ɖáɓáìn fɔ̃ɔ-sàǎ-zàìn-ɖɛ̀ɔ̀ kɛ. 30Sɔ̀ìn ɓóɛ gboɛɛ, sáa-zà-nyɔ̀ ɓěɔ̀ ɖò mɛ ɓéɖéìn nyɔmɔɔ̀ ɖò jìì mánáín, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à fɔ̃ɔ-sàǎ-zàìn-ɖɛ̀ɔ̀ nyùìn-naínɔ̀ kɛɛ gã hĩinyɛɔ̀ kɔ̃ɛɛ bũ̌ po. Nìí, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbààɔ̀ gbɔí. 31Ɔ ɖǎ ná nìǐn, nìí, nyɔ dyàà sáa-zàìn-ɖɛ̀ɔ̀ kɛɛ mɛ zà sáa-zàìn-ɖɛ̀ɔ̀ cáná séínɔ̀ ɖé dyi kà wa nyuà sáa-zàìn-ɖɛ̀ ɓá gbo kpɔ̃ìn jè dyíɛ, ɓɛ́ sáa-zà-nyɔ̀ɔ̀ kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn, ɓɛ́ ɔ ké sáa-zàìn-ɖɛ̀ kɔ̃̀ nyɔ́ dè ḿ hwìɖǐiɛɛ jǔ. Ɖɛ nìà kɛ mu nyɔɔ̀ nàmàǔnɔ̀ kɔ̃in-ɓáìn-ɖɛ̀ jǔùn, ɓɛ́ sáa-zà-nyɔ̀ɔ̀ kéɛ nyu. Ɔ dyi ná nìǐn, nìí, ní mu ɔ nàmàǔnɔ̀ kɔ̃in zĩ̀ìn.
32“Ɔ jǔ ké nyɔɔ̀ dyi ɓáɖáá ɖò dyàà mɔ́, ɓɛ́ ɔ ké sáa-zàìn-ɖɛ̀ jǔ ɓó ɔ nàmàǔnɔ̀ jè ní, nìí, ɔ mɛ mɔ̀ ɓáɖáá nyɔ́nɔ́ se kɛɛ ɖò ɓéɖéɛ. 33Ɔ ɖǎa náa nyuín, nìí, ɔ mɛ dèɛ̀ sɔ̃ dúún. Sɔ̀ìn ɓóɛ gboɛɛ, nìí, ɔ mɛ ɖáɓáìn ɓóɛ pá dyúáɖò kɔ̃̀ mú wa ɖáɓáìn fɔ̃ɔ-sàǎ-zàìn-ɖɛ̀ɔ̀ kɛ, ɓɛ́ ɔ ké nàmàǔn-sàǎ-zàìn-ɖɛ̀ jǔ. 34Ɔ ɖǎ ná nìǐn, sáa-zà-nyɔ̀ɔ̀ mɛ ɓéɖéìn nyɔmɔɔ̀ ɖò jìì mánáín, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à fɔ̃ɔ-sàǎ-zàìn-ɖɛ̀ɔ̀ nyùìn-naínɔ̀ kɛɛ gã hĩinyɛɔ̀ kɔ̃ɛɛ bũ̌ po. Nìí, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbààɔ̀ gbɔí. 35Ɔ ɖǎ ná nìǐn, nìí, nyɔ dyàà sáa-zàìn-ɖɛ̀ɔ̀ kɛɛ mɛ zà sáa-zàìn-ɖɛ̀ɔ̀ cáná séínɔ̀ ɖé dyi kà wa nyuà ɓáɖáá mɔ̀à sáa-zàìn-ɖɛ̀ ɓá gbo kpɔ̃ìn jè dyíɛ, ɓɛ́ sáa-zà-nyɔ̀ɔ̀ kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn ɓó sáa-zàìn-ɖɛ̀ tɔ̀ɔ̀ ɓě ɓɛ́ wa nyí ḿ wɛ̃ɛ kɔ̃in. Ɖɛ nìà kɛ mu nyɔɔ̀ nàmàǔnɔ̀ kɔ̃in-ɓáìn-ɖɛ̀ jǔùn, ɓɛ́ sáa-zà-nyɔ̀ɔ̀ kéɛ nyu. Ɔ dyi ná nìǐn, nìí, ní mu ɔ nàmàǔnɔ̀ kɔ̃in zĩ̀ìn.
Trenutno izbrano:
Ɖìvéɖékɔ̀ 4: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.