Hàbákù 3
3
Hàbákùɛ̀ ɓaà-wùɖù
1Ɖɛ nìà kɛ mɔ̀ Hàbákù mɔ̀à kpáá-ɖɛ̀-cɛ̃-nyɔ̀ɔ̀ kɛɛ ɓaà-wùɖù dyììn ɖé sígìónɔ̀#3:1 Nyɔ ɖò se sígìónɔ̀-wùɖùɔ̀ xwíníín jɛ́ɛ́ dyuò ɓó kàǔn. mú.
2Óó Bounɓo, ḿ ɖǎ nì bɔ̃̌ wɔ̃́,
ké fã̀à dyíìn ḿ múin ɓó ɖɛ ɓě ɓɛ́ m̀ nyuó zɔ̃̌ɔ̀ kɛɛ jè.
Ɓó kàǔn wɛ̃ɛ, ɓɔ̌ɔ̀, nyu ɖɛ ɓěa ɖe,
ɓó à nììn tiɛ̀ mú.
Kɛbì m̀ mɛ kpáìn à dyoɖoún wɛ̃ɛ,
ɓɔ̌ɔ̀, ɓéɖé à wìì kɔ̃ ɖe.
3Gèɖèpɔ́ɔ̀ nì ɖe dyiɛń sɔ̀ìn ɖé Témàùn-pàɔ̀#3:3 Témàùn-pàɔ̀ nì ɖé Íɖɔ̀ùn-ɓòɖòɔ̀ kɔ̃. mú.
Gèɖèpɔ́ɔ̀ hwɛ̀ǐn-hwɛ̀ǐnɔ̀ nì ɖé Páwàɖàùn-tòɖòɔ̀ gbo sɔ̀ǐn.#3:3 Dà nìà kɛɛ, Híìbúɖúù-wùɖù mɔ̀ Sɛ́ɖà kɛɛ céè ɓó. Sɛ́ɖà-wùɖùɔ̀ se xwíníín jɛ́ɛ́ ɖò kɔ̃̀.
Ɔ dĩ́ín-dĩ̀ìnɔ̀ dyíìn dyɔɔ̀ dà séín dyi,
ké ɔ ɓàìn-ɓàìnɔ̀ dyíìn ɓóɖó-kpàà dà séín dyi.
4Ɔ dĩ́ín-dĩ̀ìnɔ̀ nì kà dyóɖó wóɖóà xwáɖáún wɛ̃.
Wɛ́ɖɛ́-wɛ́ɖɛ́ po sɔ̀ìn ɖé ɔ xwa kɔ̃̀ mú ɓɛ́ ɔ vǐè kà ɔ kpéɔ̀ kɛ.
5Ɔ ɖoɓo wɛ́ ɖé ɔ dyúa,
ké ɔ cɛ̃ɛ, ɓɛ́ gĩɔ ké ɔ ɖeín sí.
6Ti ɔ nyànà dyiɛɛ ní, nìí, ɓóɖó-kpàà túò dyi.
Ti ɔ gmɔìn dyiɛɛ ní, nìí, ɓóɖó-dù ɓěɔ̀ nyɔ ɓěɔ̀ dyɔɔ̀ tɛɖɛ wa gbɔi.
Ɔ nyuɛ ké toɖo vɛ̀nɛ̀ sùà ɓěɔ̀ wɛ̀ìn dyi,
ké ɔ nyuɛ ké toɖo-dyù ɓě kɔ̃̀ dya ɓɛ́ ɔ nàǒ zɔ̃̌ɔ̀ dyiɛɛ pa ɓóɖóún.
7Ké ḿ dyéɛ kà fũ̀à-fṹá nì Kúsàùn-nyɔ̀ ɓěɔ̀ nyuɛń nyɛ,
ké dyɔɔ̀ tɛɖɛ Míɖìàùn-nyɔ̀ ɓěɔ̀ gbɔiɛ.
8Óó Bounɓo, ní ɓěɔ̀ mɔ̀ nyɔ poà m̀ dyoɖoún wɛ̃ɛ̀?
Dyóóɔ̀ mɔ̀ nyɔ poà m̀ dyoɖo nɛɛ̀-nɛɛ̀ɔ̀ mú kɛɛ̀?
Bounɓo, m̀ dyììn ní-kpò mú,
ké dìì-pìɔ̌ mɔ̀ nì hwíì-sǒ,
ké m̀ nyí nì nyɔ ɓěɔ̀ pó-pó.
9M̀ ɖǎ nì pɔnɔɔ̀ ti dyéìn,
ké m̀ ɖǎ ti dyé, ɓɛ́ m̀ ké nì sé-kpìì ɓěɔ̀ po.
Ké m̀ nyuɛ ké zii-nì ɓěɔ̀ fá ɓóɖó-kpàà wɔ̃.#3:9 Vɔ́sì nìà kɛ kpa kòɛ̀ ɖò-ɖò ɖé Báɓò ɖíɛ́ ɓě mú, sepóɛɖé ɔ Híìbúɖúù-wùɖùɔ̀ kàmà múin wɔ̃́uń jè.
10Ti ɓɛ́ toɖo vɛ̀nɛ̀ ɓěɔ̀ dyé m̀ wɛ̃ɛ, wa tɛɖɛ kɔ̃in,
ké ní sɔ̀ìn ma ɖé dyɔún, ké ɔ púè.
Ní tɔ̀mɔ̀ǔn-tɔ̀mɔ̀ǔnɔ̀ kuɖu,
ké ɔ dyóó-kpɛ̀ɔ̀ ɖú dyií mu kpàǐ.
11Ti nì sé-kpìì ɓěɔ̀ nì mú ziɛ̌n,
ké nì ɖí fã-fãɔ̀ nì dyi vũàǔn wɛ̃ɛ,
dyóɖóɔ̀ kè dɛ̀nɛ̀ɔ̀ nyànà dyi, ké wa se daí sɔ̀ìn ɓɛ́ìn ɖé dyɔɔ̀ dyí.
12Ɓɔ̌ɔ̀, ɖé nì dyoɖo-hwòɖòɔ̀ múɛɛ, m̀ nà, ké m̀ cɛ̃ ɓóɖó-kpàà kpó.
Ti nì dyoɖo-hwòɖòɔ̀ dyá mìɔ kɛɛ,
m̀ síìn ɓóɖó-dù ɓěɔ̀ kɔ̃in.
13Bounɓo, m̀ dyi, ɓɛ́ m̀ ké nì nyɔ ɓěɔ̀ kè kã́á ɓɛ́ m̀ ɖǎà gãa póìn.
Ké m̀ wàìn hwòɖǒ-kɔ̃in-nyìnììn-ɓòɖòɔ̀ nàìn-nyɔ̀ɔ̀ dyi,
ké m̀ gbɔɔ̀ nyɔ séín sí ma ɔ ɖeín nyɛɛ mú.
14Ɔ mìɔùn nììn ɖíɔ̀ mɔ̀ ɖɛ m̀ fíèìn ɔ dúɔ̀.
Ké ti ɓɛ́ ɔ gàa-zà-nyɔ̀ ɓěɔ̀ dyà gana, ɓɛ́ wa ké à dyi gbɛ̀ìn nyɛɛ,
wa nì à dyɔ́ ɓaɖauń kà wa mu à kpã mànàìn kà nyɔ kéɔ́ kà gǎ-dyé-nyɔ̀ ɖò kpã mànàìn vǐè-kà kɛ.#3:13-14 Vɔ́sì ɓěɛ̀ kpa kòɛ̀ ɖò-ɖò ɖé Báɓò ɖíɛ́ ɓě mú, sepóɛɖé waà Híìbúɖúù-wùɖùɔ̀ kàmà múin wɔ̃́uń jè.
15Ɓɔ̌ɔ̀, m̀ nàìn nì sǒ ɓěɔ̀ dyóóɔ̀ kɔ̃in,
ké dyóó-kpɛ̀ ɓěɔ̀ ɖu vúú.
16Ti ḿ wɔ̃́ ɖɛ séín ɓě nìà kɛ jèɛɛ, ḿ tɛɖɛ kɔ̃in.
Ní wɔ̃-kpũ̀à ɓěɔ̀ tɛɖɛ, ké ní ɓo ɓěɔ̀ tɛɖɛ ḿ gboi,
ké ní kpóɖó-dyùàɔ̀ nì dĩ̀à-dĩ̀à.
Ní mu dyi kòùn gìɖìǐ,
ɓɛ́ ḿ ké ti ɓɛ́ Gèɖèpɔ́ɔ̀ muà nyɔ ɓě vɔ̃à à gboɛɛ gǎ kɔ̃ tòùn wɛ̃ɛ fòìn.
17Kɛbì féè-cù ɓěɔ̀ mɛ se bùèɛ,
mɔɔ ké géɖéè-gbǎ ɓěɔ̀ se tòɖòɛɛ,
kɛbì ɔ́ɖè ɓěɔ̀ mɛ se mú wóɖóɛ,
mɔɔ ké ɖɛ ɖò ké se ɖé geɖe ɓěɔ̀ gbo wóɖóɛɛ,
kɛbì ɓáɖáá ɖò mɛ se ɖé ɓáɖáá-kòò ɓěɔ̀ mú nìɛ,
mɔɔ ké ɓìɖǐ ɖò mɛ se ɖé ɓìɖǐ-gbòɔ̀ mú nìɛɛ,
18wɛ̃́ɛ́ kɛɛ, ní mu múàǔn kpáùn ɖé Bounɓoɔ̀ mú.
Ní mu múàǔn kpáùn ɖé Gèɖèpɔ́ɔ̀ mɔ̀à ní póìn-nyɔ̀ɔ̀ kɛɛ mú.
19Bounɓo Ɖɛɓíɔ́ɔ̀ mɔ̀ ḿ kpé-nyí-nyɔ̀.
Ɔ nyuɛ ké ḿ fṹà xwai kà déɖé nìà kɛ,
ké ɔ póìn ḿ ɖé toɖo ɓě dya.
Wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo. Ɔ mɛ ɓèɖèɛ̀n gbǎɖí-wùɖù mú.
Trenutno izbrano:
Hàbákù 3: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.