Ɛ́séɖɔ̀ 29
29
Ɖɛ ɓá sáa-zà-nyɔ̀ ɓěɔ̀ wáká po jè dyíɛ
(Ɖìvéɖékɔ̀ 8:1-36)
1Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Ɖɛ ɓě m̀ mɛ nyu ɓɛ́ m̀ ké Eɖóún kè ɔ dyú-gàà ɓěɔ̀ wáká po, ɓɛ́ wa ké ní sáa-zà-nyɔ̀ ɓě jǔɛɛ, wa kɛà kɛ̀. M̀ mɛ ɖú ɓìɖǐ ɓíɔ́ gmɔ̀ ɖò kè ɓáɖáá ɓíɔ́ sɔ̃́ dyí. Wa mɛ ɓɔ́ kɛɛ ɖò ɓéɖéɛ. 2Ké m̀ mɛ ɖú fáɖáɓà nìɛ̀-nìɛ̀ dyí, ɓɛ́ m̀ kéɛ bɛɖɛɛ̀ se dyáìn-ɖɛ̀ gbo nìɛɛ dú kò-kò ɓě mú nyu. Bɛɖɛɛ̀ ɓěɔ̀ mɛ mɔ̀ bɛɖɛɛ̀-kpò kuún-kuún kè bɛɖɛɛ̀ ɓɛ́ wa caìn cánáa ɔ kè bɛɖɛɛ̀ se mú ku, ɓɛ́ wa fiè cáná bũ̌in nyɛ. 3Ké m̀ mɛ po bɛɖɛɛ̀ ɓěɔ̀ tìě dyúáɖò mú, ɓɛ́ m̀ kéɛ ḿ nyí. M̀ mɛ dyà wa kè ɓìɖǐ ɓíɔ́ɔ̀ kè ɓáɖáá ɓíɔ́ sɔ̃́ɔ̀ ɓó ḿ dyúa.
4“Ɔ ɖǎ ná nìǐn, m̀ mɛ dyà Eɖóún kè ɔ dyú-gàà ɓěɔ̀ ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ muà dyéìn nyɛɛ wĩín, ɓɛ́ wa ké bũ̌in dèɖè. 5Ké m̀ mɛ ɖú ɖɔ ɓě ɓɛ́ nyɔ mɔ̀ sáa-zà-nyɔ̀ vɛ̀nɛ̀ɔ̀ kɛɛ ké mú poɛɛ dyí, ɓɛ́ m̀ ké wa Eɖóún mú po. Kĩ́ín-kĩ́ín nyɛɛ, m̀ mɛ po ɔ gã́ùn xwã́-xwã́ɔ̀ mú, ɓɛ́ m̀ ké gã́ùn zɛinɔ̀ ɓóɛ kɔ̃in po, ɓɛ́ m̀ ké ífɔ̀ɔ̀ ɓóɛ kɔ̃in po, ɓɛ́ m̀ ké gbo-jìnììn-ɖɛ̀ ɖaɓa-ɖaɓa nɔ̀mɔ̀ dyíin nì ífɔ̀ɔ̀ wɔ̃ɛɛ sã, ɓɛ́ m̀ ké ɔ kɛ́í-jìɖǐ-ɖɛ̀ɔ̀ kɛ́ dyéɖéí jìɖǐ. 6Ɔ ɖǎ ná nìǐn, m̀ mɛ dèìn ɔ dúi-bĩìn-ɖɔ̀ ɓɛ́ wa ɖǎ páɖá kɛɛ dú, ɓɛ́ m̀ kéɛ góò-pĩ̀à ɓɛ́ ɔ tɛ̀mɛ̀ìn nyɔǔn dyí kà ɔ ɖǎ wáká kpá ɓó ḿ bììɛɛ dyúa dèìn. 7Ké m̀ mɛ ɖú dúún-po-cànàɔ̀ dyí, ɓɛ́ m̀ kéɛ ɔ dúún púè.
8“Ɔ ɖǎ ná nìǐn, m̀ mɛ dyà ɔ dyú-gàà ɓěɔ̀, ɓɛ́ m̀ ké wa gã́ùn ɓě mú po, 9ɓɛ́ m̀ ké wa gbo-jìnììn-ɖɛ̀ ɓě gbo jìnììn, hwɛ̀ ɓɛ́ m̀ ké wa dú-jìnììn-ɖɛ̀ ɓě dú jìnììn. Kǎà m̀ mɛ nyu Eɖóún kè ɔ dyú-gàà ɓěɔ̀ kũ̀à kɔ̃ún poɛ. Sáa-zà-kũ̀àɔ̀ mu waà kũ̀à jǔùn kánáá pū.
10“Ɔ ɖǎ ná nìǐn, m̀ mɛ kpa ɓìɖǐ ɓíɔ́ɔ̀ ɓó jàɖàìn-gbòɔ̀ wĩín, ɓɛ́ Eɖóún kè ɔ dyú-gàà ɓěɔ̀ kéɛ sɔ̃ dúún dè. 11Ké m̀ mɛ ɖáɓáìn ɓìɖǐ ɓíɔ́ɔ̀ ɓó ḿ dyúa ɓó jàɖàìn-gbòɔ̀ wĩín. 12Ké m̀ mɛ ɖú ɓìɖǐ ɓíɔ́ɔ̀ nyɔmɔɔ̀ ɖò dyí, ɓɛ́ m̀ kéɛ jìì mánáín ɓéɖéìn, ɓɛ́ m̀ kéɛ ɖɛ hwɔìn nimii-gmɛ̌ ɓě nìà sáa-kɔ̃-zàìn-gbààɔ̀ gã hĩinyɛɔ̀ kɔ̃ɛɛ bũ̌ po, ɓɛ́ m̀ ké nyɔmɔɔ̀ nyɔ sè ɓóɛɛ sáa-kɔ̃-zàìn-gbààɔ̀ gbɔí púè. 13Ɔ ɖǎ ná nìǐn, m̀ mɛ ɖú ɓìɖǐɔ̀ cáná séín ɓáìn mɛ́ɔ̀ bũ̌in nyɛ kèɛ̀ pìùɔ̀ dà kpa ɖɛɔ̀ kèɛ̀ pɔnɔ-mɛ́ sɔ̃́ɔ̀ kè cáná ɓáìn wa kɔ̃in nyɛɛ dyí, ɓɛ́ m̀ kéɛ ɓóɛ gbààɔ̀ kɔ̃ fɔ̃̀ìn. 14Kɛɛ m̀ mɛ fɔ̃̀ìn ɓìɖǐ ɓíɔ́ɔ̀ fɔ́ɔ̀ kèɛ̀ kúɖúùɔ̀ kèɛ̀ mɛ́ɔ̀ ɖé jàɖàìn-hwɔ̀ɖɔ̀ɔ̀ ɖeín. Ɓìɖǐ ɓíɔ́ɔ̀ mɔ̀ nàmàǔn-sàǎ-zàìn-ɖɛ̀.
15“Ɔ ɖǎ ná nìǐn, m̀ mɛ ɖú ɓáɖáá ɓíɔ́ ɓěɔ̀ ɖò dyí, ɓɛ́ Eɖóún kè ɔ dyú-gàà ɓěɔ̀ kéɛ sɔ̃ dúún dè. 16Ké m̀ mɛ ɖáɓáa, ɓɛ́ m̀ kéɛ nyɔmɔɔ̀ dyí ɖú, ɓɛ́ m̀ kéɛ sáa-kɔ̃-zàìn-gbààɔ̀ wáká séínɔ̀ bũ̌in mɛ́nɛ́ìn. 17Ké m̀ mɛ cɛ̃ìn ɓáɖáá ɓíɔ́ɔ̀ dyi, ɓɛ́ m̀ kéɛ mɛ́ ɓěɔ̀ kèɛ̀ pɔ̃́ sɔ̃́ɔ̀ wɔɔ̀, ɓɛ́ m̀ ké wa kèɛ̀ dúɔ̀ kèɛ̀ suaɖɛ̀ tɔ̀ɔ̀ ɓěɔ̀ dyí poìn. 18Ɔ ɖǎ ná nìǐn, m̀ mɛ fɔ̃̀ìn ɓáɖáá-ɓíɔ́-kù gànáɔ̀ ɓó gbààɔ̀ kɔ̃. Ɔ mɔ̀ fɔ̃ɔ-sàǎ-zàìn-ɖɛ̀ ɓó ḿ bìì. Ɔ mɔ̀ nyíí-ɖɛ̀ ɓɛ́ ɔ mɔ̀ ɖii-ɖɛ̀ kɔ̃̀ nyɔ́ dè ḿ hwìɖǐiɛ.
19“Ɔ ɖǎ ná nìǐn, m̀ mɛ ɖú ɓáɖáá ɓíɔ́ tɔ̀ɔ̀ dyí, ɓɛ́ Eɖóún kè ɔ dyú-gàà ɓěɔ̀ kéɛ sɔ̃ dúún dè ɖekè. 20Ké m̀ mɛ ɖáɓáa, ɓɛ́ m̀ kéɛ nyɔmɔɔ̀ ɖò dyí ɖú, ɓɛ́ m̀ kéɛ Eɖóún kè ɔ dyú-gàà ɓěɔ̀ ɖiaún-ɖùǔ-téé ɓěɔ̀ kè waà ɖiaùn-sɔ̃̀ɔ̀ jìì-kpòɖò ɓěɔ̀ ɔ kè waà ɖiaùn-ɓòɔ̀ ɓìɛ̀-kpòɖò ɓěɔ̀ bũ̌ po. Ɔ ɖǎ ná nìǐn, m̀ mɛ mɛ́nɛ́ìn nyɔmɔɔ̀ nyɔ sè ɓóɛɛ gbààɔ̀ wáká séínɔ̀ bũ̌in. 21Ké m̀ mɛ ɖú nyɔmɔɔ nìà ɓó gbààɔ̀ kɔ̃ɛɛ ɖò kè dúún-po-cànàɔ̀ ɖò dyí, ɓɛ́ m̀ kéɛ Eɖóún kè ɔ mú-po-ɖɔ̀ɔ̀ kè ɔ dyú-gàà ɓěɔ̀ kè wa nììn mú-po-ɖɔ̀ ɓěɔ̀ kɔ̃in mɛ́nɛ́ìn. Ɔ dyi ná nìǐn, nìí, Eɖóún kè ɔ dyú-gàà ɓěɔ̀ kè waà mú-po-ɖɔ̀ ɓěɔ̀ mu wáká kpáùn ɓó ḿ bìì.
22“Ɔ ɖǎ ná nìǐn, m̀ mɛ ɖú ɓáɖáá ɓíɔ́ɔ̀ cáná séín nìɛ̀ múɛɛ dyí, ɓɛ́ ɔ ké nyɔ-kũ̀à-kɔ̃ún-po-sàǎ-zàìn-ɖɛ̀ jǔ. Cáná-dà ɓěɔ̀ mɔ̀ ɔ vɔ̃-gbòò nì cánáúnɔ̀ kè cáná séín ɓáìn ɔ mɛ́ɔ̀ bũ̌in nyɛ kèɛ̀ pìùɔ̀ dà kpa ɖɛɔ̀ kèɛ̀ pɔnɔ-mɛ́ sɔ̃́ɔ̀ kè cáná ɓáìn wa kɔ̃in nyɛ kèɛ̀ ɖiaún-pɔ̃̀ɔ̀. 23Ké m̀ mɛ zà bɛɖɛɛ̀-kpò ɖò-ɖò ɖé tìě kɔ̃̀ mú ɓɛ́ bɛɖɛɛ̀ se dyáìn-ɖɛ̀ gbo nìɛɛ dú kò-kò ɓěɔ̀ nìà kɛ. Ɔ mɔ̀ bɛɖɛɛ̀ ɓɛ́ m̀ poà wáká ɓó ḿ bììɛ. Bɛɖɛɛ̀ ɓěɔ̀ mɛ mɔ̀ bɛɖɛɛ̀-kpò kuún-kuún ɖò kè bɛɖɛɛ̀-kpò ɓɛ́ wa nyùìn kà cáná kɛɛ ɖò ɔ kè bɛɖɛɛ̀-kpò se mú kuɛɛ ɖò. 24Ké m̀ mɛ nyí ɖɛ séín ɓěɛ̀ Eɖóún kè ɔ dyú-gàà ɓěɔ̀ xwa, ɓɛ́ wa ké wa dyi vũà, ɓɛ́ wa ké dyi-vũà-nyìǐ-ɖɛ̀ jǔ ɓó ḿ bìì. 25Ɔ ɖǎ ná nìǐn, m̀ mɛ zàà wa xwa, ɓɛ́ m̀ kéɛ gbààɔ̀ kɔ̃ fɔ̃̀ìn ɓó fɔ̃ɔ-sàǎ-zàìn-ɖɛ̀ɔ̀ kɔ̃in, ɓɛ́ ɔ ké ɖii-ɖɛ̀-nyìǐ-ɖɛ̀ kɔ̃̀ nyɔ́ dè ḿ hwìɖǐiɛɛ jǔ.
26“Ɔ ɖǎ ná nìǐn, m̀ mɛ zà ɓó ɓáɖáá ɓíɔ́ ɓáà Eɖóún kè ɔ dyú-gàà ɓěɔ̀ kũ̀à kɔ̃ún po jè dyíɛɛ kɛ́ɔ̀, ɓɛ́ m̀ kéɛ dyi vũà, ɓɛ́ ɔ ké dyi-vũà-nyìǐ-ɖɛ̀ jǔ ɓó ḿ bìì. Ɔ ɖǎ ná nìǐn, ɔ mɔ̀ǎ nììn.
27“Ti séín wa mu sáa-zà-nyɔ̀ ɖò kũ̀à kɔ̃ún poùn wɛ̃ɛ, nìí, ɓáɖáá ɓíɔ́ɔ̀ kɛ́ kèɛ̀ ɖiaún-pɔ̃̀ ɓɛ́ sáa-zà-nyɔ̀ɔ̀ muà dyi vũàùn wɛ̃ɛ ɓéɖé wa ké wáká kpá ɓó ḿ bìì, ɓɛ́ wa ké sáa-zà-nyɔ̀ ɓěɔ̀ kɔ̃̀ɔ̀-ɖɛ̀ jǔ. 28Kà dyúáɖòɔ̀ kǎà Éézùɖùɛ̀-dyù ɓěɔ̀ mɛ nyuɛ ɓá gbo-kpɔ̃ìn-sàǎ-zàìn-ɖɛ̀ ɓěɔ̀ jè dyí. Wa mɛ nyí ḿ gbo-kpɔ̃ìn-sàǎ-zàìn-ɖɛ̀ ɓěɔ̀ kɛ́ ɓěɔ̀ kèɛ̀ ɖiaún-pɔ̃̀ ɓěɔ̀, ɓɛ́ wa ké sáa-zà-nyɔ̀ ɓěɔ̀ nììn jǔ. Kǎà ɔ mɛ nì kánáá pū.
29“Eɖóún mú-po-ɖɔ̀ɔ̀ mɛ kpá wáká ɓó ɔ xwíníín-dyù deìn dúún ɓěɔ̀ bìì, nìí ɓɛ́ wa kéɛ mú po, hwɛ̀ ɓɛ́ wa ké wa cáná dúún po, ɓɛ́ wa ké wa kũ̀à kɔ̃ún po. 30Eɖóún dyú-gààɔ̀ nyɔ mu ɔ bɛ̃̌ǐn sèìn, ɓɛ́ ɔ ké sáa-zà-kũ̀àɔ̀ dyí ɖú, ɓɛ́ ɔ ké ɖé ní jàɖàìn-gbòɔ̀ Pá Hwɛ̀ǐn-hwɛ̀ǐnɔ̀ mú kũ̀à nyuɛɛ mɛ poɛ mú ɓó wé mɛ̀nɛ̌ìn-sɔ̃́ xwíníín ɓó ɔ kũ̀à-kɔ̃ún-po-tìɔ̀ ɓaɖa.
31“Ti ɓɛ́ m̀ ɖǎ ɓáɖáá ɓíɔ́ ɓáà Eɖóún kè ɔ dyú-gàà ɓěɔ̀ kũ̀à kɔ̃ún po jè dyíɛɛ cánáɔ̀ sáa zàìn hwɔɛɛ, m̀ mɛ ɖúɛ suaɖɛ̀ɔ̀ dyí, ɓɛ́ m̀ kéɛ ɖé pá hwɛ̀ǐn-hwɛ̀ǐn ɖò mú pĩ̀ìn. 32Ké Eɖóún kè ɔ dyú-gàà ɓěɔ̀ mɛ ɖììn suaɖɛ̀ɔ̀ bɛɖɛɛ̀ sèà ɖé tìěɔ̀ múɛɛ dyí ɓó ní jàɖàìn-gbòɔ̀ wĩín. 33Wa ɖòùn mɛ ɖi sáa-zàìn-ɖɛ̀ ɓě ɓɛ́ wa ɓáìn waà nàmàǔn ɓěɔ̀ ɖɛ kɔ̃in, ɓɛ́ wa kéà wáká kpá, ɓɛ́ wa kéà wa kũ̀à kɔ̃ún poɛ. Nyɔ kà kò ɖò mɛ ɓɔ́ ɖò ɖiɛ, sepóɛɖé ɔ hwɛ̀ mú. 34Ɔ jǔ ké suaɖɛ̀ɔ̀ mɔɔ bɛɖɛɛ̀ɔ̀ ɖò dyi goò ní, wa mɛ fɔ̃ɔ. Nyɔ ɖò mɛ ɓɔ́ɔ ɖiɛ, sepóɛɖé ɔ hwɛ̀ mú.
35“M̀ mɛ nyu ɖɛ séín ḿ cɛ̃à m̀ gbo ɓá Eɖóún kè ɔ dyú-gàà ɓěɔ̀ jè dyíɛɛ wa bũ̌. Wa kũ̀à-kɔ̃ún-po-poɔ̀ mɛ ɖú wé mɛ̀nɛ̌ìn-sɔ̃́ dyí. 36M̀ mɛ zàìn ɓìɖǐ ɓíɔ́ ɖò sáa ɓó wé séín, ɓɛ́ ɔ ké nàmàǔn ɓá sáa-kɔ̃-zàìn-gbààɔ̀ jè dyíɛɛ kɔ̃in-ɓáìn-ɖɛ̀ jǔ, ɓɛ́ gbààɔ̀ ké mú hwɛ̀. Ké m̀ mɛ púèɛ̀ cáná kɔ̃, ɓɛ́ ɔ ké wáká kpá. 37M̀ mɛ nyùìn ɖɛ dyúáɖòɔ̀ wé mɛ̀nɛ̌ìn-sɔ̃́ ɓá sáa-kɔ̃-zàìn-gbààɔ̀ dyí. Ɔ dyi ná nìǐn, nìí, gbààɔ̀ mu mú hwɛ̀ìn mìɔ, ké ɖɛ kã̀ìn séín muɛ dyi tìnììn nyɛɛ, ɖɛ gbà ɖò mu ɔ gbo kpáùn.
Wé séínɛ̀ sáa-zàìn-ɖɛ̀
(Nɔ̀ɓà 28:1-8)
38“Nyúà-ɖɛ̀ ɓě ɓɛ́ wa kéà ɓó gbààɔ̀ kɔ̃ sáa zàìn ɓó wé kè wé múɛɛ, wa kɛà kɛ̀. Wa mɛ mɔ̀ ɓáɖáá sɔ̃́ ɓɛ́ wa nyuá zɔ̃ dyúáɖò kɛ. 39Wa mɛ zàìn dyúáɖò sáa ɓó gànà-kṹún, ɓɛ́ wa kéɛ tɔ̀ɔ̀ sáa zàìn ɓó hwìo. 40Ti wa muà ɓáɖáá kĩ́ín-kĩ́ínɔ̀ sáa zàìn nyɛɛ, wa mɛ ɖú fáɖáɓà nìɛ̀-nìɛ̀ kópò-wè mɛ̀nɛ̌ìn-tã dyí, ɓɛ́ wa kéɛ ɔ́ɖè-cànà nɔ̀mɔ̀ dyíin kópò-wè hĩinyɛ caìn, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ, ké wa mɛ ɖú wã́ìn-kòpò-wè hĩinyɛ dyí, ɓɛ́ ɔ ké náá-ɖɛ̀-sàǎ-zàìn-ɖɛ̀ jǔ. 41Ti wa mu ɓáɖáá tɔ̀ɔ̀ sáa zàìn ɓó hwìoɛɛ, wa mɛ zàìn ɔ kè ɖii-ɖɛ̀-sàǎ-zàìn-ɖɛ̀ kè náá-ɖɛ̀-sàǎ-zàìn-ɖɛ̀ jĩ̀ náa sáa kà dyúáɖò kà wa nyuà nyuɛ ɓó gànà-kṹún wɛ̃. Ɖɛ nìà kɛ mu nyíí-ɖɛ̀ ɓɛ́ ɔ mɔ̀ ɖii-ɖɛ̀ kɔ̃̀ nyɔ́ dè ḿ hwìɖǐiɛɛ jǔùn. 42Waà xwíníín-dyù ɓě mu ɓó wa ɖeín dyí kɔùn wɛ̃ɛ mɛ zàìn ɓáɖáá ɓěɛ̀ sáa kánáá pū ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ muà dyéìn nyɛɛ wĩín, ɓɛ́ wa ké fɔ̃ɔ-sàǎ-zàìn-ɖɛ̀ jǔ. Ɓóɛ̀ ḿ kè mɔ̀ mu gmɔ̌ìn, ɓɛ́ ḿ ké m̀ gbo wùɖù, 43ké ɓóɛ̀ ḿ kè Éézùɖùɛ̀-dyù ɓěɔ̀ mu gmɔ̌ìn ɖekè. Ní dĩ́ín-dĩ̀ìnɔ̀ muɛ nyuùn ɓɛ́ páɔ̀ ké mú hwɛ̀. 44Ní mu jàɖàìn-gbòɔ̀ kè sáa-kɔ̃-zàìn-gbààɔ̀ wáká poùn, ké ní mu Eɖóún kè ɔ dyú-gàà ɓěɔ̀ wáká poùn ɖekè, ɓɛ́ wa ké ní sáa-zà-nyɔ̀ ɓě jǔ. 45Ɔ ɖǎ ná nìǐn, ní mu ɓó Éézùɖùɛ̀-dyù ɓěɔ̀ hwìɛ̀ cĩ́ìn, ké ní mu waà Gèɖèpɔ́ɔ̀ jǔùn. 46Ké wa muɛ dyuòùn kà mɔ̄ mɔ̀ Bounɓo mɔ̀à waà Gèɖèpɔ́ɔ̀ kɛɛ mɔ̀ nyɔ zà ma kà wa ɖé Íjè-ɓòɖòɔ̀ kɔ̃, ɓɛ́ ḿ kéà ɖé wa hwìɛ̀ cĩ́ jè kɛ̀. Mɔ̄ mɔ̀ Bounɓo mɔ̀à waà Gèɖèpɔ́ɔ̀ kɛ̀.”
Trenutno izbrano:
Ɛ́séɖɔ̀ 29: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.
Ɛ́séɖɔ̀ 29
29
Ɖɛ ɓá sáa-zà-nyɔ̀ ɓěɔ̀ wáká po jè dyíɛ
(Ɖìvéɖékɔ̀ 8:1-36)
1Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Ɖɛ ɓě m̀ mɛ nyu ɓɛ́ m̀ ké Eɖóún kè ɔ dyú-gàà ɓěɔ̀ wáká po, ɓɛ́ wa ké ní sáa-zà-nyɔ̀ ɓě jǔɛɛ, wa kɛà kɛ̀. M̀ mɛ ɖú ɓìɖǐ ɓíɔ́ gmɔ̀ ɖò kè ɓáɖáá ɓíɔ́ sɔ̃́ dyí. Wa mɛ ɓɔ́ kɛɛ ɖò ɓéɖéɛ. 2Ké m̀ mɛ ɖú fáɖáɓà nìɛ̀-nìɛ̀ dyí, ɓɛ́ m̀ kéɛ bɛɖɛɛ̀ se dyáìn-ɖɛ̀ gbo nìɛɛ dú kò-kò ɓě mú nyu. Bɛɖɛɛ̀ ɓěɔ̀ mɛ mɔ̀ bɛɖɛɛ̀-kpò kuún-kuún kè bɛɖɛɛ̀ ɓɛ́ wa caìn cánáa ɔ kè bɛɖɛɛ̀ se mú ku, ɓɛ́ wa fiè cáná bũ̌in nyɛ. 3Ké m̀ mɛ po bɛɖɛɛ̀ ɓěɔ̀ tìě dyúáɖò mú, ɓɛ́ m̀ kéɛ ḿ nyí. M̀ mɛ dyà wa kè ɓìɖǐ ɓíɔ́ɔ̀ kè ɓáɖáá ɓíɔ́ sɔ̃́ɔ̀ ɓó ḿ dyúa.
4“Ɔ ɖǎ ná nìǐn, m̀ mɛ dyà Eɖóún kè ɔ dyú-gàà ɓěɔ̀ ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ muà dyéìn nyɛɛ wĩín, ɓɛ́ wa ké bũ̌in dèɖè. 5Ké m̀ mɛ ɖú ɖɔ ɓě ɓɛ́ nyɔ mɔ̀ sáa-zà-nyɔ̀ vɛ̀nɛ̀ɔ̀ kɛɛ ké mú poɛɛ dyí, ɓɛ́ m̀ ké wa Eɖóún mú po. Kĩ́ín-kĩ́ín nyɛɛ, m̀ mɛ po ɔ gã́ùn xwã́-xwã́ɔ̀ mú, ɓɛ́ m̀ ké gã́ùn zɛinɔ̀ ɓóɛ kɔ̃in po, ɓɛ́ m̀ ké ífɔ̀ɔ̀ ɓóɛ kɔ̃in po, ɓɛ́ m̀ ké gbo-jìnììn-ɖɛ̀ ɖaɓa-ɖaɓa nɔ̀mɔ̀ dyíin nì ífɔ̀ɔ̀ wɔ̃ɛɛ sã, ɓɛ́ m̀ ké ɔ kɛ́í-jìɖǐ-ɖɛ̀ɔ̀ kɛ́ dyéɖéí jìɖǐ. 6Ɔ ɖǎ ná nìǐn, m̀ mɛ dèìn ɔ dúi-bĩìn-ɖɔ̀ ɓɛ́ wa ɖǎ páɖá kɛɛ dú, ɓɛ́ m̀ kéɛ góò-pĩ̀à ɓɛ́ ɔ tɛ̀mɛ̀ìn nyɔǔn dyí kà ɔ ɖǎ wáká kpá ɓó ḿ bììɛɛ dyúa dèìn. 7Ké m̀ mɛ ɖú dúún-po-cànàɔ̀ dyí, ɓɛ́ m̀ kéɛ ɔ dúún púè.
8“Ɔ ɖǎ ná nìǐn, m̀ mɛ dyà ɔ dyú-gàà ɓěɔ̀, ɓɛ́ m̀ ké wa gã́ùn ɓě mú po, 9ɓɛ́ m̀ ké wa gbo-jìnììn-ɖɛ̀ ɓě gbo jìnììn, hwɛ̀ ɓɛ́ m̀ ké wa dú-jìnììn-ɖɛ̀ ɓě dú jìnììn. Kǎà m̀ mɛ nyu Eɖóún kè ɔ dyú-gàà ɓěɔ̀ kũ̀à kɔ̃ún poɛ. Sáa-zà-kũ̀àɔ̀ mu waà kũ̀à jǔùn kánáá pū.
10“Ɔ ɖǎ ná nìǐn, m̀ mɛ kpa ɓìɖǐ ɓíɔ́ɔ̀ ɓó jàɖàìn-gbòɔ̀ wĩín, ɓɛ́ Eɖóún kè ɔ dyú-gàà ɓěɔ̀ kéɛ sɔ̃ dúún dè. 11Ké m̀ mɛ ɖáɓáìn ɓìɖǐ ɓíɔ́ɔ̀ ɓó ḿ dyúa ɓó jàɖàìn-gbòɔ̀ wĩín. 12Ké m̀ mɛ ɖú ɓìɖǐ ɓíɔ́ɔ̀ nyɔmɔɔ̀ ɖò dyí, ɓɛ́ m̀ kéɛ jìì mánáín ɓéɖéìn, ɓɛ́ m̀ kéɛ ɖɛ hwɔìn nimii-gmɛ̌ ɓě nìà sáa-kɔ̃-zàìn-gbààɔ̀ gã hĩinyɛɔ̀ kɔ̃ɛɛ bũ̌ po, ɓɛ́ m̀ ké nyɔmɔɔ̀ nyɔ sè ɓóɛɛ sáa-kɔ̃-zàìn-gbààɔ̀ gbɔí púè. 13Ɔ ɖǎ ná nìǐn, m̀ mɛ ɖú ɓìɖǐɔ̀ cáná séín ɓáìn mɛ́ɔ̀ bũ̌in nyɛ kèɛ̀ pìùɔ̀ dà kpa ɖɛɔ̀ kèɛ̀ pɔnɔ-mɛ́ sɔ̃́ɔ̀ kè cáná ɓáìn wa kɔ̃in nyɛɛ dyí, ɓɛ́ m̀ kéɛ ɓóɛ gbààɔ̀ kɔ̃ fɔ̃̀ìn. 14Kɛɛ m̀ mɛ fɔ̃̀ìn ɓìɖǐ ɓíɔ́ɔ̀ fɔ́ɔ̀ kèɛ̀ kúɖúùɔ̀ kèɛ̀ mɛ́ɔ̀ ɖé jàɖàìn-hwɔ̀ɖɔ̀ɔ̀ ɖeín. Ɓìɖǐ ɓíɔ́ɔ̀ mɔ̀ nàmàǔn-sàǎ-zàìn-ɖɛ̀.
15“Ɔ ɖǎ ná nìǐn, m̀ mɛ ɖú ɓáɖáá ɓíɔ́ ɓěɔ̀ ɖò dyí, ɓɛ́ Eɖóún kè ɔ dyú-gàà ɓěɔ̀ kéɛ sɔ̃ dúún dè. 16Ké m̀ mɛ ɖáɓáa, ɓɛ́ m̀ kéɛ nyɔmɔɔ̀ dyí ɖú, ɓɛ́ m̀ kéɛ sáa-kɔ̃-zàìn-gbààɔ̀ wáká séínɔ̀ bũ̌in mɛ́nɛ́ìn. 17Ké m̀ mɛ cɛ̃ìn ɓáɖáá ɓíɔ́ɔ̀ dyi, ɓɛ́ m̀ kéɛ mɛ́ ɓěɔ̀ kèɛ̀ pɔ̃́ sɔ̃́ɔ̀ wɔɔ̀, ɓɛ́ m̀ ké wa kèɛ̀ dúɔ̀ kèɛ̀ suaɖɛ̀ tɔ̀ɔ̀ ɓěɔ̀ dyí poìn. 18Ɔ ɖǎ ná nìǐn, m̀ mɛ fɔ̃̀ìn ɓáɖáá-ɓíɔ́-kù gànáɔ̀ ɓó gbààɔ̀ kɔ̃. Ɔ mɔ̀ fɔ̃ɔ-sàǎ-zàìn-ɖɛ̀ ɓó ḿ bìì. Ɔ mɔ̀ nyíí-ɖɛ̀ ɓɛ́ ɔ mɔ̀ ɖii-ɖɛ̀ kɔ̃̀ nyɔ́ dè ḿ hwìɖǐiɛ.
19“Ɔ ɖǎ ná nìǐn, m̀ mɛ ɖú ɓáɖáá ɓíɔ́ tɔ̀ɔ̀ dyí, ɓɛ́ Eɖóún kè ɔ dyú-gàà ɓěɔ̀ kéɛ sɔ̃ dúún dè ɖekè. 20Ké m̀ mɛ ɖáɓáa, ɓɛ́ m̀ kéɛ nyɔmɔɔ̀ ɖò dyí ɖú, ɓɛ́ m̀ kéɛ Eɖóún kè ɔ dyú-gàà ɓěɔ̀ ɖiaún-ɖùǔ-téé ɓěɔ̀ kè waà ɖiaùn-sɔ̃̀ɔ̀ jìì-kpòɖò ɓěɔ̀ ɔ kè waà ɖiaùn-ɓòɔ̀ ɓìɛ̀-kpòɖò ɓěɔ̀ bũ̌ po. Ɔ ɖǎ ná nìǐn, m̀ mɛ mɛ́nɛ́ìn nyɔmɔɔ̀ nyɔ sè ɓóɛɛ gbààɔ̀ wáká séínɔ̀ bũ̌in. 21Ké m̀ mɛ ɖú nyɔmɔɔ nìà ɓó gbààɔ̀ kɔ̃ɛɛ ɖò kè dúún-po-cànàɔ̀ ɖò dyí, ɓɛ́ m̀ kéɛ Eɖóún kè ɔ mú-po-ɖɔ̀ɔ̀ kè ɔ dyú-gàà ɓěɔ̀ kè wa nììn mú-po-ɖɔ̀ ɓěɔ̀ kɔ̃in mɛ́nɛ́ìn. Ɔ dyi ná nìǐn, nìí, Eɖóún kè ɔ dyú-gàà ɓěɔ̀ kè waà mú-po-ɖɔ̀ ɓěɔ̀ mu wáká kpáùn ɓó ḿ bìì.
22“Ɔ ɖǎ ná nìǐn, m̀ mɛ ɖú ɓáɖáá ɓíɔ́ɔ̀ cáná séín nìɛ̀ múɛɛ dyí, ɓɛ́ ɔ ké nyɔ-kũ̀à-kɔ̃ún-po-sàǎ-zàìn-ɖɛ̀ jǔ. Cáná-dà ɓěɔ̀ mɔ̀ ɔ vɔ̃-gbòò nì cánáúnɔ̀ kè cáná séín ɓáìn ɔ mɛ́ɔ̀ bũ̌in nyɛ kèɛ̀ pìùɔ̀ dà kpa ɖɛɔ̀ kèɛ̀ pɔnɔ-mɛ́ sɔ̃́ɔ̀ kè cáná ɓáìn wa kɔ̃in nyɛ kèɛ̀ ɖiaún-pɔ̃̀ɔ̀. 23Ké m̀ mɛ zà bɛɖɛɛ̀-kpò ɖò-ɖò ɖé tìě kɔ̃̀ mú ɓɛ́ bɛɖɛɛ̀ se dyáìn-ɖɛ̀ gbo nìɛɛ dú kò-kò ɓěɔ̀ nìà kɛ. Ɔ mɔ̀ bɛɖɛɛ̀ ɓɛ́ m̀ poà wáká ɓó ḿ bììɛ. Bɛɖɛɛ̀ ɓěɔ̀ mɛ mɔ̀ bɛɖɛɛ̀-kpò kuún-kuún ɖò kè bɛɖɛɛ̀-kpò ɓɛ́ wa nyùìn kà cáná kɛɛ ɖò ɔ kè bɛɖɛɛ̀-kpò se mú kuɛɛ ɖò. 24Ké m̀ mɛ nyí ɖɛ séín ɓěɛ̀ Eɖóún kè ɔ dyú-gàà ɓěɔ̀ xwa, ɓɛ́ wa ké wa dyi vũà, ɓɛ́ wa ké dyi-vũà-nyìǐ-ɖɛ̀ jǔ ɓó ḿ bìì. 25Ɔ ɖǎ ná nìǐn, m̀ mɛ zàà wa xwa, ɓɛ́ m̀ kéɛ gbààɔ̀ kɔ̃ fɔ̃̀ìn ɓó fɔ̃ɔ-sàǎ-zàìn-ɖɛ̀ɔ̀ kɔ̃in, ɓɛ́ ɔ ké ɖii-ɖɛ̀-nyìǐ-ɖɛ̀ kɔ̃̀ nyɔ́ dè ḿ hwìɖǐiɛɛ jǔ.
26“Ɔ ɖǎ ná nìǐn, m̀ mɛ zà ɓó ɓáɖáá ɓíɔ́ ɓáà Eɖóún kè ɔ dyú-gàà ɓěɔ̀ kũ̀à kɔ̃ún po jè dyíɛɛ kɛ́ɔ̀, ɓɛ́ m̀ kéɛ dyi vũà, ɓɛ́ ɔ ké dyi-vũà-nyìǐ-ɖɛ̀ jǔ ɓó ḿ bìì. Ɔ ɖǎ ná nìǐn, ɔ mɔ̀ǎ nììn.
27“Ti séín wa mu sáa-zà-nyɔ̀ ɖò kũ̀à kɔ̃ún poùn wɛ̃ɛ, nìí, ɓáɖáá ɓíɔ́ɔ̀ kɛ́ kèɛ̀ ɖiaún-pɔ̃̀ ɓɛ́ sáa-zà-nyɔ̀ɔ̀ muà dyi vũàùn wɛ̃ɛ ɓéɖé wa ké wáká kpá ɓó ḿ bìì, ɓɛ́ wa ké sáa-zà-nyɔ̀ ɓěɔ̀ kɔ̃̀ɔ̀-ɖɛ̀ jǔ. 28Kà dyúáɖòɔ̀ kǎà Éézùɖùɛ̀-dyù ɓěɔ̀ mɛ nyuɛ ɓá gbo-kpɔ̃ìn-sàǎ-zàìn-ɖɛ̀ ɓěɔ̀ jè dyí. Wa mɛ nyí ḿ gbo-kpɔ̃ìn-sàǎ-zàìn-ɖɛ̀ ɓěɔ̀ kɛ́ ɓěɔ̀ kèɛ̀ ɖiaún-pɔ̃̀ ɓěɔ̀, ɓɛ́ wa ké sáa-zà-nyɔ̀ ɓěɔ̀ nììn jǔ. Kǎà ɔ mɛ nì kánáá pū.
29“Eɖóún mú-po-ɖɔ̀ɔ̀ mɛ kpá wáká ɓó ɔ xwíníín-dyù deìn dúún ɓěɔ̀ bìì, nìí ɓɛ́ wa kéɛ mú po, hwɛ̀ ɓɛ́ wa ké wa cáná dúún po, ɓɛ́ wa ké wa kũ̀à kɔ̃ún po. 30Eɖóún dyú-gààɔ̀ nyɔ mu ɔ bɛ̃̌ǐn sèìn, ɓɛ́ ɔ ké sáa-zà-kũ̀àɔ̀ dyí ɖú, ɓɛ́ ɔ ké ɖé ní jàɖàìn-gbòɔ̀ Pá Hwɛ̀ǐn-hwɛ̀ǐnɔ̀ mú kũ̀à nyuɛɛ mɛ poɛ mú ɓó wé mɛ̀nɛ̌ìn-sɔ̃́ xwíníín ɓó ɔ kũ̀à-kɔ̃ún-po-tìɔ̀ ɓaɖa.
31“Ti ɓɛ́ m̀ ɖǎ ɓáɖáá ɓíɔ́ ɓáà Eɖóún kè ɔ dyú-gàà ɓěɔ̀ kũ̀à kɔ̃ún po jè dyíɛɛ cánáɔ̀ sáa zàìn hwɔɛɛ, m̀ mɛ ɖúɛ suaɖɛ̀ɔ̀ dyí, ɓɛ́ m̀ kéɛ ɖé pá hwɛ̀ǐn-hwɛ̀ǐn ɖò mú pĩ̀ìn. 32Ké Eɖóún kè ɔ dyú-gàà ɓěɔ̀ mɛ ɖììn suaɖɛ̀ɔ̀ bɛɖɛɛ̀ sèà ɖé tìěɔ̀ múɛɛ dyí ɓó ní jàɖàìn-gbòɔ̀ wĩín. 33Wa ɖòùn mɛ ɖi sáa-zàìn-ɖɛ̀ ɓě ɓɛ́ wa ɓáìn waà nàmàǔn ɓěɔ̀ ɖɛ kɔ̃in, ɓɛ́ wa kéà wáká kpá, ɓɛ́ wa kéà wa kũ̀à kɔ̃ún poɛ. Nyɔ kà kò ɖò mɛ ɓɔ́ ɖò ɖiɛ, sepóɛɖé ɔ hwɛ̀ mú. 34Ɔ jǔ ké suaɖɛ̀ɔ̀ mɔɔ bɛɖɛɛ̀ɔ̀ ɖò dyi goò ní, wa mɛ fɔ̃ɔ. Nyɔ ɖò mɛ ɓɔ́ɔ ɖiɛ, sepóɛɖé ɔ hwɛ̀ mú.
35“M̀ mɛ nyu ɖɛ séín ḿ cɛ̃à m̀ gbo ɓá Eɖóún kè ɔ dyú-gàà ɓěɔ̀ jè dyíɛɛ wa bũ̌. Wa kũ̀à-kɔ̃ún-po-poɔ̀ mɛ ɖú wé mɛ̀nɛ̌ìn-sɔ̃́ dyí. 36M̀ mɛ zàìn ɓìɖǐ ɓíɔ́ ɖò sáa ɓó wé séín, ɓɛ́ ɔ ké nàmàǔn ɓá sáa-kɔ̃-zàìn-gbààɔ̀ jè dyíɛɛ kɔ̃in-ɓáìn-ɖɛ̀ jǔ, ɓɛ́ gbààɔ̀ ké mú hwɛ̀. Ké m̀ mɛ púèɛ̀ cáná kɔ̃, ɓɛ́ ɔ ké wáká kpá. 37M̀ mɛ nyùìn ɖɛ dyúáɖòɔ̀ wé mɛ̀nɛ̌ìn-sɔ̃́ ɓá sáa-kɔ̃-zàìn-gbààɔ̀ dyí. Ɔ dyi ná nìǐn, nìí, gbààɔ̀ mu mú hwɛ̀ìn mìɔ, ké ɖɛ kã̀ìn séín muɛ dyi tìnììn nyɛɛ, ɖɛ gbà ɖò mu ɔ gbo kpáùn.
Wé séínɛ̀ sáa-zàìn-ɖɛ̀
(Nɔ̀ɓà 28:1-8)
38“Nyúà-ɖɛ̀ ɓě ɓɛ́ wa kéà ɓó gbààɔ̀ kɔ̃ sáa zàìn ɓó wé kè wé múɛɛ, wa kɛà kɛ̀. Wa mɛ mɔ̀ ɓáɖáá sɔ̃́ ɓɛ́ wa nyuá zɔ̃ dyúáɖò kɛ. 39Wa mɛ zàìn dyúáɖò sáa ɓó gànà-kṹún, ɓɛ́ wa kéɛ tɔ̀ɔ̀ sáa zàìn ɓó hwìo. 40Ti wa muà ɓáɖáá kĩ́ín-kĩ́ínɔ̀ sáa zàìn nyɛɛ, wa mɛ ɖú fáɖáɓà nìɛ̀-nìɛ̀ kópò-wè mɛ̀nɛ̌ìn-tã dyí, ɓɛ́ wa kéɛ ɔ́ɖè-cànà nɔ̀mɔ̀ dyíin kópò-wè hĩinyɛ caìn, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ, ké wa mɛ ɖú wã́ìn-kòpò-wè hĩinyɛ dyí, ɓɛ́ ɔ ké náá-ɖɛ̀-sàǎ-zàìn-ɖɛ̀ jǔ. 41Ti wa mu ɓáɖáá tɔ̀ɔ̀ sáa zàìn ɓó hwìoɛɛ, wa mɛ zàìn ɔ kè ɖii-ɖɛ̀-sàǎ-zàìn-ɖɛ̀ kè náá-ɖɛ̀-sàǎ-zàìn-ɖɛ̀ jĩ̀ náa sáa kà dyúáɖò kà wa nyuà nyuɛ ɓó gànà-kṹún wɛ̃. Ɖɛ nìà kɛ mu nyíí-ɖɛ̀ ɓɛ́ ɔ mɔ̀ ɖii-ɖɛ̀ kɔ̃̀ nyɔ́ dè ḿ hwìɖǐiɛɛ jǔùn. 42Waà xwíníín-dyù ɓě mu ɓó wa ɖeín dyí kɔùn wɛ̃ɛ mɛ zàìn ɓáɖáá ɓěɛ̀ sáa kánáá pū ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ muà dyéìn nyɛɛ wĩín, ɓɛ́ wa ké fɔ̃ɔ-sàǎ-zàìn-ɖɛ̀ jǔ. Ɓóɛ̀ ḿ kè mɔ̀ mu gmɔ̌ìn, ɓɛ́ ḿ ké m̀ gbo wùɖù, 43ké ɓóɛ̀ ḿ kè Éézùɖùɛ̀-dyù ɓěɔ̀ mu gmɔ̌ìn ɖekè. Ní dĩ́ín-dĩ̀ìnɔ̀ muɛ nyuùn ɓɛ́ páɔ̀ ké mú hwɛ̀. 44Ní mu jàɖàìn-gbòɔ̀ kè sáa-kɔ̃-zàìn-gbààɔ̀ wáká poùn, ké ní mu Eɖóún kè ɔ dyú-gàà ɓěɔ̀ wáká poùn ɖekè, ɓɛ́ wa ké ní sáa-zà-nyɔ̀ ɓě jǔ. 45Ɔ ɖǎ ná nìǐn, ní mu ɓó Éézùɖùɛ̀-dyù ɓěɔ̀ hwìɛ̀ cĩ́ìn, ké ní mu waà Gèɖèpɔ́ɔ̀ jǔùn. 46Ké wa muɛ dyuòùn kà mɔ̄ mɔ̀ Bounɓo mɔ̀à waà Gèɖèpɔ́ɔ̀ kɛɛ mɔ̀ nyɔ zà ma kà wa ɖé Íjè-ɓòɖòɔ̀ kɔ̃, ɓɛ́ ḿ kéà ɖé wa hwìɛ̀ cĩ́ jè kɛ̀. Mɔ̄ mɔ̀ Bounɓo mɔ̀à waà Gèɖèpɔ́ɔ̀ kɛ̀.”
Trenutno izbrano:
:
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.