Ɛ́séɖɔ̀ 24
24
Éézùɖùɛ̀-nyɔ̀ ɓěɔ̀ kpɔ̃ wuɖu wa kè Gèɖèpɔ́ɔ̀ dèɛɛ dyi
1Ti ɓɛ́ Bounɓoɔ̀ ɖǎ ma gma ɓěɛ̀ tòɛ̀ hwɔɛɛ, ɔ cɛ̃ɛ ma Mózè gbo, ké ɔ ɖá, “M̀ kè Eɖóún kè Náɖà kè Àbíhùɛ̀ ɔ kè Éézùɖùɛ̀-dyù ɓěɔ̀ nyɔ vɛ̀nɛ̀ kpáɖá-nyɔ tã ɓaɖa-bùè mɛ dyi nɔ̄ ḿ gbo, nɔ̄ toɖoɛ̀ dya. Kɛɛ wa mɛ sèìn ɖé nya vɛ̃in, ɓɛ́ wa ké ḿ ɓiè. 2M̀ ɖòùn mɔ̀ nyɔ mɛ xwɛ̃́ìn ḿ bũ̌in. Wa mɛ ɓɔ́ ḿ bũ̌in xwɛ̃́ìn, ké Éézùɖùɛ̀-dyù tɔ̀ɔ̀ ɓěɔ̀ mɛ ɓɔ́ toɖoɔ̀ dyáa.”
3Ti ɓɛ́ Mózè sɔ̀ ma ɖé toɖoɔ̀ dyaa, ɔ nyìnììn ma Bounɓoɔ̀ wuɖuɔ̀ kè ɔ gma ɓěɔ̀ nyɔ ɓěɔ̀ dyí, ké nyɔ séín ɓěɔ̀ ɖú ma wuɖu dyí, ké wa ɖá, “Ɖɛ séín ɓɛ́ Bounɓoɔ̀ cɛ̃à kɛɛ, à muɛ nyuùn.” 4Ké Mózè céè ma ɖɛ séín ɓɛ́ Bounɓoɔ̀ cɛ̃ ma kà kɛɛ ɓíɖíi.
Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Mózè sɔ̀ ma dyí, ké ɔ po ma sáa-kɔ̃-zàìn-gbàà ɖò ɓó toɖoɔ̀ dyéɖé zɔ̃̌, ké ɔ nyànàìn ma sɔ́ɔ́-kpò ɓaɖa-bùè sè sɔ̃́ dyi, ɓɛ́ wa ké nyɔ-ɖɛ-hwìɖǐi-dyàìn-ɖɛ̀ ɓě jǔ. Sɔ́ɔ́-kpò ɓěɔ̀ nyànà ma dyi ɓó Éézùɖùɛ̀-xwèɖè-dù ɓaɖa-bùè sè sɔ̃́ ɓěɔ̀ bìì. 5Ké ɔ ɖoɓo ma Éézùɖùɛ-gàà-dyù gmɔ̀ ɖíɛ́ ɓě, ké wa nyu ma fɔ̃ɔ-sàǎ-zàìn-ɖɛ̀ ɓě, ké wa zàìn ma ɓìɖǐ ɓíɔ́ gmɔ̀ ɓě sáa, ɓɛ́ wa ké gbo-kpɔ̃ìn-sàǎ-zàìn-ɖɛ̀ ɓě jǔ ɓó Éézùɖùɛ̀-nyɔ̀ ɓěɔ̀ kè Bounɓoɔ̀ pṹa. 6Ké Mózè ɖú ma nyúà-ɖɛ̀-nyɔ̀mɔ̀ɔ̀ dyí, ké ɔ geɛ ma dú ɓɛ́ìn wɔ̃ sɔ̃́ mú. Ɔ ɖú ma dú dyúáɖò dyí, ké ɔ poɛ ma ɖɛ-fùù mú. Ké ɔ mɛ́nɛ́ìn nyɔmɔɔ̀ tɔɔ sè ɓóɛɛ sáa-kɔ̃-zàìn-gbààɔ̀ bũ̌in. 7Hwɛ̀ ké ɔ ɖú ma céè-ɖɛ̀ kɔ̃̀ mú dèè-wùɖù nìà ɓó wa kè Bounɓoɔ̀ pṹa kɛɛ céèà kɛɛ dyí, ké ɔ zàà ma wuɖuún ɖé nyɔ ɓěɔ̀ gbo. Ké nyɔ ɓěɔ̀ zà ma ɖé wuɖu, ké wa ɖá, “À mu Bounɓoɔ̀ wuɖu nyuùn. À mu ɖɛ séín ɓɛ́ ɔ ɖǎà cɛ̃ kɛɛ nyuùn.”
8Ké Mózè ɖú ma nyɔmɔɔ nì ma kà ɖé ɖɛ-fùùɔ̀ múɛɛ ɖò dyí, ké ɔ mɛ́nɛ́ìn ma nyɔ ɓěɔ̀ kɔ̃in, ké ɔ ɖá, “Nyɔmɔɔ nìà kɛ mɔ̀ dèè-wùɖùɔ̀ zàse. Ɔ mɔ̀ wuɖu ɓɛ́ ɓě kè Bounɓoɔ̀ ɖǎ ma dè dyììn ɖé gma séín ɓěɛ̀ múɛɛ zàse.”
9Sɔ̀ìn ɓóɛ gboɛɛ, Mózè kè Eɖóún kè Náɖà kè Àbíhùɛ̀ ɔ kè Éézùɖùɛ̀-nyɔ̀ ɓěɔ̀ nyɔ vɛ̀nɛ̀ kpáɖá-nyɔ tã ɓaɖa-bùè ɓěɔ̀ mu ma ɖé toɖoɔ̀ dya, 10ké wa dyé ma Éézùɖùɛ̀ Gèɖèpɔ́ɔ̀. Ɔ ɓo xwíɖíiɔ̀ fã ma pū kà nyɔ sàmàìn má kà sááfɔ̀-sɔ̀ɔ̌ dà ɖò dyiɛ. Ɔ fã kà dyɔɔ̀ kpá kɔ̃ nìà kɛ. 11Ti ɓɛ́ Éézùɖùɛ̀-nyɔ̀ ɓěɔ̀ nyɔ vɛ̀nɛ̀ ɓěɔ̀ dyé ma Gèɖèpɔ́ɔ̀ kɛɛ, ɔ se ma wa ɖáɓá. Wa dyé ma Gèɖèpɔ́ɔ̀, ké wa ɖi ma ɖɛ, ké wa ná ma ní.
12Ti ɓɛ́ wa ɖǎ ɖɛ ɖiɛ hwɔɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Dyi nɔ̄ ḿ gbo nɔ̄ toɖoɛ̀ dúún, ɓɛ́ m̀ ké nɔ̄ nì. Ké ní mu m̀ sɔ́ɔ́-pĩ̀à ɓě kɔ̃̀ kɔ̃ gma ɓě ɓɛ́ ḿ ɖǎà céè, ɓɛ́ m̀ kéà nyɔ ɓěɔ̀ tɛ̀mɛ̀ìn nyɛɛ nìà kɛɛ m̀ nyíìn.” 13Hwɛ̀ ké Mózè kè Jasúé ɓɛ́ ɔ mɔ̀ ma ɔ sɔ̃-xwíɖíi-dè-nyɔ̀ kɛɛ sɔ̀ ma dyí, ké wa dè ma Gèɖèpɔ́ɔ̀ toɖoɔ̀ dú-hwìɛ̀ dyáa gbɔ. 14Kɛɛ Mózè cɛ̃ɛ ma Éézùɖùɛ̀-nyɔ̀ vɛ̀nɛ̀ ɓěɔ̀ gbo, ké ɔ ɖá, “Ɓě fòìn dà à, ɓɛ́ à ké ɓě gbo ɖe dyi hwɛ̀. Eɖóún kè Húɔ̀ sè dà ɓě gbo. Nyɔ ɖò dyi zaa ɖò ɓéɖé ní, ɔ mɛ kpaa wa gbo.”
15Ti ɓɛ́ Mózè mu ma ɖé Sányà-tòɖòɔ̀ dú-hwìɛ̀ kɛɛ, púɛɛ, ní-kpòɔ̀ ɓáìn ma toɖoɔ̀ kɔ̃in. 16-17Ké Bounɓoɔ̀ dĩ́ín-dĩ̀ìnɔ̀ dèìn ma ɖé toɖoɔ̀ dya dyi. Ɔ nì ma ɖé Éézùɖùɛ̀-nyɔ̀ ɓěɔ̀ dyéɖéín pū kà nyɛ nìà kɛɛ ɖé toɖoɔ̀ dya. Ní-kpòɔ̀ dè ma ɖé toɖoɔ̀ dú-hwìɛ̀ ɓó wé mɛ̀nɛ̌ìn-ɖò xwíníín, ké ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, Bounɓoɔ̀ ɖá ma Mózè sɔ̀ìn ɖé ní-kpòɔ̀ mú. 18Ké Mózè gã̀ ma toɖoɔ̀ dyáuń dyi tee, ké ɔ pa ma ɖé ní-kpòɔ̀ mú. Ké ɔ nyu ma ɖé toɖoɔ̀ dya dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́.
Trenutno izbrano:
Ɛ́séɖɔ̀ 24: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.