Ɛ́séɖɔ̀ 33
33
Bounɓoɔ̀ cɛ̃ɛ Éézùɖùɛ̀-nyɔ̀ ɓěɔ̀ gbo ɓɛ́ wa ké Sányà-tòɖòɔ̀ gbo sɔ̀
1Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “M̀ kè nyɔ ɓě ɓɛ́ m̀ zà ma kà ɖé Íjè-ɓòɖòɔ̀ kɔ̃ɛɛ mɛ sɔ̀ dà pá nìà kɛ mú, ɓɛ́ ɓě ké ɓóɖó ɓɛ́ ḿ ɖáìn zɔ̃̌ɔ̀ kà ɓě ɓǎ Ééɓòɖòhɛ̃́ɛ̀ kè Áázè ɔ kè Jékɔ̀ nyɛ́nɛ́ín nyɛɛ kɔ̃ mu. Ḿ cɛ̃ɛ zɔ̃̌ɔ̀ wa gbo kà ní mu ɓóɖóɔ̀ waà xwíníín-dyù ɓě nyíìn nyɛ. 2Ní mu ínjà ɖò ɖé ɓě dyúa ɖoɓoùn, ɓɛ́ ɔ ké ɓě nàìn, ké ní mu Kénà-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Hítì-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ ɖé ɓóɖóɔ̀ kɔ̃ dyi kúmúùn. 3Ɓóɖó kɔ̃̀ kɔ̃ ɓě nìà muɛń nyɛɛ mɔ̀ bãa-ɓòɖò. Kɛɛ ḿ kè ɓě se muɛ́ mu, mɔ́ún kɔ̃̀ ɖà ɓě mú gbɔɔ̀ ɓó hwìèɔ̀ kɔ̃, sepóɛɖé ɓě mɔ̀ dú-kùmù-nyɔ̀ ɓě.”
4Ti ɓɛ́ nyɔ ɓěɔ̀ wɔ̃́ ma hwòɖǒ-ɖé-ɖei-kpá-wùɖù ɓěɔ̀ kɛɛ, wa kpá ma wìǐn mìɔ, ké wa nyɔ ɖò se ma bɛ̃̀ìn-ɖɛ̀ ɖò bũ̌ po ɖe fɔɔ cá. 5Wa nyuɛ ma náa, sepóɛɖé Bounɓoɔ̀ ɖǎa ma Mózè gbo cɛ̃, ké ɔ ɖá, “M̀ mɛ cɛ̃ɛ Éézùɖùɛ̀-dyù ɓěɔ̀ gbo kà wa mɔ̀ dú-kùmù-nyɔ̀ ɓěɛ. Ɔ jǔ ké ḿ kè wa dyi mú naìn ɓó ti tííwè mú dyɛ mɔ̀ùn ní, nìí, ní mu wa mú gbɔɔ̀ùn. Ɓó kàǔn wɛ̃ɛ, wa mɛ zà waà bɛ̃̀ìn-ɖɛ̀ ɓěɔ̀ bũ̌in, ké ní mu ɖɛ ḿ ké wa mú nyùìn nyɛɛ jè hwìɖǐi poìn.” 6Ɔ jèɛɛ, Éézùɖùɛ̀-nyɔ̀ ɓěɔ̀ zà ma waà bɛ̃̀ìn-ɖɛ̀ ɓěɔ̀ bũ̌in ɖé Sányà-tòɖòɔ̀ gbo, ké sɔ̀ìn ɓó ké dyúa muɛɛ, wa se ma bɛ̃̀ìn-ɖɛ̀ ɖò bũ̌ po ɖe fɔɔ cá.
Bounɓoɔ̀ jàɖàìn-gbòɔ̀
7Sɔ̀ìn ɓóɛ gboɛɛ, ɖɛ Mózè ɖɛ̀ɓɛ̀ ma nyu ɖɛ̀ǐn nyɛɛ mɔ̀, ɔ ɖú ma jàɖàìn-gbò ɖò dyí, ké ɔ nyànàìn ma dyi ɖé jàɖàìn-hwɔ̀ɖɔ̀ɔ̀ ɖeín dà vɛ̃in ɖò, ké ɔ ɖáìn ma jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéìn nyɛ. Nyɔ ɖò dyi ma Bounɓoɔ̀ gbo wùɖùɛ̀ mɔ́ ɓá ɖɛ ɖò jè dyí ní, ɔ mu ma ɖé jàɖàìn-gbòɔ̀ gbo, ɖé hwɔɖɔɔ̀ ɖeín. 8Ti séín ɓɛ́ Mózè mu ma ɖé jàɖàìn-gbòɔ̀ gbo muùn wɛ̃ɛ ní, nyɔ séín ɓěɔ̀ sɔ̀ dyí, ké wa nyànà ɓó waà jàɖàìn-gbò ɓěɔ̀ wĩín dyi, ké wa gã̀ ma ɖé Mózè gbo gmɔ̀ǔn dyi tee, ké ɔ wáɖáìn ma ɖé jàɖàìn-gbòɔ̀ mú hwɛ̀. 9Ti séín ɓɛ́ Mózè dyá ma ɖé jàɖàìn-gbòɔ̀ mú nyɛ̀nɛ̀ɛ̀ kɛɛ ní, nìí, ní-kpòɔ̀ dyi ma ɓó jàɖàìn-gbòɔ̀ wĩín, ké Bounɓoɔ̀ kè Mózè wuɖuìn ma gbo. 10Ti séín ɓɛ́ nyɔ ɓěɔ̀ dyé ma ní-kpòɔ̀ ɓó jàɖàìn-gbòɔ̀ wĩín nyɛɛ, nìí, wa ɖò-ɖò séín nyànà ɓó waà jàɖàìn-gbò ɓěɔ̀ wĩín dyi, ké wa taɓa ma dú hwuɖu. 11Bounɓoɔ̀ kè Mózè xwɛ̃́ìn ma bũ̌in, ké wa zĩàìn ma wuɖuí kà gàa ɖò kè ɔ ɓǎto dèà dɔ́ɔ́ kɛ. Ɔ ɖǎ ná nìǐn, nìí, Mózè mu ma ɖé jàɖàìn-hwɔ̀ɖɔ̀ɔ̀ mú ɖe. Kɛɛ gàa-dyù gmɔ̀ kɔ̃̀ nyɛ́nɛ́ mɔ̀à Jasúé mɔ̀à Núùn dyú-gàà, ɓɛ́ ɔ mɔ̀à Mózèɛ̀ sɔ̃-xwíɖíi-dè-nyɔ̀ɔ̀ kɛɛ sè ma ɖé jàɖàìn-gbòɔ̀ mú ɖe.
Bounɓoɔ̀ ɖáìn ɔ nyɔ ɓěɔ̀ nyɛ́nɛ́ín kà ɔ mu ɓó wa gbo nììn nyɛ
12Ɓó tia ɓaɖaa, Mózè cɛ̃ɛ ma Bounɓoɔ̀ gbo, ké ɔ ɖá, “M̀ cɛ̃ɛ ḿ gbo kà ḿ mɛ nàìn nyɔ ɓěɛ̀ kɛ. Kɛɛ m̀ séèɛ̀ ḿ gbo cɛ̃ ɓá nyɔ nì mu tòùn ɓɛ́ ḿ kè ɔ ké mú naìn nyɛɛ jè dyí. Ké m̀ cɛ̃ɛ kà m̀ dyuò ḿ dyí nɔ̀mɔ̀ dyíin ɔ kè kà nì hwòɖǒ dèìn ḿ múin nyɛ. 13Kà ɓɛ́ nì hwòɖǒ dèàìn ḿ múin nyɛɛ, ɓɔ̌ɔ̀, ní ɓaà m̀ ní, zàìn ḿ nì hwòɖǒɛ̀-gbɔ-po-ɖɛ̀ ɓěɔ̀ da, nìí, ɓɛ́ ḿ ké nì kũ̀à nyu, ɓɛ́ nì hwòɖǒ ké ḿ múin dèìn kánáá pū. Ké ɔ mɛ nì m̀ hwìɖǐi kà ɓóɖó-dù nìà kɛ mɔ̀ nì nyɔ ɓě kɛ.”
14Hwɛ̀ ké Bounɓoɔ̀ zà ma ɖé wuɖu, ké ɔ ɖá, “Ḿ kè ɓě mu mú naìn, ké ní muɛ nyuùn ɓɛ́ ɓě ké cĩ́ ɖé gìɖìǐ mú.”
15Ké Mózè cɛ̃ɛ ma ɔ gbo, ké ɔ ɖá, “Ɔ jǔ ké à kè mɔ̀ se mú naǐn mu ní, mɔ̀ǔn ɖá m̀ kéɛ à gbo cɛ̃ kà à ké pá nìà kɛ mú daí sɔ̀ìn nyɛ. 16À kè mɔ̀ se mú naìn ní, xwɛ̌ nyɔ ɖò ɓɛ́ìn dyuòɛ̀ kà nì hwòɖǒ dèìn ḿ kè nì nyɔ ɓěɛ̀ múin nyɛ́? Ɖɛ́ kà kò ɖò mu zaìn gbo jǔùn ɓó à mɔ̀à nì nyɔ ɓěɛ̀ kɛ kè nyɔ tɔ̀ɔ̀ séín ɓě nìà ɓóɖó-kpàà kɔ̃ɛɛ pṹa kɛ́?”
17Ké Bounɓoɔ̀ cɛ̃ɛ ma ɔ gbo, ké ɔ ɖá, “Ní mu ɖɛ jɛ́ɛ́ m̀ zɔ̀à kɛɛ nyuùn, sepóɛɖé ní hwòɖǒ dèìn m̀ múin, ké ḿ dyuò m̀ dyí nɔ̀mɔ̀ dyíin.”
18Hwɛ̀ ké Mózè ɖá, “Ɓó kàǔn wɛ̃ɛ, ní ɓaà m̀ ní, tɛ̀mɛ̀ìn nì dĩ́ín-dĩ̀ìnɔ̀ ḿ dyí.”
19Ké Bounɓoɔ̀ ɖá, “Ní muɛ nyuùn ɓɛ́ ní dĩ́ín-dĩ̀ìn gànáɔ̀ ké ɓó m̀ dyúa zĩ̀ìn, ké ní mu ní Bounɓo-nyɛ̀nɛ̀ɔ̀ jè zio mú pòìn ɓó m̀ dyúa. Ḿ dyé nyɔ ní hwòɖǒ mɔ́ wìǐn dyéɛ dyiɛɛ wìǐn, ké nyɔ ní hwòɖǒ mɔ́ jĩ́á-jè dyí nyuɛ dyiɛɛ, ḿ nyu ɔ jĩ́á-jè dyí. 20M̀ se ní dyúa dyéɛ ɓɛ́ìn, sepóɛɖé nyɔ ɖò ní dyé ní dyúa hwɛ̀ ké ɔ ní cĩ́ ɖe. 21Ɔ jèɛɛ, m̀ mɛ nyànà sɔ́ɔ́-kpò ɓɛ́ ɔ nìà dà ḿ wáún wɛ̃ɛ kɔ̃ dyi. 22Ti ɓɛ́ ní dĩ́ín-dĩ̀ìnɔ̀ mu m̀ dyíin ziɛń dyiìn nyɛɛ, ní mu m̀ ɖé ɓí nìà sɔ́ɔ́ɔ̀ múɛɛ mú poùn, ɓɛ́ ḿ ké ɓíɔ̀ xwa wĩín ɓáìn. Ní xwaɔ̀ mu ɓó dyi gã̀ùn tee, ɓɛ́ ḿ ké m̀ dyíin zi hwɛ̀. 23Ḿ ɖǎ zi ní, ní mu ɓíɔ̀ xwa wĩín zàùn, ké nì mu ḿ kɔ̃ún dyi gmɔ̀ùn, kɛɛ m̀ se ɓéɖé ɓɛ́ m̀ ké ní dyúa dyé fɔɔ.”
Trenutno izbrano:
Ɛ́séɖɔ̀ 33: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.
Ɛ́séɖɔ̀ 33
33
Bounɓoɔ̀ cɛ̃ɛ Éézùɖùɛ̀-nyɔ̀ ɓěɔ̀ gbo ɓɛ́ wa ké Sányà-tòɖòɔ̀ gbo sɔ̀
1Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “M̀ kè nyɔ ɓě ɓɛ́ m̀ zà ma kà ɖé Íjè-ɓòɖòɔ̀ kɔ̃ɛɛ mɛ sɔ̀ dà pá nìà kɛ mú, ɓɛ́ ɓě ké ɓóɖó ɓɛ́ ḿ ɖáìn zɔ̃̌ɔ̀ kà ɓě ɓǎ Ééɓòɖòhɛ̃́ɛ̀ kè Áázè ɔ kè Jékɔ̀ nyɛ́nɛ́ín nyɛɛ kɔ̃ mu. Ḿ cɛ̃ɛ zɔ̃̌ɔ̀ wa gbo kà ní mu ɓóɖóɔ̀ waà xwíníín-dyù ɓě nyíìn nyɛ. 2Ní mu ínjà ɖò ɖé ɓě dyúa ɖoɓoùn, ɓɛ́ ɔ ké ɓě nàìn, ké ní mu Kénà-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Hítì-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ ɖé ɓóɖóɔ̀ kɔ̃ dyi kúmúùn. 3Ɓóɖó kɔ̃̀ kɔ̃ ɓě nìà muɛń nyɛɛ mɔ̀ bãa-ɓòɖò. Kɛɛ ḿ kè ɓě se muɛ́ mu, mɔ́ún kɔ̃̀ ɖà ɓě mú gbɔɔ̀ ɓó hwìèɔ̀ kɔ̃, sepóɛɖé ɓě mɔ̀ dú-kùmù-nyɔ̀ ɓě.”
4Ti ɓɛ́ nyɔ ɓěɔ̀ wɔ̃́ ma hwòɖǒ-ɖé-ɖei-kpá-wùɖù ɓěɔ̀ kɛɛ, wa kpá ma wìǐn mìɔ, ké wa nyɔ ɖò se ma bɛ̃̀ìn-ɖɛ̀ ɖò bũ̌ po ɖe fɔɔ cá. 5Wa nyuɛ ma náa, sepóɛɖé Bounɓoɔ̀ ɖǎa ma Mózè gbo cɛ̃, ké ɔ ɖá, “M̀ mɛ cɛ̃ɛ Éézùɖùɛ̀-dyù ɓěɔ̀ gbo kà wa mɔ̀ dú-kùmù-nyɔ̀ ɓěɛ. Ɔ jǔ ké ḿ kè wa dyi mú naìn ɓó ti tííwè mú dyɛ mɔ̀ùn ní, nìí, ní mu wa mú gbɔɔ̀ùn. Ɓó kàǔn wɛ̃ɛ, wa mɛ zà waà bɛ̃̀ìn-ɖɛ̀ ɓěɔ̀ bũ̌in, ké ní mu ɖɛ ḿ ké wa mú nyùìn nyɛɛ jè hwìɖǐi poìn.” 6Ɔ jèɛɛ, Éézùɖùɛ̀-nyɔ̀ ɓěɔ̀ zà ma waà bɛ̃̀ìn-ɖɛ̀ ɓěɔ̀ bũ̌in ɖé Sányà-tòɖòɔ̀ gbo, ké sɔ̀ìn ɓó ké dyúa muɛɛ, wa se ma bɛ̃̀ìn-ɖɛ̀ ɖò bũ̌ po ɖe fɔɔ cá.
Bounɓoɔ̀ jàɖàìn-gbòɔ̀
7Sɔ̀ìn ɓóɛ gboɛɛ, ɖɛ Mózè ɖɛ̀ɓɛ̀ ma nyu ɖɛ̀ǐn nyɛɛ mɔ̀, ɔ ɖú ma jàɖàìn-gbò ɖò dyí, ké ɔ nyànàìn ma dyi ɖé jàɖàìn-hwɔ̀ɖɔ̀ɔ̀ ɖeín dà vɛ̃in ɖò, ké ɔ ɖáìn ma jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéìn nyɛ. Nyɔ ɖò dyi ma Bounɓoɔ̀ gbo wùɖùɛ̀ mɔ́ ɓá ɖɛ ɖò jè dyí ní, ɔ mu ma ɖé jàɖàìn-gbòɔ̀ gbo, ɖé hwɔɖɔɔ̀ ɖeín. 8Ti séín ɓɛ́ Mózè mu ma ɖé jàɖàìn-gbòɔ̀ gbo muùn wɛ̃ɛ ní, nyɔ séín ɓěɔ̀ sɔ̀ dyí, ké wa nyànà ɓó waà jàɖàìn-gbò ɓěɔ̀ wĩín dyi, ké wa gã̀ ma ɖé Mózè gbo gmɔ̀ǔn dyi tee, ké ɔ wáɖáìn ma ɖé jàɖàìn-gbòɔ̀ mú hwɛ̀. 9Ti séín ɓɛ́ Mózè dyá ma ɖé jàɖàìn-gbòɔ̀ mú nyɛ̀nɛ̀ɛ̀ kɛɛ ní, nìí, ní-kpòɔ̀ dyi ma ɓó jàɖàìn-gbòɔ̀ wĩín, ké Bounɓoɔ̀ kè Mózè wuɖuìn ma gbo. 10Ti séín ɓɛ́ nyɔ ɓěɔ̀ dyé ma ní-kpòɔ̀ ɓó jàɖàìn-gbòɔ̀ wĩín nyɛɛ, nìí, wa ɖò-ɖò séín nyànà ɓó waà jàɖàìn-gbò ɓěɔ̀ wĩín dyi, ké wa taɓa ma dú hwuɖu. 11Bounɓoɔ̀ kè Mózè xwɛ̃́ìn ma bũ̌in, ké wa zĩàìn ma wuɖuí kà gàa ɖò kè ɔ ɓǎto dèà dɔ́ɔ́ kɛ. Ɔ ɖǎ ná nìǐn, nìí, Mózè mu ma ɖé jàɖàìn-hwɔ̀ɖɔ̀ɔ̀ mú ɖe. Kɛɛ gàa-dyù gmɔ̀ kɔ̃̀ nyɛ́nɛ́ mɔ̀à Jasúé mɔ̀à Núùn dyú-gàà, ɓɛ́ ɔ mɔ̀à Mózèɛ̀ sɔ̃-xwíɖíi-dè-nyɔ̀ɔ̀ kɛɛ sè ma ɖé jàɖàìn-gbòɔ̀ mú ɖe.
Bounɓoɔ̀ ɖáìn ɔ nyɔ ɓěɔ̀ nyɛ́nɛ́ín kà ɔ mu ɓó wa gbo nììn nyɛ
12Ɓó tia ɓaɖaa, Mózè cɛ̃ɛ ma Bounɓoɔ̀ gbo, ké ɔ ɖá, “M̀ cɛ̃ɛ ḿ gbo kà ḿ mɛ nàìn nyɔ ɓěɛ̀ kɛ. Kɛɛ m̀ séèɛ̀ ḿ gbo cɛ̃ ɓá nyɔ nì mu tòùn ɓɛ́ ḿ kè ɔ ké mú naìn nyɛɛ jè dyí. Ké m̀ cɛ̃ɛ kà m̀ dyuò ḿ dyí nɔ̀mɔ̀ dyíin ɔ kè kà nì hwòɖǒ dèìn ḿ múin nyɛ. 13Kà ɓɛ́ nì hwòɖǒ dèàìn ḿ múin nyɛɛ, ɓɔ̌ɔ̀, ní ɓaà m̀ ní, zàìn ḿ nì hwòɖǒɛ̀-gbɔ-po-ɖɛ̀ ɓěɔ̀ da, nìí, ɓɛ́ ḿ ké nì kũ̀à nyu, ɓɛ́ nì hwòɖǒ ké ḿ múin dèìn kánáá pū. Ké ɔ mɛ nì m̀ hwìɖǐi kà ɓóɖó-dù nìà kɛ mɔ̀ nì nyɔ ɓě kɛ.”
14Hwɛ̀ ké Bounɓoɔ̀ zà ma ɖé wuɖu, ké ɔ ɖá, “Ḿ kè ɓě mu mú naìn, ké ní muɛ nyuùn ɓɛ́ ɓě ké cĩ́ ɖé gìɖìǐ mú.”
15Ké Mózè cɛ̃ɛ ma ɔ gbo, ké ɔ ɖá, “Ɔ jǔ ké à kè mɔ̀ se mú naǐn mu ní, mɔ̀ǔn ɖá m̀ kéɛ à gbo cɛ̃ kà à ké pá nìà kɛ mú daí sɔ̀ìn nyɛ. 16À kè mɔ̀ se mú naìn ní, xwɛ̌ nyɔ ɖò ɓɛ́ìn dyuòɛ̀ kà nì hwòɖǒ dèìn ḿ kè nì nyɔ ɓěɛ̀ múin nyɛ́? Ɖɛ́ kà kò ɖò mu zaìn gbo jǔùn ɓó à mɔ̀à nì nyɔ ɓěɛ̀ kɛ kè nyɔ tɔ̀ɔ̀ séín ɓě nìà ɓóɖó-kpàà kɔ̃ɛɛ pṹa kɛ́?”
17Ké Bounɓoɔ̀ cɛ̃ɛ ma ɔ gbo, ké ɔ ɖá, “Ní mu ɖɛ jɛ́ɛ́ m̀ zɔ̀à kɛɛ nyuùn, sepóɛɖé ní hwòɖǒ dèìn m̀ múin, ké ḿ dyuò m̀ dyí nɔ̀mɔ̀ dyíin.”
18Hwɛ̀ ké Mózè ɖá, “Ɓó kàǔn wɛ̃ɛ, ní ɓaà m̀ ní, tɛ̀mɛ̀ìn nì dĩ́ín-dĩ̀ìnɔ̀ ḿ dyí.”
19Ké Bounɓoɔ̀ ɖá, “Ní muɛ nyuùn ɓɛ́ ní dĩ́ín-dĩ̀ìn gànáɔ̀ ké ɓó m̀ dyúa zĩ̀ìn, ké ní mu ní Bounɓo-nyɛ̀nɛ̀ɔ̀ jè zio mú pòìn ɓó m̀ dyúa. Ḿ dyé nyɔ ní hwòɖǒ mɔ́ wìǐn dyéɛ dyiɛɛ wìǐn, ké nyɔ ní hwòɖǒ mɔ́ jĩ́á-jè dyí nyuɛ dyiɛɛ, ḿ nyu ɔ jĩ́á-jè dyí. 20M̀ se ní dyúa dyéɛ ɓɛ́ìn, sepóɛɖé nyɔ ɖò ní dyé ní dyúa hwɛ̀ ké ɔ ní cĩ́ ɖe. 21Ɔ jèɛɛ, m̀ mɛ nyànà sɔ́ɔ́-kpò ɓɛ́ ɔ nìà dà ḿ wáún wɛ̃ɛ kɔ̃ dyi. 22Ti ɓɛ́ ní dĩ́ín-dĩ̀ìnɔ̀ mu m̀ dyíin ziɛń dyiìn nyɛɛ, ní mu m̀ ɖé ɓí nìà sɔ́ɔ́ɔ̀ múɛɛ mú poùn, ɓɛ́ ḿ ké ɓíɔ̀ xwa wĩín ɓáìn. Ní xwaɔ̀ mu ɓó dyi gã̀ùn tee, ɓɛ́ ḿ ké m̀ dyíin zi hwɛ̀. 23Ḿ ɖǎ zi ní, ní mu ɓíɔ̀ xwa wĩín zàùn, ké nì mu ḿ kɔ̃ún dyi gmɔ̀ùn, kɛɛ m̀ se ɓéɖé ɓɛ́ m̀ ké ní dyúa dyé fɔɔ.”
Trenutno izbrano:
:
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.